ظبط التردد l Zabbat El Taradod

لمحبي التلوين ومحبي الأيقونات ومحبي الفني القبطي

الآن يمكنك اقتناء الجزأين الأول والثاني من كتاب تلوين الأيقونات القبطية،

لقضاء وقت ممتع في التلوين والاستمتاع خلال الإجازة.
الكتاب متوفر **بنسخة رقمية (PDF)** تحميل فوري، تقدر تبدأ التلوين في أي وقت.
دعمكم مهم جدًا لاستمرار المشروع، والخطوة القادمة بإذن الله:
**قصص القديسين للتلوين**
كل مشاركة بتفرق.

رابط الشراء في أول تعليق..

Now you can get Parts One and Two of the Coptic Icon Coloring Book,and enjoy a fun and relaxing time coloring during your vacation.

The book is available as a digital (PDF) edition with instant download—you can start coloring anytime.
Your support means a lot and helps this project continue. Coming next, God willing:
Saints’ Stories for Coloring
Every share makes a difference.

Purchase link in the first comment.

في أيام في الخدمة بتروح وانت مليان طاقة وحماس ومتشجع.. وفي أيام تانية بتروح وانت مضغوط وتعبان أو محبط أو زهقان وأحيانًا البعض بيوصل بيه الحال إنه بيتحارب بشكوك سواء تجاه الخدمة أو الإيمان أو محبته لربنا.

ومع كده… بتفضل تروح الخدمة.

فتيجي قدامك رسالة رومية 15:13 ويقول لك معلمنا بولس الرسول:

"ولْيَمْلَأْكُمْ إِلهُ الرَّجَاءِ كُلَّ سُرُورٍ وَسَلاَمٍ فِي الإِيمَانِ، لِتَزْدَادُوا فِي الرَّجَاءِ بِقُوَّةِ الرُّوحِ الْقُدُسِ."

وهنا عاوز يقولك إن الخدمة ماهياش عمل إنت بتروحه لأنك مؤهل، الخدمة هي عملية حب مستمر بيقودها الروح القدس .. فمتقيسش نجاحك بإن الدرس كان مثالي وجميل، أو لأن كل المخدومين سمعوا الكلام وكانوا شطار، أو لأنك دايمًا واثق في نفسك وفي قدراتك.

لكن لأن رجاءك وقوتك من البداية مكانش منك إنما من الروح القدس اللي هو الله.

فربنا عارف إن هييجي أحدات وأوقات هتحس فيها إنك "مش قادر" أو إن معندكش شئ تقدمه للمخدومين، أو تحس إن خلاص بقى إحنا كبرنا .. كان عارف إن هيبقى فيه مخدومين صعبين شوية ومش بيسمعوا الكلام، أو مش بيقتنعوا بسهولة .. كان عارف إن انت عندك في أسرتك العائلية مشاكل وتحديات .. كان عارف إن شغلك مابقاش زي الأول ووقتك بقى محدود .. وعارف كمان إن هاتعدي عليك لحظات هتسأل فيها نفسك:
"هو أي حاجة بعملها مع المخدومين دي أصلًا بتفرق؟؟"

وعشان كده، عمره ما طلب منك تخدم بقوتك أنت، ووعد إن هو اللي هيديك القوة، والسلام، والرجاء، والثقة اللي محتاجها علشان تخدم وتعلم.

عمل الروح القدس من خلالك يمكن لسه مش ظاهر ليك.. لكنه حاصل وفعال، ونتيجته أبدية. الله بيشتغل من خلال أمانتك في هدوءك وفي نشاطك، وحتى في أيام تعبك وإن جاز القول وانت مطفي.

فأوعي في يوم تيجي وتقول مابقاش لي دور أو إني مش مؤهل حاليًا للخدمة أو كفاية كدة .. استمر في المرواح للخدمة وعلم كلمة ربنا بأي طريقة ممكنة وخليق واثق إن العملية دي كلها يقودها الروح القدس، علشان كدة من فضلك في كل خدمة أطلب روح الله القدوس يقودك ويقود عملية التعليم أو الخدمة بكافة أشكالها.

لو دخل الرب يسوع فصلك في الخدمة .. تقريبا مش هيبدأ بإنه يديهم ورقة يحلوها او يفضل يشرح او يديهم مقدمة مملة لكن اعتقد هايبدأ بحكاية، واعتقد هتكون مش طويلة أو معقدة إنما هتكون بسيطة، وغالبا هتكون عن ابن، أو أب، أو شخص كان مسافر أو حيوان أو حاجة من البيئة إللي هو فيها وبشكل أو بآخر المخدومين هيفهموها.

كان المسيح معلم قوي جدا لما تجسد وبقى وسطنا، استخدم القصص والأمثال علشان يخلي الحقايق الكبيرة والمعقدة مفهومة!

واستخدم الأشياء والأفعال زي غسل الأرجل، وإطعام الجموع على سبيل المثال علشان الناس يشوفوا الدرس حي قصاد عينيهم.

وكان بيطرح أسئلة بدل ما يدي إجابات وبصراحة ده أصعب بكتير من إنك تدي إجابات 😅

وأحيانًا كان يستخدم مبالغة تهز الدماغ زي المثل بتاع الخشبة اللي في عينك علشان يضمن إن الكل فاهمين ومستوعبين.

تقدر كخادم تعلم زي المسيح المعلم الصالح، بإن خدمتك ودروس يكونوا مؤثرين .. وكل اللي محتاجه في الاول انك تكون هادف او عارف انت بتخدم ليه وبتخدم مين.

فهمتوا ليه الهراطقة بيكونوا مؤذيين للكنيسة مش مجرد خطاة أخطأوا في حق أنفسهم؟

زي ما تابعنا الدكتور الله يرحمه اللي قال كتير من المعلومات اللي بتضر بصحة الإنسان لمجرد إنه عرضها بجرأة وبتحرر وباستشهاده ببعض الأمور اللي تبدو منطقية .. أو باستشهاده بالفعل لبعض الأمور اللي ممكن فعلا تكون حقيقية .. بس المجمل في النهاية منتج فكري مشوه .. تمشي وراه وانت فاكر إنه أنقذك من أمور جامدة وأكاذيب بينما هو ذاته اللي بيشيع الأكاذيب .. والشئ بالشئ يذكر إن كلمة هرطوقي أو هرطقة جت من الكلمة اليوناني هيرسيس اللي معناها انتقاء .. فهو بياخد حاجة صح وجنبها حاجة غلط ويعمل تشكيلة تبدو في النهاية صحيح ولكنه عاقبته الموت.

الهرطقة أو الابتداع وبالتالي الشخص المبتدع .. الكنيسة بتتعامل معاه زي ما الدولة دلوقتي بتتعامل مع الدكتور ده إنها بتكذب أقواله .. بيحذفوه من النقابة .. مش لأن النقابة شريرة ولا لأن الدولة متحجرة ولكن لأجل النفوس اللي ضاعت وبتضيع ورا المعتقدات اللي هو أثارها واللي عمل له تابعين بسببها .. ولما تعمل مقارنة صغيرة .. تشوف إزاي الواحد بيقدر يـinfluence الناس ويخلق تابعين اللي هما followers لمجرد إنه بيتحرر .. والتحرر أو الجرأة من الأمور اللي الناس بيمدحوها خصوصًا في مجتماعاتنا اللي تربت على التقليدية والاستقرار واللي هي مش حاجة غلط بالمناسبة، إنما لأن ده التطرف فدايما بيلاقي مساحة وقبول عند الكثيرين .. حتى لو مش متفق معاه تلاقي نفسك معجب بطريقته .. معجب بجرأته .. معجب إنه (في نظرك) شخص فكر وحرك الثوابت .. اللي هي عاملة مشكلة ومش عارفين نغيرها بينما كل شئ في حياتنا بيتغير.

ومن هنا الكنيسة في تاريخها القديم والحديث لم تتوانى عن إنها تواجه الهراطقة بنوع من الحسم والجدية مع الشرح والصبر لحد ما تلاقي مفيش فايدة وهو متمسك بأفكاره المنتقاه بشكل خاطئ وهايضيع ناس كتير وراه .. تقوم تقرر بفصله عن الكنيسة .. مش لأنها متصلبة الفكر إنما لأنها بتحافظ على جسد المسيح الواحد والكنيسة ذات الإيمان الأصيل، وكمان لأنها بتحذر الشخص ذاته إن الطريق ده هايفصلك عن المسيح للأبد .. وكأنها عقوبة تحمل إنذارًا إن دي هاتفصلك .. من فضلك تراجع وقدم اعتذار اللي هي عندنا تسمى التوبة.

#العوضي