الألم يصنع الأمل

اللي مالوش خير ف اهله مالوش خير ف حد ، وعشان كده كان لازم اسمع كلام والدتي ف اختيارها لعروستي ، واسيبني من البنت اللي حبيتها واتمنيتها اربع سنين جامعة..
عموما يعني انا امي كانت مختاره ليا عروسة ماشاء الله حلوة وهادية وبطل ، حاجة كده ماتتسبش البت بيضا شمع ..
وبتعرف تطبخ ومبتقومش من قدام cbcسفرة يقال ان الشيف بوراك مثلها الاعلي ،اه امي وشوشتني كده ف ودني واحنا قاعدين معاهم وقالتلي انها بتعرف بترقص ولا صافينار ياولا ..
بصراحة عروسة متتعوضش ومفيش واحد عاقل يسيب واحده بالمواصفات دي ، والا يكون مختل لامؤاخذه ف الكلمة ..
بس للاسف العروسة دي فيها كل حاجه حلوة بس مش (انتي) ، مش ف نكدك وعبطك وبكمية أكلك دي ، انا اتعودت علي صوت الطاسة الساعة اتنين بليل وانتي بتكلميني ف الفون وانتي بتقلي بطاطس..
وياما قولتلك عقبال ما ابقي انا وانتي و الطاسة ف مطبخ واحد يا حلو انت يا قمحي..
وبعدين مين قالك ان عايز واحده مفيهاش عيوب ، انا عايز واحد كلها عيوب بحبها ، عايز واحده هبله زيك بتحوش ماية الرز عشان تتقل شعرها بيها
واحده تقعد جمبي ف البلوكونة ساعة مغربيه وعلي وشها برطمان البن اللي لسه شاريه من يومين واقولها (حسبي الله ونعم الوكيل)..
واحده بتقول نكت سخيفة عشان تشوف علي وشي ريآكشن "أحمد الخولي" واسيبها واقوم تيجي ورايا وتتعلق ف رقابتي وتبوس فيا ..
واحده عارف تفكيرها وواثق فيها وف قلبها اللي مستحيل يدخل شئ تاني معايا جواه، واحده حافظ تاريخ ميلادها وامثل عليها ان نسيت الهدية لحد ما تعيط من استعباطي وبعدين افاجئها ان منستش ولا حاجة ..
وبعدين انا لو سيبتك مين هيعديكي الطريق والعربيات جاية بسرعة ، ومين هيجبلك زهرة عباد الشمس اللي بتحبيها .
هو صحيح اللي مالوش خير ف اهله مالوش خير ف حد ، بس انا مش موافق علي 100 واحده احسن منك ممكن اهلي يرشحوهالي ..
ف عشان كده انا بقولهالك اهوه ف العلن ، ان مش هتجوز غيرك ولسه قافل مع ابوكي وهروحله بكره اطلب ايدك وعينك ومشاعرك منه ..
ولو انتي شر ف حياتي ، ف اهلا بجحيم حضنك⁦ ♥