كن مميز

09/07/2025

https://chat.whatsapp.com/DLRqTMAD7FC42LzfN5GVlK?mode=r_cالكورس مجانا لوجه الله وصدقة علم علي روح ابي وامي ومحمد بن عمي

WhatsApp Group Invite

17/11/2024

ليه الطفل بيلعب ؟؟

ربنا خلق اللعب في الطفولة عشان الإنسان "كائن اجتماعي" ..

مستحيل مستحيل يقدر يطور سلوكه الاجتماعي إلا لو كان "بيعرف" يلعب ..

خاصة اللعب بيترجم لتواصل ..

إيه اللي يحصل لو الطفل اتحرم من 'الألعاب والعرائس' قبل سن ٥ سنين؟

- خلل في التواصل الاجتماعي ..
- تجاهل إهتمامات الآخرين ..
- عدم فهم الكناية وماوراء الكلام..
- عدم فهم النكتة والهزار ..
- تأخر التعلم بالقدوة ..
- صعوبة التعبير عن المشاعر ..
- خلل في إدراك المشاعر ..
- مش بيقدر يواسي او يطبطب ..
- مش بيقدر يحضن ..

المشكلة الحقيقية إن الأعراض دي موجودة عند شخص عمره ٧٠ سنة لانه مالعبش وهو عنده ٣ سنين ..

الألعاب مهمة لحياة الطفل زي الأكل والنوم والخروج ..
الألعاب غذاء لعقل ودماغ الطفل ..
الألعاب مش رفاهية .. # كن مميز #

03/11/2024

موضوع اليوم عن
مشكله من مشكلات الكلام 👇🏻

التلعثم _stuttering
تأتأه او تهتهه
ايه هو التلعثم 👈🏻 هو اضطراب يعترض لطلاقه الحديث نفسه
- اثناء الكلام بنحتاج الى اننا نرتب الاحداث فى الجهاز العصبى وترتيب زمنى ف جهاز النطق يعنى ايه الكلام دا بمعنى اننا فالمرحله دى بتكون مرحله الكلمات اسهل بكتير من مرحله الجمله
.. ( كل ما الجمله هتطول هنقابل المشكله اكتر)
يعنى المشكله هنا مش فى مفهوم اللغه ولكن من خلال النطق

...ولازم نوضح الفرق بين التلعثم وبين عدم الطلاقه....

(عدم الطلاقه الطبيعيه) خلل ف الحديث نتيجه لتوتر او عدم وضوح الفكره وقد يحصل عند الكبار والصغار وبنشوف دا فى شكل تكرار
وهنا الاطفال بتعدى ع المرحله دى اثناء نمو المهارات اللغويه ✋🏻

**اسباب التلعثم ..👇🏻
لايوجد سبب محدد حتى الان ولكن يوجد نظريات منها
١-نظريات عضويه/ زى ( زياده كهربا/ كهربا فالعضلات/نقص فيتامين (د) والكالسيوم وغيرها

٢- النظريات النفسيه/ والنظريه دى بتقول ان الطفل المتلعثم بيكون لديه استعداد للتلعثم ولما قابلالتعزيز ف زاد التلعثم وايضا لو فى توتر فالاسره او بيتضرب او خايف وهكذا

٣- النظريات التعليميه/ تنص ان هنا حصل نمذجه الولد شاف حد متلعثم ف بدأ يقلده

٤-التغذيه السمعيه الراجعه / الطفل سمع نفسه بسرعه فبيتكلم بسرعه وحصل تلعثم

***
اعراض التلعثم /

١- اعراض كلاميه
٢- لزمات ف جسم المتلعثم
**
انواع كلام المتلعثم ؟ 

١-(التكرار)Repetitionانا عاوز اشرب
تكرار أ( أأأأنا ) دايما تكرار الحرف هو الاكثر حدوثا
وممكن نشوف كدا (انا انا انا عاوز اشرب)بس تكرار الكلمه اقل شويه فالحدوث
وممكن يحصل تكرار جوه الكلمه الواحده

٢-(الاطاله) prolongation زى أ_____ الاطاله هنا تلعثم زى أااااااااااانا عاااااوز اشرب

٣-( الانشطار داخل الصوت )intraphonemic بيحذف جزء من الصوت مش بيكمل الصوت ولا بيكمل الجزء اللى خرج منه
٤-(وقفات تنفسيه) Blocks /-
أ-هنا بيكون البوء مفتوح ولكن لايخرج صوت سواء ف اول الكلمه او منتصف الكلمه
_ب_(الاقحام) احيانا بيكون لصوت او لكلمه بيظن المتلعثم انها هتساعده
،،(اللزمات) زى ( صلى ع النبى / واخد بالك / معايا)
الشخص الطبيعى يقدر يسحبها من الكلام اما المتلعثم صعب جدا انه يسحبها
_ج_ ( الخوف) هنشوفه ف صوت او كلمه بس هنا عكس الاقحام
هنا المتلعثم بيهرب من الكلمه اللى بيقف عندها ويلف ويشوف كلمه بديله يقولها ( بيقف عند ساندوتش ف يقول اكل )
***
اعراض فى جسم المتلعثم
(لزمات حركيه ) ممكن تصيب المتلعثم من شعر راسه ل اصابع رجله
وبتظهر احيانا عن كبار وصغار
احمرار الوجه
التعرق
الاصفرار
الارتعاش
وهنا هيكون الشخص محتاج اخصائى نفسى هيطلب منه يقلل من الخوف والتوتر
****
ملاحظه
*الرئيس الراحل محمد انور السادات كان شخص متلعثم وكان يخبى التلعثم بثقته بنفسه اثناء الاطاله

*عندما يتلعثم الطفل ف مرحله تعلم المهارات اللغويه ويبدا فى تكرار الكلمات فما علينا الا ان نتبع معه سوى التجاهل حتى لا يتم التعزيز ويزيد التلعثم 👌🏻

#كن مميز 😍

29/10/2024

إزاى اعرف إن إبنى عنده فرط حركة وتشتت انتباه (ADHD)؟؟
‏ attention deficit hyperactivity disorder (ADHD)

أولًا ايه هو الإضطراب دا ؟؟
حالة مرضية سلوكية بيتم تشخيصها عند الأطفال والمراهقين وتظهر مجموعة من الاعراض المرضية التى تبدأ فى مرحلة الطفولة وتستمر لمرحلة المراهقة والبلوغ ، بتعتمد على وجود النشاط الحركى والحسى ونقص الانتباه والاندفاعية وممكن يحصل النوعين من النشاط الزائد معًا وممكن يحدث احدهما دون الاخر
وطبعا الاعراض دى بتعوق عملية التأقلم ف الحياة
فالبيت ف الشارع ف المدرسة فالنادى عشان كدا لازم يتم التشخيص من بدرى حتى يتم العلاج والسيطرة ع هذه الأعراض
هتكلم هنا عن فرط الحركة عند المراهقين ف بوست تانى
⬇️
أطفال فرط الحركة

(فرط الحركة ) او زيادة النشاط عند الأطفال
((( الطفل عامل زى الدبانة )))
هنا حركة الطفل دبانة مبيقعدش دقيقة كاملة ع الكرسى نلاحظ ع الطفل انه لو قعد بيكون بيتلوى ومش قاعد ثابت حركتة اوفر بجد مش حركة طبيعيه بيجرى ف كل حتة ممكن نلاحظهم بيتسلقو الاشياء لو ف حديقة هيحاول يتسلق الشجر بيتكلموا كتير جدا مبيهدوش اطلاقا وبيعملوا كل دا من غير هدف واضح يعنى لو بيتسلق الشجر فالحديقة مش عشان شايف برتقالة وعايزها لا هو بيتسلقها كدا وخلاص
وبيعملوا كدا ف اى حته واى مكان فالمدرسة ف الشارع فالبيت ف السوبر ماركت وبيلاقوا صعوبة جدا ف اللعب مع اصحابهم والتأقلم معاهم
طبعًاا فى اطفال اشقية جداااا وقريبين اوى من اطفال فرط الحركة ف هنا بيختلط الامر عند الام او الأب
***
(((التشخيص الفارق بين اطفال فرط الحركة والاطفال الشقيه )))⬇️

أول حاجة بنسأل الأم عن عدد ساعات الطفل
الولد بينام كام ساعة فاليوم ياماما حتى لو بينام ويصحى ويرجع ينام تانى اجمالى عدد ساعات النوم كام يا ماما ؟
— لا دا بينام حلو بينام حوالى ١٠ ساعات ✅
* حلو جدًا السؤال اللى بعد رد الأم هنا هيخلينى اقولها أخبار السكريات ايه ؟؟
* هترد تقول ماشاءالله مبيبطلش اكل حلويات شوكولاته وبونبونى وعصير وبيبسى باباه مش حارمه من اى حاجة والله بيجيبلو السوبر ماركت كل يوم 🙂🙂
طبعا الطفل دا شقى جدااا ومهيبر من اكل الحلويات طبعًاا
- [x] طفل فرط الحركة بينام ف اليوم كله كله ( ٢—٤ ) ساعات بسسس فاليوم
***
لو سألت الأم مامت الطفل الشقى اخبار لعب الولد ايه
هل بيكون هادى لما بيصحى وبعدين يلعب ولا ايه احكيلى كدا.
— اه لما بيصحى بيكون مدروخ عادى زى الاطفال ويعد شوية بيتنطط ويتشقلب وناقص يمشى ع الحيط والله 🤣
هسألها تانى طب لما بيعوز ينام بيلعب كتير كدا ولا بيهدى شوية
٠–اه طبعا بيهدى من كتر اللعب بيكون اتهد ونام ف الارض كمان من كتر التعب
* دا طفل نورمال بس شقى جدًا زى ما قولنا مهيبر من الحلويات وأكلها الكتير.
* ————
- [x] طفل فرط الحركة فاللعب بيكون ( حركة دبانة) بيصحى من النوم طاير حتى لما بيعوز ينام مبيبانش عليه تعب النوم زى الطفل الشقى حركة دبانة من اول مايصحى لغاية ما ينام

***
طبعا لو اتعمل IQ للطفلين
الطفل الشقى هيكون نورمال جدًا
طفل فرط الحركة بيكون نورمال او اقل شوية
***
ولو اتعمل رسم مخ للطفلين هنلاحظ
الطفل الشقى —- طبيعى جدًا ومفيش كهربا
طفل فرط الحركة — طبيعى جدًا ومفيش كهربا

************
_نقص الإنتباه بيكون طبعًا من اكثر الأعراض إنتشارًا لديهم خاصة عند اطفال فرط الحركة فدرجة الانتباه والتركيز لديهم قصيرة جدًا جدًا
_غير قادرين على التركيز اطلاقًا ولا التذكر
_غير قادرين على النظام
_غير مهتمين بما يدور حولهم
_يجدون صعوبه ف بدء وإكمال ما يقومون به خصوصا ما يشعرون انه ممل او متكرر او فيه تحدى وتفكير
_يبدوا كأنهم لايسمعون من يتحدث معهم
_لا ينفذون الاوامر المطلوبه منهم
_ يفقدون أغراضهم وينسوا أين وضعوها زى كتبهم اقلامهم ملابسهم
_اندفاعين

*** هتكلم عن الإندفاعية ف بوست فرط الحركة عند المراهقين لأنها بتظهر عندهم أكتر من الأطفال

___________________
- [x] الخطة العلاجية للطفل الشقى وطفل فرط الحركة
*** استنوا البوست القادم هكلمكوا عن الارشادات الخاصة بالأطفال الاشقية واطفال فرط الحركة
استنونى

البوست طويل بس مفيد واتمنى تكونوا استفادتوا ♥️
شير ولايك للإفادة.
#كن مميز 😍😍

03/09/2024

،🧐🧐،ازاي اعرف ان ابني صعوبات تعلم

1-الهروب اثناء المذاكرة و كتابة الواجبات .
2-كتابة الحروف بالمقلوب .
3-كتابة الارقام بالمقلوب .
4- الحفظ بالترتيب .
5-الكتابة من الشمال لليمين .
6-كتابة جزء من الكلمة فى سطر و الجزء الثانى فى سطر اخر .
7-حفظ شكل الكلمة .
8- صعوبة التفريق بين الحروف المتشابهة ( ج ح خ ) .
9-الخلط اثناء الإملاء بين الحروف المتشابهة سمعياً ( ذ ظ ) ( ق ك ) ( د ت ) .
10-الميل الى حل الاسئلة البسيطة ( صح او خطأ ) ، الاختياري ، التوصيل و البعد عن الاسئلة المقالية .
11-التحدث اثناء المذاكرة فى موضوعات اخري .
12-نطق الكلمة سريعاُ كلمة اخري مثل : كتب تنطق كتاب .
13-انخفاض فى الانتباة للمهمة المطلوبة .
14-عدم القدرة على متابعة التعليمات و الإرشادات خاصة اذا كانت اكثر من امر .
15- إبدال مواقع الحروف و عدم القدرة على إدارك هذا الابدال كأن يقرأ كلمة سيارة – رياسة و هكذا .
16-اضطراب الإداراك البصري و فقدانه القدرة على التمييز بين الارقام فقد يقرأ 1488 مثلا 1884
17-صعوبة فى التنسيق الحسي و الحركى اى عدم قدرتة على ربط ما يراه بعينيه و ما يؤدية من عمل .
18-صعوبة فى النقل من الكتاب او السبورة .
19-بطىء فى النقل و الانتهاء من المهام المكلف بها .
20-صعوبة فى إداراك العلاقات بين الاشياء .
21-صعوبة فى إداراك الاتجاهات و الاماكن ( يمين – يسار ) .
22-صعوبة فى إداراك العلاقات المكانية .
23-صعوبة فى إداراك العلاقات الزمانية .
24-المعاناه من الاحساس بالفشل نتيجة ردود الفعل المحيطة على صعوبة تعلمة .

12/08/2024

#أعزائي الآباء 📢📢
#ازاي أعاقب ابني من غير ما أهينه و أخليه يتعقد ⁉️‼️

💥القاعدة الأولى اللي لازم كلنا نعرفها قبل ما نفكر نعاقب ولادنا هي ان الأطفال ذاكرتهم قصيرة المدى يعني بينسوا بسرعة، بس موضوع العقاب ده بالذات بيكون نسيانهم انتقائي .. يعني هما بينسوا اتعاقبوا ليه بس مينسوش ابدا العقاب نفسه 😔😔 ...

↩وعشان القاعدة دي بالذات لازم نعرف و نلتزم بالآتي:
👇👇👇👇👇👇👇👇👇👇

🔵🟠 مهما تعاقب ابنك او تعاقبي بنتك على حاجة .. لو شافك انت بتعملها عمره ما هيبطلها .. هينسى دايما هو اتعاقب ليه و هيفضل يقلدك .. مينفعش تعاقب ابنك على الكدب مثلا وهو شايفك بتكدب .. مينفعش تعاقبي بنتك على الزعيق و الصوت العالي و انتي صوتك جايب اخر الشارع .. خليك دايما واخد بالك من تصرفاتك لأنهم في الاخر مهما تعاقبهم هيقلدوك بردو ...

🔴🟠 العقاب ميبقاش عمال على بطال .. لأن في الاخر الطفل هينسى هو بيتعاقب ليه من كتر العقاب .. فوتي شوية يا فندم .. متعاقبيش على الاخطاء الصغيرة و التافهة و غير المضرة .. اعملي نفسك مش شايفة ووجهيه بعديها للصح

🟢🟡 العقاب لازم يبقى فوري وقت وقوع الخطأ .. عشان يرتبط في ذهن الطفل بالخطأ .. مفيش حاجة اسمها تحوشيله و تكتمي في نفسك و تنفجري مرة واحدة !! كده عقابك هيبقى شديد على الفاضي و الطفل مش هيفهم هو اتعاقب ليه اساسا !!

🟣🟡 الغلط لازم يفضل غلط .. يعني الخطأ اللي اعتبرتيه جسيم و يستحق العقاب .. مينفعش لما يعمله تاني ميتعاقبش عليه .. كده ابنك هيقول ايه الست اللي بحالات دي ؟؟ .. مش عايزة تعاقبيه عليه تعملي نفسك مشوفتيهوش ..

🟠🔴 خللي ديما العقاب مرتبط بالخطأ .. يعني لو كسر لعبته .. يبقى مفيش لعبة تانية .. لو عمل شقاوة يبقى محروم من النادي لمدة محددة .. عشان يعرف دايما ان خطأه له عواقب و نتايج مرتبطة بالخطأ ده .. مش مثلا كسر لعبته يبقى محروم من التلفزيون !! ايه علاقة ده بده ؟!!

🟢🟡 متهدديش بعقاب ابدا و انتي مش متأكدة و مصره انك تعمليه .. هتهددي بعقاب يبقى لازم يتنفذ لو الخطأ حصل .. التهديدات المتكررة اللي في الهوا دي بتخللي الطفل يستخف بيها

🔵🟣 التهديدات من النوع دا : انا هموتك .. انا هدبحك .. انا هكسرك ممنوعة تماما تماما .. انتي بتربيه مش بترعبيه !!

🟠🔵 التحذير بالعقاب يبقى واضح و مباشر .. يعني مفيش حاجة اسمها اوعى تعمل كده لأوريك 👌.. يعني يبقى بالصيغة دي: لو مرتبتش الاوضة بتاعتك من اللعب .. اللعبة الفلانية مش هتطلع تاني لمدة اسبوع .. تحذير من عاقبة واضحة و صريحة لفعل محدد

🔴🟡 مفيش عقاب قصاد حد !! لا قريب ولا غريب .. علاقتك بابنك و علاقتك ببنتك لازم تبقى زي علاقتك بمراتك .. خلف الابواب المغلقة ! نقول تاني .. الغرض من العقاب هو التربية و التقويم .. مش الاهانة و الفضيحة !!
انتو بتربو عيالكم مش بتذلوهم !

🟢🔵 اذا اردت ان تطاع .. خللي اوامرك و قوانينك و الاهداف اللي انت طالبها من ابنك قابلة للتطبيق .. متحطش هدف لابنك و انت عارف انه مش هيقدر يعمله و بعدين تعاقبه عليه !! .. الاهداف و القوانين دي لازم تبقى ثابتة و متتغيرش على حسب المزاج و الوقت

🟤🟡 قولناها مليون مرة و بنعيدها ممنوع منعا باتا اي حد ايا كان يعلق على عقابك او يعترض عليه قصاد الطفل .. حتى الاب و خصوصا الاب .. العقاب يتنفذ و يكمل حتى لو حضرتك مش مقتنع بيه .. اللي يتقال عليه لا يبقى لا .. الكلام و النقاش بينكم يبقى بعيد عن الطفل

🟢🟠 لازم تعيد تقييم نتائج عقابك من فترة للتانية .. ميبقاش مش جايب نتيجة و تبقى مصر عليه و بتضرب كف بكف مش فاهم ليه ابنك مش بيستجيب .. نفسيات الاطفال مش زي بعض اللي بيجيب نتيجة مع طفل مش شرط يجيب نتيجة مع طفل تاني

🟠🔴 و اهم حاجة في الموضوع لازم نعرف ان العقاب بيجي في الاخر بعد التوجيه و الشرح و الاقناع .. اقعدوا مع ولادكم .. العبوا معاهم .. قربوا منهم .. اتكلموا معاهم ..

💠👏امدحوهم كتير و كافؤوهم على كل حاجة كويسة بيعملوها .. مش كده و بس .. امدحوهم كمان على كل حاجة وحشة مش بيعملوها .. المكافئة دايما و ابدا بتجيب نتيجة افضل بكتير من العقاب 💪😍

#أولادكم أمانة 🌹🌹🌹 #كن مميز #

12/08/2024

(١١ نصيحه مهمه لو الطفل بينسي بسرعة)🤦
ممكن يكون ابنك :
١- عنده مشكله في الإنتباه او الإدراك او الاتنين وعلشان كده المعلومه مش بتوصل للمخ بشكل سليم فبينسي بسرعة 🤦
٢- عنده مشكله فى الذاكره والذاكرة عندنا انواع كتير

٣- الطفل ممكن يكون بيحب يتعلم سمعي اكتر أو بصري اكتر لازم اعرف ابنى انتباهه سمعي ولا بصري اكتر لو سمعي هبدا احكيلو المعلومه بقصه مشوقه لو بصري هرسمله
المعلومه برسمه معينه عمره مهينساها 😉👌

٤- فى طفل بيحتاج راحه كل ربع ساعه مش بيقدر يستقبل جديد ف هنعطي بريك للمخ ونرجع نستكمل ♥️

٥- انا بذاكر للطفل وصوتي عالى جدا وعماله ازعق وأصوت واشتم فى الطفل ويلا اكتب يلا يلا بسرعه والطفل مستني الضربه هتجيله منين فهيفضل قلقان وعمره مهيركز 🤦
قبل منبدأ مذاكره مع طفل لازم مزاجنا يكون كويس وهاديين لو عكس كده بلاش نذاكرله فى الوقت ده افضل 👌👌

٦- الخوف وده لما الطفل يبقي عارف الحاجه بس خايف يغلط قدام صحابه فيبدأ خوفه يأثر على تركيزه والنقطه اللى فوق سبب كبير فى ده ☝️☝️☝️☝️

7- التغذيه المعلبات والأكل الغير صحي بيأثر على العمليات العقليه فى المخ والتركيز والانتباه والنشاط الزائد زي الشيكولاته والشيبسي وغيرها 🤦🥲 .

٨- الشاشات كارثه بكل المقاييس على تركيز الطفل فى حاجه واحده او شئ واحد هتلاقيه بيذاكر ولعب وكرتون وافيهات افلام واغانى ومهرجانات شغاله فى دماغه 🤦🤦🤦

٩- مع اى معلومه جديدة التكرار التكرار التكرار ( التكرار بيعلم الشطار 😉😉🌹) وقبل اى معلومه جديده لازم لازم مراجعه على المعلومات القديمه علشان متطيرش 🐦🐦

10- قبل منبدأ مذاكره لازم نتأكد أن الطفل مش جعان مش عطشان مش عايز يدخل التويلت الطفل ياخد شاور ويكون فريش كده وحاطط برفيوم حلو وموده كويس يلا نبدأ نذاكر وبلاش يبقي لسه اكل ويذاكر ومينفعش ناكل واحنا بنذاكر❌❌
١١- يفضل نذاكر فى مكان فاضي تماما أن امكن أو قدامنا حيطه بيضه بلاش مشتتتات لعب فى الاوضه صور على الحيطه اخواته بيتفرجوا على التليفزيون بره صوت اطفال بتلعب كوره فى الشارع كل ده هيأثر على تركيزه لأن فى اطفال مش بتعرف تحجب صوت الخلفيه وبتتشتت بسهوله 🤦 #كن مميز #

12/08/2024

ازاي اعرف ان ابني أو بنتي بيتعرضوا لأي شكل من أشكال العنف ؟ 📍
⬅️ بيصحي كل يوم الصبح مش عايز يروح الحضانه
بعد ماكان خلاص اتعود علي المكان
⬅️ هتلاقي فيه تغيير مفاجئ في طريقة التعبير عن انفعالاته
مثلا هتلاقيه بدأ يضرب اخواته أو مامته أو باباه أو أي شخص قريب منه من غير سبب
⬅️ دورة نومه غير منتظمه
بمعني انه ممكن يصحي كتير من النوم بيعيط أو بيصوت من غير سبب
⬅️ فجأه بقي يجز علي أسنانه من غير سبب
⬅️ ممكن نلاقيه اغلب الوقت واخد جنب لوحده أو قاعد ساكت حتي لو وسط تجمع
⬅️ بعد ما كان بيتكلم كويس فجأه يحصله مشكلات في الكلام زي التأتأه
⬅️ مكنش بيعاني من التبول الا إرادي
وفجأه أصبح يعاني منه
⬅️بيخرب العابه وبيدمرها بكثره
🌹🌹🌹
بشرط أن كل الحاجات دي مكنتش بتحصل معاه قبل كدا وفجأه بدأت تحصل
🌸🌸🌸 #كن مميز #

30/07/2024

كن مميز مع الآخرين بطرق تفكير مختلفة متطورة مع برنامج كن مميز ❤️💚🤍
المدربة/ داليا ابو العلا

25/07/2024

الحمد لله آراء بعض المشتركين في كورس كن مميز

16/07/2024

هناك العديد من المفاهيم التي ينبغي علي المعلمين والقائمين على تقديم الدعم الاجتماعي التربوي فهمها جيداً واستيعابها ..ليستطيعوا من خلال ذلك مساعدة الأطفال الذين تعرضوا لأحداث صادمة أولظروف صعبه ومؤلمة في حياتهم الشخصية وأثرت عليهم ..
فالتعامل مع الأطفال المتضررين من تلك الأحداث الصادمة يشكل تحدياً كبيراً لهم بسبب ضعف قدرة الأطفال خصوصاً صغار السن على التعبير اللفظي عن معاناتهم لعدم اكتمال نموهم المعرفي. وبسبب غياب تلبية بعض الاحتياجات الأساسية. مثل ان يشعروا بالأمن والحماية والتقدير والانتماء
بحيث يحصل الأطفال على المساعدة اللازمة للتكيف مع مواقف الحياة الصعبة أو التغلب عليها وإعادة دمجهم مع محيطهم الاجتماعي والاستفادة من آليات التاقلم الفردية والمجتمعية ولايتطلب بالضرورة تدخلاً تخصصياً في مجال الصحة النفسية لاكنه يقدم خطوات عملية لتحسين الصحة النفسية للافراد ويستجيب لاحتياجاتهم ويوفر لهم الحماية ويخفف من معاناتهم ويوفر لهم الراحة في إطار المنظومة الاجتماعية التي يعيشون فيها.