04/02/2024
.. لطالما السماء موجودة لسوف تكون لي اثار علي الارض ..
من اشهر المقولات اللي قالها ابن مصر البار الملك رمسيس الثاني و قد كان
رمسيس كان بيعشق المباني و التماثيل الضخمة جدا العمارة و النحت ف عهده شهدوا حركة غير مسبوقة يمكن محصلتش من عصر بناة الاهرام
مفيش حتة ف مصر الا و فيها تمثال ضخم او بقايا مباني عليها اسمه
مفيش متحف من متاحف العالم الا و فيه قطعة اثرية فريدة تخصه
تماثيله الضخمة ف مصر مبهرة زي التمثال اللي هتعرفوا حكايته ف البوست .. تمثال ميت رهينة ..
اللي زاروا متحف ميت رهينة او اتفرجوا علي صوره زيي بيدققوا جدا ف كل تفصيلة من تفاصيل التمثال و اعجابهم بيه بيزيد و بيثير علامات تعجب و تساؤلات كتير هنرجع بالزمن لسنة 1820 م ف قرية ميت رهينة التابعة لمركز البدرشين بمحافظة الجيزة ..
عمال بيشتغلوا بهمة و نشاط تابعين لاحد البعثات الاجنبية اللي بتعمل تنقيب في المنطقة بحثا عن كنز اثري محدش اكتشفه قبلهم
بيظهر للعمال كتل حجرية ضخمة منحوتة و مع ازالة الرمال اكتر بيبتدوا يعرفوا شكلها
بيفضلوا يحفروا الي ان يعثروا علي التمثال واقع علي ضهره و متكسر لست اجزاء كبيرةو نص رجليه مش موجودين خالص زي ما انتوا شافين ف الصور
طب ازاي تمثال زي ده يبقي موجود هنا ؟!
ببساطة المنطقة دي فيها معبد اسمه معبد بتاح الكبير .. نثر الفن و الفنانين في مصر القديمة .. فاساسي يبقي قدامه تماثيل كتير زي ما بنشوف ف معابد الاقصر و الكرنك
و المنطقة دي كانت مدينة منف اقدم عاصمة لمصر و بتاح مقدس عندهم فوجود المعبد برضه طبيعي
لكن يبدو ان حصلت حاجة كبيرة هناك ادت ان تمثال بالضخامة دي يقع و يتكسر لاجزاء
التمثال مصنوع من الحجر الجيري منحوت من قطعة واحدة و وزنه حوالي 100 طن و طوله 10 متر من غير رجليه طبعا ممكن يتفوق ف طوله علي تمثال المتحف الكبير
بيصور الملك بكامل هيئته لابس التاج المزدوج .. تاج الشمال و الجنوب دليل علي توحيد المملكة ..
في خراطيش كتير موزعة علي جسمه و لبسه بتحمل اسمه و القابه منحوتة متكاملة زي الكتاب ما بيقول
وقتها الكشف عمل صدي واسع لدرجة ان محمد علي باشا والي مصر وقتها قرر يهديه للمتحف البريطاني
و لكن المتحف البريطاني اعتذر !!!!!!
مش عشان مش عاجبهم مثلا لا خالص عشان مش عارفين هينقلوه ازاي 😂
و هنا ف مصر لقوا انهم هيضطروا يقطعوه تاني عشان النقل فقالوا نرممه و نسيبه زي ما هو ف مكانه و نبي حواليه حاجة تحميه
و بعد عشرات السنين بنوا حواليه المتحف الحالي و اضافوا ليه قطع اثرية تانية و بكده بقي متحف ميت رهينة من اشهر المتاحف ف مصر و العالم
اصدقاء كتير بيقولولي ليه ميترممش و يقف علي رجليه تاني ؟!
وقتها مكنش في امكانيات تسمح و رغم انه حاليا نقدر بس انا شايفة ان وجوده كده افضل كتير .. سيبوه نايم محدش يصحيه 😂😂😂🇪🇬🇪🇬
