دار الكوثر حضانة

– هو إزاي بنغلط في رمضان؟
مش الشياطين بتتسجن؟
– النبي ﷺ قال:
«إذا جاء رمضان فُتِّحت أبواب الجنة،
وغُلِّقت أبواب النار،
وصُفِّدت الشياطين»
يعني الشياطين بتتقيّد. بس خلي بالك…
في فرق بين التقييد والسجن التام.

– إزاي يعني؟
– تعالى أحكيلك حاجة.
في يوم النبي ﷺ
كان معتكف في العشر الأواخر من رمضان.
وجت السيدة صفية رضي الله عنها تزوره.
ولما مشيت، النبي ﷺ خرج معاها يوصلها.
فمرّ صحابيين، فلما شافوه أسرعوا في المشي.
فقال لهما النبي ﷺ: «على رِسْلِكُمَا إنما هي صفية»
يعني دي زوجتي… مش امرأة غريبة.
فالصحابيان قالا: سبحان الله يا رسول الله!
فقال ﷺ:
«إن الشيطان يجري من ابن آدم مجرى الدم،
وإني خشيت أن يقذف في قلوبكما شيئًا»

خلي بالك…
ده حصل في العشر الأواخر من رمضان.
يعني الشيطان موجود.
فالتصفيد معناه إن تأثيره أضعف، وسلطانه أقل،
مش إنه اختفى تمامًا.

ثاني حاجة… مش كل غلطة سببها شيطان.
في حاجة اسمها النفس.
النفس اللي اتعودت سنة كاملة على سلوك معين،
مش هتتغير في يوم وليلة.
واحد متعود يغضب،
واحد متعود على معصية،
واحد متعود على الكسل…
حتى لو الشيطان قلّ تأثيره، فالعادات لسه موجودة.

رمضان بيهدّي الضوضاء الخارجية علشان تكتشف نفسك بوضوح.
لو لسه بتغلط، يبقى محتاج تشتغل على نفسك،
مش ترمي كل حاجة على الشيطان.
الصيام مش امتناع عن الأكل بس. ده تدريب على التحكم.
علشان كده النبي ﷺ قال:
«فإن سابَّه أحد أو قاتله فليقل: إني صائم»
يعني رد فعلك لازم يتغير.

فلو وقعت في غلطة في رمضان
قول: أنا محتاج أجاهد نفسي أكتر.
رمضان شهر تدريب.
واللي يغلط فيه باب التوبة مفتوح.
الله سبحانه أعطانا نعمة رمضان علشان نعرف إننا مش ضعاف
لأ ده إحنا نقدر نتحكم في أنفسنا وشهواتنا
فلما نفضل تلاتين يوم في مجاهدة مع النفس وبعض عاداتنا تتغير
نخرج من رمضان أفضل وأقوى ... وأتقى
– اللهم أعنّا على أنفسنا.