Yara Noaman Life Coach. يارا نعمان مدربة حياة

من الحاجات المهمه اننا كأب وام نساعد اولادنا علي اتخاذ قرارتهم بانفسهم ..والتعلم منها وشيل مسؤولياتها …
اما اذا كان ده صعب علينا ودايما خايفين من اختياراته او من تفكيره فنقرر له باعتبار اننا فاهمين اكتر منه ..فناخدله جميع قراراته..
ده للاسف هيبني عنده بعض الحاجات اللي ممكن تبقي هي
بالنسبالنا الاهم ولكن مش واخدين بالنا منها …
هتلاقيه في كل صغيره وكبيره يسأل اعمل ايه ، اختار ايه،اقرر ايه
-الخوف الشديد والدائم من الندم علي القرار الخاطئ وألم تحمل المسؤوليه وحده ..
-هيتوقع دايما اسوأ النتائج لقراراته الشخصية عشان مش واثق فيها..
-هيفضل معتمد اعتماد كلي علي امه او ابوه وعمره ما هيعرف هو عايز ايه..مش عارف يفهم نفسه ولا يفهم احتياجاته ولا مشاعره
-عمره ما هيشوف القيمه في اختياراته الشخصية وده هيفقده ثقته في نفسه ..
اكيد احنا كأب وام عايزين نشوف ولادنا عندهم ثقة في نفسهم ..
عارفين يفهموا نفسهم ..
يقدروا يتحملوا المسؤلية ..
يعرفوا يتعلموا من اخطائهم..
يعرفوا يبنوا حدودهم ..
يعرفوا يعتمدوا علي نفسهم …
احنا صحيح بنخاف عليهم .. بس الخوف الاكبر هما هيكملوا حياتهم ازاي؟
طيب هل احنا ضامنين وجودنا جنبهم طول الوقت؟
اللي بيعتمد علي ابوه وامه في قراراته انهارده بكره هيعتمد علي ناس تانيين ..
لو انهارده هو ادام عنينا ومسيطرين علي الامر ،،ممكن في وقت يكون مش معانا ولوحده هيعمل ايه ؟مين هيسيطر وفكره عامل ازاي ؟
دورنا التوجيه واننا نساعده يشوف الصوره ولكن لازم يبقي ليه وجهه نظر وقرار حتي لو كان غلط من وجهه نظرنا وتفكيرنا ..
كل ما ساعدناهم انهارده يعرفوا ياخدوا قرارتهم ويتحملوا مسؤليتها ..كل ما سعدناهم يبنوا نفسهم وشخصيتهم
كل ما اتطمنا عليهم
وده بعد ما نبني تاسيس ((اخلاق ، قيم،دين،مفاهيم صح،))
توجيهنا اننا نفهمهم ونساعدهم ونعلمهم
علم ابنك يكون راجل ، علم بنتك تكون مسؤولة
علموهم يعرفوا يختاروا …

مهم اوي نسمح لاولادنا بالتعبيير عن نفسهم…
حتي لو كان بسبب عقاب مننا واقع عليهم ..
او بسبب فرض شئ عليهم لا يقبلونه ..
الطفل المعبر عن ذاته .. بيقدر يفهم نفسه ،،بيقدر يكون رأي ،،بيقدر يكون شخصية ،،بيقدر ياخد خطاوات ..بيقدر يقول لا للاذي ،،بيفهم رغباته واحتياجاته ..وبيعرف يضع حدوده ..
بيتعلم المواجهه..وعدم الخوف والانسحاب والهروب ..
وده جانب مهم جدا في التربية …
مهم نسمح بالتعبيير حتي لو مكنش علي هوانا او مختلف معانا ..
مهم نسمع وجهه نظره ونناقشه فيها..ونوجه توجيهاتنا عادي ..ولكن مع احترام وجهه نظره وتشجيعه علي التعبير ..
اما لو وقفنا ده ورفضنا تعبيره او عاقبناه عليه او قابلناه بالرفض ..وعدم القبول لسماعه ..
ده هيبقي ليه تاثير سلبي عليه ..
وهيوصلنا اننا بدل ما نزعل منه دلوقتي انه بيعبر او بيستاء او بيقول وجهه نظره ونعتبره قله ادب ..
هنزعل عليه بكره لما نشوف حاجات كتير مكناش نتمني نشوفها فيه …
لما الطفل بيخاف من التعبيير عن نفسه ..
بنحرمه..
انه يعرف يبني حياه خاصة بيه ..
او يعرف يقيم علاقات ناجحة..
او انه مايعرفش يفهم شغفه في الحياه ..ولا يعرف يكون علي طبيعته ولا بيحس بالتقبل ..
ده غير انه مش هيعرف يعبر او يتكلم عن اي مواقف مر بيها ..
وبتكون مواقف كبيره محتاجة مننا توجيه .. فبالتالي لا هيعير ولا هنعرف عنها حاجة ولا هنعرف نلاقي فرصه للتوجيه اللي هو محتاجة .
زي مثلا ((التحرش))
او ((تنمر))
وده هيحصل لانه بيخاف ومش حاسس بالامان..
ده غير ان كده علاقتنا بيه باظت ..
وبدل ما نكون الام والاب اللي بيشعر معاهم بالامان بنكون بالنسباله عدم امان ..!!!
ويبقي تعلقه بينا تعلق غير امن!!!
وكمان في نقطة مهمه جدا ….
هو انه هيخاف جداااا من الخطأ…. وده هيحرمه من التجارب ..
والحياه كلها تجارب..عشان ينضج ويتعلم ..

لازم نشوف الامور بشكل مختلف …احنا بنربي … يا تري عايزين نربي مين ونربيه علي ايه ..وليه ..؟
عايزين نكون بالنسباله ايه ؟
عايزين نحصد ايه منه؟
التعبيير عن النفس شئ مهم جدا جدا ..
طيب هل معني اني اسمح له بالتعبيير عن نفسه او اعتراضه ،اني اسمح بقله ادبه ؟
اكيد لا …
ولكن …
اذا حصل موقف وحصل منه تعبيير عن نفسه فيه او اعتراضه بشكل بالنسبالي مش مقبول…
فاللي المفروض اعمله اني مسكتوش واكبته واعاقبه …
لا ..
طيب اعمل ايه ؟
اسمعه وبعد ما يخلص ويطلع اللي جواه ..
اقوله انا معنديش مشكله انك تعبر عن نفسك او انك تعترض او تقول وجهه نظرك او حتي تختلف معايا..
ولكن ضروري تفهم ان في طريقة محترمة ممكن نتكلم بيها..
وابدأ اناقشه اذا استجاب واذا لم يستجيب اسمع وبعدين اخد موقف بمعني انا سمعتك ولكن كلامنا مخلصش لسه هيكون في كلام بينا ولكن مش دلوقتي لاني مش هقبل انك تتكلم معايا بالطريقة دي …
وبعد كده اسيبه …
ولكن لااااازم نرجع ونتكلم ونوضح ونوجه ونحط حدود …
زي ما قلنا …
اه انا معنديش مشكله في انك تعبر وتتكلم او تعترض ونختلف ولكن باسلوب محترم وراقي وانا اكيد هسمعك ونقدر نلاقي حل وسط ….او ممكن كمان اقتنع بوجهه نظرك ..وممكن كمان اعتذرلك لو انا اسأت التصرف ..
عمر ما كان الاعتذار لاولادنا بيقلل مننا كام واب ..
ولكن ده بيعلمهم ان احنا عادي ممكن نخطأ وبنعترف بغلطنا وبنحاول نصلحه …
وبيحسسهم بالامان من ناحيتنا واننا ممكن نفهمهم غلط او نتصرف غلط لاننا فاهمين غلط ..
علاقتنا …. هي الاساس في تربيتنا …
كل ما كانت علاقتنا باولادنا كويسه ..كل ما كانت تربيتنا ليهم افضل واسهل …
كل ما عرفنا نوصل بيهم لبر الامان ….
وده عمره ما هيحصل الا لو هما حاسين معانا بالامان….👌🏻

((بدلا من التطفل علي خصوصيات الأخرين ،حاول ان تطفل علي المناطق المظلمة في عقلك👌🏻))
د..احمد خالد توفيق..

((الانفصال))

قرار الانفصال مش قرار سهل ولكن محتاجين نعرف احنا بناخده ليه؟ وهل جاهزين ليه ولا لا ..
واذا اخدناه او هو حصل عن طريق الطرف الاخر .. محتاجين نفرغ مشاعرنا ونتعلم ازاي نتعامل معاها ومع افكارنا عشان نعرف نتخطي ده و نكمل حياتنا..ومتأثرش علي علاقتنا بنفسنا ولا علي اولادنا..لو موجودين
الانفصال ممكن يبقي ليه اشكال كتير..
من ضمنهم الانفصال بدون طلاق ..
وهو ان كل طرف له حياته ومالوش علاقة بالتاني حتي لو كانوا عايشين مع بعض..
او انفصال عاطفي ..
بمعني ان عايشين مع بعض ،، وامام الناس زوجين مستقرين
ولكن بينهم انفصال عاطفي او شرخ كبير في الحقوق والواجبات ..
او وصلوا من كتر الخلافات اللي مابتتحلش لحاجة اسمها زواج صامت مفيش لغه مفيش حوار مفيش حياه عاطفية بينهم ولا تواصل..
اسباب كتير ممكن تؤدي للانفصال العاطفي ..
واسباب كتير ممكن تؤدي للطلاق..او الانفصال..
ولكن ….
قبل القرار ده لازم نسال نفسنا
هل انا قمت بدوري ؟؟
عملت اللي عليا ..
قدمت حلول ..
الزواج هو ميثاق غليظ .. بمعني انه ميثاق مايتفكش بسرعه
احنا بنحاول ..
بنسعي..
بنفكر ..
بنعمل مجهود..
وفي حالات طبعا قسوة .. لازم نحمي نفسنا من الاذي ..
اذا كان ملموس ومضر .ولا يتغير….
الزواج تجربة ..
ممكن تنجح وممكن تفشل ..بس الفكرة ايه الدليل علي نجاحها او فشلها ؟
ايه المكاسب والخسائر ..
ايه النتائج
وقبل ده كله ايه المجهود اللي اتعمل ..
عشان كده هو ميثاق غليظ..
طيب بعد المجهود بعد السعي مفيش نتائج مفيش اتفاق .مفيش قبول..
يبقي زي ما قال ربنا ..

وَإِنْ يَتَفَرَّقَا يُغْنِ اللَّهُ كُلا مِنْ سَعَتِهِ وَكَانَ اللَّهُ وَاسِعًا حَكِيمًا

الطلاق شرع ربنا ولكن ربنا قال

فَإمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ

لازم اشوف انا واقفه او واقف فين دلوقتي ..في اي مرحله ..
وايه الخطاوات اللي المفروض اعملها ..
احلها مع نفسي ومع الطرف الاخر .. وخصوصا لو في اولاد ..
ايه اللي اولادي بيشفوه ؟
ايه اللي بيسمعوه؟
ايه المفاهيم اللي بعلمهلهم عن العلاقة الزوجية؟
او عن الطلاق..
ايه الاثار النفسية اللي بتقع عليهم وممكن تسبب ليهم عقد وامراض نفسية يكملوا بيها باقي حياتهم ..
انا بعمل ايه ؟؟!
انا دوري ايه؟!
انا عايز ايه؟!
المجتمع بقي مليان كلاكيع وللاسف عمالة تتورث من شخص لاخر زي الفيروسات والامراض ..
بعد كده بتطلع ناس مش عارفه تقوم بأدورها ..مش فاهمه ازاي شكل دورها اصلا ..
لخبطة في المفاهيم لخبطة في الاخلاق لخبطة حتي في الدين وكلام ربنا…..
وللاسف مفيش حد هيقدر يغير مجتمع ولكن الاكيد ان كل حد يقدر يغير نفسه …..
وبالتالي دايرته هتتاثر بيه وربما يتاثر بيه اجيال جايه عن طريق اولاده …
وقبل كل ده اللي بيتغير وبيعمل اللي عليه ده بيعود علي نفسه قبل حياته نفسيته ، صحته، رضاه عن نفسه ..واحساسه بالقيمة ..
استحقاقه انه يستاهل يبقي كويس يستاهل يعيش حياه كويسه يستاهل يبص لنفسه في المرايه ويفخر بيها ..
يستاهل يربي اولاد ويطلعهم للمجتمع ويعمل رسالته ويقابل ربنا بيها ….
ريموت الكنترول في ايدك انت بس 👌🏻
في ايدك انتي بس👌🏻
بس نعرف ازاي نستخدمه ✋🏻

هل انا لما اتعالج نفسيا واتعافي هبطل احس بالمشاعر اللي بتعطل حياتي ؟
هل هحس بقي بالمشاعر الجميلة اللي بتزدني سعادة وبس..
هل هتختفي الاعراض عندي ..
هل علاقتي هتتحسن بحد ..
التعافي مش معناه ان الاعراض هتختفي والمشاعر السلبية هتختفي..
التعافي يعني هتعلم ازاي اتعامل معاها ازاي هتصرف في المواقف اللي بتضغطني .. ازاي هفكر لما اشعر بالمشاعر دي
ازاي ادير مشاعري اتعامل مع افكاري واغير سلوكياتي
وده هيخلي حياتي تتحسن ونظرتي تتغير وعلاقاتي تبقي كويسة ..وممكن اخرج من علاقات خالص ..وابدأ اخد خطاوات جديدة في حياتي..
ده هيساعدني علي اني اعرف اتعامل واعيش بصحة نفسية كويسة..
هيساعدني اتعرف علي نفسي .. واتعلم ازاي احبها واحترمها ..ازاي اقدرها واسعدها ..
كل ما جوايا اتغير كل ما حياتي اتغيرت ..
البداية دايما من عندك🌹

((الأمل))
منغير الأمل ممكن اوي منقدرش نكمل ..
تفاءلوا خيراً تجدوه..
الأمل ان بكرة هيبقي اجمل ..
الأمل ان المريض هيخف..
الأمل اني هنجح في الأمتحان ..
الأمل ان الفرج قريب..
الأمل ان حياتي هتتحسن ..
كل ده حلو وجميل والأمل والتفاؤل ده شئ جميل بيحفز الانسان علي تجاوز الصعاب والتقدم في حياته ..والنظرة الأيجابية للحياة والشعور بالثقة ان الحياه هتتحسن ..
وده كمان في حسن ظن بالله ..وده الحقيقة جانب مشرق جداا للحياة وللصحة النفسية ..
ولكن✋🏻
للاسف في جانب مظلم للأمل …
لأن الامل لا يعني الانفصال عن الواقع ،، ولا يعني رفع قدميك بعيدا عن الارض ..
لان الامل هنا هيتحول لوهم☝🏻
وده هيحول التحفيز لاحباط والشعور بالعجز ..
طيب انا كده اتلخبطت🙈
يعني يبقي عندي امل ولا لا😒
الاجابة ان طبعا اه يبقي عندنا امل وحسن ظن في الله وثقة ..
ولكن ضروري افرق ما بين الامل والوهم ..
بمعني اني اشوف فين موضع الامل ده ..لان هو بيبقي جميل لما يكون في توقيته وموضعه..وغير كده بيكون وهم ..
يعني اما يبقي عندي امل اني هنجح في الامتحان رغم صعوبه الماده او التحديات غير اني انجح في الامتحان وانا اصلا مروحتش !!
وهنا انا لما ببني امل ببنيه لما اعمل اللي عليا 👌🏻
لما اسعي .. لما اخد بالاسباب..
و زي كمان ان يبقي عندي امل اني اعيش بصحة جيدة
ولكن مش اني اصغر ٢٠ سنه ..
اني اتجوز راجل كويس
غير اني اتجوز افضل راجل في العالم ..او اتجوز الفارس اللي هيحققلي كل احلامي
الأمل ان مشاكلي مع جوزي او مراتي تتحل ونتفاهم وانا بعمل مجهود لده وبسعي فيه ..وفي مؤشرات لده ..
غير ان علاقتي بحد مؤذي وكل يوم يأذيني اكتر و علاقتي بيه هتتغير وهو هيتصلح ونعيش في تبات ونبات مع ان مفيش اي مؤشرات علي ان ده بيحصل او هيحصل ..
وده يخلينا نفهم ان الامل يبقي الي حد ما واقعي ..
يعني ميبقاش عندي امل ان وضعي الاجتماعي والمادي يتغير ويبقي احسن وانا مش بسعي لده ولا بحاول ..ولا في مؤشرات واقعية لده...
الأمل في غير موضعه وهم ..
الأمل المبالغ فيه ممكن يؤدي الي احباط..
الامل الغير مبني علي قواعد ثابته يؤدي غالبا الي عجز ..
احسن بالله و ظن خير في اقداره وثق فيه
لاكن ✋🏻متنساش تسعي وتعمل اللي عليك وتاخد بالأسباب 👌🏻

((التكيف ))
من اهم المهارات اللي بتساعد وبتدل علي القوة النفسية ..
كتير مننا بيعدي بأوضاع مش مريحة نفسياً ..
التكيف يعني القدرة علي التكيف مع الظروف المتغيرة والتأقلم معها ..سواء كانت الظروف دي في العمل او في العلاقات الشخصية او في الحياه عموما ..التكيف يعني المرونه ازاي ابقي مرن ومتكيف مع ظرف ما ..ازاي اقدر اعدي منغير خسائر نفسية ..بالعكس اعدي وانا مكتسب خبرات جديدة ، مهارات جديدة ، مكتسب قوة نفسية👌🏻
طيب ايه اللي هيحصل لو ماعرفتش اتكيف ..؟
ألم نفسي،ناتج عن الرفض لشئ او الاحساس بأنك مجبر علي تحمله, صعوبة الحياه ..وده ممكن يصاحبه قلق، توتر واكتئاب وبعض الاضطرابات اللي تفقدك صحتك النفسية وتوازنك ..
وايه اللي هيحصل لو قدرت اتكيف ..؟
الشعور بالثقة في الله والثقة في النفس ..
اكتساب المهارات الجديدة ..
التعلم من الخبرات والتجارب..
الصحة النفسية الجيدة ..
القوة النفسية..
طيب ده كلام جميل ولكن هو صعب تنفيذه ..
ايه الحل ؟! ايه اللي يساعدني علي التكيف ..
من اهم الحاجات اللي بتساعد علي التكيف هو انك تتلمس ايجابيات الوضع الجديد و لا تذكر ايجابيات الوضع القديم بل تذكر سلبياته…👌🏻
طريقة التفكير هي اللي فيها السر …
ازاي بتفكر ؟! ازاي بتنظر للأمور وتفسرها ..
كل ما ادربت علي طرق تفكير مختلفة كل ما شوفت زوايا مختلفة من الامور ..
اللي بيتغير مش الشئ .. ولا الظرف ..
اللي بيتغير نظرتي له او تفسيري او تفكيري عنه ..
كل ما كان ده في صالحي .. كل ما زدت مرونه وتكيف وصحة نفسية ..
الانسان كل ما يفكر في ايه اللي هيستفيده ؟ ايه المكاسب .؟ايه اللي هيضيف له ؟
ده بيعزز من تجربته ومن شخصيته ومن ثقته
لاكن كل ما هيفكر هو خسر ايه ؟ضيع ايه؟اتضر ازاي؟ده بياخد من طاقته ونفسيته وحياته …
متركزش علي اللي يهد فيك ☝🏻
ركز دايما علي اللي يبني فيك 👌🏻
كل ما اتعلمنا كل ما زدنا وعي ..كل ما اتغيرنا كل ما اتغيرت حياتنا..
اننا نعمل اللي علينا واللي في سيطرتنا ونسلم لله واقداره ونسعي في حياتنا ونكمل ..ونتوكل علي الله
ده هيزدنا ثقة وقوة نفسية ..

من اهم النقط اللي تعيشك في صحة نفسية جيده ..
انك متكذبيش علي نفسك ..
بمعني تواجهي الحقايق .. وتتقبليها .. وتشوفي ازاي تقدري تتعاملي معاها .. ده بيزيدك وعي عن نفسك وبيوصلك لطريقة تفكير مختلفه .. بمعني انا عارفه الحقيقة ومتقبلاها حتي لو زعلانه منها .. ولكن بفكر ازاي اتعامل معاها ..
لكن لما بكذب علي نفسي ومواجهش نفسي واعيش في انكار عشان فاكره ان ده هو اللي بيحميني ..انا كده بأذي نفسي نفسيا ..✋🏻وبعطلني كتير
كل ما كان عندي وعي .. كل ما اتعلمت ازاي اواجه مشاكلي او مشاعري او نظرتي عن نفسي ..كل ما سعيت للوصول لطريقة للتعامل معاها او ادارتها ..
كل ماساعدت نفسي علي التطور وعلي صحة نفسية جيده..
#صحةنفسية

❤️

من اكبر الحاجات اللي بتعزز ثقتي في نفسي …
اني لما اوعد نفسي بشئ اعمله 👌🏻
احنا كتير بيجلنا افكار عن التغيير … زي انا محتاج اظبط النقطة دي …
محتاج اظبط اكلي …
انا عايزه بقي اشتغل علي نفسي ..
انا من بكره هبدأ العب رياضة ..
انا هنظم وقتي ..
كتير جدا بيجلنا افكار جميلة تساعدنا علي التطور والنمو ..
وبناخد قرارات ..
بس اوقات بيعدي الوقت واحنا حتي مبدئناش ..
الفكرة بتفضل فكرة لغايه ما تتنفذ علي ارض الواقع ..
كل ما اتحركنا و بدئنا ..كل ما عززنا ثقتنا في نفسنا وعرفنا اننا نقدر 👌🏻

الألم هو أكبر محفز للتغيير✋🏻