المدرسة العربية للسينما والتليفزيون Arab Film & TV School

مرحبا

#المدرسة العربية للسينما والتليفزيون
://www.arabfilmtvschool.edu.eg/
#امتحانات المدرسة العربية للسينما والتليفزيون OnLine
#امتحان السيناريو
# يوم الخميس 8 سبتمبر 2022
يحدث الآن

يعنى إيه فيلم سينما ؟؟
وسام الباجوري
يعنى بسم الله سيناريو متوافق عليه رقابيآ ثم تنازل من السيناريست بعد ماياخد تمنه بالكامل " حسب الإتفاق علي العقد " لصالح إستغلال شركة الإنتاج المصرية
يعنى ميزانية بيعملها المنتج الفنى والكرو بتاعه بعد تعاقدهم هم الأول
يعنى مخرج وكرو إخراج بالكامل يتعاقدوا
يعنى تفريغات للسيناريو إنتاجيآ وإخراجيآ
يعنى مدير تصوير وكاميرا مان وفوكس بولر وتعاقد معاهم
يعنى كاميرا " أليكسا او ما شابه والمتخصصين هيفهموا " وطاقم عدسات ومعدات إضاءة وصوت وموشن وفيديو أسيست وحجزهم بعدد أيام التصوير " لا تقل عن ١٠ أيام فعلي "
يعنى مشرف إضاءة وعمال إضاءة وتعاقد معاهم
يعنى مهندس صوت ومساعدينه والتعاقد معاهم
يعنى معاينات وحجز لوكيشنات
يعنى تعاقدات ممثلين بالكامل علي الأقل معروفين " وكلام فسركم كده معاهم طاقم مساعدين ولبيسة وأكل خاص وكرافانات وليلة "
يعنى تحضيرات وبروفات وستايليست وماكيير وكوافير
يعنى مكتب كاستنج للمجاميع " نسبته وأجر الناس "
يعنى مهندس ديكور ومصمم معارك واكسسوار وفوتوغرافيا وميكينج وبوفيه " طبعا برجالتهم واجورهم "
يعنى رسم نسبي فالنقابات وتصاريح داخلية عشان التصوير
يعنى مكروباصات للتنقل والمعدات وبريك " الأكل طول أيام التصوير "
يعنى أكشن وتصوير وعداد فلوس شغال صرف وبس
هل خلاص كده؟؟
لأ طبعا
فى مرحلة تانية " شركة البوست بروداكشن " يعنى مونتاج ومونتير بمساعدينه ومكساج وميكسير وكلر ولو فى جرافيك أو دوبلاج وموسيقي تصويرية وتيزر وتريللر وأفيشات ومابالكم لو كمان فى أغاني بالفيلم " مطرب كلمات لحن توزيع تنازلات " كل ده باكيدج بمبلغ وقدره
يبقي فاضل ايه بعد ماخلصنا ؟ هننزل سينما بقي ونكسب
لا إستنى مش بالسهولة دى
خلصت الفيلم ؟؟
خلص بقي ورق الفيلم ده
تنازل المخرج وكمان فاوشرز التلات نقابات " مهن سينمائية وتمثيلية وموسيقية " ورقابة على المصنفات الفنية وغرفة صناعة السينما " رقم وقدره برضو وعلي حسب فيلمك طبعا "
خلاص كده ؟
لأ
هو كده انت جاهز للبيع لكن عن طريق موزع داخلي وخارجي عشان هو خبرة وهيصرفلك فيلمك بسرعة " بنسبة علي فكرة "
فى ناقص حاجة واحدة صغننه قوى " الدعاية " وما أدراكم ما الدعاية
تمام خلاص كده ؟؟
لا فى بقي ان إيرادات دور العرض ٥٠٪؜ ليك و٥٠٪؜ للسينما وصاحبها " غير إن أي مصاريف عليك كمنتج طبعا "
خلاص كده ؟؟
آه خلاص
ومش هتقل عليكوا بالتفاصيل والكواليس اللي مليانة تعب ومصاريف وعداد فلوس شغال بس إحقاقآ للحق ان من ورا فيلم السينما ده فوق الخمسمائة فرد بيوتهم مفتوحة وليهم نصيب من الإنتاج ورزقهم فيه بس كده
كل ده عشان الناس تروح تقطع تيكيت وتدخل تقعد فالتكييف ويا تنبسط يا لأ
فبلاش بقي نفكرها سهلة وبسيطة ومافيهاش مجهود عصبي وبدني ودلع ومكسبها كتير
لأ ياسادة
صناعة السينما مشقة لا يعرفها سوى من يخوض تلك المعركة ويخرج منها منتصر
عشان إللي مايعرفش بيألف واللي عارف مابيقولش ..
أنا إللي كاتبة البوست ده كاملآ وأنا مسئولة عن كل كلمة فيه