16/08/2026
كنت واقف مع صاحب سنتر دروس بندردش سوا قبل ما أدخل الحصة ، ففيه ولد دخل علينا و سلم صاحب السنتر ظرف صغير وقاله المصاريف أهي يا مستر 🤝 المستر شكره وقاله يلا ادخل على فصلك ♥️
المهم المستر فك الظرف وفتحه وطلع الفلوس فببص لقيت كام خمساية فيه ميكملوش 30 أو 40 جنيه 😳 فضحكت وقلتله الولا بيغفلك ؟ 😂 حاططلك تلاتين أربعين جنيه خمسات عشان تفكر إنهم كتير؟ 😂
المستر ضحك وقالي : " دي أحلى تغفيلة في حياتي ، بس الصراحة أنا و أمه اللي مغفلينه ، عشان أمه أرملة وحالتهم وحشة والولد نفسه عزيزة جدا مش قابل فكرة إنه ييجي الدرس ببلاش وميدفعش زيه زي أصحابه فأنا متفق أنا و أمه إنها تبعت الظرف ده كل شهر وفيه خمسات بحيث إن إبنها يفكر إنهم كتير وإن دي المصاريف "
قلتله إيه الجمال ده 💟 ما تخليني أشارك معاك كل شهر في مصاريف الواد ده 🤔♥️
قالي :" ولا جنيه واحد ، أصلا انت هتاخد 10 جنيه من الفلوس دي دلوقتي ولما تدخل الحصة اسأله سؤال ولو جاوب اديهاله ، وبعمل كده مع كل مدرس 🤍 الفلوس اللي أمه بتبعتها ، الولد بياخدها تاني فكة بقا " ❤️
عارفين الإحسان في العطاء ؟ شوفتوه قبل كده ؟ هو ده بقا 🥹👌🥰😍
منقولة عجبتني جدا.
