إعمار للتدريب والتطوير - emaar

!

صادفني من خلال لقاءاتي مع الأولاد أكتر من فتى في حالة أشبه بالعزلة إن لم تكن كذلك ..

يعني مثلاً ماعندوش أصحاب ( في حين إن دي أهم مرحلة بيتكون فيه مفهوم الشِلة والأنتيم)

على طول لوحده وهو في بيته ويُفضل جلوسه وأكله شربه في غرفته بعيدًا عن أسرته!

بيقعد فترات طويلة منعزل تماما عن أي نشاط إجتماعي وطبعاً أغلب الوقت ده على الموبايل!

وغيرها من الأمثلة اللي بتظهر فكرة إغتراب المراهق أو شعوره بالوحدة والإنعزال.

والحقيقة إن ده ممكن يكون مُتفهم لو دي طبيعة شخصية زي إنه يكون إنطوائي مثلاً لكن مع ذلك الإنطوائي مش بيكون في حالة الإنعزال الكاملة دي بل وبيقدر يمارس أنشطة اجتماعية عادي على فكرة .. ولكن كتير من الآباء لما يلاقوا الحالة دي ظاهرة على أبناءهم بيسقطوها على إنه إنطوائي مش اكتر!

لكن الحقيقة هو بيعاني وعنده مشكلة حقيقية! والأمر تفاقمه ممكن يسبب له إضطرابات نفسية لا سيما لو الأمر أصبح ظاهر لدرجة كبيرة ، زي شعوره بالحزن طول الوقت - ردوده المقتصرة وبعده عن أي محاولات تُفتح للنقاش - لامبالاة كبيرة بما يحدث حوله وهكذا إلخ...

ده بيكون سببه إيه والمفترض نعمل إيه ؟

نكمل في بوست أخر بإذن الله

لكن شاركنا هل شوفت علامات زي دي على ابنك او مراهق تعرفه وفكرت إنها مجرد إنطوائية مش اكتر ؟

أنا كبرت ممكن تشوفوا دا !!!

أهي الجملة دي بتلخص كتير من الصراعات إللي بتحصل بين المراهق مع من حوله واللي في الأغلب بيكونوا والديه واللي بتبان في كلامه وأفعاله وسلوكياته سواء بشكل مباشر أو غير مباشر

دي الرسالة إللي عاوز يوصلها طول الوقت وعاوز إعتراف حقيقي بيها .. أنا كبرت ممكن تشوفوا دا ؟! ممكن تصدقوا؟! ممكن تبينوا بأفعالكم إنكم فعلا مصدقين مش مجرد كلام أو تصنع بالتصديق!

لأن كتير من الأباء فعليًا ممكن يخدوا فترة طويلة لحد مايتقبلوا فكرة إنه إبنهم كبر أو بنتهم كبرت ، اه طبعا لم ينضجوا بالشكل الكافي ولا يقدروا يتحملوا مسؤوليات كاملة (وإن كان متواجد النموذج دا بس طبعا لازم يكون في مراعاة للفروق الفردية) بس التعامل من الوالدين ماينفعش يكون هو هو نفس التعامل إللي كان بيتم في المراحل إللي بتسبق مرحلة المراهقة .. فبنلاقي الصراع العنيف إللي بيحصل بين المراهقين وآبائهم والنفور اللي بيحصل بينهم والجدال المستمر دايمًا بينهم.

لأن المراهق بيكون عاوز يسلط الضوء على فكرة إنه دلوقتي بقى كبير فمن حقه يعمل زي الكبار ، يكون له صوت ورأي وشخصية مستقلة بس بيلاقي صد لكل دا..

فيبدأ يعبر عنه بعند - غضب - تمرد - عنف - كذب - وأحيانا سرقة -صوت عالي - جدال - سخرية - تقليل إحترام .... إلى أخره من التصرفات إللي بتخلي الأب والام لو ماعندهمش تفهم لطبيعة المرحلة يتحولوا لند لأبنائهم وبيكونوا طرف في الصراع رغم إن دورهم الحقيقي هو إحتواء الصراع مش المساعدة على تفاقمه

دا غير الآباء إللي بيشعروا بالصدمة ، أنا إبني ماكنش كدا؟! إزاي إتحول كدا ، دا انا كنت مجرد بس ما أزعل ماكنش يهدى إلا لما يصالحني دلوقتي بيتعمد يستفزني ويزعلني .. طب إزاي؟!

وكل دا تاني نتيجة لعدم فهم طبيعة المرحلة والتغيرات إللي بتطرأ عليها وبيكون ليها تأثير قوي جدا على المراهق وبالتالي بيتم التعامل معاها بشكل خاطئ وبيكون ليها نتائج سيئة!

طيب الحل إيه ؟!

هقولك المرة الجاية بإذن الله 😉
بس مهم تشوف أول كومنت 👇🏻