كل عيش

03/03/2021

حافظ عليها زي ما بتحافظ على عربيتك.
عامليه بحنية زي ما بتعاملي الحلة التيفال.
حبوا بعض. 😃

28/02/2021

"ليس من حق من تعامى عن البدايات أن يشكو سوء النهايات"
👈متبقاش طول النهار زعيق وخناق في البيت، وبتقلل من مراتك قدام ولادك أو حتى بينك وبينها وعشان معقد نفسيا بتطلع العقد عليها وتحسسها بالنقص، وبعد فترة سواء قصيرة أو طويلة = تتفاجئ إنها بتطلب الطلاق🤷‍♂️!
متبقيش ليل نهار كئيبة ومطلعة عينيه ومش بتبطلي طلبات وبتكسفيه قدام أهله ومش سامعة كلامه، ولما ينفجر فيكي مرة واحدة ولا يرمي عليك اليمين= تزبهلي وتعملي مش عارفة دا حصل ليه 🤷‍♀️!!
الجزاء من جنس العمل، وللصبر حدود، وطول ما بننفخ في بالونه هتفرقع في وشنا مهما كانت كبيرة وبتستحمل❗️.

مبادئ السعادة الزوجية

10/01/2021

👈من القصص اللي أثرت فيا في تعاملي مع المرضى
مريضة جاية بألم شديد في الكتف واشتباه تمزق في الأوتار فبسألها: حضرتك بتشيلي حاجات تقيلة أو عملتي مجهود كبير؟!
وكأني بسؤالي دا دوست على جرح!!
لقيتها عينيها دمعت وصوتها وطي .... وقالتلي: زمان مرات أبويا الله يسامحها كانت بتشيلني كتير وطول اليوم باشتغل في البيت ومكنتش بسأل في نفسي.....
بس من ساعة ما اتجوزت وجوزي ربنا يباركله ويكرمه بيهتم بيا ومبيتعبنيش وبطلت شغل صعب وبيلف بيا على الدكاترة عشان يعالجني.
الجميل كان نظرة العرفان والامتنان في عينيها وإنها بتحكي الكلام دا في غياب جوزها يعني دليل واضح على صدقها.
وتأكيدا لكلامها إننا لما طلبنا منها أشعة رنين ومع إنه كان عاملها مقطعية قبلها فالراجل مترددش لحظة، وعمل الاشعة تاني يوم فعلا، مع إن واضح عليهم إن حالتهم المادية بسيطة جدا.
النماذج دي بتفرح الواحد وبتسعد يومه وبتخليه يتمنى إن دا يبقى النموذج السائد في الأسر كلها. 😊

29/10/2020

اللهم صل وسلم وبارك على سيدنا محمد

إلقاء القصيدة المحمدية بصوت: محمد هشام وهي منسوبة للإمام البوصيري في مدح خير البرية وكلماتها: محمدٌ أشرف الأعراب والعجــم محمدٌ خير من يمشي على قدمِ محمدٌ با...

24/09/2020

دايما فيه حدود في الخناق ووقت الزعل مينفعش نتعداهم.
فيه خطوط حمراء مينفعش نعديها مهما كانت لحظة الغضب زي كلمة أنت مش راجل، احنا مننفعش لبعض، تهديد بالطلاق.... إلخ.
الكلام دا مينفعش يتسكت عليه ولو عدى مرة يبقى يعدي بقرصة ودن موجعة مش وبس، وميتكررش تاني.
دا الأصل وكل واحد أدرى بظروفه لكن تبقى عارف إنك بتتنازل عن جزء كبير وضخم من حقك حيتضاعف مع الوقت لو ملكش موقف قوي.
وبالنسبة للوقت فياريت ميعديش يوم إلا والخناقة خلصانة، كل ما مدة الزعل بتزيد كل ما الشيطان بيزودها والإصلاح بيصعب.
الكلام للطرفين طبعا وإن كان بصيغة المذكر.

01/09/2020

متحوجش شريكك لعتابك على نفس الموضوع مرتين، فاللبيب بالإشارة يفهم.
اللي بيفهم وبيحب ميقصدش يغضب حبيبه ولو مرة فما بالك إنه يغضبه مرات!

27/08/2020

قال النبي صلى الله عليه وسلم: من وسع على عياله يوم عاشوراء لم يزل في سعة سائر سنته.
قال جابر الصحابي رضي الله عنه: جربناه فوجدناه صحيحاً، وقال ابن عيينة: جربناه خمسين أو ستين سنة.
واتفقت المذاهب الأربعة على استحباب التوسعة على الأهل في يوم عاشوراء.
فمستني إيه بقى 😃
ابسطهم ووسع عليهم وربنا هيبسطك ويوسع عليك 🤲🏻

مبادئ السعادة الزوجية

27/08/2020

النفاق أسهل وسيلة للسعادة الزوجية! 😃

25/08/2020

تقلقي بس لو شفط كرشه أو فرد ضهره قدامها، غير كدا شكليات.

24/08/2020

لو عرفت إنها ممكن تقدملك من الكاسات اللي في النيش= اتجوزها 😃

23/08/2020

مشاكلك الزوجية وأسرار شريكك مش مجال للفضفضة ولو مع أقرب أصدقائك، الحالة الوحيدة اللي تخليك تحكي المشاكل دي هو الوصول لحل ليها، ومش مع أي حد لكن مع الشخص اللي فعلا هيساعدك بحكمته وخبرته، حتى لو الشخص دا مش قريب منك كفاية لكنك تثق في عدله وحكمته، وفي المقابل صديقك المقرب إن لم يكن أهلا لذلك فمتقربش للجوانب دي معاه نهائيا وخلي الفضفضة في أي حاجة تاني غير أسرار بيتك.
مفيش حاجة اسمها دا صاحبي ومخزن أسراري لأن الأسرار هنا تشمل شخص تاني ليه عليك حق الستر فكلامك عنه بلا داعي هتك لهذا الستر فربما تأثم بذلك، وعمليا ممكن يجي يوم وغالبا بيجي بتندم فيه على فتحة صدرك مع صاحبك لأسباب كتير مش مكانها في البوست.
الأصل في المشاكل الأسرية الستر ومحاولة الحل بين الطرفين فقط.
لكن الأصل الأكبر هو بقاء المودة والصفاء وحل المشكلات فإن لم يكن هناك سبيل للوصول للحل سوى بإشراك طرف آخر فافعل.

مبادئ السعادة الزوجية