Ebdaa Academy - أكاديمية إبداع للتدريب والاستشارات

ازاي تتأكد ان المجال اللي اخترت تكمل فيه هو المناسب ليك؟

1- التجربة
التجربة هي اللي هتخليك تعرف ان المجال دا مناسب للمهارات اللي عندك أو غير مناسبة، لكن المشكلة ان الناس بتخاف تجرب، خايفة تفشل، أو تتصدم ان المجال دا مش مناسب ليها. التجربة هتعلمك وهتخليك تكتشف في نفسك مهارات وقدرات جديدة، ولو المجال دا مش مناسب ليك هتقدر انك تكتشف مجالات تانية مناسب لقدراتك.

2- اتبع شغفك
اتباع الشغف أكبر كذبة كانوا بيضحكوا بيها على الناس خصوصًا الطلبة واللي لسه متخرجين، عشان كدا "كال نيوبورت" اتكلم في كتابه "So good they can,t ignore you" ان اتباع الشغف مش صحيح في كل الأوقات ولا مع كل الناس، ودا راجع لنظام التعليم اللي بيعتمد على الحفظ وعدم التدريب والتجربة، بالتالي اتباع الشغف هيخليك يا اما تايه وفي الأخر هتلاقي نفسك بتشتغل مجال مش حابه أو هتلاقي نفسك بتحب حاجات كتير ومش قادر تكرر تكمل في ايه.

وأكد كال ان لازم يبقى عندك "عقلية الحرفي" مش "عقلية الشغف" بمعني انك تقرر المجال اللي هتكمل فيه بعد ما تجرب أو تقرأ عن مجالات كتير وتبدأ تشوف المهارات اللي عندك مناسبة لمجال ايه بالظبط.

3- ابني مجال لنفسك
ابني لنفسك Career Capital أو قاعدة قوية في مجال معين من خلال النتائج اللي حققتها من التجارب، وعشان تعمل دا لازم تستغل فترة الجامعة وتجرب فيها المجالات اللي شايف انها هتناسبك.

4- اعرف هتختار المجال ازاي
سايمون سينك أتكلم في TEDx عن الـ Golden circle اللي بتتكون من (Why – How – What) وقال ان ممكن اتنين يكونوا في نفس الكلية وبيذاكروا مع بعض وبياخدوا نفس الكورسات وفي نفس الوقت واحد منهم يجيب امتياز والتاني يجيب مقبول أو جيد.

عشان كدا قبل ما نعمل الـ What لازم نعرف الـ Why وايه القيمة اللي هنقدمها وتضيفها، لأن مهم جدا نبقى عارفين كل خطوة بنعملها بنعملها ليه وهتضيفلنا ايه وازاي هقدر استغلها لصالحي.

كمان من الحاجات المهمة جدًا انك تعرف من خلالها المناسب ليك هي معرفتك بنفسك وقدراتك، ومن الحاجات دي اختبار MBTI لتحليل الشخصيات، تقدر تعمله من هنا: shorturl.at/FV289

طريقك نحو الإبداع...!

"أنا لست مخترع أو عالم كي أبدع وأبتكر، إن ما يحدث في عملي أشبه بالروتين القاتل، وكل ما أحرص عليه هو أن أنهي ساعاته بسلام".

الجملة دي كفيلة إنها تأدي لفشل أي مؤسسة، وده بيحصل لما الموظفين يلاقوا نفسهم وسط روتين الشغل اللي بيخليهم مش عارفين يقدموا أي شيء جديد يذكر في وظائفهم أو لشركتهم، وده بيأثر على طاقتهم وأدائهم في العمل.

مفيش شركة بتنجح بدون موظفيها، مشاركة أفكارهم واقتراحاتهم، الاستعانة بأرائهم، كل دي حاجات أساسية لا يمكن لأي شركة إنها تستغنى عنها، ودا اللي بيدفع الموظف إنه يأدي عمله بإبداع.

ودي مهمة كبيرة بالنسبة للشركات، وعشان يتحقق الهدف ده، لازم تبحث عن خبراء ومدربين لتدريب وتنمية مهارات الموظفين لتحقيق هدف الشركة في النجاح والاستفادة من قدراتهم ومهاراتهم.

كمان من أهم العوامل اللي لازم تتوفر في الموظفين والمديرين هي الثقة، الثقة هي اللي بتساعد على ظهور مهارات الموظفين، بدون ثقة الخوف هيأثر على أدائك كموظف، ومشاركة أرائهم في اتخاذ القرارات المهمة، وده دور الإدارات العليا والمديرين في أنها تدي الثقة والفرصة للموظفين انهم يشاركوا في إنجازات الشركة.

ستيف جوبز في تحفيزه للموظفين على الإبداع والابتكار في العمل، قال "لا يهمني أن أكون أغنى رجل قدر ما يهمني أن أعود للفراش في المساء وأنا أشعر بأنني قمت بشيء رائع"

والحقيقة ان اللي بيقدموه الموظفين هو نظام وأساليب مزروعة فيهم من البداية ودي مجرد نتيجة للأشياء المزروعة فيهم، فالروتين ونظام الشغل له تأثير كبير عليهم، لأن الموظف زي ما عودته من البداية.

السؤال هنا ايه الطرق والأساليب اللي بتعزز الإبداع والابتكار في الموظفين؟
1- الجانب المعرفي: زيادة طرق ومصادر المعرفة للموظفين وتدريبهم من أهم الطرق اللي تساعد على تنمية قدرتهم الإبداعية والفكرية، فالاستعانة بالخبراء والمدربين هو الحل الأمثل لتحقيق الجانب المعرفي لديهم.
2- المناخ والبيئة الإبداعية: الإبداع والابتكار لا يتحققوا وسط بيئة ومناخ غير مناسبين، فالحرية في العمل وعدم التقيد وتوفير بيئة مناسبة للتفكير والابداع، كل ده يساعد الموظفين على الإبداع والابتكار في العمل.
3- حب ما تعمل: الحب من أهم العوامل اللي بتدفع أي فرد للنجاح والتميز في جميع مجالات الحياة، وحب عملك يساعدك على الإبداع والابتكار فيه، لأن عدم حب اللي بتعمله هيأدي لضياع وقتك ومجهودك بلا فائدة.

أخيرًا، أساليب وطرق تحفيز الموظفين كتير، لكن المهم هو انك تمنحهم الحرية في وظائفهم وعدم تقيدهم بأساليب إدارية هتضرهم أكثر ما هتنفعهم.
تفتكر ايه أكثر شيء يخلي الموظفين تحب شغلهم وتبدع فيه؟

ازاي المرء بيتعافى بأصدقائه؟

زي ما بنقول كدا ان الشركة هي بيتنا التاني ودا لأنك لو حسبت الوقت اللي يتقضيه في الشغل هتلاقيه تقريبا أكتر من الوقت اللي بتقضيه في بيتك، والطبيعي ان المكان اللي تقضي فيه وقت كبير المفروض تكون مبسوط فيه، وبما ان معظم وقتك بتقضيه في الشغل فلازم تبقى مرتاح ومبسوط في شغلك مهما كانت الصعوبات والمشاكل اللي بتواجهها.

ومن أهم العوامل اللي تساعدك تكون مرتاح في شغلك هي علاقتك بزملائك في الشغل لأن هم اللي بيساعدوك في شغلك وبيهونوا عليك ضغط الشغل، عشان كدا لازم علاقتك بيهم تكون ناجحة، وعشان تعرف تكون علاقات اجتماعية ناجحة مع زملائك لازم تتبع الخطوات دي:

1- بادر بالمساعدة:
خليك دايمًا انت اللي تبدأ بالمساعدة، وتفاعل معاهم في مشاكلهم وشاركهم برأيك وقت ما يطلبوا منك لأن دا أكتر حاجة هتخليهم يحبوك ويتقبلوك بسرعة.

2- استغل المناسبات والأحداث:
الرحلات اللي الشركة بتعملها، أعياد الميلاد، المناسبات الخاصة بزملائك، كل دي مناسبات هتساعدك أنك تقرب منهم أكتر، فلازم تستغلها.

3- شاركهم في الأكل:
"هنفطر ايه؟" :D
السؤال الأشهر على الإطلاق كل يوم، شاركهم في الفطار، اعزمهم، اسألهم هنفطر ايه النهاردة، اقترح عليهم تخرجوا أخر اليوم بعد الشغل وتروحوا تتغدوا في أي مكان.

4- ضيف زمايلك على مواقع التواصل:
ضيفهم على الفيس بوك أو الانستجرام أو الواتساب، بس خلي بالك ان دا هييجي بالتدريج مش من أول يوم تضيف الشركة كلها، دا هيخليهم على تواصل بيك دايمًا حتى لو متكلمتوش.

والأهم من كل دا لازم تكون عندك مهارات تواصل جيدة عشان تساعدك وانت بتتعرف على ناس جديدة، داه يسهل عليك كتير جدًا، لأن من غير مهارات التواصل هتعاني كتير وانت بتتعامل مع زملائك في الشغل وهتاخد وقت كبير عشان تتعرف عليهم.

شاركنا بتجربتك في أول يوم شغل وازاي قدرت تتعرف على زملاءك في الشغل؟

ايه العلاقة اللي بتربط بين الخبرة والفلوس؟

الطبيعي ان كل ما الخبرة تزيد الفلوس كمان بتزيد، ولازم تعرف ان أول 10 سنين شغل هم اللي بيحددولك مرتبك هيوصل لكام باقي السنين الجابة، عشان كدا وانت في بداية حياتك العملية قبل ما تدور على مرتب دور على مكان تتعلم منه ويزودك خبرة.

شغلك في شركة كبيرة في بداية حياتك المهنية هو سلا ذو حدين، الحد الأول هو الإحساس بالأمان طول ما انت شغال في الشركة وبتاخد مرتب عالي، أما الحد الآخر هو وقت ما تحب تغير شغلك وتروح لشركة تانية، وقتها هتبان مستوى خبرتك هل فعلا المكان اللي كنت فيه كان بيضيفلك جديد ويزودك خبرة ولا كان مجرد مهمة بسيطة بعملها كل يوم كروتين يومي.

عشان كدا لازم في الأول تدي الأولوية للتعليم وتضحي ولو بالقليل من الفلوس، لأن التعليم هو اللي هيزود خبرتك مع الوقت، معرفتك وخبرتك كل ما تزيد مرتبك هيزيد، كمان تأتي أولوية التعليم في بداية عملك لأن القدرة على التعلم بتقل مع الوقت.

الخلاصة ان فيه 3 أشياء لازم تعرفهم:
- ان الأولوية ليك بعد التخرج هو التعلم وليس الفلوس.
- الشركات الكبيرة نسبة التعلم فيه بتبقى أقل من الشركات الصغيرة.
- أي شركة تروحها لو لقيت انها مش بتضيف لك جديد لازم تسيبها وتشوف شركة غيرها في أسرع وقت.

شاركنا بإبه أكتر حاجة لازم نركز عليها خصوصًا بعد التخرج؟

5 كتاب رشحها بيل جيتس يجب أن تقرئها...!

في كل عام يرشح لنا بيل جيتس مجموعة من الكتب في مجالات مختلفة سواء تاريخية أو خيالية أو السير الذاتية لبعض الأشخاص التاريخيين. وأهم الكتب اللي تم ترشيحها السنة دي هي:

1- السيرة الذاتية لـ "ليوناردو دافنشي" - تأليف والتر إيزاكسون
وفيه يسرد الكاتب السيرة الذاتية لليوناردو دافنشي اللي اشتهر برسمه على الرغم من تعدد اهتماماته في مجالات أخرى كعلم التشريح وفنون المسرح. من انبهار بيل جيتس بدافنشي دفع 30 مليون دولار في مقابل الحصور على مذكرة علمية له باسم "مخطوطة ليستر".

2- "كل شيء يحدث لسبب وأكاذيب أخرى أحبها" - تأليف كيت بولر
تروي كيت في الرواية دي كواليس رحلتها في فهم ما يحدث لها بعد أن تم تشخيصها بسرطان القولون بعد أن كان في مرحلة متقدمة. تتساءل كيت إن كان ده اختبار لها أم في رواية تجمع بين الإيمان والاقتراب من الموت، وتقدم لنا قائمة من 6 طرق لدعم الأشخاص بشكل مجدي.

3- لينكولن في المقبرة (Lincoln in the Bardo)
بعد قراءتك للرواية دي هتعرف أشياء لم تكن على علم بها بالرئيس الأمريكي الأسبق "ابراهام لينكولن"، برع الراوي "ساندرز" في الجمع بين الحقائق التاريخية عن الحرب الأهلية وعناصر خيالية تمثلت في حوار دائر بين 166 روح لأشخاص من بينهم ابن لينكولن المتوفي.

4- قصة الحياة: تاريخ كل شيء - تأليف ديفيد كريستيان
وفيه يحكي الكاتب قصة الكون بدءاً من نظرية الانفجار العظيم إلى المجتمعات المعقدة الموجودة اليوم، ولو دي أول مرة تطلع على تاريخ الكون يبقى الكتاب ده هيكون بداية أكثر من رائعة.

5- الوقائع (Factfulness) ، تأليف هانس روسلينج
يقسم روسلينج في الكتاب سكان العالم إلى 4 مجموعات من حيث الدخل. بحيث يعيش مليار شخص في المستوى الأول وينامون على التراب ويقضون معظم أيامهم وهم يمشون حفاة أملاً في الحصول على المال. وفي الطرف الآخر، يمتلك مليار شخص أفخم السيارات بدون حتى تكبد عناء العمل لـ6 أو 8 ساعات في اليوم، وبين المجموعتين تقع مجموعتان متوسطتان، ويحاول الكتاب أن يبين لنا ما يمكن أن يمنعنا من رؤية العالم بواقعية.

شاركنا بأهم الكتب اللي شايف انها فرقت معاك لما قرأتها أيًا كان مجالها؟

هل تعلم ان 3 مليون موظف تم تسريحهم خلال عامين، من 2015 إلى 2017 حسب دراسة إحصائية لـ "مكتب إحصاءات العمل".

خسارة الوظائف وتسريح الموظفين أصبح أمر عادي بالنسبة لتدهور اقتصاد البلاد، ويرجع سبب تسريح الموظفين لإعلان إفلاس بعض الشركات المتوسطة والصغيرة ودمج البعض الآخر.

الموظفين اللي تم تسريحهم ممكن نقسمهم لنوعين "المتكررون، ومتغيرو الأهداف"، المتكررون ممكن نقول عليهم المحافظين على نمط حياتهم، بيميلوا دائما للبحث عن وظائف تشبه وظائفهم اللي تم تسريحهم منها، بيكونوا علاقات قوية مع زملائهم في العمل، بعضهم يرى ان السبب الرئيسي لاستمرارهم في العمل هم أصدقائهم وليس العمل نفسه.

أما النوع الثاني "متغيرو الأهداف"، هم عكس المتكررون، بعد تسريحهم بيبحثوا عن وظائف في مجالات جديدة مختلفة عن مجالهم، معظمهم يتجه لريادة الأعمال وإنشاء المشاريع، دائما ما يبحثون عن فرص لاستخدام مهاراتهم بطريقة جديدة ومختلفة، فمثلا المحاسب في البنك يرى أنه لو استخدم مهاراته في شركة أخرى سيعود عليه بفائدة أكبر، المتغيرون كانت علاقاتهم في العمل ودية ومهنية ولم يهتموا بتكوين علاقات قوية مع زملائهم.

ما هو المسار أو الطريق الأفضل، "المتكررون أم متغيرو الأهداف"؟
يعتمد الأمر على عدد الفرص المتاحة وحجم المنافسة، فعند تسريح عدد كبير من الشركات سيكون حجم المنافسة على بعض الوظائف كبير نظرا لكثرة الموظفين اللي عندها نفس مهاراتك، وبالتالي في الحالة دي هتكون الفرصة أكبر لمتغيرو الأهداف، لأن الفرص والمجالات هتكون أكبر وأوسع بالنسبة لهم.

ومن النصائح اللي بعض المديرين التنفيذيين بيوجهوها للموظفين اللي تم تسريحهم:
1- قيم أوضاعك الحالية، قيم خبرتك ومهاراتك اللي بتتميز بيها، والأهم من كدا انك تأخد وقتك في التفكير.
2- الشركة أو المؤسسة اللي كنت فيها هتكمل بيك أو بدونك، عشان كدا لازم حياتك متتأثرش وتكمل في الشغل اللي هتبدء فيه بعد كدا.

أخيرًا، خسارتك لشغلك ممكن يكون مكسب ليك، مهاراتك وخبرتك ممكن تفيدك في مكان تاني أفضل من المكان القديم، ركز على المهارات والخبرات اللي اكتسبتها ووظفها صح عشان تقدر تفيد المكان اللي هتكمل فيه.

احكيلنا تجربتك لو مريت بمشكلة في شغلك زي دي، وايه الخطوات اللي خدتها عشان تتغلب عليها؟

امتى تختار إنك تستقيل من شغلك؟

قلة الوظائف المتاحة في الشركات جعلت الموظفين متمسكين بوظائفهم، حتى لو الموظف هييجي على نفسه عشان يرضي مديره ويستمر في الشغل، وده لأن بعض الموظفين بيشوفوا ان استقالتهم من الشغل يعتبر فشل ليهم.

لكن امتى تفكر في الاستقالة من العمل؟
1- لو شايف ان فيه شغل بيتم بطريقة غير قانونية.
2- لو شايف ان الشغل بيأثر على صحتك وحياتك خارج العمل.

على سبيل المثال أحمد كان شغال مدير فرع في إحدى الشركات، ومرت شركته بفترة اندماج مع شركة أخرى واتغيرت الإدارة تمامًا، لكن أداءه لم يعجب الإدارة الجديدة. احمد اتأثر بظروف الشركة وعشان الإدارة ترضى عنه اشتغل لفترات أطول، لكن ده أثر على صحته، وكمان دكتوره وأسرته لاحظه ده عليه ونصحوه انه يسيب الشغل.

أحمد بدأ يبحث عن شغل جديد لكن شغله الحالي كان بيأثر عليه في المقابلات الشخصية، فقرر انه يستقيل، لكن استقالته كانت بطريقة ملائمة لتاريخه في الشركة، وكانت الاستقالة تحتوي على رسالة شكر للإدارة يشكرهم فيها عن الفترة اللي قضاها معاهم، وانه محتاج يغير مساره المهني للمبيعات والتسويق.

أحمد مذكرش حاجة عن صحته، ومذكرش كمان ان الشركة كانت سبب في استقالته أو تدهور حياته، لأنه كان عارف ان أكيد هييجي الوقت والشركات اللي هيقدم فيها على هتحتاج انها ترجع للمديرين اللي اتعامل معاهم عشان تعرف معروامت عنه وعن أداءه في الشغل. حتى يستطيع ان يستفيد منهم في شغله القادم، لأن بعض الشركات بتحتاج انها تسأل عنك أخر مدير اشتغالت معاه.

المستفاد من القصة ان قبل ما تستقيل من شغلك لازم تتبع 4 خطوات:
1- حدد ازاي هتستقيل وهتقدم طلب الاستقالة لمين وامتى هتقدمها.
2- استشير بعض أصدقاء في قرار الاستقالة والأفضل ان واحد منهم يكون زميل معاك في الشغل.
3- بعد ما تقرر اكتب طلب الاستقالة وبعض الثناء والشكر للمدير والإدارة الحالية.
4- تاني يوم من تقديم استقالتك تعتبر حياة جديدة بالنسبة وقتها لازم تاخد راحة وتبدأ تبحث عن شغل جديد.

في النهاية اللي محتاجين نقوله ان قرار الاستقالة شيء مش سهل لأن مش بالسهل انك تلاقي فرصة تانية بعد استقالتك مباشرة، فكر جيدًا قبل القرار وفي نفس الوقت الشغل ميأثرش على حياتك وصحتك، والأهم ان القرار اللي هتاخده يكون في صالحك.

قولنا ايه أكتر سبب يخليك تاخد قرار الاستقالة من شغلك؟

ماذا قال علم النفس عن ريادة الأعمال؟

في إحدى اللقاءات لمجموعة من طلاب الماجستير في إدارة الأعمال، كان الهدف من اللقاء تعليم رجال الأعمال والمديرين تطبيق إبداعاتهم وإيجابياتهم وتفكيرهم في فهم احتياجات الناس، قالوا ان أحد الأشياء الحاسمة اللي جعلت أصحاب المشاريع يكملوا في طريقهم هي التعهدات اللي خدوها على نفسهم لتحقيق أهدافهم، وأكد بعض الحاضرين على ان نجاح المشاريع يستلزم إلهام وتحفيز فريق العمل باستمرار، وتوفير حلول لمشاكلهم.

أولًا: هل ممكن يبقى فيه عامل أو صفة مشتركة بين الناجحين ومؤسسين الشركات؟

المبادرة والإيجابية، علم النفس شايف ان الصفة دي هي العامل الرئيسي والمشترك بين الناجحين وأصحاب الشركات، لولا الإيجابية كان مش هيبقى فيه مبادرة ولولا المبادرة كان مش هيبقى فيه مخاطرة ولا شركات اتأسست ولا هؤلاء المديرين والناجحين وصلوا لما وصلوا إليه.

من أساسيات علم النفس الإيجابي ان البشر مدفوعين بالسعي ليعيشوا حياة ذات معنى سواء لأنفسهم أو للمجتمع، وأحيانًا يرى ان المستقبل هو أكثر شيء يدفعهم للمبادرة أكثر من الماضي، لأن المستقبل يعطيهم شعور بالتفاؤل والأمل أكثر من أي شيء آخر، ويصفها علم النفس بـ "الجوهر الحقيقي للحياة" يعني ان تعيش حياة مؤثرة ومرضية.

ثانيًا: هل يولد رواد الأعمال بالفطرة؟

أجرى مركز المؤسسات بجامعة مانشستر متروبوليتان بحث عن العناصر الأساسية اللي بتدفع رواد الأعمال لتحقيق أهدافهم، البحث بيوضح ان النجاح له عناصر يمكن تعلمها من خلال التجربة وده بينافي ان رواد الأعمال مولودين بالفطرة، وتوضح أيضًا الدراسة أهمية المهارات والخبرات المكتسبة مثل المعاملات في السوق واتخاذ القرارات، ودا بيدل على ان ريادة الاعمال يتم تعلمها لكنها لا تكون فطرية.

توضح الدراسة أيضًا أن المديرين وقادة الشركات الناجحة يجمعون بين الفهم العميق لأسواقهم ورؤية مستقبلية لأعمالهم، والالتزام بتحقيق الأهداف المخطط لها.

ثالثًا: هل توجد عوامل تساعد على النمو في ريادة الأعمال؟

هناك 6 عناصر أساسية تساعدك على الازدهار والنمو في مجال ريادة الأعمال:
1- الخبرة الكافية في السوق: الفهم الجيد للسوق ومتطلباته والفرص المتاحة فيه والمنافسين لك في نفس مجالك.
2- التنبؤ بالمستقبل وتطوير أعمالك باستمرار ومواجهة التحديات اللي ممكن تواجهك، وعقلية رواد الأعمال قادرة على تحقيق أهدافهم ورؤيتهم لأعمالهم.
3- اتخاذ القرارات: المعروف ان قادة الأعمال دائمًا قادرين على التفكير واتخاذ القرارات في الوقت المناسب للتقليل من المخاطر اللي ممكن تنتج عن اتخاذ قرار خاطئ، وملتزمون أيضًا بعد اتخاذ القرارات الاطلاع عليها متابعتها في تحقيق الهدف المراد تحقيقها أم لا.
4- تنمية الأعمال: لا تتوقف دائمًا عن تنمية أعمالك، واصل عملك بالقدر الكافي حتى بعد وصولك لتحقيق هدف معين واصل تنمية اعمالك لتحقق أهداف أكثر لأنه في لحظة يمكن ان يهدم كل شيء حققته.
5- زيادة المبيعات: المنافسة على البيع وزيادة المبيعات أمرًا جيدًا لكن الخدمة اللي ممكن تقدمها بعد عملية البيع تعد أمرًا مهمًا للغاية، خدمة ما بعد البيع يمكنها ام تزود لكن المبيعات لأضعاف وتحافظ على عملائك وولاؤهم.
6- روح الابتكار: وجود فرص جديدة تساعد على النمو والابتكار في العمل بدرجة كبيرة، لأنها تعطيك فرصة أفضل للمستقبل والشعور بإنجاز دائمًا بإنجاز العمل.

في النهاية لكل رائد أعمال صفات تميزه عن غيره، وكل مدير ناجح في مجال من الممكن ألا ينجح في مكان أخر، لكن المهم هو أن تستمر في التطور من نفسك ومن أعمالك حتى تستمر في منافسة الآخرين.

5 مواقع لدخول عالم ريادة الأعمال...!

السنوات الأخيرة زادت الاتجاهات لريادة الأعمال وتأسيس المشاريع، وأصبح عدد كبير من الناس يملك أفكار مختلفة لعمل مشروعه الخاص، وأشارت بعض الإحصائيات ان ما يقر إلى 75% من المصريين يرون ان ريادة الأعمال خيارًا مهنيًا أفضل من العمل كموظف لشركة أخرى.

سواء بدأت مشروعك أو بتفكر تبدأ، أو عندك شغف تعرف أكتر عن المجال، فمن المؤكد انك بتبحث عن مصادر ومواقع تقرأ وتتعلم منها، وفي المقال ده جبنالك أهم مواقع ريادة الأعمال اللي تساعدك بأهم النصائح في تأسيس المشاريع الجديدة ودخول مجال البزنس، ومن المواقع دي:

1- موقع Seth Godin’s Blog
من أفضل المدونات اللي ممكن تبدأ بيها، بها محتوى متنوع ما بين قصص وشروحات التسويق، مقالات حول طرق التعامل في العمل، أفكار ومشاريع تجارية مختلفة.

صاحب المدونة هو رجل الأعمال والخبير التسويقي المشهور "سيث جودين"، سيث أسس الكثير من الكتب اللي بتخص ريادة الأعمال والتسويق، مثل كل المسوقين كذابون، المنخفض، التسويق بالاستئذان وغيرها من الكتب المفيدة.

ومن مقولاته المشهورة في مجال التسويق "لا تبحث عن زبائن لمنتجاتك، بل ابحث عن منتجات لزبائنك"، ومن هنا جاءت فكرة مدونته، ودائمًا ما يحث القراء على البحث عن منتجات مختلفة وتناسب الزبائن وليس العكس، والتحدث مع زبائنك بطريقة عاطفية لأنه يرى أن 80% من القرارات اللي بياخدها الانسان ترجع إلى دوافعه العاطفية.

2- موقع Entrepreneur
من أشهر المجلات العالمية، أصدرت من 30 عام تقريبًا وكانت بدايتها باللغة الإنجليزية فقط، وكانت تستهدف المبتدئين في مجال ريادة الأعمال وتعليمهم تأسيس وإدارة المشاريع الخاصة بهم.

بعد ذلك بدأ الموقع في التوسع أكثر في مجالات مختلفة من ريادة الأعمال، فشملت مقالات تخص التسويق، المال والاقتصاد، وبعض المقابلات الشخصية لأشهر رواد الأعمال للتعرف على نجاحاتهم وإنجازاتهم والاستفادة من تجاربهم.

3- موقع Under 30 CEO
من اسمه هتعرف انه بيهتم برواد الأعمال اللي سنهم أصغر من 30 سنة، الموقع بيقدم نصائح عملية للبداية في مجال ريادة الأعمال، ومن أهم مميزاته انه يعرض مشاكل وحلول فعالة لما يتعرض لها رواد الأعمال وأصحاب المشاريع الصغيرة والمتوسطة.

4- موقع All Business
الموقع ده يعتبر أكبر مصدر إلكتروني في العالم للشركات الناشئة، بيقدم نصائح تخص مجال ريادة الأعمال عمومًا، ويعتبر من أهم المواقع لكل رائد أعمال ويجب تصفح وزيادة الموقع كل يوم لمتابعة كل ما هو جديد في عالم ريادة الأعمال، الموقع يوفر المصادر والموارد والأدوات الأساسية اللي ممكن يحتاجها أي رائد أعمال في بداية تأسيس مشروعه وتنميته.

5- موقع Small Biz. Trends
الموقع عبارة عن نشرة إلكترونية يختص بمجال ريادة الأعمال والمشاريع الصغيرة، الموقع يهم كل رائد أعمال لأنه يضم مجموعة من المقالات المتخصصة في التخطيط والتمويل والموارد البشرية.

يمكنك أيضًا متابعتنا للتعرف على أهم المقالات اللي تخص ريادة الأعمال والشركات الناشئة وبعض المجلات والتخصصات الأخرى.

هل فعلا ممكن أبدأ مشروع من البيت بتكاليف لا تتعدى 2000ج؟

امتلاك مشروع من المنزل هو حلم كل رائد أعمال خصوصا النساء، وده لأن المشروعات اللي بتتعمل في المنزل لا بتحتاج لتكلفة وموارد كبيرة، وبالتالي بتبقى فرصة انطلاق لرائد الإعمال انه يبدأ مشروع صغير وبعدين يكبره بدون وقت ومجهود كبير وبدون تكاليف عالية.

بالطبع بداية مشروع بنفسك وتحت إدارتك ومسؤوليتك هيعلمك كتير، إدارة الأزمات، سرعة اتخاذ القرارات، دي كلها مهارات هتعود عليك شخصيًا في تطوير ذاتك ومهاراتك وهتكون بداية انطلاقك لمشاريع أكبر وأضخم، وفي المقال ده هنقولك أهم المشاريع اللي ممكن تبدأها من المنزل بتكاليف وإمكانيات مادية قليلة لا تتعدى ال 2000ج:

1- صناعة الحلويات
أي شخص موهوب في الطبخ ممكن يبدأ مشروع زي ده، كل الاعتماد في مشروع زي ده بتكون على مهارة الطبخ وتجهيز وتحضير الحلويات، في المشروع ده كل تركيزك هيكون على تقديم الحلويات بكميات قليلة وبيعها للمحلات.

نجاحك في المشروع ده هيعتمد على المميزات والاختلاف اللي هتقدمه في طبق الحلويات، سواء كانت حلويات شرقية أو غربية، المعدات والأجهزة مش هتكون مشكلة في الأول، وبالنسبة للتسويق ممكن تبدأ بتوزيع بعض الأوراق المطبوعة أو استغلال النت والسوشال ميديا في تسويق الصور والمنتجات اللي بتقدمها.

2- تفصيل الملابس
مهنة أو موهبة الخياطة تعتبر المهنة الشائعة والمشهورة خصوصا بين النساء، يمكنك أن تبدأ في مهنة الخياطة بماكينة خياطة صغيرة تكون مستعملة بتكلفة قليلة، وتبدأ في خياطة وتفصيل الملابس للأقارب والأصدقاء، بعد فترة يمكنك فتح محل صغير مع العمل باستمرار لكسب أرباح أكثر.

3- بيع مستحضرات التجميل
بيع المنتجات النسائية عمومًا من أكثر الأشياء استهلاكًا في السوق خصوصًا مستحضرات التجميل لأنها تقريبًا بتستهدف أعمار صغيرة وكبيرة ما بين (18: 45)، بالتالي الشريحة المستهدفة بتكون واسعة وجمهورها كبير خصوصًا لو هتشتغل على السوشال ميديا زي "الفيسبوك" و"الانستجرام". كل المجهود في المشروع ده هو إنك تكون محافظ على تواصلك الدائم مع جمهورك على الميديا لأن دي الطريقة الوحيدة اللي هتساعدك في بيع منتجاتك.

4- الأعمال المكتبية
مشروع زي ده محتاج حاجتين، لاب توب أو جهاز كمبيوتر مع سرعة في الكتابة، المشروع باختصار إنك بتستقبل أبحاث محتاجة إعادة كتابة أو فيديوهات تحولها لكلام مكتوب، كل اللي عليك إنك هتشتري طابعة بمبلغ بسيط ويكون عندك معرفة ببرامج المايكروسوفت زي الـ Word والـ Excel.

5- تجارة الألبان
وده مشروع بيعتمد أكثر على المناطق الشعبية والريفية، وهو إنك بتشتري منتجات الألبان زي اللبن والجبن بسعر الجملة من مربيين الأبقار وبيعها بسعر القطعة في المناطق الأخرى.

قولنا ايه أكتر مشروع مربح من وجهة نظرك وسهل إنك تبدأ فيه، وهل فيه أفكار تاني شايف انها كانت ممكن تبقى موجودة؟

تفتكروا ايه المشاريع اللي ممكن نبدأ بيها من البيت بمجهود وتكاليف قليلة؟

موعدنا مع الفيلم الأسبوعي
فيلم The call of the entrepreneur

الفيلم بيحكي عن قصة ل3 من رواد الاعمال في مجالات مختلفة هم "براد"، "جيمي"، "مورجان" وازي انطلقوا من الصفر ووصلوا للنجاحات اللي حققوها لحد ما وصلنا للوقت ده.

مورجان كان مزارع ومنتج للألبان، بيحكي الفيلم قصته ورحلته من مزارع بسيط لصاحب شركة للألبان ومنتجاتها تقدر بمئات الألاف، أما فرانك كان مصرفي جورجي الأصل، كان يعيش في نيويورك ومتخصص في مجال الهندسة المالية، والأخير كان جيمي، نشأ في الصين بعدين انتقل إلى هونج كونج وافتتح مجموعة متاجر للتجزئة قبل تأسيسه لشركة كبيرة تختص بالدعاية والإعلان.

مش هنحكي كتير عن الفيلم، عشان تقدر تستمتع بيه وانت بتشوفه وتعرف ازاي وصلوا للنجاحات اللي حققوها، وتقدر تشوف الفيلم من اللينك ده: https://www.imdb.com/title/tt1756792/