Ahmed Mekkawy

السلام عليكم
استفتاااااء
لو رجعنا نشاط الصفحة مرة تانية .. تحبوا ...
١- تكون الصفحة متخصصة في اللغة الإنجليزية فقط
٢- تكون متنوعة ما بين اللغة و الـ soft skills

بوست محاضرة مصغرة كدة في تريكة من تريكات الانجليزي بنحتاجها ساعات كتير لاسيما لو بتدرس انجليزي لغرض الدراسة
و إن شاء الله يكون مفيد للجميع
هنتكلم عن الـ helping verbs أو الـ auxiliary verbs
يعني ببساطة الأفعال المساعدة:
١- اللي بتيجي تدخل على verb تاني علشان تساعده
٢- اللي مينفعش تيجي لوحدها في سياقات معينة (لكنها لتستخدم منفردة كافعال رئيسية main verb في سياقات أخرى)
٢- اللي كل فصيل أو verb منهم مسؤول عن أزمنة محددة
زي ما هو واضح من الصورة هتلاقي إن:
أولا: verb (be) هو المسؤول عن الـ continuous tenses أو الأزمنة المستمرة و ديما ييجي وراه الفعل الرئيسي مضاف له ing.. و ده له صورتين
١- مضارع present فيديلك مضارع مستمر present continuous
٢- ماضي past فيديلك ماضي مستمر past continuous
ثانياً: verb (do) و ده مدير الـ simple tenses أو الأزمنة البسيطة .. و دائما يجي وراه الفعل الرئيسي في المصدر infinitive .. و برده له صورتين (أو صورتين و نص يعني 😅)
١- مضارع present فيديلك present simple
٢- ماضي past فيديلك past simple أو في بعض الكتب simple past
ثالثاً: verb (have) هو المسؤول عن الـ perfect tenses أو الأزمنة التامة و ديماً ييجي وراه الفعل الرئيسي شكله 3rd form أو الـ PP أو التصريف الثالث في بعض الروايات .. و ده له صورتين (أو صورتين و نص يعني 😅)
١- مضارع present فيديلك present perfect
٢- ماضي past فيديلك past perfectأو في بعض الكتب
الصورة المرفقة موضحة كل الشرح ده و بالأمثلة
فيه أزمنة تانية طبعاً بتخرج من الازمنة دي بس دول الـ core و كلامنا عن الـ helping verbs مش عن الأزمنة :)
لو فيه أي سؤال معاكم و تحت أمركم

لو عندك مشكلة في إنك تكون متحفز باستمرار أو إنك تستمر في عادة إيجابية لوقت طول .. لو بتكسل تكمل في أي مشوار بدأته أو مش عارف تبدأ ازاي .. فالفيديو ده ليك .. إيدك و اللايك و الشير و اللينك في أول تعليق
و طبعاً سوي صبصقرايب و لايك و شير للقناة عشان لسة جديدة و محتاجة دعمكم ^_^

بداية جديدة و فيديو جديد .. إيدك و اللينك في أول تعليق زي الباشا تخش تتفرج و و تقول واو و تعمل subscribe و تقولي برافو الله و تستنى الفيديو الجاي :D

#تجارب
صباح الخير عليكم
شباب كتير سألوني عن تجربتي في موضوع الفيديوهات و الفويس أوفر .. فانا هأحاول أختصر تجربتي في نقاط محددة:
أولاً الموضوع عندي شغف وهواية و له علاقة بإني بأحب أثر في اللي قدامي بكل إمكانياتي و الصوت على رأسها كأحد آليات مهارات التواصل
طيب أنا عملت إيه:
أولاً بخصوص الفيديوهات:
1- أنا ليا خبرة في مسألة الفيديوهات لأني كنت بسجل فيديوهات تعليم English على الصفح هنا فموضوع الفيديوهات مش جديد عليا و أنا بستخدم فيه برنامج سهل و جميل اسمه Wondershare Filmora و تقدروا تشتغلوا على برامج تانية طبعاً زي sony vegas و camtasia و العملاق Adobe premier
2- مصادر الفيديوهات باجيبها سورسات فري ما عليهاش حقوق و مسموح باستخدامها عادي من موقع اسمه Pexels.com و بالنسبة للصور ففيه مواقع كتير أوي على رأسها مثلاً freepik و فيه فيديو هايل في موضوع المصادر لصديقي Walid Taha تقدروا ترجعوا ليه
3- الفيديوهات مش مجرد قص و لزق أو تحميل و خلاص .. لازم يكون عندك ثقافة كبيرة و حس في اختيار الفيديوهات المناسبة لكلامك و للرسالة اللي انت عاوز توصلها من الفيديوهات و عشان كدة لازم تكون بتعرف تبحث باستخدام الـ Key words المناسبة
ثانياً بخصوص الصوت أو الـ Voice Over
1- كل صوت حلو .. مفيش صوت حلو و صوت وحش .. بس فيه اداء حلو و أداء محتاج تطوير
2- ما تقلدش .. ما تقلدش .. ما تقلدش .. الفويس أوفر مش صوت فخم و تخين و بطئ .. الفويس اوفر صوت بيأدي صح و بينطق صح
3- مخاارج حروفك هي سلاحك و مهارتك في موضوع الصوت .. لازم تكون مخارج حروفك مظبوطة و لغتك العربية قوية و ده له سكة واحدة .. القرآن .. القرآن هو أكثر حاجة هتظبطلك لغتك بشكل قوي جداً
4- اسمع كتير أووووووي .. اسمع كل ألوان التسجيلات الصوتية .. اعلانات بمختلف انواعها .. وثائقي .. شروحات .. قصص روايات .. اسمع كل حاجة
5- تابع أ/ خالد النجار على اليوتيوب .. من وجهة نظري هو عمدة المجال .. و فيه في مصر بردو أصوات خرافية ما شاء الله لا قوة الا بالله
6- محتاج تتعلم عملاق الهندسة الصوتية Adobe Audition و هتلاقوا صديقي Haytham Hassan Mohamed عامل سلسلة جميلة أوي على اليوتيوب بيقدم فيها شروحات للبرنامج .. و فيه قنوات تانية كتير لأجانب بتقدم شروحات بردو و هايلة .. و لو ما لقتش Adobe Audition متاح .. فبرنامج Audacity متاح مجاناً تماماً
7- ما تخليش الأدوات توقفك أبدأ .. أنا بدأت بالموبايل و شوية و اشتريت مايك اسمه Sudotack st-810 من على أمازون في حدود 1500 جنيه .. هو ده اللي بشتغل بيه
8- ادخل على اليوتيوب و اتعلم ازاي تعزل مكان تسجل فيه و تقدر تعمل ده بمخدات سريرك و المرتبة (انا عامل كدة و بلاش كسفة :D) و الاول كنت بأدخل أسجل جوة الدولاب أو ألبس بطانية على دماغي
9- يا رب ما أكون ناسي حاجة ^_^
ثالثاً: المحتوى أو السكريبت
1- و طبعاً المحتوى أو السكريبت بيجي من حاجتين .. ابداعك و خبرتك و ثقافتك .. يعني خبراتك في مجالك العملي بتمكنك من كتابة محتوى بالذات لو تحفيزي او تسويقي و دول مجال شغلي .. كمان ثقافتك و اطلاعك و قراءتك هيخلوا عندك حصيلة لغوية كبيرة تسهل عليك كتابة المحتوى
أنا حاولت أجمل الموضوع و ألمه بأكبر شكل ممكن فأرجو إني أكون أفدتكم
و لو لسة فيه أي أسئلة هأرد عليها في التعليقات إن شاء الله

أهم خير ممكن تعمله في نفسك هو إنك تشوف مواطن قوتك و مواطن تطويرك و تبدأ تشتغل عليها و تحسنها .. و علشان تعمل ده فإنت محتاج تعرفها و تشوفها قدام عينك .. فدلوقتي حالاً هات ورقة و قلم و ابدأ إملى الـ Note دي بالحاجات اللي انت محتاج تتعلمها و حطها قدام عينك و خليك شايفها كل يوم .. و النوت الجاية هنقول هنعمل ايه .. قولنا إيه الحاجات اللي محتاج تتعلمها

السلام عليكم على كل المتابعين ..
عودة بعد غياب طويل 😊
التغيير اللي حاصل إن شاء الله علشان نزود مواضيع المحتوى اللي بقدمه و ما يقتصرش على حاجة واحدة أو مجال واحد ✌️
هيكون فيه محتوى متنوع بيتنشر على الصفحة من تنمية مهارات لـ How to مروراً بالبيزنس و تجارب حياتية و عملية و نصايح كتير مفيدة إن شاء الله في مجالات كتير
هيكون فيه فيديوهات محتوى سواء تدريبي و تطويري أو تحفيزي 👏👏
هيكون فيه Change 💪

Let's "PAUSE" and think. It's worth thinking.

لمحبي الـ idioms .. دي بعض الـ idioms اللي بتستخدم فيها أجزاء الجسم body idioms ^_^