Smal Business Owner

الحمد لله علي كل نعمه ربنا من علينا بيها

سيبك من أهلي و زمالك .. سيبك من الكورة خالص ..و معاك إنهم غلطانين .. بس عندي سؤال واحد .. العين الإماراتي جاي يلاعب الأهلي الأسبوع الجاي .. لو لاعيبة العين مسكوا مدير أمن القاهرة دفنوه في نجيلة الإستاد يا ترى فيه حد منهم هايتحبس حتى في أوضة الفندق بتاعه دقيقتين على بعض ؟

بطلوا رخص بأه ..

المواقف بتعلمنا ان مش كل الديون فلوس ... فيه ديون جدعنة ومواقف حلوة وكلمة طيبة

حد وقف في ضهرك في أزمة كبيرة
حد سندك وقت ضعفك
حد نصحك نصيحة مخلصة وانت لايص. حد دلك على سكة اخرها خير كبير لك .
حد شجعك تكمل وانت قربت تستسلم.
حد طمنك وانت مرعوب وفي قمة قلقك.

دي كلها ديون … ديون معنوية كبيرة اوي اوعى تنساها ولو مردتهاش لصاحبها ردها لاقرب حد محتاجها

وَلَا تَنْسَوُا الْفَضْلَ بَيْنَكُمْ إِنَّ اللَّهَ بِمَا تَعْمَلُونَ بَصِيرٌ
صدق الله العظيم

فكرة إنك تحتسب كل حاجة بتعملها عند ربنا بجد نعمة كبيرة اوي، تتعب ف تربية ولادك (فتحتسب تعبك)
تصبر على مجهود معين أنت ملزم تقوم بيه كل يوم ( فتحتسب صبرك )
ترضى كل الرضا بوضع انت مش مرتاح فيه ( فتحتسب رضاك )،
نعمة كبيرة أوي إن الواحد كل ما يعمل حاجة يقول يا رب أنا محتسبها عندك،

لإن مش كل مجهود متشاف، و لا كل صبر متقدر ، و لا كل تعب و تحمل و ضغط الناس هتقف تسقفلك عليه، لكن تأكد إن كل لحظة تعب تعبت فيها و طاقتك خلصت و احتسبتها عند ربنا هتتفاجئ بيها بكرم من عنده.

احتسب الحاجات الـ ملهاش ميزان عند الناس، بس ليها ميزان كبير اوي عند ربنا. 💙

🛑جزء كبير من حساب البشر يوم القيامة هيكون على ما يُسمى "العنف الصامت" ..

الأذى النفسى النفسي، الغِل، الحسد، الشغل من تحت لتحت، إضمار الشر، الحقد، سوء الظن، أو ما يمكن وصفه إجمالاً "ما تخفي الصدور" ..

المفاجأة إن ما تخفي الصدور من نوايا ومشاعر يحاسب عليه الله كما يشاء سبحانه وتعالى:
"إِنْ تُبْدُوا مَا فِي أَنفُسِكُمْ أَوْ تُخْفُوهُ يُحَاسِبْكُمْ بِهِ اللَّهُ".

عشان كده من أسباب النجاة يوم القيامة:
"يَوْمَ لَا يَنفَعُ مَالٌ وَلَا بَنُونَ إِلَّا مَنْ أَتَى اللَّهَ بِقَلْبٍ سَلِيمٍ"

القلب السليم ده لوحده سبب كافي للنجاة، في حين إن ناس أعمالها كالجبال يجعلها الله هباءً منثورًا بسبب فساد الصدور وفساد النوايا، فيه ناس تانية هتدخل الجنة بنقاء قلوبهم والعمل الصالح.

رزقنا الله وإياكم القلب السليم
منقول

انا اللي مش قادر استوعب ان جه اليوم اللي نلاقي فيه ناس ندافع فيه عن الدروس الخصوصية والمدرسين و مصدقين انهم ضحايا لمجرد تقليل مادتين بس مش كل المواد 😓😓😓
ياجماعه ارحموا ابونا بقي

١٠٠ ساجد او يزيد في سبيل الله شهداء في مدرسه إيواء النازحين استشهدوا وهم يصلون الفجر وبين يدي الله
ياااااااااااالله
يارب عليك بأولاد الفجرة فأنهم لا يعجزونك
فلا ننتظر النصرة والمدد الا منك وحدك
فالعرب في نوم عمييييييييق 😣😣😣😣😣😣😣😣😣😣😣😣😣😣😣😣

بمناسبة الثانوية العامة وموسم الجامعات في مصر فأنا عندي رأي دائما بقوله لأصحابي 💔💔💔.

مشكلة التعليم في مصر إنها بتخرج حمار لكنها بتديله شهادة تقوله إنه أسد؛ ومش هي دي المشكلة الوحيدة؛ المشكلة إن الحمار عشان معاه شهادة بتقول إنه أسد فيبدأ يصدق إنه أسد.

لما يصدق إنه أسد يبدأ يتعامل إنه أسد؛ يقدم في وظائف الأسود وعاوز مرتب أسد؛ لكن أصحاب الأعمال شايفين حقيقته وإنه مش أسد ولا حاجة ويبدأوا يعرضوا عليه وظايف الحمير عادي... وهنا تيجي أصعب مرحلة.

المنطقي يقف مع نفسه ويشوف حقيقته؛ ويبدأ يتعلم ويطور من نفسه بشتى الطرق بحيث يبقي أسد فعلاً وأسد متوحش كمان مش أسد عادي؛ يبقي أسد قولاً وفعلاً مش بس معاه ورقة بتقوله إنتا أسد.

*️⃣ لكن لا مش بيحصل دا لكن بيقعد في البيت ويقولك شايف البلد المفترية معايا شهادة أسد أهي بس كل الوظايف هي حمير؛ ويقعد يقول للناس أنا أسد بس البلد ظلمتني ؛ أنا أسد.

انتا صح البلد ظلمتك؛ البلد كان مفروض تعلمك صح وتطلعك أسد وتدربك ك أسد لكنها ظلمتك واكتفت إنها تديك ورقة تقول إنك أسد... بس نعمل إيه دي بلدنا.

فالحل مش زي ما البعض بيروج ويقولك خلاص بلاش تعليم دا هيديك شهادة تقول إنك اسد وانتا حمار يبقي سيبك من التعليم؛ لا يا غبي الورقة اللي بتقولك يا أسد مهمة؛ انتا حاول تكمل دور الدولة؛ دا موضوع صعب جداً بس لازم تعمل ايه؛ تخيل مطلوب منك تقوم بدور الدولة لكن لازم تعمل دا... كمل واتعلم.

متبقاش زي الأهالي اللي يدخلوا عيالهم مدارس ب 100 و 200 و 300 ألف جنية ويقولك عيالي متربين أحسن تربية دا بدفع له ربع مليون كل سنة؛ ايه علاقة التربية بمصاريف التعليم متفهمش 🤔 أهم نفس العقليات دي متقلدهاش وتقول ما أنا دخلت كلية X خلاص أنا فل..

التنسيق هيبدأ فاختار المكان اللي هيديك ورقة أسد منه؛ وابدأ برضك تعلم وتطور من نفسك؛ انا ضيعت وقت الكلية وندمت؛ وقت الكلية مش مكان للفسح وقعدة حلوه في الجنينة والاسكوير وحولين المعامل؛ دا الوقت اللي تكمل دور الدولة فيه؛ فتبقي أسد بس منتظر يوم التخرج عشان تاخد شهادة رسمية بالأسودية.

خلاف ذلك هتفضل منظومة التعليم تخرج حمير ونقابلهم في كل مكان وهو واقف يتفاخر إنه أسد؛ وتبقي ماسك نفسك وعاوز تقوله طيب خبي ودانك الطويلة وبطل تنهيق يا... يا أسد
مجرد رأي والله

حابب أوضح رأيي ليه غالبا بعتذر عن حضور الأفراح؟
الأفراح والخطوبات كتير ما شاء الله.
للأسف آخر 10 سنين مبقتش احضر أفراح أو حفلات خطوبه اطلاقاً حتي ولاد اخواتي وأخوات مراتي يعني اقرب الناس ليا ورأيي هنا أنا فاهم ممكن يزعل ناس.
لكن ربنا يعلم أنا ليه بقول كدة.
واعذرني حسيت إني لازم أعمل كدة، عشان ممكن مقدرش أوضح وجهة نظري ليك بشكل خاص أو مباشر.
ولكن لعل وعسي إن يتغير حاجة لو انت فكرت في كل نقطة من دول وبحثت فيهم بتمعن.

وقبل ما أقول ليه أحب اقولك إني أنا مش بقدر أروح أفراح كتير وحتي لو رحت بروح أمضي فعليا وغالبا مش هسلم عليك وأنا ماشي عشان متزعلش إني مشيت بالسرعة دي وأنا مش عايز أزعلك في يوم زي ده.
وحابب أذكر الأسباب دي عشان لو مجيتش تعذرني أو لو عشان اتغيرت الأمور دي أجيلك من عنيا لو أقدر.

١. أنا ميرضينيش لا للعريس ولا الأهل ولا ليا إني أشوف زوجة حد بترقص.
اللي مرضاهوش لنفسي مرضاهوش لغيري.
وبيصعب عليا جدا إن سواء الرجل ولا البنت ولا الأهل ممكن يندموا علي قرار زي ده بعدين.
مش هقولك غير آية بسيطة جدا واحدة بس.

"ولا يضربن بأرجلهن ليعلم ما يخفين من زينتهن" صدق الله العظيم.
تمعن في معني الآية بس وهتفهم قصدي.
ده هنا بنتكلم عن حاجة زي الخلخال بس.
فما بالك باللي بنشوفه دلوقتي اقسم بالله فساتين حتي البيت ماينفع تتلبس فيه وأيلي عنده أولاد كبار يفهم الكلام دا .
المروءة والرجولة والمسؤولية تحتم عليك تفكر كتير في الموضوع ده وتسأل فيه.

٢.الإنسان المفروض بيختار يعف نفسه ويبدأ حياة جديدة، ببقي زعلان لك إن البداية كدة والله.
ببقي نفسي تكون بداية شكلها محترم .
زعلان لك ليه ؟عشان تهمني.
ما انت أكيد عازمني عشان فيه ما بيننا نوع من أنواع الود، فمن واجب المحبة اللي ما بيننا أتضايق لو حاجة فيها ضرر ليك أو تقلل من شكلك وشأنك

٣. كمية العري اللي بقت موجودة بقت صعبة وبترعب الواحد وبقيت المنافسة مين هيقلع أكتر ويرقص أكتر ومين فستانه أحلي.
هتقولي لو مش عجبك متبصش ومش هتاخد الذنوب.
ما عندك حق فعلا عشان كدة بحاول مروحش الأفراح.
احنا أضعف من إن نسيب نفسنا في أماكن للفتنة أو إن نفتح أبواب للشيطان يدخلنا منها دا حتي ممكن يكون في ناس كبيره ومحترمه متأذيين جدا من المناظر وشكل البنات ولا ايلي جايب رقاصه وللأسف تلاقيه قاعد مجبر قال ايه علشان ميزعلش حد او يزعل حد منه 😧 يعني تقاليد زفت وشكليات أزفت .

وابحث أكتر في الموضوع كبنت أو كأب أو كأم أو أخ، ده حتي الأميرات في الغرب بتلاقيهم لابسين محتشم في أفراحهم لإن ده من الوقار ومن الإحترام ليهم والتعزيز من قيمتهم قبل ما يكون للغير.

"يا نساء النبي لستن كأحد من النساء

ده الأمر هنا بعدم الخضوع من القول بس.
فما بالك بالرقص.
سبحان الله له حكمة في كل شئ.

٤. رقص الرجالة...منظر بيضايقني جدا جدا اقسم بالله لما واحد يكون بيترقص الرقص اللي بقي الواحد بيشوفه.
وأوقات يكون رقص صعب علي بنات كتير إنها ترقصه أصلا.
بزعل إن ليه نعمل كدة في نفسنا.
مش ليلة العمر ولا حاجة ولا دي الفرحة.
عمرنا ما سمعنا عن إن ده إحتفال للرجال.
ولا إن دي صفات من صفات الرجولة اللي فعلا تبقي معروف بيها.
واه والله حتي سمعتك وسيرتك ممكن تتشكل من حاجة زي كدة.
فبيصعب عليا المنظر والله عشان اللي بيرقص.
دا حتي شكل الراجل وهو بيرقص حاجه مقززه جدا ودي وجهه نظري أنا مش بفرضها علي حد هتقولي ياعم كل واحد بيفرح بطريقته عادي هقولك انت حر والله معك وانا كمان حر واحنا حبايب

٥. بخاف بصراحة.
بخاف إن ينتهي عمرنا في أماكن زي دى ودلوقتي في بعض الأفراح شرب و عري و ما شابه.
احنا ذنوبنا كفاية والله العظيم.
مش ناقصة ذنوب علي ذنوبنا وبندعي بحسن الخاتمه

٦. الصوت بقي، ده لو الأغاني كانت حلال ومش حرام، أنا بصراحة مش فاهم ليه أبقي قاعد في كمية الإزعاج دي ولا حد سامعني ولا أنا سامعه.
حاجة مش مفهومة بالنسبة لي وبتزعجني أنا آسف.دا بقي غير شكل الأغناني ايلي بقت تشتغل والمهرجانات اقسم بالله كأني قاعد مفيش فرق بيني وبين سواقين الميكروباصات علي ازبل خط ويقولك اصل دي الموضه وابلي ماشي دلوقتي وللأسف الغالبيه يتبع ثقافه القطيع

٧ .مش ببقي مبسوط كمان ليك وأنا عارف إنك بتقسط ولا مستلف تمن الفرح عشان تصرف علي الفرح مبالغ رهيبة فيي حاجه فشخره ومنظره ومترضيش ربنا بالمنظر ده وبتبدأ حياتك كدة.
وبتصرف كل المبالغ دي في ساعتين زمن حتي لو في الحلال وانت دي مش مقدرتك.
هنتسأل عن كل جنيه اتصرف في ايه وليه.
والله سامحني ببقي لو انت حبيبي وأنا عارف ظروفك ببقي متضايق ليك من خوفي عليك.

" ومن قدر عليه رزقه فلينفق مما آتاه الله" صدق الله العظيم.

كل دول بعض الأسباب اللي بتخليني ممكن مجيش الفرح.
الشعور المسيطر الحمدلله بيبقي الخنقة متضايق وانا قاعد وبخاف علي نفسي لأني بجبرها تعمل حاجه مبتحبهاش لمجرد ارضاء الناس والشكليات والكلام الفارغ وهيقولوا ايه ودا اخوك ودا ابن اخوك وابن أخت وغيرهم وغيرهم فبطلت اعمل كدا مهما حصل
بكون مخنوق ليك قبل ما يكون ليا.
مخنوق ليك إني عارف إن التقاليد والعادات مسيطرة.
التقاليد والعادات خلت ما يغضب ربنا سبحانه وتعالي بقي منطقي وبقي الرد " أمال عايزنا نعمل ايه يعني"

العادات والتقاليد خلت الرقص عادي...الشرب عادي..الإسراف عادي...اللبس العاري عادي.

نصيحة ليك:

١.ابدأ حياتك بما يرضي الله وربنا هيبارك والله.
٢.اعزم اللي يهمك تفرح معاهم، وافرح معاهم صح فاهم صح
٣. زوجتك أغلي من إنك تفرج الناس عليها.
٤. انفق مما آتاك الله ومتحملش نفسك فوق طاقتك.
٥. وفر فلوس واطلع عمرة أو حج انت وزوجتك، علي حسب استطاعتك. .
٦. اطمن والله ينفع يبقي فرح من غير رقص..

المودة والرحمة ما بينكم هي الفرح الحقيقي مش الفرح نفسه.❤️

_ حاول تصدق مقولة ان اللي شغال ومكمل في التوقيت ده خسران
_ هتسأل وتقول ايه اللي جابره ؟
_ هقولك بعيدا عن انه بيحافظ علي وجوده واسمه اللي تعب وشقي علشان يعملهم لحين ما الحال يتعدل لان ده مش سبب انه يفضل خسران ، بس السبب الوحيد انه يفضل شغال وهو بيخسر ان في مال رايح جاي فبياخد منه ويصرف علي نفسه وبيته واهله وعياله والتزاماته حتي لو هيتداين علي أمل انه هيرجع يسد في اي موسم او لو حتي هيفضل يتداين علطول وتقفل لوحدها انما لو جاب ضلفها وقفل وقعد في بيته فمش هيلاقي مال يصرف منه وهيتكشف وهيبقي عاطل وشحات وهيمد ايده للناس واكيد محدش يحب يبقي كده
فيقولك اتداين واخسر احسن
وده حال الكثيرين الان
اللهم يسر امورنا