05/09/2023
أول مرحلة وهي ما قبل الخطوبة.
----------------------------------
1- لو فيه عيب مش هينفع معاكي فهو مش هيتغير يعني لو هتتقبليه تمام , لأ يبقى ارفضي.
2- العلاقات الأونلاين 98% منها بيفشل , ماينفعش تتعرفي على حد شات أو مكالمات حتى.
3- لو هتتجوزي وتروحي معاه في بيت عيلة فدة طريق كله مشاكل خصوصا لو أنتي عندك خصوصية في بيت أهلك لأن بيت العيلة كله عايش مع بعضه إلا حالات نادرة ودة مش عيب دي ثقافة.
4- المرحلة دي ماينفعش تقولي عليه دة عوض ربنا ليكي لأنه غالبا مش كدة. دي تتقال بعد الجواز بسنين.
5- لو هترتبطوا ويسافر ويسيبك يبقى دة طريق فيه صعوبات أكتر , ما ينفعش تتعرفي على حد أونلاين أو حتى مكالمات.
6- ما توافقيش على حد لمجرد إنك عايزة تطفشي من بيت أهلك , توافقي فقط لو هو مناسب ليكي.
7- أنتي مش هتتجوزي ظروف , أنتي هتتجوزي طريقة تفكير وشخصية , الظروف بتتغير.
8- اللي حواليكي عايزينك تتجوزي ويفرحوا بيكي بغض النظر هتكوني مبسوطة في جوازك أو لأ يعني تسمعي منهم أه بس تأثيرهم عليكي ما ينفعش يكون كبير , هما بيحبوكي أكيد بس دة مايمنعش إنهم ممكن يضروكي عادي من غير قصد.
9- لو أنتي بتتكلمي ومش بيتبل في بقك فولة فلازم تفهمي شخصيته بتحب الخصوصية ولا عشان دي دمرت بيوت كتير.
10- التغافل في المرحلة دي مش مفضل أوي يعني هو برده لو عنده عيب فمش هيتغير يا تقبليه زي ما هو يا بلاش.
11- لو هو صريح معاكي في عيوب زي مثلا أنا بتاع بنات , فماتفرحيش أوي بدة لأنه يخونك وهيلومك لو اعترضتي بعد كدة ومش هو بس وهتكوني أنتي اللي غلطانة عشان وافقتي.
12- لو بتساعديه بفلوس وبقى بيطلب منك فلوس بشكل واضح مش هيتجوزك ومش هيشيلك دة بعد كدة , الراجل لو هيستلف من طوب الأرض مش هياخد من البنت اللي هيرتبط بيها.
13- لو بتحبي الخروج وهو أصلا مش بيخرج يبقى مش هيخرجك بعد كدة مهما طالت وعوده.
14- لازم تفتحوا مع بعض موضوع حقوق المرأة وحقوق الرجل وتشوفيه مركز مع واجباته أكتر ولا حقوقه وهل هو عادل في الجزئية دي ولا لأ.
15- البخل من أبشع الصفات اللي ممكن انسان يقبله على نفسه.
16- أنتي محتاجة تشتغلي على نفسك وتكوني جاهزة يعني لو عندك عقدة من حاجة معينة محتاجة ظبطيها بهدوء عشان بعد المرحلة دي هندخل في قصة تاني خالص
17- المرحلة دي ما ينفعش تطول خالص ولازم يكون فيه ميعاد واضح إنه ييجي البيت مثلا(مش فترة ثابتة)
دي مجموعة نصائح أو ملاحظات ممكن تكون مفيدة لحد ، والبوست هيكون طويل فممكن تشوف المرحلة اللي حضرتك فيه وتقريها علطول , عشان كل مرحلة وليها شكلها فقسمتهم وخليت لكل مرحلة كلامها , وفي العلاقات , النصائح الخاصة بالولد غير البنت وعشان كمان لكل مرحلة كلامها فخليت البوست دة هيكون نصايح للبنت , وهنزل في بوست تاني للشباب , المراحل اللي هنتكلم عنها هما 3 مراحل أولهم مرحلة الما قبل الخطوبة زي اللي فوق والباقي تحت , أهم حاجة إن فيه حاجتين هنتفق عليهم أهم من النقط نفسها
1- أول حاجة , نصائح كل مرحلة فهي بتاعة المرحلة دي بس , يعني ما ينفعش ناخد شوية من هنا ونطبقها في مرحلة تاني.
2- النصايح دي مش قرارات تتاخد ولا قوانين ثابتة , دي مجرد نصيحة ممكن تكون مفيدة وممكن لأ , هي مجرد عامل مساعد للتفكير
علاقة الزواج من أجمل العلاقات لو مشيت بشكل مظبوط , الحب مش هو اللي الأساس اللي يضمن استمرارية العلاقة , المودة والرحمة هي أساس الجواز
المرحلة الثانية وهي ما بعد الخطوبة
--------------------------------------
1- لازم تبقى حاطة مؤشر لشكل العلاقة لغاية دلوقتي , يعني كمية الخناقات اللي اللي حصلت بينكم وشكل الخناقة عامل إزاي.
2- لو فيه تغير في شخصيته معاكي يبقى تسيبيه فورا لأن التغير اللي بعد الجواز حمادة تاني خالص.
3- لو هو كان عنده شغف بيكي قبل الخطوبة والموضوع بدأ يقل يبقى أنتوا عندكم مشكلة مع بعض.
4- في المرحلة دي هو مش زوجك مهما حصل.
5- هنا ممكن تبدأي تتغافلي عن حاجات بسيطة , بس المهم لو الحاجات دي مش هتتقبليها يبقى برده الاستمرار هيكون صعب.
6- ماينفعش يبقى تركيزكم في التجهيزات ومش بتعرفوا بعض أكتر.
7- هو هيحاول يسعدك لغاية مرحلة معينة بعدها هينفضلك حتى لو مخطوبين.
8- مش كل الشباب بتفهم موضوع الهرمونات , فمحتاجة توليله الموضوع بشكل عقله يستوعبه
9- لو أنتي من النوع اللي كلامك دبش فركزي أوي لأن تأثير الكلمة اللي هتقوليهاله بتقتل حاجة حلوة ناحيته , زي لما واحد تقولك دة كدة مش راجل وتروحي قايلهاله مثلا هو مش هيبين.
10- أنتي مش بتتجوزي أنتي وهو بس , دي عيلتين بيرتبطوا ببعض , يعني محتاجة تركزي في كدة عشانك أنتي قبل أي حد , وبرده حافظي على اللي بينكم ما يطلعش برة.
11- الانفال بيبدأ مع أول مشكلة بتطلع براكم أنتوا الأثنين.
12- لو أنتوا في مرحلة الخطوبة ومش عارفين تصالحوا بعض وفيه تدخلات خارجية دي مؤشر مش حلو يخليكم تعيدوا التفكير تاني.
13- محتاجة مجهود أكتر عشان تفهمي شخصيته.
14- لو هو مرتبط بأصحابه خلي دايما المساحة دي بالعقل طبعا.
15- هو مش بيحب أصحابه أكتر منك بس القهوة اللي بيروحها معاهم بيروحها وهو مش شايل مسئولية يعني.
16- لازم تكونوا علاقة أصحاب عشان لو اتحولت لروتين هتزهقوا من بعض.
17- رد فعلك على أي مشكلة محتاجة تكزي فيه جدا عشان هو اللي هيبين شكل علاقتكم بعد كدة.
18- بلاش كل مكالمة تكون خناقة ولو هي كدة سيبيه.
19- لغاية أخر يوم قبل الجواز حطي في دماغك إنكم ممكن ما تكملوش عادي. أنا عارف إن دة صعب , بس المقصود ما تحطوش بعض في خانة اللي هيعيشوا مع بعض مدى الحياة طول مانتوا لسة مش متجوزين.
19- لو هتتجوزا في بيت عيلة فمحتاجة تفهمي الأول ثقافة بيت العيلة عشان تعرفي تتعاملي.
21- أوعي تاخدي نصيحة من جروبات البنات وتطبقيها بشكل قطعي. ياما بيوت اتخربت بسبب بوست واحد نزل. البنات أكيد خايفين عليكي أكيد بس هما بينصحوا نفسهم فيكي يعني الظروف دايما مختلفة.
22- لو هو مش بيهتم بزعلك المرحلة دي يبقى مش هيتهم بعد كدة وبالعكس تماماً.
23- خلينا متفقين أحنا مش بنقيم مين حلو ومين وحش ، الفكرة كلها بتشوفوا مناسبين لبعض ولا لأ
24- العلاقة لازم تكون موزونة , يعني هات وخد , مش طرف واحد بيدي والتاني لأ
المرحلة التالتة بعد الجواز
----------------------------
1- وهنا بقى الموضوع مختلف عن كل اللي فات فخلينا نركز أكتر.
2- أول مشكلة بينكم مش هي الكارثة رد الفعل هو اللي هيتبني عليه كل حاجة جاية.
3- اختيار الوقت لفتح موضوع مهم لكل واحد فيكم.
4- حساباتكم في كل حاجة مختلفة عن بعض , فأنتي كدة كدة هتركزي في حساباتك بس مهم تركزي في حساباته كمان ودي هتفرق كتير جدا.
5- بلاش تريأة على أي حاجة حتى لو هزار لأن دة هيفرق كتير بشكل أكبر أدام.
6- جدودوا صداقتكم كل شوية.
7- تاني , انفصالكم هيبدأ مع أزل مشكلة تخرج برة.
8- مهم تبقي فاهمة الأمور من حواليكي تعرفي تقيمي.
9- هو مش هيتغير , مش هيتغير , تقبليه أو انفصلي عنه , ودول طريقين ليهم مزاياهم وعيوبهم.
10- دايما حافظي على رصيدك جواه وتابعي رصيده جواكي.
11- التنازلات لازم تكون محكومة , وماينفعش تكون من طرف واحد طول الوقت.
12- الحاجات اللي مضايقاكي غير الحاجات اللي مضايقاه محتاجين تركزوا في الحاجتين.
لو الموضوع مرهق شوية ممكن تنضم معانا في ال workshops اللي بنعملها أو الجلسات الفردية في حالة إن الموضوع صعب ومرهق نفسيا
