د خالد الشرنوبي أخصائي القلب

في يومٍ من الأيام زارتني في العيادة فتاة صغيرة تبلغ من العمر خمس سنوات، برفقة أمّها الطيبة التي كان يبدو عليها الاهتمام الشديد بابنتها والحرص على صحتها.

جلست الأم وعلى وجهها علامات القلق، وقالت بصوتٍ يحمل خوفًا واضحًا:

“يا دكتور… قلبي مش مطمّن. بحس إن قلب بنتي بيدق بسرعة، ومجرد ما تبذل مجهود بسيط بتتعب وبتنهج… هي بتتعالج من تأخر ذهني، وباخدها جلسات تخاطب وفي تحسن الحمد لله، بس أنا خايفة يكون في حاجة في القلب.”

استمعت لها باهتمام، ثم بدأت بفحص قلب الفتاة بالسماعة. وبعدها قررت عمل أشعة إيكو على القلب للاطمئنان أكثر.

مع بداية الفحص لفت نظري وجود اتساع واضح في البطين الأيمن، لدرجة أنه يدفع الحاجز بين البطينين ناحية اليسار… وفي هذا العمر غالبًا وراءه عيب خلقي.

تابعت الفحص بدقة… كفاءة القلب كانت جيدة، والصمامات الأساسية سليمة، مع وجود ارتجاع بسيط فقط في الصمام الثلاثي الشرفات. انتقلت بعدها لرؤية الحاجز بين الأذينين، حيث توقعت المشكلة.

وبالفعل… ظهر ثقب كبير بين الأذين الأيمن والأيسر (ASD).
هذا الثقب يسمح بمرور الدم من الأذين الأيسر إلى الأيمن، مما يؤدي إلى تمدد الجانب الأيمن من القلب.(صورة توضيحية بأول تعليق)

طبعت صور الإيكو، وجلست على مكتبي، والأم تنظر إليّ بعين ممتلئة بالخوف والترقّب. كان عليّ اختيار الكلمات بحرص شديد.

قلت لها بهدوء:

“خير إن شاء الله… المشكلة بسيطة ولها حل. الحمد لله إننا اكتشفناها مبكرًا قبل حدوث مضاعفات، ولسه كفاءة البطين الأيمن جيدة. الثقب يمكن إغلاقه إن شاء الله، إما بالقسطرة أو بالجراحة حسب حجمه.”

شرحت لها طبيعة الثقب، وكيف تسبب في اتساع القلب، وطلبت عمل إيكو بالمنظار لتحديد طريقة العلاج الأنسب.

تلقت الأم التشخيص بالصبر والإحتساب - وهو شيء لو تعلمون عظيم.

“طيب… أعمل إيه دلوقتي يا دكتور؟”

رتبت لها الفحص، ولم تتأخر لحظة.
أظهر المنظار أن الثقب كبير، ولا يمكن إغلاقه بالقسطرة… وبالتالي تحتاج الطفلة إلى غلق جراحي.

تقبلت الأم الأمر برضا وإيمان عجيب، وبدأت فورًا في إنهاء إجراءات العملية. رتبت لها مع أحد الزملاء جراحي القلب وبفضل الله تم إجراء العملية ونجحت نجاحاً باهراً.
ثم زارتني منذ مدة قصيرة و عملت لها إيكو وكنت في غاية السعادة من النتائج بفضل الله: أغلق الثقب تماما وعاد القلب إلى طبيعته وحجمه الطبيعي. قلت لها الحمد لله الآن أصبح قلب ابنتك طبيعي جدا مثل أي طفل آخر والحمد لله رب العالمين.
ربنا تقبل منا ووفقنا وسدد خطانا واجعلنا سببا في شفاء كل مريض نلقاه
د/ خالد الشرنوبي
01060195739
القلب هو الملك ❤️

العلم بحر لا شواطئ له....
فكان ولابد من التخصص الدقيق...
فبعد الحصول على دبلومة أمراض الباطنة ، اليوم يناقش دكتور عمر الشرنوبي رسالة الماجستير في أمراض الكلى وموضوع هام في مرضى الغسيل الكلوي المزمن.
ألف مبروك للدكتور عمر الشرنوبي اخصائي الباطنة والكلى.
بالتوفيق دائما 🥰
جعلكم الله سببا في شفاء المرضى وتخفيف معاناتهم وتقبل منك جهدكم و سعيكم وعقبال الدكتوراه إن شاء الله 🌹

في يوم من الأيام، كنت جالسًا في العيادة أقوم بالكشف على المرضى وعمل إيكو على القلب، تم إبلاغي بأن هناك حالة محجوزة بالقسم الداخلي تحتاج لعمل إيكو، لكنها لا تستطيع النزول إلى العيادة لأن حالتها غير مستقرة وتعاني من انخفاض بنسبة الأكسجين في الدم.

قمنا على الفور بنقل جهاز الإيكو والصعود إلى غرفة المريضة، حيث وجدت امرأة قد جاوزت الستين من عمرها، تميل إلى الأمام قليلًا وتلتقط أنفاسها بصعوبة، ولا تستطيع الاستلقاء على ظهرها، تشعر باختناق شديد إن حاولت ذلك.

تصفحت ملفها على عجل وذهني مليء بالأفكار، بينما كانت الممرضة تقوم بتشغيل الجهاز. وما إن وضعت البروب على صدر المريضة، حتى كانت المفاجأة:

القلب يسبح داخل كمية هائلة من السوائل تحيط به من كل جانب وتمنعه من العمل بشكل طبيعي، رغم أن كفاءة عضلة القلب والصمامات كانت جيدة.

إذن… ارتشاح شديد حول القلب هو سبب كل هذا العناء، ويجب التدخل فورًا.

تأكدت ظنوني وكتبت التقرير على عجل، وأبلغت الطبيب المسؤول بضرورة نقل المريضة إلى العناية فورًا لسحب السائل، فالوقت لا يسمح بأي تأخير.

وبالفعل تم نقلها إلى العناية على الفور، وتم تحضير الأدوات والقساطر اللازمة لسحب هذا السائل. وكانت هذه أول مرة تتم فيها هذه العملية داخل المستشفى.

تجمع عدد من الزملاء الأطباء والتمريض المخلصين، وتم تجهيز كل شيء.
سميتُ الله، وقمت بتعقيم يدي وارتداء الملابس المعقمة، وكذلك الممرضة المسؤولة التي كانت تساعدني.

قمت بحقن المخدر الموضعي تحت الجلد ببطء، ثم تم إدخال القسطرة إلى داخل السائل، وبدأنا بسحبه تدريجيًا.

وبفضل الله… ما إن بدأ السائل يخرج حتى تحسنت حالة المريضة سريعًا، وظهر على وجهها الارتياح، وعاد إلى نفسها الهدوء، ولملامحها الفرح، ولقلبها السكينة.

وبالطبع تم إرسال عينة السائل للمعمل لمعرفة السبب

والحمد لله رب العالمين الذي وفقنا لهذا ❤️
سبحانك لا علم لنا إلا ما علمتنا إنك أنت العليم
ربنا تقبل منا انك انت السميع العليم وتب علينا انك انت التواب الرحيم
اللهم اجعلنا سببا في شفاء كل مريض نلقاه 🤲
القلب هو الملك ❤️
010 60195739

جات لي مريضة في منتصف العمر بتشتكي من ألم في منتصف الصدر بيتكرر معاها🥹🥹
الغريب إنها معندهاش ضغط ولا سكر ولا حتى بتدخن😂😂😂 بس وصف الألم مقلق الصراحة ويستدعي إن الواحد يهتم بيه ويدور على سببه.
فيه مريض أول ما بسمع شكوته بحس إن وراه حاجة....
وفيه مريض تاني بيشتكي من وجع في صدره برده بس أول ما يوصفه بحس اننا اطمنت.🥰
المهم ، قست الضغط... عالي شوية
قست النبض برده عالي.... معدي 100 أثناء الراحة ودا مش طبيعي 🥹
عملت رسم القلب طلع الحمد لله كويس بس الضربات سريعة بشكل ملحوظ بس طالعة من مكانها الطبيعي بنسميها sinus tachycardia.
الإيكو برده طلع كوبس الحمد لله ، كفاءة العضلة ممتازة والصمامات كلها تمام.
طاب ليه ضربات القلب سريعة كده.....
بدأت أفكر في أسباب زيادة ضربات القلب sinus tachycardia
حضرتك متوترة؟
لأ خالص يا دكتور.
ركزت على علامات الأنيميا..... برده مفيش🤔
حضرتك بتخسي في الوزن ؟
آه يا دكتور خسيت 😲
من غير ما تعملي ريجيم أو تقللي أكلك؟
آه
بتنامي كويس؟
لأ نوم قليل وفيه أرق
علطول عصبية ومتوترة ؟
آه يا دكتور ، عرفت ازاي ؟😂
طاب معلش اعمليلنا التحليل ده(تحليل غدة عرقية).
وكانت نتيجة التحليل مش مفاجأة ولا حاجة.....
نشاط في الغدة الدرقية...
يعني بتشتغل زيادة عن اللازم وبتفرز الهرمون بكميات كبيرة.
وهو اللي بيعمل كل الأعراض دي.
قلت لها الحمد لله إن ربنا وفقنا وشخصنا السبب قبل ما يحصل مضاعفات ، لأن الغدة لو اتسابت كده من غير علاج ممكن تعمل مضاعفات خطيرة قد تصل إلى رفرفة أذينية أو فشل في عضلة القلب 😭.
فالحمد لله على لطفه في قضاءه والحمد لله الذي وفقنا لهذا وما توفيقي إلا بالله.
ربنا يتم لها الشفاء ويكتب الشفاء لكل مريض ويرزقنا الإخلاص والتوفيق 🤲
و الحمد لله رب العالمين
دمتم بصحة وعافية
القلب هو الملك ❤️
دكتور خالد الشرنوبي
010 60195739

النهارده جالي شاب في ريعان الشباب عنده حوالي 20 سنة كان جالي قبل العيد بيشتكي من نهجان مع المجهود وبقاله شهرين بيلف وياخد علاجات بدون نتيجة ملحوظة.....
لما جالي قبل العيد قعدت معاه واخدت تاريخ مرضي مفصل. أبرز ما فيه إنه كان بيسخن ومفيش شهية للأكل راح لدكاترة الصدر و عمل تحليل درن والحمد لله طلع سلبي. عمل تحاليل مناعة وبرده طلعت سلبية.
عملت له إيكو لقيت القلب عايم وسط كمية كبيرة من السوائل تحيط به من كل جانب. طلبت له بعض التحاليل ثم كتبت له علاج...
النهارده بقى وبعد أقل من أسبوعين من العلاج الحمد لله كمية السائل اللي حوالين القلب قلت جداً جداً ونفسه بقى أحسن كتير والحمد لله رب العالمين.
ربنا يتم شفاه على خير ويشفي كل مريض 🌹
ويوفقنا لما فيه رضاه
القلب هو الملك ❤️
دكتور خالد الشرنوبي
010 60195739

كل عام وحضراتكم بخير و صحه و عافيه ❤️
رزقنا الله وإياكم حج بيته الحرام وزيارة نبيه عليه الصلاة والسلام ❤️
القلب هو الملك ❤️

امبارح جات لي مريضة تعمل إيكو عندها حوالي 60 سنة..
من عادتي إني قبل ما أعمل للعيان الإيكو ، بقعد أدردش معاه شوية وأعرف تاريخه المرضي ومين طلب منه يعمل إيكو وليه علشان دا بيفيد جداً....
المهم... في البداية كنت حاسس إن شكلها مش غريب عليا...
بقولها حضرتك بتعملي إيكو ليه؟
قالتلي حضرتك أنا مغيرة الصمام الميترالي بصمام معدني من حوالي عشر سنين وبعدين غيرت الصمام الأورطي بصمام نسيجي في 2023 وحضرتك عملت لي إيكو من 3 شهور وقلت لي إن فيه ارتجاع في الصمام الأورطي ورحت مركز مجدي يعقوب في اسوان وشافوا الإيكو بتاع حضرتك وبناء عليه قرروا يعملوا لي إيكو بالمنظار واللي أكد كلام حضرتك.
رغم اني كنت عاملة إيكو آخر مبينش الكلام ده.
كنت في غاية الدهشة بصراحة 😲
طاب حضرتك بتعملي إيكو تاني ليه دلوقتي ؟
هما طلبوا مني إيكو تاني علشان عندي عملية 🥹
بصراحه متوقعتش إن تقارير الإيكو اللي العبد الفقير عامله يوصل لمركز مجدي يعقوب ويلاقي استحسان ويساهم في تشخيص وعلاج مريضة.
ربنا يتم شفاها على خير 🥰
وربنا يستعملنا على الوجه الذي يرضيه عنا و يجعلنا سبب شفاء ويتقبل منا 🤲
وكل عام وحضراتكم بخير 🌹
القلب هو الملك ❤️

أول ما المريض يدخل عليك… وبعد السلام 👋
سيبه يحكي… وما تقاطعوش خالص

يمكن تكون دي أبسط نصيحة… لكنها من أهم مفاتيح التشخيص 👌

المريض في أول كلامه بيقول “الزتونة” 🍋
وبيوصف إحساسه الحقيقي… وقلقه… وأهم تفاصيل الشكوى

لو استعجلت وقاطعته ❌
ممكن تضيع منك خيوط مهمة جدًا

لكن لو سمعته كويس 👂
هو بنفسه هيحط إيدك على أول الخيط… اللي هيوصلك للتشخيص الصحيح 🎯

🩺 اسمع… افهم… وبعدين اسأل

القلب مش بس عضو…
القلب حكاية لازم تتسمع كويس ❤️

القلب هو الملك 👑