تَجلّياتْ عالِمْ صَغير

كل سنة وانتم وأطفالكم بألف خير. 🤩♥️
عيد أضحى مبارك.

💙💖

عرفتوا ليه من زمان و احنا مختارين اللونين دول؟
ندعم #فطرة

الخريف لونه وردي!

أكتوبر مش بس مشهور بنسماته الباردة واجوائه اللطيفة، كمان مشهور باللون الوردي، وبالتالي إتسمي "أكتوبر الوردي".

أكتوبر من بدايته لنهايته هو شهر التوعية بسرطان الثدي.

بتنطلق خلاله حملات تشجيع النساء في كل أنحاء العالم على الفحص الدوري للثدي، للكشف المبكر عن أورام الثدي لعلاجها بطرق سريعة وأكثر فاعلية.

عرفينا في كومنت لو تحبي تعرفي أكتر عن سرطان الثدي؟

"ازاي تضيفي لابنك ثقافة الإسعافات الأولية؟"

أي إنسان ممكن يحصله أي إصابة وهو لوحده، ممكن يحصل نوبة قلبية أو اختناق أو نزيف أو حاجات كتير، النهاردة جايين نعلم طفلك يعمل إيه لو حصلُّه أو لحد من زمايله أي خطر، وازاي يتصرف ويتعامل مع الموقف.

🔹️وصف الموقف وطلب المساعدة
أول حاجه مهم تعلميها لابنك هي إنك تعلميه يطلب المساعدة، عززي عنده الثقة بنفسه و الشجاعة وإدراك قيمة نفسه ومساعدته، حفظيه رقم الإسعاف، و عرفيه إزاي يوصف الموقف.

عشان نقدر ينفذ النقطة دي، أهم حاجه لازم يعرفها هي اسم كل حالة وإيه أعراضها عشان يقدر يوصف الي بيحصل صح، زي: أعراض النوبة القلبية، من ألم شديد في صدره، أو الإغماء، أو صعوبة في التنفس.
ده بيعتمد على شجاعة ابنك وقدرته إنه ميتوترش ويسأل الشخص الي قدامه عن الأعراض اللي حاسس بيها.


🔹️التركيز على حالات الطوارئ اللي ممكن تحصل لحد من العيلة
عرفي ابنك على حالة الشخص المريض في العيلة واتأكدي إنه على دراية بالتصرف الصح في حالة لو حصل حاجة خطيرة وهو لوحده مع الشخص ده، فيقدر يطلب المساعدة.
خلي ادوات الإسعاف قريبة منه في البيت و عرفيه ازاي يستخدمها.


🔹️علمي ابنك الهدوء
من أهم الحاجات الي لازم تعرفيها لإبنك هي إنه يوصف الموقف بهدوء وميتوترش عشان يكون وصفه صح ودقيق للمُسعف إذا قدر إنه يطلب المساعدة، مش لازم يكون بطل خارق، ابنك في الآخر طفل ولكن مفيش مانع إننا نعرفه بأهم الحاجات اللي نقدر بيها ننقذ شخص ما أو نكون علي وشك إنقاذه حتى.


شاركونا بمواقف حصلت مع أولادكم خلال أي حالة طارئة واحكولنا اتصرفوا فيها ازاي؟

دايمًا الأطفال بيتأثروا بالسوبر هيروز و كتير بيتمنوا لو عندهم قوى خارقة.

بس اللي كتير ميعرفهوش إن سهل جدا الطفل يكون سوبر هيرو من غير أي قوى خارقة في خطوتين بس!

1- علم الطفل وحفظه أرقام الطوارىء عشان تحت أي ظرف يقدر يتصرف ويطلب المساعدة في غياب الكبار، مع ضرورة تعليمه طريقة الإتصال وطلب النجدة.

أرقام الطوارئ هي:
🔹️123 إسعاف
🔹️122 طوارىء
🔹️180 مطافي

2 - درب الطفل على الإسعافات الأولية البسيطة،
كدة بتساعد الطفل على زيادة ثقته في نفسه ويبقى أكتر شجاعة وهدوء في مواجهة الحوادث الصغيرة، زي لو وقع من عالعجلة واتعور تعويرة صغيرة مثلًا.

ممكن كمان تدرب الطفل -حسب قدرته على الاستيعاب- على التفريق بين أنواع الإصابات، زي الكسور والحروق وطرق التعامل معاها، للجروح المختلفة ولدغات الحشرات، وعلى الأعراض المحتملة اللي ممكن تظهر على الشخص الملدوغ فتؤدي لمضاعفات خطيرة تنتهي بالوفاة لو متلحقش في الوقت المناسب.

بتعليمك لطفلك طرق طلب المساعدة في حالات الطوارئ، وبعض الإسعافات الأولية البسيطة، بتساعده يكون بطل، أحيانًا، ممكن تكون أنت المصاب و طفلك هو وسيلتك الوحيدة لإنقاذك.

سيبولنا كومنت وهنبعتلكوا ماتريال يساعدكوا على تدريبهم على مبادئ الإسعافات الاولية.

فضول أطفالك دايماً مصدر صداعك، بس في الحقيقة هو مصدر الهامهم.👌🏼

إحكيلنا اغرب سؤال اتسألتيه من طفلك قبل كده؟ 😂🤍

5 حاجات المفروض ابنك يكون عارفها في حالة إنه تاه منك:

🔹️رقم الموبايل، واسمك، واسم باباه بالكامل

ممكن تحفظيه ده بأغنية، أو تفكريه كل شوية من فترة للتانية، وممكن برضو تخيطي رقمك واسمك في هدومه، أو ممكن تكتبيهم في ورقة وتحطيه في جذمته احتياطًا عشان لو نسي وقتها.

🔹️يفضل مكانه

إلا لو لقى نفسه في مكان زحمة/ عربيات أو أي مكان خطر ماينفعش يقف فيه، وقتها يشوف أقرب مكان آمن يستنى فيه لحد ماتيجوا وتلاقوه. لازم أهم حاجة يكون متشاف في المكان ال هيستنى فيه.

🔹️يطلب المساعدة من شخص كبير

أفضل شخص ممكن ابنك يطلب مساعدته هو إنه يلاقي أم ومعاها ابنها، يشرحلها إنه تايه وعايزها تساعده في إنه يلاقي أهله، ويقولها رقم الموبايل واسم والده/والدته بالكامل.

🔹️تحديد مكان للمقابلة

قبل ماتدخلوا أي مكان زحمة، اتفقي مع ابنك على مكان تتقابلوا فيه لو تهتوا عن بعض، لو ابنك كبير هيرجع للمكان ده، لكن لو صغير يروح يشوف أي موظف في المكان يطلب مساعدته في إنه يلاقي المكان اللي اتفقتوا تتقابلوا فيه.

🔹️ينادي باسمك بصوت عالي

لو تاه ومش قادر يشوفك وقتها ينادي بإسمك بصوت عالي، مش يا ماما أو يا بابا، حتى لو كان في مكان هادي أو مكسوف ينادي.

جربي تمثلي انتي وابنك في البيت القصة دي وتخليه يطبق عملي الخمس حاجات فوق، ده هيساعد أكتر، المهم إنك تطمنيه إنه لو قدر الله ده حصل في الحقيقة هو هيعمل ده وانتي هتلاقيه بعدها على طول.

قولي لنا في كومنت طفلك عنده كام سنة؟ وهنبعتلك انسب طريقة يستوعب بيها يتصرف إزاي في الموقف ده.

القناة دي هدفها شرح مناهج العلوم بطريقة مبسطة وربطها بالواقع وتطبيقها علي حياتنا العملية
كمان بينفذوا التجارب الدراسية عمليا في المنزل بأدوات بسيطة وآمنة .. وبيعملوا زي اختبارات صغيرة عشان تتابع مع ابنك فهم اد ايه من التجربة.

كمان هتلاقوا عليها عمل تجارب علمية عامة في المنزل بتفسيرها العلمي لاستغلال اوقات الفراغ وتحبيبهم فى مادة العلوم 🤩💜

ولسن ما قبل المدرسة، قريب هيكون في العاب وتجارب خاصة للسن دا لتنمية مهاراتهم وتفكيرهم

القناة تستحق المتابعة بجد لكل اللي عنده اولاد في سن ابتدائي واعدادي خصوصًا .. تابعوهم ✨💙
لينك القناة
https://m.youtube.com/channel/UCnrl4LsvZt9AQYNByqKQ3qw

لينك صفحة الفيس بوك

Science Academy-Rehab Hamdy - YouTube Science Academy-Rehab Hamdy قناة لشرح مناهج العلوم بطريقة مبسطة وربطها بالواقع وتطبيقها علي حياتنا العمليةوتنفيذ التجارب الدراسية عمليا في المنزل بأدوات بسيط...

كل سنة وانتوا طيبين ♥️
عيد أضحى سعيد عليكم جميعا 🥳

"منتسوري" الكلمة اللي انتشرت جدًا خصوصًا فالسنوات الأخيرة بين الامهات، لكن بيفضل مش واضح بشكل كامل إيه المقصود بيها؟ طب هتفيد ابني أو بنتي ازاي؟ طيب هي عبارة عن ايه ؟ بتطبق ازاي ؟ هو يعني ايه حضانة منتسوري ؟
دا اللي هنعرفه في البوست دا .. حاولنا نجمعلكم كل المعلومات المهمة اللي تخص المنتسوري في ١٦ نقطة بشكل موجز فخلونا نشوفهم 👇👇👇

١- نظام المنتسوري هو منهج أو طريقة للتعلم اللي أسسته دكتورة اسمها ماريا منتسوري من حوالي قرنين فاتوا وعشان كدا بقى اسمه منتسوري نسبة ليها.

٢- د.ماريا منتسوري لما جت تحط المنهج دا حطته على أساس علمي هو (مراقبة النظام البيولوجي لنمو الاطفال) علشان تصمم منهج تعليمي بيراعي الامكانيات الفردية لكل طفل.

٣- المنتسوري شايف ان مش أحسن حاجة للتقييم هي الدرجات والامتحانات اد ما مهم اننا نكون مدركين ومؤمنين ان أصلا الاطفال بشكل طبيعي بيبقي عندهم شغف ودافع انهم يستكشفوا ويتعلموا وقادرين يعملوا دا كويس ويبدعوا فيه اذا اتحطوا في بيئة مناسبة وبتدعمهم بشكل صح .

٤- المنتسوري بيعتمد على فلسفة تربوية مبدأها ( ان كل طفل جواه الشخص اللي هيكون عليه في المستقبل ) وعلشان كدا بيسعى منهج المنتسوري الى تنمية شخصية الطفل بصورة كاملة .

٥- بيعتمد المنهج على تفاعل الطفل مع المعرفة والعلوم اللي حواليه بمساعدة الالعاب والادوات التعليمية اللي بيوفرها منهج المنتسوري عن طريق حواسه.

٦- المنتسوري بيقول ان فقط من خلال اعداد البيئة المحيطة، نقدر بسهولة نتحكم في اللي هيتعلمه الطفل.

٧- الادوات اللي بيعتمد عليها منهج المنتسوري بسيطة ومش دايما كلها حاجات جاهزة .. الادوات ممكن تكون عبارة عن مجموعة من الاشكال الهندسية والعلب الخشب و الألواح والأجراس وأقمشة واوراق ملونة وبطاقات لكلمات وصور.

٨- في المنتسوري، دور المعلم انه يجهز البيئة اللي الطفل هيتعلم فيها (ليها مواصفات خاصة) ويزودها بالادوات والألعاب والأنشطة اللازمة لعملية التعلم ( واللي بتتحدد حسب عمر الطفل) .. بعد ما يجهز البيئة كل اللي عليه انه بس يراقب الطفل ويلاحظ تفاعله و تعلمه ويوثق كل دا عشان لو هياخد اي قرار بعد كدا زي تغييرات في بيئة التعلم .

٩- ممكن النقطة اللي فاتت تخليك تحس ان دور المعلم في نظام المنتسوري بسيط ومش محتاج حاجة يعني ..
لكن لأ حابين نوضحلك أن في منظمات وهيئات بتوفر برامج معتمدة دوليا لإعداد معلمي منتسوري واللي البرنامج الواحد منهم ممكن يحتاج من المعلم اكتر من سنتين دراسة !
وأشهر الهيئات دي هي MACTE والجدير بالذكر انها بتحط معايير صارمة للبرامج التدريبية اللي بتُعتمد من خلالها ... يعني الموضوع مش سهل او بسيط لأ دا شئ بيتطلب مجهود و مذاكرة من المعلميين اللي هيطبقوا بعد كدا النظام دا .

١٠- نظام المنتسوري بيتقسم لمستويات، كل مستوى بيختلف في المحتوى وطرق التقديم عددهم ٦ مستويات تقريبا بداية من الاطفال عند عمر الولادة إلى سن ١٩ سنة .

١١- الأدوات اللي بيعتمد عليها منهج منتسوري مش مجرد العاب من الخشب .. لأ دي أدوات اتصممت بطريقة علمية هدفها هو دعم الطفل وتعلمه بطريقة منتظمة ومرتبة وكمان بتكون مطابقة لمعايير الجودة والسلامة.

١٢- كمان منتسوري بيعتمد على ألعاب بسيطة بس الهدف منها بيكون كبير زي لعبة (حمل الكرسي) للاطفال من ٢-٥ سنة واللي فيها بنطلب من الطفل انه يشيل الكرسي لمسافة معينة من غير ما يخبط في أي حاجة هتقابله في الطريق وكمان يكون يحافظ على ان الكرسي يكون معدول بشكله السليم طول الوقت.

١٣- منهج المنتسوري اتعمل عشان يكون مناسب للأطفال العاديين والأطفال ذوي الاحتياجات الخاصة كمان.

١٤- د.ماريا نجحت في تعليم الاطفال ذوي الاحتياجات الخاصة وأسست مدرسة للمعاقين وطبقت عليهم مبادئ سيجوان وكمان خلتهم مش طلبة عاديين لأ دول بقوا متفوقين وحققت معاهم نجاح باهر ! 💙

١٥- من أشهر أقوالها "ان نجاح الأطفال ذوي الاحتياجات الخاصة وقدرتهم على مناقشة الاطفال العاديين، يرجع إلى عامل واحد فقط وهو أنهم تعلموا بطريقة مختلفة."

١٦- د.ماريا منتسوري ألفت كتب كتير عن تعليم وتربية الأطفال مهمة ومفيدة جدا .. لو مهتم تعرف أكتر اكتر عن الكتب دي او تقرأها ابعتلنا على رسايل البيدج او سيب كومنت واحنا هنبعتهالك.

منهج او نظام المنتسوري يعتبر من أكتر النظم اللي تجحت وانتشرت بشكل كبير والدليل على كدا انه بدأ من حوالي ٢٠٠ سنة ولسه موجود لحد انهاردة و دايمًا في جديد 💙

ودلوقتي بعد ماعرفت اكتر عن المنتسوري، ياتري هل النظام دا له سلبيات أو عوائق ؟

لو عندك سؤال متعلق بمنهج المنتسوري او محتاج مصادر تساعدك في تطبيقه مع أطفالك سيبلنا كومنت او ابعتلنا على رسايل الصفحة واحنا هنساعدك❤️💙


#منتسوري

مافيش طفل غبي !!

سنة 1983 في عالِم اسمه ( هاورد جاردنر ) حط نظرية أسمها ( الذكاءات المتعددة ) ودي تعتبر من أهم النظريات التربوية اللي بتشغل كتير جداً من الباحثين .
طيب النظرية دي بتقول ايه؟
بتقول إن كل طفل بيتولد بنوع ذكاء خاص بيه، مافيش ابداً حد بيتولد غبي ! لكن كل المشكلة بتبقى في ان أهل الطفل نفسهم مش بيبقوا فاهمين دا ولا عارفين ازاي يكتشفوا و ينموا الذكاء اللي عند أبنهم .
هاوورد حدد 8 أنواع ذكاءات أساسية ( ذكاء لغوي - منطقي رياضي - موسيقي - مكاني فراغي - بدني رياضي - في التعامل مع الأخرين - في التعامل مع النفس - متعلق بالطبيعة ) .
وحدد اختبار صغير كدا بيتعمل للطفل من خلاله بنقدر نحد الطفل ذكاءه رايح لأي نوع من الذكاءات الـ8 ، وكمان حط شوية مقترحات تساعدنا ازاي نبدأ نتعامل وننمي الذكاء دا .

كمان في مثال على إن الذكاء و العبقرية شئ ممكن نغرسه ونكبره ف الأطفال أكتر بكتير من كونهم أشياء ليها علاقة بالوراثة والجينات ( كان في عالم نفس اسمه لازلو بولغار، الراجل دا ألّف كتاب عن كيفية تربية العباقرة، ولما اتجوز اتفق مع مراته انهم يربوا أولادهم زي القواعد اللي ف الكتاب ، وكانت النتيجة مجموعة كاملة من الأطفال العباقرة ❤ منهم جوديت بولجار - تقدروا تعملوا سيرش عن اسمها - البنت دي تعتبر أقوى لاعبة شطرنج ف التاريخ 💙 ) .

ودلوقتي هنستعرض ال 8 أنواع ونتكلم عنهم في الصور للي في البوست افتحها و اقرا اللي مكتوب معاها و حاول تحدد طفلك انهي طفل من دول ✨
و ياريت طبعا الأب يعمل منشن للأم و الأم تعمل منشن للأب👏✨

و لو عايز تبدأ تفهم طفلك و تشجعه سيبلنا كومنت واحنا هنبعتلك اختبار تحديد نوع الذكاء اللي اتكلمنا عليه 🤩 وكمان هنساعدك في تحليل النتايج وهنقولك ايه افضل طريقة للتعلم بالنسبة لطفلك ❤️.

وإنت بتقرأي ورد القرآن كل يوم أخدتي بالك لفظ رمضان اتذكر كام مرة؟ 🤔