Al-Rahma Nursery حضانة الرحمه

01/05/2024

الدخول المبهج من الأب في البيت له ارتدادات نفسية عميقة ..
•يدخل يلعب.
•يدخل يضحك.
•يدخل ومعه مفاجأة.
•يدخل يحتضن يُقبل أطفاله.
•يدخل ويستعد لطلعة سعيدة.
•يدخل يساعد في أعمال المنزل بنفس طيبة

دع واترك مشكلاتك عند باب بيتك فأنت أب هناك من ينتظرك ليفرح بك

وإذا دخل الأب إلى المنزل فليجعل أول نصف ساعة لأهل بيته يستمع إليهم ويحدثهم ويضاحكهم، ولا ينشغل بموبايل ولا بأي شيء آخر ❤ ..

27/04/2024

وماتوفيقي الا بالله
عودة الدراسه اعتبارا من ١/٥

24/01/2024

مراحل نمو اللغه 🌸

24/01/2024

سميث اكسنت⁦❤️⁩

طريقة سميث اكسنت دي او بالبلدي كدا التنفس البطني👍

بستخدمها مع مين؟🤔
١.مع حالات التلعثم
٢.مع حالات البحة الصوتية
٣.مع بعض حالات العي لو مصاحبها مشاكل صوت

ملحوظه🤭
مع حالات التلعثم بعلمه تنفس بطني بس بس بس وبعدين يتنفس مع كلمات
اخدتوا بالكم أنا بسبست اد ايه😂
محدش يدي تنفس بطني و اصوات وكدا مع حالات تلعثم😠

فيه ناس بتقول بعمله تنفس بطني مع اصوات علشان اعوده اكتر ع التنفس البطني و ادخل له الموضوع بالتدريج و تساعده ع الاسترخاء و كدزا😂
براحتك طبعا .. بس افتكروا اني بسبست فوق كتييير .. كل شيخ وله طريقته✋

المهم
- نخش ع الطريقة و بلاش مقدمات👉
- ياريت والله لاني زهقت منك😠
- اشكرك😓

١.بتقول للمريض اعتبر بطنك دي بالونه و هننفخها .. هتاخد نفس من مناخيرك أو من بؤك .. براحتك .. المهم تاخد نفس حلو .. اشوف بطنك بتتنفخ .. اكتم النفس .. علشان يشوف كرشه وهو ادامه و انا اشوفه .. واطمن .. يلا بقى طلع النفس و فضي بطنك
يعني تاخد نفس ..يطلع كرش😂
تفضي النفس و تطلعه .. يروح الكرش😓

وياريت انت تعملها ادامه كتير علشان يستوعب الفكرة
وياريت قبل ما تعملها تشرحله الطريقة كلها وأهميتها
يعني مش اول ما يدخل تقوله وريني كرشك😂

ركز بقى👇

لو كتفك اتحرك مع دخول و خروج النفس يبقى انت لسه بتتنفس من صدرك 🙄

طب اعمل ايه؟
حط ايد ع صدرك علشان تثبته و ايد تانيه ع بطنك علشان تشوفها و هي بنتحرك👉

ممكن تساعده لو نفس النوع لو نفس النوع لو نفس النوع ابوس ايدكم نفس النوع
يعني لو راجل و انت راجل حط ايدك ع بطنه وهي طالعه و داخله .. لكن لو ست .. لاااااا و العكس صحيح👻

ممكن تساعده في البدايه أنه يعمله وهو نايم ع ضهره في البدايه و تحط ع بطنه كتاب علشان يشوف بطنه و هي طالعه و نازله و بردوا دا لو نفس النوع⁦☝️⁩ ولو عيادتك فيها شزلونج .. حلوة شزلونج دي 😂 😂😂
لو معندكش .. و دا الطبيعي .. يعملها في البيت وهو نايم ع ضهره في البدايه👉

و لو اتقنها وهو نايم ع ضهره و اتعود عليها في البيت مثلا .. يتدرب عليها وهو قاعد بزاوية قائمه👍

٢.لازم يتدرب ع التنفس البطني بس كدا .. كتييييير لحد ما يتقنه تمام الاتقان .. يتقنه وهو قاعد و هو واقف وهو ماشي وهو بيعمل حركات .. دا مهم جدا👉

خد بالك في الاول هيقولك .. حاسس اني دايخ .. هو مش بيمثل عليك .. هو فعلا داايخ لانه مش متعود ولأنه بيبذل جهد🙄 .. فريحه حبه و ارجع كمل😂 وقوله لو اتدربت كتير في البيت هتقل الدوخه👉

خد بالك في الاول هيقولك بطني وجعتني .. هو مش بيتهرب منك .. هو فعلا مكنش بيدرب عضلة بطنه .. واي عضله لما بندربها جديد .. بتوجعنا .. خليه يرتاح .. وأرجع كمل وقوله لو اتدربت كتير في البيت .. مش هتوجعك😂👉

خد بالك لو واحده حامل .. ممنوع تعمل تدريب سميث😠

خد بالك لو حد عنده اي عمليه في بطنه أو حاجة في بطنه .. متعملهاش👉😠

خد بالك .. اوعى تعمل اصلا تدريبات سميث اكسنت غير لما تكون جايالك الحالة من عند طبيب طبيب طبيب .. يا جدعان طبيب خريج طب ابو ٧ سنين دراسة دا و الف سنه دراسه بعدها و كاتبلك هتعمل تدريبات سميث و كام جلسه و الحاله ايه .. يعني اوعى تعملها من نفسك .. ابوس ايدكم علشان متحصلش مشاكل .. اللهم اني قد بلغت 🙌

٣.بتدرب المريض ع التنفس البطني مع اصوات مهموسه
س .. ش .. ف
ياخد نفس .. ينفخ بطنه .. يفضي النفس و يقول سسسسسسسسسسسسس .. هي مره واحده لكن طويله زي صوت التعبان كدا🐍🐍🐍
ياخد نفس .. ينفخ بطنه .. يفضي النفس و يقول ششششششششش .. هي مرة واحدة ولكن طويله كأنه بيطلب من حد يسكت🤫🤫🤫
ياخد نفس .. ينفخ بطنه .. يفضي النفس و يقول فففففففففففف .. هي مرة واحدة ولكن طويلة كأنه بينفخ وقرفان منك😤😤😤

٤.بتدرب المريض ع التنفس البطني مع اصوات مجهورة
ز .. چ .. ڤ ... كل واحد لوحده مره واحده
نفس اللي شرحناه فوق⁦☝️⁩⁦☝️⁩

٥.بتدرب المريض ع التنفس البطني مع المتحركات ولكن مع اضافت صوت (ه) اللي هي الهاء يعني
هااااااااي .. هوووووووه .. هييييييه
كل واحد لوحده مرة واحده
نفس اللي شرحناه فوق⁦☝️⁩⁦☝️⁩⁦☝️⁩

كدا بقى معانا ٩ اصوات
س .. ش .. ف .. ز .. چ .. ڤ .. هااااي .. هووووه .. هيييه

حلو؟
حلو👍

٦.بتدرب المريض ع التنفس البطني مع كل صوت من دول يقوله مرتين .. واحد قصير وواحد طويل
مثال
نفس .. ينفخ بطنه ..يطلعه وهو بيقول س سسسسسسس
نفس .. ينفخ بطنه .. يطلعه وهو بيقول ش شششششش
وهكذا لباقي ال ٩ اصوات 👍

٧.بتدرب المريض ع التنفس البطني مع كل صوت من دول و هو بيقوله ٣ مرات

لحد ما توصل أنه يكرر كل صوت من ال ٩ دول⁦☝️⁩ كام مرة بقى🤔
خمس مرااااات

فيه ناس بتقول ٧ و فيه ناس بتقول ٩ و فيه ناس بتقول ١٢. يلا مين يزود😂

المهم بقى انك ممكن تدربه أنه يعملهم بايقاعات مختلفة علشان ياخد.شكل الكلام👍

المهم بقى أنه يتدرب عليهم وهو قاعد وهو واقف وهو ماشي وهو بيتحرك وهو بيعمل حاجة🤯

المهم بقى أنه بعملهم طبعا مع التتنفس البطني👌

٨.بتدرب المريض أنه يستخدم التنفس البطني مع كلمه مفردة
ممكن مع العد .. مع شهور السنه .. مع ايام الاسبوع
مثال
نفس .. ينفخ بطنه .. يطلع النفس وهو بيقول وااااحد
نفس .. ينفخ بطنه .. يطلع النفس وهو بيقول اتنييين
نفس .. ينفخ بطنه .. يطلع النفس وهو بيقول تلاااته
وهكذا⁦☝️⁩

٩.بتدرب المريض أنه يستخدم التنفس البطني مع كلمتين
مثال
نفس .. ينفخ بطنه .. يطلع النفس وهو بيقول واحد اتنين
نفس .. ينفخ بطنه .. يطلع النفس وهو بيقول تلاته اربعه
وهكذا 👍

١٠.بتدرب المريض ع التنفس البطني مع جمله من تلت كلمات
مثال
انت لازم تتكلم بتنفس بطني و تسأله اسمك ايه..مهم جدااا
وهو يرد
ياخد نفس طويل .. ينفخ بطنه .. يطلع النفس وهو بيقول
انا اسمي احمد .. مرة واحده
و تفضل تهريه اسءلة كتير و يرد بجمله من تلت كلمات😂

وهنا لازم تحس أنه اتعود ياخد نفس طويل
هنا لازم تحس أنه مبقاش مشدود زي زمان
وهنا لازم يكون بطل يحط ايده ع بطنه ولا كتفه يعني يتكلم وهو مرتاح .. عادي كدا 👉

١١. بعدين بتدربه ع التنفس البطني مع كلام محفوظ ثم كلام مقروء ثم كلام تلقاءي ثم حوااار 👍

و الحمد لله خلصنا😂
ربنا يشفي الجميع 🤲

18/12/2023

أينشتاين وتأخر الكلام ومستقبل طفلك !

في سنة ١٨٧٩ اتولد طفل اسمه ألبرت في مقاطعة فورتمبيرغ بألمانيا، الطفل كبر وسنة بعد سنة، لكنه متكلمش، أهله قلقوا عليه بشدة، المفروض الطفل عند عمر سنة يبدأ يقول أول كلمة له، بس ألبرت لسه منطقش حاجة، طيب المفروض عند سنتين يكون بيقول جملة من كلمتين، ها يا ألبرت، هتعرف تقول جملة من كلمتين؟ ألبرت مش بيرد عليهم.

تفوت أيام وأسابيع ويظل الأهل قلقانين، ويصل قلقهم إلي الشك ان ابنهم ممكن تكون عنده مشكلة قوية في الذكاء منعاه من انه يقدر يتكلم، القلق يزيد وألبرت يوصل لحد سن ٣ سنين، ها بقي، قول اي حاجة يا ألبرت نشفت ريقنا، وألبرت لسه مش بيقول حاجه.

يشاء الله العلي القدير عند سن الأربع سنوات، ان ألبرت يبدأ ينطق كلمات بسيطة، ويتطور مستوى ألبرت في الكلام لحد اما يقدر يقول جملة كاملة عند سن ٥ سنوات، تشعر الأسرة بالأمل والتفاؤل ويقولوا الحمد لله الواد أخيراً أتكلم، ولكن يفضلوا قلقانين ان ألبرت ممكن يطلع عنده مشكلة في الذكاء واما يكبر يعاني كتير في حياته، وتمر الأيام ويكبر ألبرت ويصبح من أذكي العقول في تاريخ البشر.

أينشتاين مكنش حظه حلو وأهلوا أكيد اتغلبوا علي المشكلة بصعوبة لان مكنش في جلسات تخاطب في عصره تعالج المشكلة عنده من لحظة ما اكتشفها أهله وتخليه يتكلم بدري، لكن أكيد حظه كان حلو بردو بمجهود وعمل وتعليم وتدريب أهله اللي أكيد ساعده انه في النهاية يجتاز المشكلة اللي واجهها دي وهو صغير رغماً من أن مدتها طولت معاه، وهو اللي مهد له طريق نجاحه العظيم، لانهم لو كانوا تركوه من غير تعليم ومن غير مجهود لحل مشكلته، ولو كانوا يأسوا، مكنش أصبح ما أصبح عليه الأن.

القصة دي قايمة علي ادعاء قرأته بالصدفة واما بحثت لقيته مكتوب في مراجع كتير ، الادعاء هو ان ألبرت أينشتاين اتأخر في الكلام وهو صغير واهله قلقوا عليه ان ممكن يكون عنده نقص في الذكاء.

انا حبيت أكتب لكوا عنها علشان تكون مثال يضع فينا التفاؤل والأمل، واننا نفهم ان مشكلة تأخر الكلام دي هي مشكلة قابلة للعلاج اذا تدخلنا في سن مبكر وبشكل سليم، ونفهم ان الطفل لو اتاخر في الكلام فمش شرط انه يكون ضعيف في الذكاء وان خلاص كده مستقبله كله في خطر، فرغماً من إن احتمال ضعف مستوى الذكاء وارد ويجب الوقوف عليه، لكن يظل مش كل طفل متأخر في الكلام ضعيف في الذكاء.

فاذا واجهتنا مشكلة تأخر الكلام مع أطفالنا، نخلي عندنا يقين بالله ونحمد الله علي ما وصلنا إليه من علم في مجال التخاطب يساعدنا في علاج مشكلة الاطفال دي من بدايتها بسرعة وبسهولة، ونسعى في أسرع وقت تجاه التشخيص والتقييم الدقيق علشان نقدر نقف علي المشكلة بشكل صحيح وأسبابها وكمان نحدد مستوى الطفل بدقة ونتبع أسلوب التأهيل اللازم، ونتعاون مع الاخصائي ونشتغل باستمرار في البيت، لان هو ده طريق النجاح في أبهى صوره.

اذا تركوا أهل أينشتاين ابنهم ويأسوا واستسلموا لفكرة انه قد لا يتكلم وقد لا يكون ذكياً ، وإذا ما جدوا وأجتهدوا في تعليمه الكلام وحل مشكلته، لما وصل ذلك العقل العبقري إلي ان ينير حياتنا جميعاً بما أكتشفه وفسره من علم 💙

07/12/2023

نشاط سوق الخضار 🍓🥭🍍🍅🫑🍆🥒🥝🍐🥔

04/12/2023

🎉اعلان 🎉
نعلن :
📌 عن وجود جلسات تخاطب وتنمية مهارات وتعديل سلوك وصعوبات تعلم (نمائي و أكاديمي)

الطفل اللي متأخر في الكلام؟
الطفل اللي عنده مشاكل في النطق.. و ينطق حروف خطأ
تنادي عليه مش بيرد و مش منتبه؟
تحسي انه مش بيركز في الحاجة اللي بيعملها؟
بينسى كتير ودايما بيقاطعك في الكلام؟
بيتهته في الكلام؟

لو عندك نفس المشكلة أو غيرها
💫الطفل هياخد اللي يحتاجه من جلسات
( تخاطب / تنميه مهارات / تعديل سلوك
صعوبات تعلم (نمائى ،اكاديمى )
تطوير المهارات اللغويه والسمعية
طب ايه البرنامج اللي هنمشي عليه!
- جلسات تخاطب🗣️ وعلاج فرط الحركه والنشاط الزائد وتشتت الانتباه والتركيز
- تأخر وعيوب النطق والكلام
- علاج اللدغات
- جلسات تعديل السلوك😌
- جلسات تنمية مهارات😇
- جلسات تأهيل أكاديمي✍🏻
- تنمية المهارات العملية والاجتماعية والسلوكية - برنامج فردي لكل طفل

أ/ياسمين عادل سلطان
بكالوريوس تربية
قسم التأهيل المهني لذوي الاحتياجات الخاصة ودبلومه في التربيه الخاصه
اخصائية التخاطب وتنمية المهارات .. تعديل سلوك .. صعوبات تعلم

22/11/2023

10/11/2023

مبدعين الرحمه 💙💙🌸

08/11/2023

هتلاحظوا ان بقالي فتره مش بنزل انشطه او اي شئ باستمرار ودا السبب👇
تضامنا مع أهلنا في قطاع غزه ونصرة لدمائهم
قررنا عدم نشر أي نشاط نقوم به على صفحةالروضه حتى انتهاء الحرب وهذا أضعف الإيمان
النصر النصر ان شاء الله لأهلنا في غزه