29/08/2026
ممكن تستغرب لما تشوف إننا في التأهيل بنعلّم المصاب يمشي إزاي بالعكازات بعد عملية الرباط الصليبي.
لكن دي واحدة من أول خطوات الحركة بعد العملية، لأن المصاب محتاج يتعلم إزاي يتحرك ويحط الحمل على رجله بشكل آمن ومناسب للمرحلة اللي هو فيها.
العكازات مش معناها إن المصاب مش قادر يمشي، بالعكس، إحنا بنستخدمها كوسيلة تساعده يتحرك بأمان في الفترة الأولى، لحد ما القوة والتحكم في الرجل يتحسنوا.
وبنعلّمه طريقة استخدام العكازات، وتوزيع الوزن، وخطوة الرجل المصابة، وإزاي يحافظ على توازنه أثناء المشي.
ومهم تعرف إن ترك العكازات بدري مش دايمًا معناه إنك بتتعافى أسرع.
لو المصاب لسه عنده ضعف في العضلة الأمامية، أو مش قادر يتحكم في الركبة أثناء المشي، أو عنده ألم أو تورم، فالتخلي عن العكاز لمجرد إنك عايز تمشي من غيره ممكن يخلي طريقة مشيك أسوأ ويحط حمل مش مناسب على الركبة في المرحلة دي.
عشان كده قرار الاستغناء عن العكازات مش بيتحدد بعدد أيام ثابت، لكن حسب حالة كل مصاب وقدرته على المشي والتحكم في الطرف المصاب.
ومع تحسن القوة والتحكم واستجابة الركبة للتأهيل، بنبدأ نقلل الاعتماد على العكازات تدريجيًا لحد ما المصاب يكون جاهز يستغنى عنها.
العكاز مش عيب… واستخدامه مش معناه إنك متأخر.
الهدف مش إنك تسيبه بأسرع وقت، الهدف إنك تسيبه لما تكون جاهز فعلًا.
لأن التأهيل مش سباق، وكل خطوة فيه ليها هدف.
Dr-Muhammad Abd El Aal
اصابات ملاعب مركز التاهيل والطب الرياضي د محمد عبد العال
