بتاع ألماني - Mafdi Farouk

احكيلي عملت ايه في أول يوم في العيد؟
وحاول تكتب بالألماني

عارفين ايه سر جمال سويسرا؟
انها دولة ناطقة بالألمانية.

ذاكر ألماني علشان نتقابل الصيف اللي جاي هنا

اللي عايز يسمع ألماني هيلاقي مثال لفكرة استماع محترمة في أول كومنت. ويكمل بقى بنفس الطريقة وبنفس الApp

الألماني بقى سبوبة، والنصابين اللي بيستغلوا جهل واحتياج الناس كتروا.

⚠️ متذاكرش الماني وانا هخليك تتكلم بطلاقة!
⚠️ هثبتلك ان اللغة دي اسهل لغة في العالم!
⚠️ الألمان بيقولوا كده ومش بيقولوا كده!
⚠️ لو بتقول كده يبقى انت لسه A1 قول كده علشان تبقى B2
⚠️ الجملة/ الكلمة دي هتخليك تبان B2

وتلاقي نطق ملهوش أي علاقة بالألماني، بس أداء كله ثقة.
شرح قواعد من منطلق غلط وكتابة الكلمات وشكل الجملة كارثي.

والكومنتات: ممكن التفاصيل، ممكن رقم للتواصل.

حقيقي الناس دي بتصعب عليا لأنها بتيجي بعد شهور من تضييع وقت وفلوس مع المحتالين دول يقولوا عايز احدد مستوى وتلاقيه مستواه تحت الصفر حرفيا. ياما ناس درسوا معايا كانوا واخدين مستويات مع الناس دي، وكان طلبي الوحيد منهم انهم يحاولوا ينسوا كل حاجة اتعلموها هناك. الناس اللي بتبقى بادئة من الصفر بتتعلم أسرع واحسن منهم بكتير لانهم بدأوا بنظام، يعني على نضافة بالبلدي.

الألماني لغة علوم غيرت العالم (اينشتاين وفرويد)، لغة فلسفة غيرت التاريخ (نيتشة، ماركس، هيجل وكانط) وأدب عميق (كافكا وغيره)، لغة عظيمة جدا، ومُرَكبة وغير سهلة، لغة تحتاج مئات والآف الساعات من الاستماع والقراءة والكتابة والممارسة والتفكير والتأمل. كل جملة فيها تحمل ثقافة وبتعبر عن عالم مختلف تماماً عن عالمنا، لغة حتماً هتفشل فيها لو مش هتتعلمها بنظام.

مينفعش تدي وقتك وذهنك لحد لا يستحقه. لما هتيجي ألمانيا مش هتلاقي غير قلة قيمة وبهدلة بسبب لغتك. لغتك هتحفظ كرامتك وهي المفتاح اللي هتفتح بيه أبواب للخير والنجاح.

نصيحتي للمدرس، اتقِ الله في الناس اللي بتقعد قدامك وطور نفسك الأول وخد على الأقل شهادة C1 واتعلم أي حاجة عن التدريس، واقرأ وثقف نفسك علشان يكون عندك شئ تقدمه وبعدها انطلق. وللمتعلم، اسأل المدرس عن مؤهلاته (قوله تعرف هيجل ياهير 😂 أو قوله ممكن تقولي عمل واحد قريته لأي كاتب ألماني) ومش عيب تقوله وريني شهادتك، او اسأل حد بتثق فيه هل اللغة اللي بيتكلمها الشخص ده ألماني ولا لغة هو اللي عاملها في الأوضة عنده جوه.