Better.than.yesterday1

ممكن نسأل هي ايه الاختلافات اللي بين البنات و الولاد وليه ممكن يحصل خناقات بينهم لمجرد انهم مش فاهمين بعض و الكتاب دا بيشرح كل الاختلافات بين الولاد و البنات يعني عشان نعرف نتعامل مع بعض اخوكي او اختك او مامتك او باباكي ودا بيسهل اكتر التعامل و خليكوا عارفين ان مهارة كسب الناس دي حاجة مهمة اوي
اول حاجة لازم نبقي دايما فاكرين ان احنا اصلا مختلفين مش بنفكر زي بعض مش بنتعامل زي بعض
هنستخدم لفظ رجل و لفظ انثي دا اكيد خلاكوا تخمنوا اسم الكتاب و هو men from mars and women from venous رجال من المريخ و إناث من الزهرة ندخل في الاختلافات و نتعامل معاها ازاي
١- الرجالة بيحبوا القوة و الكفاءة الquality يعني و السرعة و الانجازات فدايما كلامهم عبارة عن عربيات لعيبة كورة بوكس
الرجالة دايما بتحل مشاكلها بنفسها محدش بيحب يشتكي
لما بيحكوا لبعض مشاكل عندهم هما مبيبقوش عايزين غير حل و التاني بيديله حل
٢- الاناث مش بيهتموا بنفس الحاجات هما بيهتموا بالمشاعر و بالعواطف
و هنا الفرق لما بنت تحكي لبنت مشكلة هي مش بتبقي عايزة تاخد حل قد ما هي عايزة تاخد دعم و حب و تشجيع

هنا تحصل اول
مشكلة ان لما رجل يحكي مشكلة عنده هو عايز منها حل مش كلام حلو

و لما امرأة تقول مشكلة لراجل هو بيديها حل و هي مش عايزة حل هي عايزة حد بيسمع اكتر ما يتكلم و يشجعها

٢- ان الذكور بتحب الانجازات و تحس قعدتهم تنمية بشرية الا ان المرأة بتحب التحسين دي بتحاول تحسن كل حاجة حواليها يعني عمرك شوفت واحد بيجيب كل فترة حاجات للتنظيم في اوضته او في بيته لا المرأة هي اللي بتهتم بالحاجات دي عايزة تخلي كل حاجة احسن و اسهل و بتحس انها دايما مسؤولة عن اللي حواليها

وهنا تحصل تاني مشكلة ان لما المرأة تحاول تحسن الراجل في حاجة هو بيعملها حاجة في شخصيته هي مش قصدها تتحكم فيه هي عايزاه بافضل شكل ممكن هي كدة بتعبرله عن حبها بس كتير بيحسوا انهم فقدوا جزء من شخصيتهم او رجولتهم و دي حاجة طبيعية لانو لما لما كان بيتعامل مع الرجالة كان اللي بيحاول منهم يعدل علي حاجة في شخصيته من حقه ساعتها يزعل منه لانه راجل مش محتاج راجل تاني يعدل عليه

هنا نطلع بنقاط مهمة
١- طريقة الرجل في التعبير عن الاهتمام إعطاء حلول
٢- طريقة المرأة في التعبير عن الاهتمام هي الاهتمام بالمشاعر و الدعم المعنوي
فاصبح عندها hints كدا نتعامل بيها مع بعض زي
-لما تلاقي رجل محتاج مساعدة بس مطلبش منك مساعدة متديهوش حلول شجعيه بس
-لما تلاقي رجل طلب مساعدتك في حاجة لديه حل عشان هو مش محتاجة محفز
-لما تلاقي بنت محتاجة مساعدة سواء طلبتها او مطلبتهاش هما بيبقوا مركزين في المشلكة مش فاضيين يشوفوا هما طلبوا مساعدة ولا لا اسمع منها كل حاجة و حاول علي قد ما تقدر تقولها كلام حلو يساعدها

Think again
I decided to do this book’s summary like presentation since you don’t be bored of reading a long paragraph summary 🤩
Wanna know your opinions lu all ❤️

ممكن نسأل انا ليه مضطر اتعامل مع التغيير اللي بيحصل في حياتي ؟
بكل بساطة التغيير في حياتنا هو اللي بيحركنا يعني ايه ؟ يعني انت مثلا عملت مشروع و فشلت حصل تغيير فهتبتدي تشوف مشروع تاني او تطور من مشروعك لحد ما تنجح فالتغيير هو اللي بيحركنا ناحية اهدافنا

لو انت في الدراسة و اول امتحان جبت فيه A+ هل بتحس انك عايز تبذل مجهود اكتر الاجابة طبعا لا ولكن لو جبت في امتحان B+ ساعتها هتحس انك محتاج تبذل مجهود في اللي بعد كدا فتغيير النتيجة خلاك تبص لقدام للي بعد كدة

فالتغيير بيخليك تبص علي الفرص اللي جاية بعد كدة فلو انت من الناس اللي لما حاجة تتغير تقف مكانك و تعند مش هتنجح و لا هتكبر و خصوصا في دراسة او مشروع او محل او اي كارير لازم هتخسر اكتر من انك تكسب ودي حاجة لازم تتقبلها

في نوع من الناس و دا احسن نوع فيهم كلهم انا سميتهم (water people )
هتكلم عن النوع بعد كدة اقولكوا ليه سمتهم كدة

اولا النوع دا هما الناس اللي مش مستنية للتغيير هما راحنوا يعني بيسعوا انهم دايما يغيروا نظرتهم للحاجة و يغيروا افكارهم و شخصياتهم النوع دا مش بيستني موقف معين يحصل فأثره يغيرهم لا هما هنا اتغيروا ايا كان حصل الموقف دا او لا

ثانيا ليه سمتهم water people
لانهم زي المياة يعني ايه ؟ يعني بيتعاملوا مع التغيير بسلاسة اوي ودا لان احتمال انهم يغيروا افكارهم و شخصياتهم قبل ما التغيير يجي اصلا عالي اوي فلما بيقابلوا التغيير بيكونوا هما نفسهم اتغيروا
في مقولة حلوة اوي لBruce lee
( if you put water into a cup it becomes the cup if you put water in a bottle it becomes the bottle if you put water in a teapot it becomes the teapot
be water my friend )
يعني تماشي مع التغيير بسلاسة

مثلا واحد فتح محل في الاول هو مدرسش marketing ولا عنده فكره ازاي يخلي الناس تشتري و هو مستناش المحل يفشل هو فتح المحل من هنا و بدأ course marketing و اتعلم كتير في المجال اللي شغال فيه فواحدة واحدة بدأ يحط الحاجات اللي اتعلمها في المحل دا فنجح لكن هو مستناش المحل يفشل فبدأ كورسات فيه فرق كبير اوي

لازم يبقي عندك الmindset دي انك رايح للتغيير مش هو اللي جايلك

طيب تتعامل ازاي مع التغيير فقدت حد بتحبه خسرت شغل او ايا كان نوع التغيير ؟

لازم تحدد وقت تزعل علي الحاجة اللي انت فقدتها اقعد مع نفسك عيط صرخ صوت اعمل كل اللي انت عايزه بعد كدة هتعيش حياتك بعد كدة عادي المهم انك متطولش في الcomfort zone دي الانسان القوي هو اللي يرجع لحياته العادية في اقل مدة من الانهيار بعد التغيير و اوعي تسمح للزعل انه يوديك في حتة مش هتعرف ترجع منها

من اعظم الدروس اللي اتعلمتها و اللي اتمني ان كل الناس تبقا عرفاها دا كان كتاب who moved my cheese

النهاردة هنتكلم عن التغيير في حياتنا
ايه دا تغيير ايه لا ملوش داعي
ملوش داعي ليه و يعني ايه اصلا ملوش داعي
اصل انا خايف من التغيير قلقان يحصل حاجة تضايقني

معظم الناس لما تقول تغيير علطول يقلقوا و يحسوا ان في حاجة وحشة او مش متوقعة هتحصل مع اننا لو فكرنا شوية هتلاقي ان حياتك طول عمرها في تغيير سواء حسيت بيه او محستش يعني انت مش زي انت من خمس سنين ولا انا زي انا من سنة طبيعي بتتعلم دروس بتقابل ناس بتجري ورا احلامك شوية حققتها وشوية لسة المهم ان حياتنا بيحصل فيها تغيير دايما دي نقطة احنا متفقين عليها

طيب تفتكروا ليه الناس بيخافوا من التغيير ؟

لان الناس دايما حاطه كل تركيزها علي التغييرات السلبية اللي بتحصل في حياتها فقدت شغل فشلت في مشروع صحاب سابوا بعض محدش جرب يحط تركيزه ولا يلاحظ التغييرات الايجابية اللي بتحصله مع الوقت فبقا مرتبط في دماغنا قصة التغيير علي انها حاجة وحشة او مش مرغوب فيها اللي هوا لا ملوش لازمة التغيير دا و بعض الناس بتخاف من ردة فعلها علي التغييرات السلبية اللي بتحصلها يعني ايه ؟ يعني لما حاجة بتحصل في حياتك مش عجباك انتا بتدخل في دايرة من الحزن ممكن تطلع و ممكن لا علي حسب انتا اتعودت تقابل التغييرات اللي بتحصل في حياتك ازاي

و الكتاب دا فكرته انه يعرفك انواع الناس اللي بتتعامل مع التغيير و ليه اصلا تتقبل فكرة التغيير دي

في ٣ انواع من الاشخاص قالهم spencer Johnson في كتابه who moved my cheese

١- النوع الاول
هو اللي ماشي مع التغيير اذا كان حلو او وحش منغير ما يفكر او يسأل اسئلة
والنوع دا مهما يحصل معاه حاجات وحشة مش بتأثر عليه سلبيا و لما بيدوروا علي حاجة جديدة بيلاقوا احسن من القديمة لو مثلا فقد شغل بيلاقي شغل احسن و هكذا

٢- النوع التاني
هو اللي يدرك التغيير بس بيدركه متأخر و يمشي معاه برضو زي الاول بس الفرق انه ادرك التغيير متأخر و مش وحش انك تلاحظ التغيير متأخر

٣- النوع التالت
هو الخطير اوي اللي مش بيقدر يتخطي او يموڤ اون من التغيير اللي حصله و يقعد متضايق
طب ليه النوع دا خطير ؟
لان اي انسان يحصل معاه تغيير و ميقبلوش يهلك طب ليه يهلك ؟ لان النوعين التانيين حصل تغيير بس بيكموا حياتهم تاني لكن النوع دا بيفضل واقف مكانه مبيتحركش مبيفكرش حتي لو في فرص احسن من اللي فقدها او حاجة احسن

ازاي اتعلم اي حاجة بسرعة ؟ هو ينفع اصلا ؟
في طرق تخليك تتعلم اسرع من اي حد و تنجح في اي حاجة بتتعلمها

اول حاجة لازم تبقي متأكد ان المعلومات ملهاش آخر لازم هتتعلم حاجات طول الوقت و ان التعلم المستمر هو اهم اسباب نجاح كل الناس اللي معاها فلوس لانهم قرروا يتعلموا فلما طبقوا اللي تعلموه في اي حاجة نجحوا فيها و عملوا كمان منها business لنفسهم
وعشان كدة لازم تؤمن بمقولة
“Your learning ability decides your earning capacity “
"قدرتك علي التعلم تقرر قدرتك علي الكسب "
كل ما تعلمت اكتر كل ما قدرتك علي الكسب بتزيد

تعريفات لازم تبقي عارفها
‏ (Input ) الادخال : دي الحاجات اللي بتدخلها لمخك معلومات عملت عليها سيرش كتب قريتها بودكاست بتسمعها

‏ ( output ) الاخراج : دي الحاجة اللي بتعملها بعد ما تدخل المعلومات في مخك عن طريق التطبيق و هنتكلم عنها بالتفصيل

دلوقتي هنتكلم عن الحاجات اللي فعلا تخليك تتعلم اسرع وتضمن لنفسك انك بتتقدم

هنقسم مراحل التعليم لأربع مراحل
‏١- learn : لازم تدخل معلومات كويسة و تبقا متأكد منها عشان دي اللي هتبني عليها لازم تضمن لنفسك معلومات صحيحة مش اي معلومات و خلاص

‏٢- reflect : بعد ما تتعلم فكر ازاي ممكن تستخدم المعلومة دي في حياتك

‏٣- implement : لما تتعلم حاجة جديدة خد قرارات تعملها نحية المعلومات دي زي انك ممكن تشرحها لحد ممكن تطبقها بس غلط جدا انك تتعلم حاجة بعدين تتبسط انك اتعلمتها فتروح رايح تتعلم حاجة تانية

‏٤- share : احسن طريقة عشان تثبت المعلومة انك تعلمها لحد حاول تعلم المعلومات للناس اللي حواليك

معلومة : لو عندك معلومات كتير منغير تنفيذ (output ) انتا كدا بقا عندك shallow learning و هو التعلم اللي علي الوش اللي هوا انتا متعرفش غير حتة من المعلومات

و لكن لو كل معلومات اللي بتاخدها بتخليها تمر بالاربع مراحل دي فانتا كدا عندك deep learning

خليك متأكد انك لو هتقعد فترة من الزمن عشان تتعلم حاجة (input ) فانت هتقضي ضعفها عشان تثبتها في دماغك و تطبقها (output)

ودول كانوا الحاجات اللي المفروض تعرفها لو عايز تتعلم بجودة عالية و اسرع و تضمن لنفسك ان المعلومة تتثبت و تحاول تستخدمها

طول عمري مقتنعة ان مهارة اكتساب الناس دي موهبة و مش عند كل الناس بس بعد ما قريت الكتاب دا عرفت ان اي حد ممكن يكسب الناس لانها مهارات حياتية ممكن نتعلمها الكتاب دا حلو اوي و دي الحاجات اللي تطلع بيها من الكتاب للمؤلف Dale Carnegie فلو مهتم تعدل بعد تصرفاتك و تبقي احسن الكتاب دا ليك

ملحوظة : انك تكسب الناس مش حاجة وحشة لانك بتكون علاقات في حياتك من المهم انها تكون كويسة فممكن انتا تبقا بتعمل حاجات فاهم انها مش هتأثر علي علاقتك باللي حواليك ولكنها بتأثر

دول حاجات تعملها عشان تكسب الناس

١- افهم ان العلاقات تتدمر بسبب النقض فمتنتقضش كتير

٢- متلفتش الانتباه ليك بالاسلوب الغلط زي انك تضحك بصوت عالي او انك تزعق او انك تتكلم بطريقة مش لطيفة مع اللي حواليك

٣- اوعي تفتكر انك لو قعدت تمدح في الناس هتكسبهم (اعطي كل ذي حق حقه ) كتر المجاملات يخليك شخص منافق و مش محبوب

٤- متلومش حد عشان كدة كدة هيليوم اللي حواليه لو عايزه يعرف انو غلطان ابعد عن اللوم عليه

٥-لما تبقا متعصب من حاجة متتكلمش خالص لانك هتقول كلام تندم عليه و ممكن تخسر اللي قدامك

٦-خليك شخص إيجابي محدش بيحب يقعد مع شخص متشائم

٧-خليك شخص عفوي و تعامل مع الناس بدون تصنع

٨-قدم المساعدة للناس لما تحس ان حد محتاج مساعدة متتأخرش

٩-خليك متواضع مع الناس محدش بيحب المتكبرين

١٠-اهتم بالاخرين و خليك دايما علي تواصل معاهم

١١-احترم الرأي بتاع الناس وتقبله مش كلنا دماغنا واحدة ولكن احتفظ برأيك في نفس الوقت

١٢- خليك محسن الظن بالناس و التمس الاعذار ليهم

١٣-ابعد عن النميمة و انك تتكلم علي الناس في ضهرهم

١٤- لو غلطت مش عيب انك تقول انا غلطت المهم تتعلم منه

١٥-لو الكلام اللي هتقوله مش هيعود عليك بالنفع متقولوش يعني تجنب الكلام اللي مالوش لازمه

١٦- عشان تنقد حد نقض بناء
١- امدح مدح صادق
٢- اذكر الفعل الغلط اللي حصل
٣- اديه نصيحة للي بعد كدة

١٧-اهتم بنفسك اهم مش اي حاجة اهتم بشكلك و دايما حسن من شخصيتك و افكارك

١٩- اقوي اول انطباع الناس تاخده عنك هو (الابتسامة )
الحقيقة بالنسبة ليا انا مش مقتنعة اني هعمل الحاجات دي عشان حد و لكن انا بعملها عشان نفسي بالتالي هكسب الناس ولكن الهدف الرئيسي من الحاجات دي هو اني اعدل من بعض تصرفاتي فهكون انسان احسن

في ٣ مبادىء عشان تقنع اي شخص بالحاجة اللي عايزها

١-لما تيجي تقنع حد اتكلم عن الحاجات اللي هتفيده و الحاجات اللي هتضره و متجبش سيرتك خالص مهم انه يفهم انك عايز مصلحته

٢- حاول تبدأ الموضوع من النحية الايجابية و خلي الكلام إيجابي متخليش الشخص يقفل مخه معاك

٣- طيب ازاي اخلي الكلام تمام و إيجابي ؟ خلي أسئلتك تبقا ردودها ب اه كذا مرة المخ بيتفتح لما يبقي الكلام إيجابي لكن متخليش اللي قدامك يجاوب ب لا

ازاي الاقي شغفي او ارجعه لو لقيته ؟

هو ايه الشغف دا اصلا ؟

هو الاداة اللي بتخليك تخلص اي حاجة عايز تعملها منغير ما تحس بالتعب

طيب ازاي الشغف دا بيشتغل ؟

هنتكلم عن ال dopamine hormone
هو المادة اللي بتديك الدافع انك تعمل حاجة معينة عشان في الاخر تحصل علي مكافأة ببساطة هو هرمون بيحفزك انك تعمل حاجة عشان في الاخر تبقي مبسوط و الهرمون بتاع السعادة اللي هتحصل عليه لما تخلص هو serotonin hormone

الdopamine عشان يشتغل محتاج
١- انه يعرف ان في نهاية اللي هتعمله في شعور بالسعادة و هو هرمون الserotonin

تفتكر ايه اللي بيخليك تقعد تتفرج علي فيلم ساعتين
عشان لمًا تخلص تقول الفيلم كان حلو فالشعور بتاع السعادة بييجي في اخر العمل مش في اثناء اي العمل

الdopamine لما بيلاقيك بتعمل نشاط معين باستمرار بيبدأ الجسم ساعتها انو يوقف إفراز الهرمون مثلا لو في وجبة معينة بتحبها و بتاكلها باستمرار بعد فترة هتحس انك مش عايز تاكلها ف هرمون الdopamine بالتدريج هيقل بالتاني انت هتبقا عايز اكلة احسن تحصل منها علي dopamine اعلي من الاول

في طريقتين تحصل منهم علي dopamine hormone
1- consumption
دي معناها انك بتستهلك حاجة عشان تحصل علي السعادة
و كتر الحصول علي dopamine من الاستهلاك يسمي addiction وهو الادمان
2-creation
دي معناها انك بتنتج او بتعمل حاجة تاخد منها dopamine بالتالي السعادة
و كتر الحصول علي dopamine من الcreation يسمي passion و هو شغف
# نرجع لمعلومة ان الdopamine لو توقف هتبحث عن مصدر اخر او مصدر اقوي عشان تحصل عليه

الكلام دا مهم اوي .

— كل ما استهلكت حاجات عشان تحصل علي dopamine هيتوقف هتبتدي تستهلك اكتر عشان تحصل علي dopamine و انتا هنا addicted

— و لكن كل ما انتجت و حصلت علي الdopamine هيتوقف و هتبحث علي انتاج اكتر عشان تحصل علي dopamine انتا هنا هتبقا passionate

( دا بالظبط معني الشغف )

طيب بعد دا كله ازاي الاقي شغفي او ارجعه ؟
١- خفف مصادر الاستهلاك (consumption)
٢-اكتب list بالحاجات اللي حابب تجربها و اختر حاجة و اتعلم فيها اقعد اقل حاجة خمس شهور تتعلم فيها