Well-Planted Montessori

تكرار الخطأ مع العقاب عليه هو عجز عند الطفل مش عناد،ننتبه🚷
الحل✅
نتدرب على المهارة المطلوبة لتفادى الخطأ
وكل طفل قدرته على الاستجابة مختلفة💪
دمتم بخير
-coach
#أمومة-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

رسالة جاتلى من أُم❤️

أنا أُم وندمانه على طريقة تعاملى مع طفلى الخاطئة خصوصا إنى فهمت كتير عن التربية ودلوقتى عايزة أصلح الأمر.
هل دا ممكن؟
ولا خلاص مفيش فايدة من الإصلاح😔

أكيد حبيبتى الأم فى حل مهما كانت المشكلة كبيرة أو صغيرة
خطوات بسيطة ممكن ترجع الثقة والامان بينك وبين طفلك،
أولها إنك أدركتى إن طريقتك اتسببت فى الإختلال النفسى لطفلك وإن عندك العزم على تغيرها
✅اعرفى سبب إختيارك للطريقة القديمة وهى طبعا طريقة سهلة فى حل المشاكل يعنى شوية زعيق وتخويف والطفل يسمع الكلام ،هى تبان سهلة لكن عواقبها أخطر بكتير،فلابد من الحل الجذرى لاختيارك للطريقة القديمة واللى فى الغالب سببها ضغوطاتك النفسية اللى بتخرجيها فى الصغير المسكين اللى مش فاهم هو عمل إيه؟!
وإنك مش هتكررى الطريقة دى مهما حصل .

🌹اعتذرى لطفلك بطريقة حقيقية من إهانتك له او ضربك أو أى فعل مؤذى وإنها كانت طريقة خاطئة وإنك بتجاهدى نفسك أنك مش هترجعى للطريقة دى تانى

🌹أهتمى بالأحضان والتعبير عن الحب والاهتمام والرعاية النفسية طول فترة الإصلاح وتقدير مشاعر الغضب والحزن عنده بدون تفريط ولا إفراط، الطريقة دى بتنسيه الطريقة القديمة بالتدريج.

🌹إسأليه هل فى موقف هو لسه فاكره ومش عارف ينساه ولسه بيتألم منه؟
ولما يجاوب أسأليه، كنت تحب أعاملك إزاى فى الموقف ده وأعتذرى عن الموقف وإنك مش هتكرريه معاه وهتتعاملى باللى يحبه.

وأخيرا
لو عملتى كل ده وحسيتى إن طفلك لسه متأثر بالطريقة القديمة وإنك مش عارفه تساعديه أو تتخطى صدمات معينة من الألم معاه ومأثرة على سلوكه ومشاعره فمفيش مشكلة إنك تطلبى المساعدة من متخصص يساعدك فى بناء الثقة لطفلك وتحسين سلوكه.

دمتم بصحة وعافية وربنا يحفظ أولادنا جميعا❤️
-coach
#أمومة-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

أم بتحكيلى وبيتقولى أنا نفسى اكون أم مثالية زى ما بتقولوا ،أعبر عن حبى لولادى وأكون هادية معاهم واسمعهم ،لكن بحاول كتير وبفشل لأن صبرى بينفذ وآجى آخر اليوم أجلد فى نفسى على عنفى مع اولادى وقلة صبرى😢
حبيبتى الأم
أنا عايزاكى ام حقيقية مش أم مثالية يعنى أم تزهق وتغضب وتمل من كتر الاسئلة عادى جدا لأننا بشر مش ربوتات لكن ممكن نعبر عن دا بشكل مختلف ومتزن
وأعرفى إن الاولاد الهاديين المطيعين دول فى الحقيقة أطفال خايفين خاضعين مسروق منهم طفولتهم أقبلى طبيعة كل مرحلة من حياة اطفالك هتعيشى بهدوء واتزان🌹
-coach
#أمومة-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

مقدرة خوفك المرضى من التحرش الجنسى لأولادك لإنك تعرضتى لنفس المشاعر،لكن لو فكرتى كويس هتلاقى إنك وقتها لم يُتبع معاكى احطياطات السلامة،الآن خدى بالاسباب واتبعى قواعد السلامة واستودعيهم لله خلى سعيك مرتبط بحفظ الله لهم ويقينك أنه خيرٌ حافظا وهو أرحم الراحمين
-coach
#أمومة-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

ليه إبنى مش بيحكيلى عن تعرضه للتحرش😔!!!!؟

هقولك سببين من أهم الاسباب اللى تخلى الطفل مش بيتكلم.
أولا🖊️
المحاسبة الشديدة والمستمرة على كل خطأ دون السؤال عن سبب الحظأ أو مساعدة الطفل فى فهم مشاعرة حين وقوع الخطأ فبيعتقد الطفل إنه مشترك مع المتحرش فى الخطأ فلا يستطيع أخبار الأم ، وهنا دور الأم فى التغافل لأن
أوقات بتعمد الخطأ لجذب الإنتباه مثلا أو للأستكشاف أو أختبار صبر الأم وحبها له
ثانيا🖊️
التوقعات.
لما تكون الأم مثالية أو تسعى لذلك فبينطق ده على أطفالها بمعنى إنها عايزاهم أطفال مثاليين بدون أخطاء وكل شئ على أكمل وجه،واجبات تنظيم تنفيذ مهام إطاعة أوامر ، يعنى تربية زى ما بيقول الكتاب، وهنا الطفل بشعر إن عليه مسؤلية كبيرة على المستوى السلوكى والأخلاقى فيخاف يخيب أمل الأم فيه فميقدرش يشرح ما تعرض له من إنتهاكات لأنه بيظن إنه مشترك مع المتحرش فى الخطأ.
هنا دور الأم فى تطمين أولادها دائما وتقوله أنا معاك انا فى ظهرك وفى صفك مش ضدك فى أى شئ تتعرض له، أنا هساعدك مش هلومك، أنا مش هيخيب أملى فيك لانى بحبك.
طمنوهم علشان يسهل عليهم إنهم يحكو لو تعرضو للتحرش

-coach
#أمومة-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

السلوك 🤌وراه شعور🙇‍♀️

يعنى قبل ما تضيقى من سلوك إبنك فكرى إيه الشعور اللى خلاه يعمل السلوك ده؟

✨لو ابنك مبقاش يحب يقعد معاكى وبيفضل يقعد فى اوضته أو الخروج عند جدته مثلا أو خالته فدى علامة إن الامان من ناحيتك مهزوز ومبيحسش بالامان فى وجودك

✨مهما اتكلمتى معاه مبيسمعكيش غير لما تدخلى فى نوبة الغضب والزعيق يبقى دى لغتك الاساسية معاه.

✨أول ما يشوفك يعمل حركات كلها استفزاز ويحاول يحرك غضبك يبقى العلاقة بينكم مبقاش فيها راحة وقبول ، محتاجة تتقبلى ابنك بكل ما فيه يعنى حب من غير شرط.

✨لو لاحظتى الكذب المستمر من إبنك يبقى علامة على الخوف من العقاب بسبب التضيق المستر والمحاسبة على كل كبيرة وصغيرة.

✨مبيطلبش منك تعلبى معاه يبقى دى علامة على عدم وجود رابط مشترك بينكم، اللعب مش رفاهية دا بناء لعلاقة قوية كلها حب وثقة.

✨لو كل شوية يقولك إنت مبتحبنيش أو أنا وحش حتى لو بيقولها بنبرة استهزاء إعرفى انها صرخة قوية من جواه عايز يقولك أنا محتاجلك يا ماما أحضنينى.

✨كل اللى بينك وبينه أوامر وأعمل ومتعملش مش هيحس إن له قيمة عندك غير من خلال فعله
يعنى حب مشروط

✨عناد ورفض لكل اللى بتقوليه يبقى وسيلة لجذب الانتباه أو محاولة للاستقلاليه بسبب حصارك له باتباع الأوامر.

✨الصراخ المستمر يبقى الطفل دا معندوش القدرة عن التعبير عن مشاعرة أو مش عارف يعبر عن احتيجاته.

لو لاقيتى علامة او اكثر يبقى علطول تحسنى علاقتك به لان دا مجرد إنذار لخطر أكبر محتاج منك وعى وفهم.

العلاج.
إبدأى علطول تحسنى العلاقة بينك وبينه زى،
.حضن بدون اسباب.
.جملة أنا بحبك فى كل أحوالك.
.وقت خاص بينك وبينه.

-coach
#أمومه-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

كل ما أشوف مشاكل الأمهات اللى اعرفها مع اولادهم المراهقين أخاف على اولادى😥

يا ترى أنا بربى صح؟
يا ترى اولادى هيطلعو أسوياء؟
يا ترى هعرف أساعدهم يحبو نفسهم ويعيشو براحة ورضا وسعادة ؟

أسئلة كتير بتدور جوايا وحاسة بالخوف والقلق😔

أقولك أنا يا ست الكل تعملى إيه علشان تتجنبى كل اللى شوفتيه وبتخافى منه بعون من الله وفضله😊
مهارات لابد من إنك تعلميها لإبنك قبل سن 16سنة
ليه قبل 16سنة لإنه بدل ما يتعلمها منك بسهوله هيتعلمها من صعوبة الحياة.
المهارات دى بتبنى إنسان قوى سوى قادر يحب نفسه ويتعاطف مع غيره ويساعد نفسه فى كل موقف ويقدر يتخطى المشاكل بفضل الله ورحمته

1- إدارة المشاعر.
إزاى يقدر يعبر عن غضبه ويفهم إن الغضب شئ طبيعى إنه يحصل لكن إزاى أقدر أعبر عنه وافرق بينه وبين الغضب اللى بيكسر فيه او يأذى نفسه او غيره وإزاى يقدر يضبط غضبه بالتدريب فى المواقف اليوميه

2- الصورة الذاتيه.
لو إبنك قالك أنا فاشل أو غبى أو حسيتى إنه فاقد الثقه فى نفسه، خدى بالك إن ممكن تكون دى طريقة النقد بتاعتك معاه فيشوف نفسه زى ما أنتِ شيفاه وبالتالى هيعيش بنفس الشعور أو يحاول يثبت عكسه بكل طريقة حتى لو غلط، دورك إنك تظهرى الإيجابيات اللى موجودة عنده، مثلا أنت معاون أنت شجاع ،وشجعيه على الحاجات اللى مش موجوده فيه يعنى مثلا إيه رأيك ننظم البيت سوا.

3- التعاطف والمشاركة.
هل لاحظتى إنه مبيعرفش يتعاطف مع اللى حوليه أو مبيحطش نفسه مكانهم، هنا دورك بكل سهولة إنك تغرسى فيه ده.

4-المبادرة وتكوين الأصدقاء.
هل لاحظتى إنه بيعرف يتعرف على ناس جديدة وبيعرف يكون صدقات هل هو اللى بيبدأ أولا ولّا بينتظر الناس تتعرف عليه

5-التفاوض مع الآخرين وحل المشكلات.
إبنك بيتخاق كتير ؟ بينسحب؟ بيعيط لما ميعرفش يتفاوض مبيعرفش يشرح وجهة نظره للى قدامه، دورك تعلميه مهارة التفاوض وشرح الأسباب ووجهة نظرة فى المشكلة ودا كمان بيكون من خلال أسئلتك له أثناء المشكلة .

6- القيادة والعمل الجماعى.
هل لاحظتى إنه بيقود مجموعة من الأطفال أثناء اللعب بحب وتفاهم ولّا بيتحكم ويفرض رأيه ولّا بينقاد من غير ما يفكر و يكون له رأى، هو هنا محتاج ازاى يكون وسط مجموعة وأعرف أنجح والكل ينجح معايا من خلال التفاهم والتعاون بينهم وأزاى يعرف يصلح بين اصحابه وقت الخلاف،
دى مهارات بيتعلمها من خلال المواقف المتكرره.

7- إدارة الوقت والتخطيط.
هل إبنك بيسوف فى عمل واجباته، هل مبيعرفش ينجز المطلوب منه فى الوقت المحدد،هل بينسى مسؤلياته وبيحتاج منك تفكرية بإستمرار،
مهارات التفكير والتخطيط من أهم أدوات الحياة لابد إنه يتعلمها ويتدرب عليها
مثلا كتابة جدول لمهامه المطلوبة منه يوميا والوقت المطلوب إنجازها فيه حتى لو كانت مهام بسيطة، مش مهم تكون منظمة بنسبة 100٪ لكن يكون عنده القدرة على الاعتماد على نفسه فى تأدية مهامه بنسبة كبيرة.

8- الذكاء المالى.
إبنك لو بياخد مصروف مبيعرفش يوفر منه؟
او حتى يكفيه المدة المحددة؟
يبقى دى مهارة مهمة لابد من التدريب عليها ومتقوليش لسه صغير، علميه إزاى ينظم إحتيجاته على قد مصروفه والمرحلة اللى بعد كده إنه يوفر منه ولو جزء بسيط.

9- النظافة الشخصية والتغذية السليمة.
هل بيعرف ينظف أسنانه لوحده ويغسل إيدة ووشه بعد الأكل ويربط حذائه؟
هل بيفرق مابين جعان وزهقان ومتضايق؟ هل بيتضايق لو هدومه مش نظيفة؟
هل عارف الاكل الصحى والغير صحى وإن الاكل الغير صحى بيأثر على صحتنا ومزاجنا وإن بسببه ممكن نشعر بالغضب أو القلق.

10-اللياقة والذوق والأدب.
هل عنده مهارات الذوق أثناء الكلام وأختيار الكلمات الطيبة؟
تقدرى تعلميه هذه المهارة بسهوله من خلال القدوة الحسنة والتنبيه المستمر على إختيار الكلام الطيب والالفاظ الحسنة.

11- الإنتباه والتركيز.
من أهم المهارات التى لابد من إنك تتأكدى إنها موجودة فى إبنك لإنه ممكن يكون ذكى ولكن قليل الإنتباه والتركيز ودا محتاج تدريب على مهارات الانتباه والتركيز ودى بتكون سهلة وممتعة للأطفال لأن أغلبها عبارة عن لعب مسلى بالنسبة لهم.

12-التعليم الذاتى والتفكير النقدى.
هل إبنك بيحتاج حد ديما يقوله تعمل إيه ولا عنده فضول وأسئلة عن كل حاجة جديدة عليه زى،ليه؟ وإزاى؟ مش مجرد تقليد بدون تفكير.

13- التفكير الإبداعى والتحليل النقدى.
هو التفكير خارج الصندوق والربط بين السبب والنتيجة وتحليل المواقف ودا ممكن يتعلمه من خلال طرح الأسئلة والقصص والمواقف.
دى مهارات أساسية فى حياة إبنك لو أتعلمها خلال فترة الطفولة هتتجنبى الكثير والكثير من المشاكل فى المراهقة بفضل الله ورحمته.
دمتم طيبين.
-coach
#أمومه-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

بما إننا عارفين إن فى إضطراب اسمه ADHD وبقى منتشر بين الاطفال وأمهات كتير بتعانى منه
✍️ يلا بينا نعرف شوية نقاط عن الاضطراب ده

هو إضطراب نمائى للتركيز الفائق وفرط الحركة
🫴 تعالو نركز شوية على الكلمة دى(التركيز الفائق)
يعنى ابنى مش هيعانى من قلة الفهم او هيواجه صعوبات فى التعلم خلال الدراسة😉
لكن هيكون عنده صعوبة فى التركيز لفطرة طويلة ودا طبعا سببه فرط الحركة.
لكن فى حالة إن النشاط اللى بيقوم به الطفل مثير له او بيحبه او من ضمن شغفه زى ما بنقول هتلاقيه فى قمة التركيز والفهم🧐 (نقطة مهمة جدا هنتكلم فيها فى آخر البوست)👌

طيب لو ابنى مصاب بADHD هيعيش حياة طبيعية ويكون شخص ناجح😔
تعالى أفجأك واقولك😎
إن فى ناس من أشهر الشخصيات كانت مصابة بADHD
زى مين❓
مايكل جوردن..لاعب كرة سلة أمريكى
ألبرت أينشتاين...العالم الفزيائى المعروف
وغيرهم كتير ومنهم شخصيات عربية وعالمية معروفة
يعنى الإضطراب ده ميمنعش إبنى من النجاح❓
لأ طبعا وبكل ثقة💪
طيب ازاى أساعد إبنى علشان يكون شخصية ناحجة🤔
أولاً الرياضة
ممارسة الرياضة أول شئ فعّال لأبنى فى العلاج من هذا الإضطراب
ممكن تكون ألعاب فردية
مثل
التنس-الجولف-السباحة
أو ألعاب جماعية
مثل
كرة السلة-كرة الطايرة

طيب تعالى نفهم الرياضة هتساعدة ازاى🫵
1- تحسين الإنتباه والتركيز
2- تقليل الحركة الزائدة
3- تحسين التنظيم والخطط
4- زيادة الثقة بالنفس
5- تقليل الإكتئاب والتوتر ودى أهم نقطة

ثانياً
العلاج الدوائى
لانها بتحسن النواقل العصبية اللى هى السبب الرئيسى فى إضطراب ADHD وبالتالى بتحسن التركيز ويقلل زحمة الافكار اللى فى دماغة

ثالثاً
الكوتشنج
يعنى المرافقة والتدريب لأنه هيساعده كتير فى تنظيم المهام والتخطيط وتعزيز المهارات الإجتماعية والتواصلية وتقديم الدعم العاطفى وتقليل التوتر والقلق
وكل دى نقط مهمة جداااا

والنقطة الأخيرة اللى قلنا هنتكلم عنها بعدين هى ازاى استغل تركيزه الفائق على الشئ اللى بيحبه ويكون تركيزة فيه عالى جدا👏🏻
أشوف إبنى بيميل لأيه من النشاطات أو الفنون أو الرياضة وأدعمه فى الاتجاه الصحيح اللى ممكن يكون باب لنجاحه فى حياته العمليه بعدين
لان المصاب بإضطراب ADHD بيحتاج دعم وتوجيه وتنظيم للأفكار
فلابد من دعم أولادنا والاستفادة من المهارات الجيدة عندهم للتقدم والنجاح.
تحياتى

-coach
#أمومه-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

قالولى إبنك عنده إندفاعية😥
يعنى ايه إندفاعية🤔
تعالى أقولك😎
يعنى طفل مش بيستخدم عقله خااالص فى أى تصرف وتحسى إنك مهما وجهتى وعلمتى مبيتعلمش
🥰حبيبى قبل ما تدخل على ماما لازم نخبط على الباب✊
يفتح الباب مرة واحدة وبدون إذن
🥰حبيبى متاخدش اللعبة من اخوك غير لما تستأذنه
تلاقيه اخدها غصب عنه ويمكن لو رفض يكسرها
🫩ممكن تلم حاجتك بعد ما تلعب بيها
تلاقى الدنيا على بعضها عاليها واطيها🤕

كلم عمو بأدب يا حبيبى مينفعش تعلى صوتك كدا عيب تلاقيه بيقول اللى جواه من غير ما يفكر🤒
ونفضل نصحح ونعلم ونتكلم ونطول بالنا وكتير نزهق ونتعصب لان فعلا التصرفات مستفرة جدااا
لكن دا بأثر بالسلب على نفسيته ودى مش أحسن حاجة
هو فعلا طفل مش قادر يضبط سلوكه لأن مهاراته ضعيفة جدا
طب والحل😄
ببساطة يتعلم نشاطات فيها مهارات للتفكير
زى البازل بمستويات بسيطة ونعلى بمستوى النشاط معاه وزى نشاطات السيكوموترز لانها بتعلم الطفل الصبر وهو دا اللى الطفل محتاجه
صبر وتركيز لعلاج الاندفاعية👌
-coach
#أمومه-سعيدة
#تعديل-سلوك
#تربية-إيجابية
#مدرب- مونتيسورى- دولى
#إرشاد-نفسى- أطفال
-Tuhami

التحفيز العصبي الحسي الحركي القائم على منهج جلين دومان هو أحد الأساليب التي طوّرها الطبيب والعالم الأمريكي Glenn Doman من خلال عمله مع الأطفال بهدف تحفيز الدماغ في سنوات الطفولة المبكرة.

يعتمد هذا المنهج على مبادئ التحفيز المبكر التي تؤمن بأن دماغ الطفل قادر على النمو بشكل مذهل إذا تعرض للمنبهات الحسية المناسبة في الوقت المناسب، خاصة خلال السنوات الست الأولى من العمر.

أهمية برنامج التحفيز العصبي الحسي الحركي القائم علي منهج جلين دومان
✅ تؤدي تدريبات التحفيز العصبي الحسي الحركي الى تكامل المنعكسات الاولية، حيث نقوم باعادة عمل المنعكسات الاولية والتي كان المفروض ان يقوم بها الطفل بطريقة تلقائية عن طريق انشطه حسيه وحركيه تساعد علي تطور مستويات الدماغ من اسفل الي اعلي لتحسين كفاءه القشره المخيه وتحسين عمل فصي الدماغ الايمن والايسر وبالتالي تتكون الوصلات العصبية والتشابكات العصبية بالمخ وتقوى وتنشط .

🔺هذه التدريبات ذات اهمية بالغة لتكوين الوصلات العصبية بالمخ وتغطيتها وتعزيزها بالمادة البيضاء (الميالين). كما انها مهمه جدا للقدرة على التحكم في رفع الرأس وضبط نغمة العضلات ووضعية الجسم في الفراغ والحركة بسهولة وسرعه رد الفعل و تصبح الفرصة متاحة للتعلم والتواصل والاتزان العاطفي والسلوكي والحركة بسهولة وكذلك القدرة على تطور كل هذه المهارات.

✅ فوائد هذا المنهج:
🔺تعزيز نمو الدماغ بشكل متكامل (سلوكي، معرفي، حسي، حركي).
🔺تطوير المهارات اللغوية والمعرفية في سن مبكرة.
🔺مساعدة الأطفال ذوي القدرات الخاصة على اكتساب مهارات لم تكن ممكنة بطرق تقليدية.
🔺تحسين الانتباه والتركيز والذاكرة والتنظيم الحسي.
🔺مهم جدا لتحسين قدرات الأطفال أصحاب صعوبات التعلم
🔺يساعد في حل مشاكل فرط الحركة وتشتت الانتباه والوعي بالجسم وعسر القراءة وعسر الكتابة وضعف التركيز وضعف التأزر و المشكلات السلوكية وضعف الادراك
⛔️عن طريق
1.التحفيز الحسي (Sensory Stimulation): يتضمن تعريض الطفل لمجموعة متنوعة من المنبهات الحسية (البصرية، السمعية، اللمسية، الشمية، والذوقية والدهيلزية)، بطريقة منظمة ومتكررة ومحفزة للدماغ.
2.التحفيز الحركي (Motor Stimulation): يتضمن تمارين تساعد على تطوير القدرات الحركية الكبرى (كالزحف والمشي) والدقيقة (كالحركة الدقيقة لليدين)، وذلك من خلال برامج حركة مدروسة تبدأ من مراحل مبكرة جداً.
3.التكامل الحسي الحركي (Sensorimotor Integration): الهدف هو أن يتكامل النظام العصبي الحسي مع النظام الحركي، بحيث يستجيب الطفل للمنبهات الحسية بحركات مناسبة، مما يعزز نمو الدماغ وتنظيم وظائفه.

محمد خالد
أخصائي تكامل حسي وتحفيز عصبي
sensory world center

-coach
#أمومه-سعيدة
#تربية-إيجابية
#تعديل-سلوك
#مدرب- مونتيسورى- دولى
#إرشاد-نفسى- أطفال
-Tuhami

إبنى مطلع عينى والله يا مس ومش بيسمع الكلام ولا بيكتب الواجب وطول النهار شقاوه وعند وعدم سمعان الكلام🥹
ورقة وقلم واكتبى معايا يا ست الكل😁
قوانين الحزم🤓
حياة بلا مسؤليات= حياة بلا امتيازات☝️
بعد ما قعدت واتكلمت معاه وحسيت إن معندوش مشكلة حقيقيه يعنى تعبان مش واخد حقة فى الترفيه واللعب أسألة؟
مالك يا حبيبتى مش عايز تكتب الواجب ليه😇
مبحبش الواجب يا ماما بحب العب وبس 😸
طيب شوف لو مكتبتش الواجب مفيش لعب بالالعاب انهاردة
أو مفيش وقت الشاشة
أو مفيش خروج عند تيته
وهكذا الحاجات اللى بيحبها
وانفذ اللى قلته بكل حزم وهدووووء💅
يتنطط بقى يصرخ يدبدب
أنا اكون هاديه وانفذ
مرة على مرة هيفهم انى مصممه على قوانين اللعب والمذاكرة اللى متفقين عليها
ونفس طووويل💆‍♀️
ولو عمل مرة اديله حاجتين مثلا بالونتين او 2شيكولاته
علشان المرة اللى مش هينفذ فيها الواجب كامل ياخد واحدة بس ودا اسمه عقاب بسحب بعض الامتيازات ولو رجع يهتم زودى اميازات ونوعى فيها كمان
ودى مش رشوة لأ دى امتيازات علشان هو مؤدب ونفذ الاتفاق
وخدى بالك ممكن يكون الخطأ المتكرر منه ضعف مهارة يبقى هنا محتاج دعم منك مش عقاب
زى ما تكونى بتعاقبى بيبى على لبس بامبرز وهو لسه مش مدرك يعنى ايه حمام

تحياتى- -coach
#أمومه-سعيدة
#تربية-إيجابية
#تعديل-سلوك
#مدرب- مونتيسورى- دولى
#إرشاد-نفسى- أطفال
-Tuhami