23/01/2020
بوست مجمع للتعزيز التفاضلي
أولاً ☝️ التعزيز التفاضلي للسلوك البديل (DRA)
وهو إختصار لDifferential Reinforcement of Alternative Behavior
بنعمل ايه في الإجراء ده ؟
بنعزز سلوك وبنوقف تعزيز علي سلوك تاني ( بنعمله إطفاء) بالنسبة للسلوك اللي بنوقف تعزيز عليه هو السلوك السلبي أو المشكل وبنعزز سلوك تاني بديل ( يكون مناسب إجتماعياً) بنفس المعزز ... يعني ايه 🤔
تعالوا ناخد مثال علشان الأمور توضح 💁♂️
لو الطفل بيصرخ لمه يكون عايز حاجة معينة لعبة مثلاً مش هنديله اللعبة لمه يصرخ يبقي كده وقفنا التعزيز علي السلوك ده ( هنعمل ليه إطفاء🚫) وبنديله اللعبة في حالة انه يطلب بشكل مقبول سواء بكلمة أو إشارة أو صورة ( هنا أنا عززت سلوك بديل مناسب بنفس المعزز اللي الطفل كان عايزه )
ناخد بالنا من حاجة مهمة وهي إني لازم قبل ماحدد السلوك البديل لازم أكون عارف ايه اللي بيعزز السلوك السلبي أو اللي أنا عايز أستبدله بمعني تاني لازم أشوف الطفل بيعمل السلوك ده علشان ايه بالزبط ( وظيفة السلوك)وهنا أحنا هنتكلم ان السلوك ممكن يكون بيحصل لحاجة من دول 👇
1️⃣ لو وظيفة السلوك الحصول علي الإنتباه :
مثال :الطفل بيصرخ لمه بكون بتكلم مع حد علشان أنتبهله ...
التدخل ⬅️ لازم أوقف تعزيز السلوك ده وهو انتباهي ليه بأي شكل من الأشكال حتي ولو بتوبيخه لأن ده برده انتباه وهيعزز السلوك ويخليه يزيد
ولا زم أدخل سلوك بديل 🔁 وأعززه زي إني انتبهله بس لمه ينده عليا أو يلفت انتباهي بشكل مقبول من غير صراخ
2️⃣ لو وظيفة السلوك الحصول علي شيئ مادي ( لعبة أو طعام ..الخ) :
مثال لو الطفل بيضرب أخوه علشان ياخد اللعبة
التدخل ⬅️ مش هديهله اللعبة لو ضرب أخوه وهيكون السلوك البديل🔁 انه هياخدها بس لو طلب من أخوه اللعبة بشكل مقبول
3️⃣ لو وظيفة السلوك الهروب من مهمة أو نشاط :
مثال : الطفل بيرمي الأدوات علشان مش عايز يكمل النشاط ,
التدخل ⬅️هنا لازم ماديلوش فرصة الهروب ولازم يكمل النشاط وهيكون السلوك البديل 🔁اني أديله راحة لمدة معينة بعد ما يكمل النشاط
4️⃣ لو السلوك وظيفته تعزيز الي : ( هنا الطفل بيتعزز من السلوك نفسه مافيش معزز خارجي علشان أوقفه )
مثال : الطفل بيهز الجزع
التدخل ⬅️ ادخل سلوك بديل مناسب يشبع نفس الحاجة دي زي انه يقعد علي حصان هزاز 🔁
في الفيديو ده هنشوف إزاي بيتم إطفاء سلوك انه الطفل يصرخ أو يزق إيد المعلمة أو حتي يحاول يخطف الحاجة بإنها مش هتديله اللي هو عايزه ( هتعمل إطفاء للسلوك) واستبدلته بسلوك انه هياخد الحاجة بس لمه يطلب بشكل مقبول
وده رابط الفيديو
[https://www.youtube.com/watch?v=FOQLUaNFvAQ&feature=share](https://www.youtube.com/watch?v=FOQLUaNFvAQ&feature=share)
( الجزء الثاني )
التعزيز التفاضلي للسلوك المتنافر أو الغير متوافق
Differential Reinforcement of Incompatible Behavior(DRI)
يعني ايه متنافر أو غير متوافق ؟
يعني السلوك اللي هيتم تعزيزه والسلوك اللي هيتم اطفاؤه الاتنين مختلفين في الشكل يعني من الناحية الجسدية ماينفعش الإستجابتين يحصلوا في وقت واحد..يعني ايه الكلام ده ؟ 🤔
ناخد مثال يوضح 👇
لو الطفل بيطلع أصوات تكرارية هخليه ينفخ بابلز وأعززه علي ده
لو بصينا علي سلوك اصدار الأصوات التكرارية مستحيل يحصل طول ما الطفل بينفخ بابلز وده كده سلوك متنافر
📣 طيب ناخد بالنا من حاجة مهمة وبتلخبطنا أحياناً
ال DRA وال DRI الاتنين يقدموا سلوك تاني ودي نقطة التشابه بينهم بس واحد بيقدم سلوك بديل ممكن يأدي نفس وظيفة السلوك والتاني بيقدم سلوك متنافر مش بيأدي نفس وظيفة السلوك اللي أنا عايز أقلله وعشان نفهم أكتر هناخد مثال للمقارنة 👇👇ا
هعزز الطفل لمه ينط علي النطاطة بدل النط علي الأثاث ده كده سلوك بديل DRA بيأدي نفس الحاجة اللي كان بيأديها السلوك السلبي
وهعزز الطفل لمه يربع ايده بدل انه يضرب زميله ده كده سلوك متنافر DRI لانه مش هيأدي نفس الوظيفة أو يشبع نفس الحاجة
الجدول ده فيه أمثلة لسلوكيات بديلة ومتنافرة للسلوكيات اللي بتحصل خلال اليوم الدراسي
( الجزء الثالث )
التعزيز التفاصلي للسلوكيات الأخري
Differential Reinforcement of Other Behaviors (DRO)
يعني ايه تعزيز تفاضلي للسلوكيات الأخري ؟
هو نوع من التعزيز بعزز فيه غياب أو عدم حدوث السلوك خلال فترة زمنية محددة وبيتقال عليه كمان (Zero Behavior) وهنا أنا بعزز الطفل عن عدم حدوث السلوك خلال المدة المحددة دي حتي لو حصل أي سلوك تاني
ناخد مثال علشان الأمور توضح 👇
لو أنا بشتغل علي سلوك ضرب الأصدقاء مثلاً والمدة اللي حددتها 30 ثانية يبقي أنا هعزز الطفل علي انه مش هيضرب حد من أصحابه خلال ال30 ثانية دي حتي لو عمل سلوك تاني زي انه يشتم مثلاً أو يرمي الأدوات وبعدين بنزود المدة بالتدريج لدقيقة وبعدين دقيقتين وهكذا
إزاي بنطبقه ومع أي سلوكيات ؟
يفضل إستخدامه مع سلوكيات إيذاء الذات أو الأخرين أو تدمير الممتلكات وغيرها من السلوكيات العدوانية أو الخطيرة
قبل ما نطبق ال DRO لازم نحدد حاجات مهمة
1- تحديد معدل حدوث السلوك اللي هيتم التدخل لعلاجه ( يعني مثلاً بيحصل كام مرة في ال10 دقائق )
2- تحديد المعزز اللي هديهله لما مايعملش السلوك خلال المدة اللي هحددها
3- تحديد المدة الزمنية بتاعت التدخل بتاعي ويفضل زي ماقولنا في البداية تكون مدة قصيرة وبعدين أزودها بالتدريج
🚫 أخيراً فيه مشكلة هتواجهني وهي إني خلال المدة الزمنية بتاعة التدخل أنا هعزز غياب سلوك ما ولنفترض زي ماقولنا في المثال بتاعنا ضرب أصحابه ولكن ممكن يحصل إني عززت سلوك تاني من غير ما أقصد زي انه يشتم وبكده وارد ان سلوك الشتيمة ده يزيد
طيب ايه الحل للمشكلة دي ❓
أولاً هخلي الفترة الزمنية قصيرة قدر الإمكان
ثانياً هعزز غياب السلوكين مع بعض علشان أضمن ان الأتنين يقل معدل حدوثهم مش واحد يقل والتاني يزيد ( يعني هعزز غياب سلوك الضرب والشتيمة)
