02/11/2022
وصلتنى رسالة اليوم على الصفحة
مضمونها ماشى جدا مع الأحداث الجارية و ما يواجهه الكثير من الأسر …
الرسالة لأم ، بتواجه أسرتها ظروف مادية صعبة ، بعد ما كانت أمورهم مستقرة.
قالت لأولادها : أن هذا إبتلاء و علينا بالصبر و الدعاء
بدأوا الأولاد فى الدعاء… و لكن تملكهم القلق و الخوف
ليه يا ماما بندعى و ما زال دعاءنا غير مستجاب ..
سؤال الأم … ماذا أفعل و إزاى أفهمهم ..
و لأن الموضوع يهمنا كلنا … لأن كتير منا واجه هذا التحدى أو ممكن فى يوم من الأيام يواجهه
قررت أجاوب على هذا التساؤل على الصفحة
و أجابتى هتكون قصة واقعية أبطالها أسرة ، أعرفهم عن قرب و لذلك عرفت قصتهم من البداية لنهاية بتفاصيلها
عيزاكم و أنتم بتقرأوا ، لا تسرحوا مع الأحداث
خلوا عقلكم شغال ، يحلل و يستوعب الخطوات اللى قام بها الأب و الأم
يلا بينا … نقرأ و نركز 🤓
ترجع أحداث القصة لسنة ٢٠١٦ ….
الأب كان بيشتغل سنين فى أحدى شركات ال multinational المعروفة…
مرتب كبير ، منصب مهم … حوافز و مكافآت
الأولاد فى مدارس و جامعات دولية
أجازة كل صيف خارج مصر
عربيتين موديلات حديثة من أغلى الماركات
لم تكن حياتهم رفاهية مفرطة أو مغالاة ، و لكن فيها راحة و عدم شيل أى هم للماديات فى حياتهم
فجأة ، حصل تغييرات فى قيادات الشركة . و بالتالى تم تعديل فى سياسات الشركة و ترتيب أولوياتها و الوظائف
تم تعديل وظيفته و إبلاغه أن الأفضل يطلع Lay off بمكافأة عن سنوات عمله فى الشركة.
لا يوجد إختيار و لا بديل للقرار…
قرر الأب ، يفكر بهدوء و يتقبل القرار بأيمان
و بدأ مع نفسه يرتب أفكاره، و طلب من زوجته يتكلم معاها . قعد معاها , قالها على قرار الشركة.
وكان محضر Excel Sheet .. عشان يطمنها ، قالها أن مكافأته و شوية مدخرات هتأمن مصاريف الأولاد الدراسية و البيت لمدة سنتين. فى حالة لو لسه لم يجد عمل لأى سبب.
هدوءه و ترتيب أفكاره، ساعد زوجته المحترمة تستوعب. و لأنها زوجة على خلق، هى كمان طمنته و قالتله لا تقلق : بأذن الله فترة و هتعدى و مع بعض و بلطف من ربنا كل شيىء هيمر عليهم بهدوء.
أتفقوا مع بعض ، أهمية التحدث عن الموضوع مع الأولاد …
عشان يفهموا التغيرات اللى هتحصل و يكونوا جزء من الحل … مش عبءو مشكلة
أتفق الأب و الأم ، يتخذوا من هذا الموقف، فرصة تربية و تعلم لأولادهم … نقربهم من بعض كأسرة و تعلمهم تقبل تغييرات الحياة ومواجهة تحدياتها بقوة و يقين.
قعدوا مع أولادهم و عرض الأب عليهم مقتطفات من وضعهم المادى عشان يطمنهم و يفهمهم
و أخذوا مع بعض قرارات بالتعاون مع بعض لخفض النفقات..
🔹- مفيش سفر للخارج فى الأجازات
🔹- شراء ملابس فى نطاق و مناسبات معينة
🔹- بيع العربية الأغلى لتوفير كاش لتأمين التعليم والأعتماد على عربية واحدة للجميع
🔹- تقليل بند الخروجات و الأكل من المطاعم
🔹- عدم شراء بنود بقالة رفاهية زى الكورن فليكس ، الشيكولاتة الغالية
🔹- جابوا مكواة بخار ، عشان يكوا فى البيت التى شيرتات السهلة ، و المكواة فقط للملابس الصعبة
🔹- تم تقليل الأيام اللى بتيجى فيها السيدة اللى بتساعد فى النظافة من كل يوم .. ليوم واحد فى الأسبوع ، على أن بتعاونوا مع بعض فى بعض الأعمال المنزلية
لم يكن الموضوع سهلا ، بس اللى مخلهوش صعب و لا مستحيل ..
أنهم كانوا بيكلموا أولادهم دايما من الصغر
على فكرة أن النعم دائما لا تدوم…
قد يحدث فيها قلة أو ندرة
و كانوا بيحكوا دايما لهم عن قصص من الواقع
أو التحديات اللى مروا بيها فى صغرهم مع أهلهم
و إزاى بالصبر و اليقين و السعى كانت بتعدى..
مر على هذه القصص الآن ٦ سنوات …
يا ترى ايه اللى حصل
اللى حصل مش حلول الأفلام ذات النهايات السعيدة للمشاهد الصعبة
اللى حصل واقعى جدا … تحسنت أحوالهم
لم يمروا باحساس الضيق بفضل و ستر ربنا
و لكن لم يعودوا لرفاهية ما قبل ٢٠١٦
الأب أشتغل … بس مش بنفس الدخل السابق
بس كسبوا من هذه التجربة كتير … رصيد له قيمة أكبر من رصيد البنوك
❇️- رصيد إحترام لزوج اللى تعامل بثقة و هدوء
❇️- رصيد تقدير لزوجة الجميلة التى لم تجزع أو تضغط على زوجها
❇️- رصيد مشاركة ، لما الأب و الأم ادوا فرصة لأولادهم يكونوا جزء من الحل و ليس عبء عليهم لو كانوا خبوا عليهم بحجة أنهم لا يتأثروا أو يحسوا بالنقص
كلهم أتعلموا أن " دوام الحال من المحال "
و أن الصبر و الأستمرار فى الشكر هو خير ضمان لأستمرار الستر
هذا الموقف اللى ممكن تتعرض له أى أسرة
التعامل معه مسئولية الأسرة كلها
بقيادة و توجيه الأب و الأم مع بعض بروح و رؤية واحدة
ربنا يعينا جميعا .. و يرشدنا لصواب والتعامل بحكمة و يقين عند مواجهة أى إبتلاء
05/05/2020
02/05/2020
29/03/2020
29/03/2020
24/03/2020
16/03/2020