البلاستيكاتي

لحظة و سكون‼️

الأربعاء ١٥ أبريل ٢٠٢٦
كان يوم غريب بالنسبة لي كله بأحداثه.

لكن هحكي حاجة واحدة حاليا منه.

يومها صباحا حوالي الساعة ١٠ و شوية كنت في التجمع سايق كان عندي مشوارين ورا بعض و بعدها موعدين في وسط البلد.

مكالمة تليفون جتلي و اضطريت بسببها أركن علشان ارد علي إيميل مهم محتاج رد سريع لكن مش شرط وقتي لكن قلت أخلص منه قبل ما اليوم يسحبني معاه.

دخلت شارع طوله حوالي ٢٠٠ - ٣٠٠ متر في طريقي. حوالي ٣ - ٤ حارات في الإتجاه بخلاف طريق الخدمات service road.

الشارع في الوقت ده علشان مفيش مدارس و زحمة الصبح كان تقريبا فاضي.

لقيت الرصيف بطول الطريق فاضي تماما و الشارع.

ركنت جنب الرصيف في نص الشارع بعيد عن مدخل الشارع أو مخرجه. و اكون واضح من باب الإحتياط لأي حد جاي رغم ان الدنيا نهار.

الشارع كان فاضي وقتها في إتجاهي تماما لكن بيعدي فيه عربيتين تلاتة كل شوية في العموم لأنه طريق يومي بالنسبة لي و عارفه و تفاصيله.

المهم ركنت ولعت الفلاشر و العربية دايرة. و بدأت انجز موضوع الإيميل ده.

أعتقد مر دقيقتين تلاتة و فجاءة
سمعت صوت خبطة جامدة الأول و بعدها راحت حاجة داخلة في العربية من الظهر طيرتها لقدام حوالي ٢٠ متر و لا حاجة ع الأقل.

أنا كنت لابس حزام الأمان لكن موطي راسي و ماسك الموبايل بكتب. مع صوت الخبطة الأولي ملحقتش ارفع راسي كانت الحادثة حصلت و كل اللي كنت شايفة السقف و لحظيا مبقتش فاهم أنا بتقلب و لا بتدهس و لا خبطة من وراء و لا إيه بيحصل.

و بعدها سكون.

مش هتكلم علي تفاصيل ما بعد الحادث و اللوجيستكس التالية و الجو ده.

عايز فقط اعبر عن تفكيري من نتاج الحادث.

بالعقل و المنطق مفيش أي سبب واضح و صريح للحادث. الشارع واسع و فاضي و مش سريع و في نور ربنا. حتي اللي خبطني من ورا بقوله في إيه بيقولي مش عارف.

فالحادثة دي جاية لنا.
أحنا الاتنين.
نصيبنا و قدرنا بلطف من ربنا.

ليه؟ الله أعلم بحكمته.

"قُلْ لَنْ يُصِيبَنَا إِلَّا مَا كَتَبَ اللَّهُ لَنَا" صدق الله العظيم (سورة التوبة اية ٥١)

"واعلم أنَّ ما أصابك لم يكن ليخطئك، وما أخطأك لم يكن ليُصيبك" صدق رسول الله.

مش كل حاجة بتحصل لنا لسبب لازم نكون فاهمينه و مقتنعين بيه.

- يمكن ده سبب رزق لغيرنا في الصيانات و المشتريات و خلافه.
- يمكن ده سبب يأخرنا في الوصول لمكان كان هيبقي فيه أذي أصعب علي الطريق او قرار مؤذي أو فعل محرم.
- يمكن مكفرات لذنوب و معاصي.
- يمكن ترقية و تزكية للنفس.
- يمكن....
- يمكن.

مش هنعرف السبب و لازم نرضي بقضائه و حكمه و نثق أن كله خير.

"لَقَدْ خَلَقْنَا الْإِنسَانَ فِي كَبَدٍ" صدق الله العظيم (سورة البلد أية ٤)

أحنا بس بنسي.

محتاجين نفكر نفسنا لأن الدنيا لاهيانا. خامة و دولار و هرمز و التزامات و أسعار و بيت و أولاد و أهل و غيرهم.

النقطة الأهم بقي هي

موت الغفلة.

اللي بنقرأه في الأخبار و بنشوفه في التليفزيون و الريلز و غيره أو بنسمعه من أصحابنا أو معارفنا أن فلان عمل حادثة و توفاه الله.

أو دخل ينام مصحيش. و ياه ده كان لسه معايا.

أو ياه ده أنا لسه مكلمه الصبح.

أو...أو...

ده وارد جدا يحصلنا عادي.

أيوه أحنا ذي ما بتقراها.

أحنا مش بعيد عنها.

هما كمان كان عندهم خطط يوم و أحلام و إلتزامات و حقوق و مواعيد و غيره.

هل يا تري احنا مستعدين؟

نقطة أخيرة شاغله تفكيري، هو الواحد بيلحق يتشاهد في المواقف دي؟

هل في حاجة تتعمل في دنيتك تخليك #لحظيا تتشاهد فجاءة وقت ما يحصل حادث لحظي كده.

أصل أنت وقتها غريزة البقاء بتبقي هي الغالبة عليك خصوصا أن الموضوع كله ثانية ثانيتين و سكوووون بعدها.

كلنا عدي علينا مواقف و خبرات حلوة و وحشة. و الحوادث منها. وقتها بتكون مركز تماما أنك تنجو مش تتشاهد.

هتتشاهد لو خلاص شايف (بمنطقك) أن خط نهاية الأجل علي بعد ثواني منك. ده علي الأقل اللي ممكن الواحد يفكر فيه.

لكن أنك تكون مستعد #لحظيا دي أعتقد محتاجة تدريب للنفس و العقل من نوع أخر.

الله المستعان.

الحمد لله عدت علي خير و أنا بخير و العربية في العمليات.

قدر و لطف.

البوست فضفضة و لحظة توقف مع النفس و سكون.

أشهد أن لا إله إلا الله و أشهد أن محمدا رسول الله.

عليها نحيا و عليها نموت و بها نلقي الله.

دمتم سالمين 💐
سلام 👋

هل البلاستيك الحيوي هو الحل؟‼️
بلاستيك حيوي❗️
حل❗️

لو متابع موضوعنا من بدايته كنا بنسمع و نحلل الاراء و اللي بيجري حوالينا عالميا و نشوف هل البلاستيك بصورته الحالية اللي نعرفها بينتهي و لا بيتطور.

لكن الموضوع مطلعش بالبساطة المتوقعة.

البلاستيك الحيوى Bio-based plastics أو Bioplastics بيمثل فرصة مهمة للتطوير و تنويع المصادر لكنه مش عصا سحرية للأسف.

👤: يعني إيه بلاستيك حيوى يا هندسة؟

البلاستيك الحيوى Bioplastics هو مصطلح عام لا يعني نوع واحد من البلاستيك بعينه لكن يشمل تحته قاعدة أوسع من مواد البلاستيك.

هذه القاعدة من المواد فيها:
▪️إما مصدر الخام حيوى ذي النباتات والكتلة الحيوية Biomass. علما بأن الكتلة الحيوية هي المواد العضوية اللي من أصل حيوى ذي النباتات والمخلفات الزراعية وبقايا الكائنات الحية اللي ممكن استخدامها كمصدر للمواد أو الطاقة.
▪️أو قابلة للتحلل الحيوي Biodegradable بواسطة الكائنات الدقيقة في ظروف معينة.

و البلاستيك الحيوي تصنيفاته الأساسية:
▪️ بلاستيك حيوي غير قابل للتحلل
Biobased non-biodegradable
بلاستيك مصدره حيوى لكنه غير قابل للتحلل الحيوى ذى مواد البولي إيثلين الحيوي Bio-PE و البي إي تي الحيوي Bio-PET.
▪️بلاستيك حيوى قابل للتحلل
Biobased biodegradable
و هو بلاستيك مصدره حيوى وقابل للتحلل ذي مواد PLA و PHA.
▪️بلاستيك بترولي قابل للتحلل
Fossil-based biodegradable
و هو بلاستيك من مصدر بترولى لكنه قابل للتحلل الحيوى ذي مادة PBAT.

ده معناه ببساطة أن مش كل بلاستيك حيوي bioplastic يعني أنه قابل للتحلل و مش كل بلاستيك قابل للتحلل biodegradable يكون مصدره حيوي.

لأن دي نقطة فيها إختلاط مفاهيم عند أغلب الناس.

الجدل العالمي حول bioplastics بيدور بين هل المواد دي بديل حقيقي للبلاستيك التقليدي أكثر استدامة أم مجرد حل جزئي ممكن ينتج عنه مشاكل متنوعة؟

تعالوا نفهم أكتر.

الجدل الأساسي مركز حول:
▪️مصدر الخام الحيوي (الناس و الماشية تأكل و لا نعمل بلاستيك).
▪️الأثر الحقيقي في تحليل دورة الحياة Life Cycle Analysis (LCA).
▪️ المنافسة مع الأراضي الزراعية والمحاصيل.
▪️ القابلية الفعلية للتحلل.
▪️مدى توافقها مع أنظمة الجمع والفرز وإعادة التدوير الحالية.

👤: هو إيه المميزات يا هندسة؟

بعض أنواع البلاستيك الحيوي bioplastics بتساهم في:
▪️تقليل الاعتماد على الموارد البترولية.
▪️تخفيض في انبعاثات غازات الاحتباس الحراري.
▪️تفتح فرص و مجالات للابتكار الصناعي والقيمة المضافة الحيوية خصوصا للمخلفات الزراعية و الحيوانية.

👤: و العيوب و التحديات إيه؟

العيوب والتحديات باختصار نقدر نلخصهم في النقاط دي:
▪️مش كل البلاستيك الحيوي قابل للتحلل.
▪️ القابلية للتحلل قد تحتاج ظروف صناعية محددة ولا تتحلل تلقائيا في أي بيئة. يعني ببساطة مش كل اللي هيترمي في الارض هيتحلل من نفسه.
▪️المنافسة علي الاراضي الزراعية و الكتلة الحيوية.
▪️التكلفة مقارنة بالبلاستيك البترولي.
▪️الخواص الميكانيكية و الكيميائية والأداء مقارنة بالبدائل من الخامات البترولية.
▪️توافر المصادر الحيوية و الخامات.
▪️قياس الاستدامة الحقيقية.
▪️احتمالات تعقيد مسارات إعادة التدوير الحالية أو المستجدة و خلق التباس لدى المستهلك.
▪️تحديات التجارة العالمية و القوانين بين الدول فيما يخص البلاستيك الحيوى.

المفوضية الأوروبية ذكرت أن البلاستيك الحيوى أو القابل للتحلل ليس حل سحري بحد ذاته، وأن فائدته تعتمد على التطبيق وظروف الاستخدام ونهاية العمر.

👤: يعني إيه نهاية العمر أهندسة؟
نهاية العمر يعني إيه بيحصل لمنتج البلاستيك (أو غيره في العموم) بعد إستخدامه و التخلص منه. هل بيعاد تدويره و يرجع يدخل تاني سلاسل القيمة ولا بيشكل عبئ علي البيئة و مخلف غير مستخدم و قيمة مهدرة.

بالتالي سؤالنا الإفتتاحي اللي فوق: هل البلاستيك الحيوى هو الحل؟ مفروض يتطور و يبقي:
️▪️إيه التطبيق المناسب للبلاستيك الحيوي؟
▪️بأنهي اداء؟
▪️التكلفة؟
▪️إيه الاثر البيئى الناتج؟

نفهم من كده أن مستقبل البلاستيك على الأرجح لن يُبنى على استبدال كامل للبلاستيك البترولي لكن على مزيج من الحلول.

مستقبل البلاستيك‼️

غالبا هيبقي البوست القادم بإذن الله لو لنا عمر.
طول بالك كده.

للحديث بقية.

سلام 👋

إيه مستقبل البلاستيك؟‼️
سؤال بسيط عكس إجابته.

بدأنا البوست السابق بنظرة لمستقبل البلاستيك بصورة أعمق و أوسع من التركيز داخل الصناعة نفسها فقط. راجع البوست السابق لو عايز تفهم و تتابع.

أحد النقاط اللي كان دايما عليها علامة إستفهام بالنسبة لي لما بدأت أتابع العناوين الجديدة عالميا ذى الاستدامة و الاقتصاد الدائرى كانت #أوروبا.

نقطة هامشية، بداية متابعتي للمواضيع دي كان جاي من تركيزها علي إعادة تدوير #البلاستيك و الصناعات المصاحبة لعمليات إعادة التدوير و تطور الخامات من مصادر أخرى غير بترولية و إستخداماتها. بالإضافة إلي المصطلحات الجديدة ذي الابتكار و ممارسات صناعية أكثر إستدامة و الإنبعاثات الكربونية.

كنت بتابع علشان أفهم الأصوات العالمية و المحلية اللي بتنادى بمنع و إلغاء البلاستيك مالهم عايزين إيه و ليه.

يعني هدف المتابعة في الاول كان بدافع متابعة التطورات في صناعتى. و التحديات اللي بتواجها و خطورتها علي شغلي.

لكن المتابعة فتحت أبواب عالم جديد خلفها.

نرجع لعلامة الإستفهام حوالين نقطة ليه بتقود #أوروبا التحول للإقتصاد الدائري بجدية و حزم و سرعة؟

أي متابع للتطورات و القوانين المستحدثة عالميا في مجالات الإستدامة و الاقتصاد الدائري هيلاقي اوروبا غالبا هي اللي متصدره المشهد.

الحقيقة مش متصدره فقط المشهد، لا دول جريوا بعيد جدا عن دول العالم. إجتماعات و قوانين و تشريعات مفعلة و تحديثات و جهات رقابية و منظومات كاملة لا تنام.

و بالتبعية كل اللي له مصلحة مع أوروبا و أسواقها مضطر يتابع و يوفق أوضاعه بجديه و شفافية و يلتزم بكل مستحدثاتهم اللي تخصه لو عايز يحافظ علي سوقه هناك.

عندنا مثلا قوانين CBAM المستحدثة مؤخرا مخليه الصناعات و الجهات الرقابية في الدول خلية نحل لتوفيق أوضاعها.

لازم نفهم أن أوروبا مش بتقود ملف الدائرية فقط لأنها “بتحب البيئة” أكثر من غيرها.

لكن لأنها أكتشفت ببساطة أن الاقتصاد الخطي التقليدي Linear Economy القائم على استخراج مواد أولية جديدة، واستهلاكها، ثم التخلص منها (take - use - dispose)، بقي مكلف و #خطر ومش ذكي استراتيجيا.

المفوضية الأوروبية بتعرض الاقتصاد الدائري باعتباره أداة لتحقيق أهداف المناخ والبيئة في المقام الأول، وفي الوقت نفسه أداة لتعزيز المرونة الاقتصادية، والتنافسية، وتقليل الاعتماد على واردات المواد الخام والطاقة.

ببساطة، طوق نجاة و معركة بقاء بالنسبة لهم.

يوجد عدة مخاوف عالمية متشابكة بتدفعهم في دعم الانتقال للاقتصاد الدائري و لها تأثير قوي علي مستقبل البلاستيك.

▪️المناخ والانبعاثات:
البلاستيك جزء من اقتصاد يعتمد على الوقود الأحفورى، وبالتالي يرتبط بانبعاثات الكربون خلال مراحل الاستخراج، والتكرير، والإنتاج، والنقل، ونهاية العمر.

بالتبعية مبقاش مناقشة البلاستيك منفصلة عن مناقشة المناخ.

▪️التلوث والمخلفات والتسرب البيئي:
الضغط الشعبي والسياسى على البلاستيك جزء كبير منه من مشاهد المخلفات، والتسرب إلى البيئة، والتلوث المائى البحري و النهرى، وضعف إدارة المخلفات في دول كثيرة.

منظمة التعاون الاقتصادى والتنمية OECD أعلنت أنه حتى مع بعض التحسن في تقليل المخلفات إلا إن العالم هيفضل بعيد عن السيطرة على المشكلة بدون سياسات قوية فعالة.

▪️أمن الموارد وسلاسل الإمداد:
أزمات الطاقة والحروب والتوترات الجيوسياسية وضحت أن الاعتماد العالي على المصادر الخارجية للطاقة والمواد الخام مش مجرد قضية سعر لكن قضية أمن اقتصادى في المقام الأول.

بيانات مكتب الإحصاء للإتحاد الاوروبى (يوروستات Eurostat) وضحت أن الاتحاد الأوروبى إعتمد في ٢٠٢٤ على الواردات لتغطية حوالي ٥٧% من احتياجاته من الطاقة. النفط والمنتجات البترولية كان نسبتهم حوالي ٦٧% من واردات الطاقة.

وفي ٢٠٢٣ حوالي ٩٥% من الطلب الأوروبى على البترول والمنتجات البترولية تم تغطيته بالاستيراد.

الأرقام بتفسر ليه الإنتقال للاقتصاد الدائرى بالنسبة لأوروبا مهم و يستخدم كأداة لتقليل التعرض للصدمات الخارجية.

▪️ التنافسية الصناعية:
أوروبا حاليا مش بتتكلم عن الاستدامة فقط. هما عدوا النقطة دي من زمان و حاليا كلامهم عن “الاستدامة التنافسية”.

يعني ببساطة أن الشركة أو الصناعة اللي مش هتخفض الفاقد من عملياتها، وترفع كفاءة استخدام المواد، وتوفيق أوضاعها مع التشريعات الجديدة، قولا واحدا هتفقد قدرتها على المنافسة في أسواق المستقبل.

بمعني تاني، أن الإنتقال لممارسات و إقتصاديات دائرية بقت فعليا من رؤوس المواضيع في أجندة النمو الصناعى الأوروبى اللي بيمر مؤخرا بالعديد من الازمات الطاحنة.

▪️ الاضطرابات وأسواق البترول والغاز:
الحروب والتوترات في مناطق حساسة لمصادر الطاقة ذي الشرق الأوسط مبقتش أحداث سياسية عابرة لكن بقت عوامل تهدد عالميا تكلفة الخامات، واستقرار الشحن، وتدفق المشتقات ومدخلات الصناعات.

بناءا علي ما سبق بقي السؤال التالي مصدر قلق و إزعاج و يبحث عن حل:
هل من الحكمة أن يفضل جزء كبير من المواد الأساسية للصناعة العالمية مربوط بمنظومة شديدة الحساسية سياسيا؟‼️

سؤال لا يعني انتهاء البلاستيك من المصادر البترولية بكرة الصبح لكن مفاده أن الاعتماد الكامل عليه أصبح أكثر خطورة من قبل. و يستوجب التركيز علي إيجاد بدائل و حلول لتفادي منطقة الخطر.

الدليل علي كده أن المفوضية الأوروبية ذكرت حديثا أن حماية البيئة والتحول للاقتصاد الدائري مرتبطين مباشرة بالمرونة والازدهار والتنافسية.

خلاص يا سيدي، سهلة.
مش أحنا عندنا بلاستيك حيوي Bio-plastic يبقي محلولة.

هل البلاستيك الحيوى هو الحل المنقذ؟

أنت مستعجل ليه كده❗️
الدنيا مطارتش و البلاستيك مخلصش.

للحديث بقية بإذن الله.

دمتم مستدامين.

سلام 👋

هل بدأت نهاية عصر البلاستيك؟‼️

ده مش مجرد سؤال جدلي.
سواء بيئي أو أكاديمي.
الموضوع أعمق.

الأسابيع الأخيرة كلنا شهدنا و مازلنا الأحداث الجارية في المنطقة المحيطة و تأثيرها علي صناعات متنوعة و منها طبعا صناعات البتروكيماويات و مشتقاتها.

مستقبل البلاستيك أصبح متمركز في نقطة تقاطع بين الاقتصاد، والطاقة، والجغرافيا السياسية، والمناخ، والأمن الصناعي، وسلاسل الإمداد. مش مريح نفسه البلاستيك و تاعبنا معاه.

لكن تعالي نفكر و نسأل تاني بصورة أوضح السؤال الاساسي.

هل حاليا بنشهد بداية نهاية عصر البلاستيك البترولي ولا بنشهد ولادة عصر جديد للبلاستيك نفسه؟

العالم مبقاش بينظر للبلاستيك علي أنه فقط مادة تصنيع عبقرية و متفردة. لكن النظرة أصبحت أشمل و أعمق كجزء من منظومة أكبر مرتبطة بالنفط والغاز، والانبعاثات، واعتمادية الدول على الواردات، وقدرات صناعاتها و اقتصادها على مواجهة الأزمات و التعامل معاها.

معظم اللي بيتكتب عالميا مش بيعكس إن العالم بيستعد للتخلي عن البلاستيك ذي ما كتير من الناس ممكن تعتقد.

الحقيقة أن توقعات الخبراء و الدراسات المعلنة بتعكس أن إنتاج واستخدام ومخلفات البلاستيك عالميا مرشحة لمواصلة الارتفاع بقوة خلال العقود المقبلة.

منظمة التعاون الاقتصادي والتنمية OECD ذكرت أن الاستخدام والإنتاج ومخلفات البلاستيك هتشهد إرتفاع بحوالي ٧٠% سنة ٢٠٤٠ مقارنة بسنة ٢٠٢٠. و أن حجم مخلفات البلاستيك عالميا هيزيد ثلاثة أضعاف مستوياته الحالية علي سنة ٢٠٦٠ في أغلب السيناريوهات.

يا مين يعيش، أكيد بتقول في نفسك كده. صح؟ ‼️

حكومات أغلب الدول بتحط لنفسها و للعالم خطط مستقبلية بتحدد سياستها و توجهاتها و أهدافها للسنوات القادمة. و بيجتهدوا يحققوها و يطوروها و يطوعوا كل المتاح من إمكانيات و جهود لتحقيقها.

تقدر بالقراءة أو المشاهدة في مجالك أيا كان تشوف ده بشوية تفكير و تحليل.

كنت كتبت سابقا بوستين بعنوان "شايفنها إزاي" بناءا علي مشاهدات حقيقية و سماع أراء خبراء و أكاديمين عالميين في مجال صناعات البلاستيك و الإستدامة لفتح مناقشات هذا الموضوع.

أغلب الرسائل و التعليقات وقتها كانت في إتجاه و حول إعادة التدوير وده كان "ظاهر البوستات" لكن "مضمونهم" كان مختلف تماما.

نرجع لنقطتنا الأساسية، أغلب الشواهد بترسل رسالة واضحة أن البلاستيك مش هيختفي قريب، سامحني، لو كانت دماغك مودياك في إتجاه تاني.

ببساطة كده مستقبل البلاستيك مش الاختفاء لكن إعادة تعريفه من جديد.

مش من الحكمة أن يبقى جزء كبير من موارد المواد الأساسية لصناعة إستراتيجية عالمية مربوط بمنظومة شديدة الحساسية سياسيا و جغرافيا بتبعاتهم. و ده من النقاط اللي لفتت إنتباه الدول الصناعية المتطورة و خصوصا عديمة المصادر الطبيعية البترولية.

السؤال مش معناه إنتهاء عصر البلاستيك البترولي بكرة الصبح، لكن الدول الصناعية بالتجربة إكتشفت أن الاعتماد الكامل عليه أصبح أخطر من قبل كده. و ده من أهم النقاط اللي شاغله العالم أخر كام سنة و تحديدا الإتحاد الأوروبي. بالإضافة للأسباب الأخري المعلنة منهم.

عبقرية مواد البلاستيك و تميزها ساهم في تطور الحضارة المعاصرة و تغيير اسلوب و نمط حياتنا للأسهل بصورة تحدت العقل و المنطق.

و نتج عنها أثار بيئية و ضغوط إقتصادية و تحديدات عالمية متنوعة. لكن أصبح البلاستيك بمواده و صناعات لا بديل عنهم حاليا.

بالتالي الموضوع خرج من دائرة الوصول لإجابة سؤال هل سينتهي البلاستيك من حياتنا؟

لإجابة الأسئلة التالية:
▪️أنهي نوع بلاستيك سيقود المستقبل؟
▪️انهي نموذج اقتصادي؟
▪️أنهي مصادر خام؟
▪️انهي مسؤولية بيئية؟
▪️ليه؟

للإجابة، محتاجين نفهم نقاط أخري هي حديث العالم السنوات الأخيرة و قطارهم بيجري في مجالاتها و أحنا بنجتهد ذيهم نواكبهم.

للحديث بقية، إبقوا معنا.

دمتم مصنعين.

سلام 👋

إيه نتيجة ما سبق بالنسبة لمصر؟‼️

راجع البوست السابق لو مش متابع.

قبل ما نجاوب محتاجين نعرف الأرقام بتقول إيه بالنسبة لوارداتنا من Ethylene و EDC و VCM و مصادرهم طبقا لبيانات (WITS/UN Comtrade)

مادة HS 290121 – Ethylene
▪️تم إستيراد كميات بسيطة جدا تكاد لا تذكر
▪️تم استيراد ٤٦ #طن فقط في ٢٠٢٣
▪️تم استيراد ١٥.٥ #طن فقط في ٢٠٢٤
#السبب: مصر لا تعتمد على الإيثيلين المستورد لأنه بينتج محلي ضمن مجمعات البتروكيماويات المتنوعة.

مادة HS 290315 – EDC (Ethylene Dichloride)
▪️تم استيراد ٤٨٣ ألف طن في ٢٠٢٣ بقيمة ١٧٢.٦ مليون دولار من ألمانيا (٤١%)، الولايات المتحدة (٤١%) ، السعودية (١٠%)كأهم 3 مصادر.
▪️تم استيراد ٥٥١ ألف طن في ٢٠٢٤ بقيمة ٢٠٤.٢ مليون دولار من ألمانيا (٣٨%)، الولايات المتحدة (٢٦%) ، السعودية (١٨%)، و أندونيسيا (١٨%) كأهم 4 مصادر.
#السبب: مصر تعتمد بشكل كبير على استيراد ال EDC.

مادة HS 290321 – VCM (Vinyl Chloride Monomer)
▪️لم تستورد مصر أي كميات من الVCM في عامي ٢٠٢٣ أو ٢٠٢٤
#السبب: الإنتاج المحلي يغطي الاحتياجات بالكامل

نتيجة الأحداث الحالية في منطقة الخليج علي مصر تأثير مركب:

١- نقص في واردات مدخلات الإنتاج وارتفاع أسعارهم:
معاناة شركات الخامات المصرية المنتجة وخصوصا المعتمدة بصورة جزئية أو كلية على استيراد EDC لاستكمال الإنتاج المحلي من نقص حاد وارتفاع في الأسعار نتيجة اختناق سلاسل الإمدادات العالمية وتوقف الإمداد من مصادر الخليج. على عكس مشاكل الإمدادات المرتبطة بمصادر أسيا، لم تظهر التقارير العامة المتاحة حدوث حالة قوة قاهرة كبيرة في قطاع ال EDC داخل الولايات المتحدة خلال مارس ٢٠٢٦.

تنفيذ الصادرات من الولايات المتحدة إلى الشرق الأوسط تعرض لاضطرابات بسبب تعليق بعض شركات الشحن لخطوطها. بالإضافة إلي ارتفاع تكاليف الطاقة ومدخلات الإنتاج أدي إلي رفع أسعار الكيماويات الأمريكية. (US exports to Middle East war zone service disruptions | S&P Global) (US business activity amid Iran war | Reuters) (INSIGHT: US chemical price hikes ramp up on Middle East crisis | ICIS)

معاناة المصانع المصرية المعتمدة على واردات خامات PVC الصينية أو الأمريكية من اختناق سلاسل الإمداد وارتفاع أسعار الخامات. في مارس ٢٠٢٦، كان التأثير الرئيسي على صادرات الصين من ال PVC إلى مصر مرتبط باللوجستيات أكثر من مشاكل في توريدات الإنتاج الصيني نفسه.

إجمالي الزيادة التراكمية في سعر PVC حسب المنشأ:
▪️ #الصيني وصلت ٣٨% من أخر فبراير حتى ٢٠ مارس ٢٠٢٦. (Chemorbis via Syntex America)
▪️ #الأمريكي زيادة تراوحت ٢٥٠ – ٣٥٠ دولار / الطن من أخر فبراير حتي ١٣ مارس ٢٠٢٦ (INSIGHT: Middle East crisis, stock prices surge | ICIS)

بالنسبة لواردات الصين، تحويلات واسعة حدثت لمسارات شركات الشحن بعيد عن طريق مضيق باب المندب وقناة السويس، بالإضافة إلى تعليق مؤقت لبعض الخدمات، ووجود تردد من البائعين في تقديم عروض توريد للPVC .مما أدي إلى تقييد الإمدادات الصينية الفورية المتجهة إلى مصر ورفع التكلفة النهائية على المستوردين المصريين. (Maersk suspends two shipping services due to Middle East crisis | Reuters)

٢- تكاليف الطاقة:
نتج عن الاضطراب في تدفقات الغاز الطبيعي المسال (LNG) والنفط في المنطقة إلى ارتفاع تكاليف الطاقة مما سينعكس مباشرة على عملية الكلور - قلوي chlor-alkali كثيفة الاستهلاك للطاقة وهي عملية أساسية لإنتاج ال PVC.

٣- ارتفاع أسعار أسعار منتجاتنا عالميا مع وجود مشاكل في لوجيستيات التصدير:

السوق التركي أكبر مستورد من خامات السوق المصري أعلن زيادة في أسعار الخامات قرابة ٨٠ – ٨٥ دولار / الطن حتى تاريخه لأسعار الخامات في السوق التركي. (Chemorbis.com)

في ٣ مارس، ذكرت S&P Global أن المتعاملين في البرازيل أفادوا بأن العروض القادمة من #مصر والسعودية وفيتنام والصين قد توقفت لأن البائعون كانوا يعيدون تقييم الجوانب اللوجستية والتسعير.

هذا يعكس حالة تردد واسعة من الموردين في ظل اضطرابات الشحن العالمية، ويظهر أن تأثير الأزمة امتد إلى أسواق بعيدة مثل أمريكا الجنوبية وليس فقط الشرق الأوسط أو آسيا. (War in the Middle East cools polymer trade in the Americas, fuels expectations of rising prices | S&P Global)

#الخلاصة:
🔹️مصر لديها قاعدة تصنيع محلي قوية لخامات PVC و طبقا للأرقام الرسمية المعلنة.
🔹️الشركات المصنعة لخامات PVC في مصر تعتمد بشكل جزئي أو كلي على واردات EDC. (لماذا لا يصنع محليا؟ حد عارف)
🔹️تأثر أسعار الخامات في اتجاه الزيادة محليا وعالميا نتيجة اختناق سلاسل الإمداد وارتفاع أسعار الطاقة والشحن والمواد الخام.
🔹️أغلب واردتنا من خامات ال PVC من أمريكا والصين وأوروبا.
🔹️صادراتنا أغلبها لأسواق تركيا والبرازيل والمغرب.

التحدي الحقيقي هو كيف يمكن للشركات المصرية الاستفادة من عوائد التصدير بالعملة الصعبة مع ارتفاع الأسعار عالميا و سعر الصرف محليا مع تقليل قيمة فاتورة الاستيراد لمدخلاتها وتقليل الضغط على العملة الصعبة؟‼️.

علما بأن الزيادة التراكمية المعلنة في أسعارنا عالميا زادت بنسبة ٣٥% من أخر فبراير حتي ٢٠ مارس (Chemorbis via Syntex America)

ما سبق كان نظرة شاملة موجزة و تحليل لواحد من الصناعات المصرية الهامة و مصدر دخل هام لقطاع البنروكياويات في مصر.

إيه رأيك وتقييمك لصناعة خامات ال PVC في مصر بعد ما وصلت لهنا؟

شاركنا رأيك لأنه أكيد إضافة.

سلام 👋

سألت نفسك؟‼️

هل عندنا صناعة خامات PVC؟
هل معتمدة علي الخليج بشكل مباشر؟
هل الميزان التجاري لصالحنا؟

البوست ده تكملة لأخر بوستين لو مش متابع معانا.

إجابات الأسئلة السابقة محتاجة فهم و تحليل للسوق المصري ونشوف الصورة كاملة لصناعة خامات PVC.

لو أنت ساكن جديد علي كوكب الأرض وغير متابع ما يحدث عالميا وتحديدا في منطقة الخليج هلخصلك بإيجاز.

منطقة الخليج فيها توتر وغليان وحالة حرب رفعت الضغوط على أسواق الطاقة والنقل والتأمين البحري عالميا، و التأثير انعكس مباشرة على تكلفة إنتاج ونقل المواد الخام والكيماويات الوسيطة والمنتجات بصفة عامة.

شهدت أسعار خامات PVC في أوروبا وتركيا ارتفاعات ملحوظة مع زيادة أسعار الغاز والنافتا Naphta والإيثيلين Ethylene، إلى جانب اضطرابات الشحن وارتفاع تأمين مخاطر الحرب على السفن War risk premium.

إيه موقف صناعة خامات PVC في مصر؟‼️

تعتبر مصر لاعب إقليمي قوي في صناعة خامات PVC بقاعدة تصنيع محلية تتمثل في:
🔹️شركة البتروكيماويات المصرية (EPC):
هي شركة مملوكة للدولة أنشئت في عام 1987 تشغل وحدة لإنتاج PVC المعلق Suspension PVC (S‑PVC) في الإسكندرية بطاقة إنتاجية معلنة 80 ألف طن/سنة. وتقوم بإنتاج درجات متنوعة من خامة PVC تشمل K‑57، K‑61، K‑67، وK‑70.
في أكتوبر 2023 أعلنت الشركة في تقريرها الرسمي أن إنتاجها للعام 2022/2023 وصل 82.7 ألف طن وهو أعلي إنتاج تم تحقيقه منذ بداية عمل الشركة. أعتقد أن الأرقام دي مرتبطة بمشاريع البنية التحتية في الدولة الفترة دي مثل حياة كريمة وغيرها من المشاريع القومية، وقتها كان في توسع في الطلب في السوق لخامات PVC لتصنيع المواسير و الوصلات لتلبية احتياجات المشاريع.

أعلنت EPC في يناير 2026 اعتمادها ميزانية لضح استثمارات جديدة لتوسيع طاقتها لإنتاج مونومر كلوريد الفينيل (VCM) لتصل إلى125 ألف طن / سنة، كما تستهدف إنشاء خط إنتاج جديد لإنتاج خامة PVC يضيف 120 ألف طن / سنة إضافية للطاقة الإنتاجية الحالية للمصنع.

للعلم، تنتج الشركة أيضا صودا كاوية Caustic Soda.

🔹️شركة تي سي آي سنمار للكيماويات (TCI Sanmar Chemicals):
هي شركة هندية تعتبر من أكبر الاستثمارات الخاصة في قطاع الصناعات الكيماوية في مصر، وتقع في بورسعيد. تشغل الشركة مجمع صناعي ضخم بطاقة إجمالية معلنة 400 ألف طن / سنة من خامة PVC. و 275 ألف طن / سنة صودا كاوية.

الطاقة الإنتاجية الحالية المجمعة المعلنة للتصنيع المحلي حوالي 480 ألف طن / سنة من خامة PVC.

إيه موقف صادراتنا وواردتنا لخامة PVC؟‼️

بصفة عامة تعتمد مصر على استيراد بعض الخامات المتخصصة لتلبية الطلب المحلي المتزايد، خصوصا في قطاع البناء والتشييد ومشاريع البنية التحتية القومية.

في #٢٠٢٣:
استوردت مصر حوالي ٢٠٤ ألف طن بند جمركي (HS 3904) بقيمة ٢٣٣ مليون دولار.
صدرت مصر حوالي ٢٣٨ ألف طن بند جمركي(HS 3904) بقيمة ٢٤٤ مليون دولار.
الميزان التجاري في ٢٠٢٣ إيجابي لصالح مصر في عدد الأطنان المصدرة و العوائد.

في #٢٠٢٤:
استوردت مصر حوالي ٢٠٧ ألف طن بند جمركي (HS 3904) بقيمة ٢٢٣ مليون دولار.
صدرت مصر حوالي ٢١٨ ألف طن بند جمركي(HS 3904) بقيمة ٢٢١ مليون دولار.
الميزان التجاري في ٢٠٢٤ إيجابي لصالح مصر في عدد الأطنان المصدرة و"سيكا كده" سلبي (أقرب للتوازن) في العوائد .

في #٢٠٢٥:
استوردت مصر حوالي ٩١ ألف طن بند جمركي (HS 3904) بقيمة ٩٤ مليون دولار.
صدرت مصر حوالي ١١٨ ألف طن بند جمركي(HS 3904) بقيمة ١١٥ مليون دولار.
الميزان التجاري في ٢٠٢٣ إيجابي لصالح مصر في عدد الأطنان المصدرة والعوائد.

نقدر نلاحظ مما سبق أن السوق المصري لخامة و منتجات PVC ليس مجرد مشتري فقط لكن يعتبر مورِد أساسي للأسواق الخارجية.

إيه هي الأسواق الخارجية لصادراتنا؟‼️

أهم 5 أسواق خارجية لمنتجاتنا في أخر 3 سنين ٢٠٢٣ – ٢٠٢٥ هما:
▪️تركيا - الأولي على مدار هذه الفترة كسوق خارجي لنا
▪️البرازيل - الثانية أخر سنتين والثالثة في ٢٠٢٣
▪️المغرب - الثالثة أخر سنتين والثانية في ٢٠٢٣
▪️إيطاليا - الرابعة أخر سنتين والخامسة في ٢٠٢٣
▪️رومانيا – المركز الخامس في ٢٠٢٥ والرابع في ٢٠٢٣

بصراحة لفت انتباهي شيء، أنت خدت بالك من حاجة؟

هي تركيا دي مش دولة صناعية وأحنا شايفين أننا بنستورد منها فقط❗️

بشوية بحث في الأرقام الرسمية العالمية المعلنة في بند جمركي ١ فقط لقيناها السوق الخارجي رقم ١ لنا فيه، وأكيد في أكتر من بند نفس الحال.

أذكر في إحدي زياراتي هناك، مصنع من مصانع البلاستيك قالي "أنهم في تركيا محتاجين موردين أسطمبات (قوالب) من مصر لأن حجم الطلب في السوق المحلي عندهم أكبر من قدرة السوق المحلي على تلبيته و ده معطلهم ومحتاجين بدائل".

حاولت أبحث وأنا شغال علي التقرير ده إيه هو السبب الأساسي – لو في – لاهتمام السوق التركي بمنتجاتنا من البند HS 3904.

خلاصة الأسباب بعد قراءات متنوعة إن السوق التركي بجمع بين:
🔹️طلب قوي ومنظم على PVC.
🔹️اعتماد كبير على الواردات.
🔹️قرب المسافة البحرية بينا وبينهم.
🔹️الإعفاء من الرسوم الجمركية بموجب اتفاقية التجارة الحرة الثنائية.

بالتبعية، أكيد المنتج المصري محقق جودة مستوفية الشروط العالمية بجانب كل ما سبق اللي يعتبر عوامل مساعدة. أصل هتعمل إيه الماشطة ....... لو منتجنا المصري سيء
ولا إيه؟

ما حجم سوقنا في باقي الدول؟‼️

سواء في الخليج – سبب التحليل الأساسي – أو أفريقيا بالمرة لأنها قارتنا الأساسية.

في ٢٠٢٤، كانت قطر هي أكبر مستورد عربي خليجي لصادرات مصر من HS 3904، بقيمة تقارب ١.٣٠ مليون دولار. وكانت بقية الوجهات الخليجية الظاهرة في البيانات الرسمية أقل بكثير، حيث بلغت صادرات مصر إلى السعودية حوالي ١٢٣ ألف دولار.

على مستوى الدول الأفريقية، فقد كانت المغرب هي أكبر مستورد أفريقي لصادرات مصر من HS 3904 بفارق واضح مثل ما هو مذكور أعلاه، ما يجعلها ليست فقط أكبر سوق أفريقي، لكن واحدة من أهم الأسواق العالمية لصادرات مصر في هذا البند.

بعد المغرب، ليبيا والجزائر ضمن أهم الوجهات الأفريقية في البيانات التفصيلية على مستوى البنود الجمركية الفرعية، بالإضافة إلى أسواق أفريقية أصغر مثل جنوب أفريقيا، تونس، السنغال، كينيا، كوت ديفوار، تنزانيا، السودان، وإثيوبيا.

#الخلاصة:
طبقا لبيانات عام ٢٠٢٤ المعلنة للتبادل التجاري، قطر هي أكبر وجهة خليجية عربية لصادرات مصر من البند HS 3904 – علما بإن الرقم ضعيف جدا، على النقيض كانت المغرب بفارق واضح أكبر وجهة أفريقية.

إيه هي المصادر الخارجية لوارداتنا؟
أهم مصادر خارجية لوارداتنا في أخر ٣ سنين ٢٠٢٣ – ٢٠٢٥ هما:
▪️الصين وأمريكا مركز أول وثاني أخر ٣ سنوات بأفضلية للصين ٢٠٢٣ و٢٠٢٥ مركز أول.
▪️فرنسا – المركز الثالث طوال الفترة.
▪️بلجيكا – المركز الرابع طوال الفترة.

إيه ده، مفيش مصدر من الخليج؟
هو سعر الخامة ملخبط ليه❗️

محتاجين نرجع خطوة ونشوف الصورة من منظور أوسع شوية.

يعتمد إنتاج PVC بشكل كبير على سلاسل الإيثيلين ethylene chain (إيثيلين ثنائي الكلور EDC، ومونومر كلوريد الفينيل VCM) وعلى عملية الكلور - قلوي chlor-alkali process (الكلور chlorine والصودا الكاوية caustic soda).
للتبسيط، تعتمد عملية تصنيع PVC علي الترتيب التالي:
🔹️بداية من Ethylene
🔹️ يتم تحويله إلي EDC بإضافة الكلور
🔹️ يتم تفكيكه للحصول علي VCM
🔹️ يتم بلمرته للحصول PVC

منطقة الخليج مصدر محوري عالمي لإنتاج الإيثيلين. دول مجلس التعاون الخليجيGCC أنتجت ١٢% من الإنتاج العالمي طبقا للأرقام المعلنة عن ٢٠٢١ و ١١% طبقا لأرقام ٢٠٢٤ المعلنة. علما بأن أكبر حصة إنتاج للسعودية من دول مجلس التعاون. حجم الإنتاج يضع دول مجلس التعاون الخليجي GCC مستقرة في المركز #الثالث عالميا لإنتاج الإيثيلين بعد الولايات المتحدة والصين.
إيران بتنتج تقريبا ما يعادل ٣٥% من إجمالي إنتاج دول مجلس التعاون الخليجي و ما يقارب ٤٥% من حجم إنتاج السعودية مع خطط استثمارية معلنة (قبل الأحداث الأخيرة) لتوسيع قاعدة الإنتاج خلال السنوات المقبلة. مما يعني أن الحصة الإجمالية لمنطقة الشرق الأوسط مهمة. ( Iran's petrochemicals on the rise | S&P Global)

بالنسبة لمواد EDC و VCM، فإن الخليج يعتبر مركز إنتاج مهم و متنامي لكن بالنسبة للأرقام و حجم الإنتاج أسيا وتحديدا شمال شرق أسيا هي المركز العالمي المهيمن عالميا في إنتاج واستهلاك ال EDC، بحصة تقريبية ٤٠% من حجم الإنتاج والاستهلاك العالمي. (S&PGlobal)

الحرب أدت إلى إغلاق أو تعطيل جزء كبير من الطاقة الإنتاجية العالمية لهذه المواد الكيميائية، سواء:
▪️بشكل #مباشر عن طريق الهجمات على المنشئات بمنطقة الخليج وحصار الشحن.
▪️بشكل من خلال حرمان المنتجين عالميا وتحديدا في أسيا وأوروبا و بعض الدول من المواد الأولية اللازمة لاستمرار تشغيل وحداتهم الإنتاجية.

إغلاق مضيق هرمز خنق الإمدادات الحيوية من النافثا Naphtha والإيثان Ethane والكيماويات الوسيطة Intermediate chemicals.

عدة مواقع ذكرت #نقلا عن تقرير خاص صدر في منتصف مارس ٢٠٢٦ من مورغان ستانلي Morgan Stanley بأن ٥.٢% من الطاقة الإنتاجية العالمية للPVC ٦.٤% من الEDC ٥.٤% من ال VCM اصبحت تحت تأثير القوة القهرية نتيجة الاضطرابات الحالية بالمنطقة. (لم أستطع الوصول لمعلومة مؤكدة لهذه الأرقام أو قراءة التقرير بنفسي بخلاف باقي الأرقام لذا وجب التنويه لكن مذكورة في مواقع متعددة بنفس الصياغة والمعني).

▪️أسعار Ethylene ارتفعت عالميا من ٢٤% - ٣٥%
▪️أسعار EDCارتفعت عالميا حوالي ٢٣%
▪️أسعار VCM ارتفعت عالميا حوالي ٣٦%
طبقا للمعلن بتاريخ ١٨ مارس(Polymerupdate via Beroe Inc., March 18, 2026 )

إيه نتيجة ما سبق بالنسبة لمصر؟‼️

البوست القادم بإذن الله.

إبقوا معنا....

دمتم مصنعين.

سلام 👋

متابع معانا؟‼️

البوست السابق ذكرنا تقييم عام لموقف الأحداث الجارية في منطقة الشرق الأوسط طبقا لما تم نشره وتداوله على المواقع العالمية حتي تاريخ ٢١ مارس ٢٠٢٦ و تأثيره علي سوق البلاستيك.

من البوست الحالي و ما يتبعه هدفنا فهم التأثير الناتج من الأحداث على سوق البلاستيك لبعض خامات البلاستيك ما أمكن.

نتيجة للأحداث الجارية حتى تاريخ نهاية البوست الحالي ٢٤ - مارس - ٢٠٢٦، يشهد السوق العالمي ارتفاع أسعار في جميع المواد الخام الكيميائية الاساسية Building Block Chemicals لصناعة البلاستيك مثل:
▪️الإيثيلين Ethylene
▪️البروبلين Propylene
▪️بنزين Benzene
وبالتالي جميع أنواع بوليمرات البلاستيك شهدت زيادات متفاوتة في الاسعار العالمية و نتج عنها شلل في سلاسل التوريد القائمة و عجز في التنفيذ لمدد طويلة.

خلال البوست الحالي ومجموعة البوستات اللاحقة بإذن الله - بقدر ما ربنا يفتح علينا - كلامنا عن بعض أنواع الخامات التي تهم السوق المصري و نفهم سوقها بصورة أوضح وحجم التأثير عليه وأسبابه وأوجه الفرص الناتجة من الأزمة.

بداية تحليلنا علي بوليمر البولي بروبيلين PP.

🔷 ️البولي بروبيلين PP:
تعتبر مادة PP أكثر مادة بلاستيكية تم توثيق تحركها بوضوح حتى الآن خلال الازمة.

ذكرت في البوست السابق السعر بلغ ١١٨٠ دولار/طن PP injection CFR Far East Asia بزيادة ٣٣٠ دولار/طن منذ ٢ مارس، في حين بلغ ١٢٩٠ دولار/طن في ١١ مارس PP raffia CFR North Africa بارتفاع ١٩٠ دولار/طن خلال أسبوع واحد فقط. وتنسب S&P هذه الزيادة إلى تعطل صادرات الشرق الأوسط وحالات القوة القهرية force majeure نتيجة المخاطر المحتملة أثناء الشحن والاضرار بالمنشئات نتاج الاستهداف. (spglobal.com)


هذا البوليمر مهم جدا للسوق المصري لأن PP يستخدم على نطاق واسع في صناعات الرافيا والأجولة المنسوجة والمنتجات المنزلية والأغطية والعبوات الرقيقة thin wall ومنتجات الحقن. وبالتالي فإن السعر المعلن بالزيادات لشمال أفريقيا مهم بشكل خاص لأنه أقرب إلى واقع الحال في السوق المصري من استخدام السعر المعلن للجانب الأسيوي. (spglobal.com)

من المهم معرفة أن سعر بوليمر البولي بروبيلين PP معتمد #أساسا على سعر المواد الخام الأولية وتوافرها وتحديدا غاز PGP (Polymer Grade Propylene) وليس على أليات السوق من العرض والطلب. وعالميا سعر PGP في تزايد حاد مؤخرا نتيجة الأحداث.

سألت نفسك، ما هي قدراتنا من الإنتاج المحلي لمادة PP؟

الشركات المنتجة رسميا لبوليمر البولي بروبيلين البكر PP في مصر طبقا لما هو مذكور على صفحة الشركة المصرية القابضة للبتروكيماويات ECHEM بوضوح، هما:
▪️الشركة المصرية للبروبيلين والبولي بروبيلين EPP / EPPC.
▪️شركة الشرقيون للبتروكيماويات OPC.

▪️الطاقة الإنتاجية الرسمية الحالية المعلنة لـشركة EPP هي ٣٥٠ ألف طن/ سنة.
▪️الطاقة الإنتاجية الحالية لـشركة OPC المعلنة هي ٢٢٥ ألف طن/ سنة (طبقا للصفحة الرسمية لـشركة Oriental petrochemical Company (OPC) - Carbon Holdings).

وبناء عليه، تصبح الطاقة الإنتاجية المحلية السنوية المؤكدة حاليا لمصر ٥٧٥ ألف طن/سنة. (ECHEM)

أما من ناحية الدرجاتGrades، فإن موقع EPP يذكر رسميا أنه ينتج:
🔹️ هوموبوليمر Homopolymer PP.
🔹️ راندوم كوبوليمر Random Copolymer.
🔹️كوبوليمر Copolymer.

موجهة لتطبيقات:
🔸️ الرافيا Raffia
🔸️ الفيلم Blown Film
🔸️الحقن Injection molding
🔸️التشكيل بالحرارة Thermoforming
🔸️اقمشة غير منسوجة Nonwoven
🔸️الفايبر و الخيوط Fiber

يذكر موقع OPC أنها تنتج:
🔹️ أربعة أنواع من هوموبوليمر Homopolymer PP تخدم صناعات:
🔸️ الرافيا Raffia
🔸️ الفيلم Blown Film
🔸️الحقن Injection molding
🔸️الفايبر و الخيوط Fiber

هذا يعني أن قاعدة إنتاج بوليمر PP المحلية في مصر لا تقتصر على درجة واحدة، بل تشمل عدة درجات متنوعة.

جدير بالذكر ما تم إعلانه في أكتوبر ٢٠٢٥ عن إنشاء مجمع بتروكيماويات في منطقة العين السخنة شمال غرب خليج السويس، في شراكة بين هيئة قناة السويس Suez Canal Authority وأنكوراج للاستثمارAnchorage Investments.

الطاقة الإنتاجية المعلنة للمرحلة الأولي من الشراكة الجديدة ٧٥٠ ألف طن / السنة لمادة البولي بروبيلين PP بتكلفة استثمارية معلنة بقيمة ٢ مليار دولار أمريكي.

الإعلان الأول للخطوط العريضة لهذا المشروع كان في عام ٢٠٢١. وتم إعلان اسم Anchor Benitoite على المجمع الصناعي وقتها.

هل يوجد طريقة لمعرفة السوق بنظرة أشمل و أوضح؟

لمعرفة السوق بصورة أوضح فإن أفضل حل هو الاعتماد على البيانات الرسمية المعلنة من جهات متنوعة و التعامل معها.

️في #٢٠٢٣:
🔻 مصر استوردت ٣٨٦ ألف طن من HS 390210 الخاص بـ Polypropylene in primary forms
🔻 مصر استوردت ١١١ ألف طن من HS 390230 الخاص بـ Propylene copolymers in primary forms
وبذلك، يكون إجمالي واردات عائلة البولي بروبيلين PP في ٢٠٢٣ قد بلغ ٤٩٧ ألف طن

وفي المقابل:
🔺 ️مصر صدرت ٢٢٤ ألف طن من HS 390210 الخاص بـ Polypropylene in primary forms
🔺️ مصر صدرت ٥٩٦ طن من HS 390230 الخاص ب Propylene copolymers in primary forms

وبذلك، يكون إجمالي صادرات عائلة البولي بروبيلين PP في ٢٠٢٣ قد بلغ حوالي ٢٢٥ ألف طن.

في #2024:
🔻 مصر استوردت ٤٦٣ ألف طن من البند HS 390210 الخاص بـ Polypropylene in primary forms
🔻 مصر استوردت ١١٠ ألف طن من البند HS 390230 الخاص بـ Propylene copolymers in primary forms

وبذلك، يكون إجمالي واردات عائلة البولي بروبيلين PP في ٢٠٢٤ قد بلغ حوالي ٥٧٣ ألف طن

وفي المقابل:
🔺️مصر صدرت ٢٨٥ ألف طن من البند HS 390210 الخاص بـ Polypropylene in primary forms
🔺️مصر صدرت ٥١٩ طن من البند HS 390230 الخاص بـ Propylene copolymers in primary forms

وبذلك، يكون إجمالي صادرات عائلة البولي بروبيلين PP في ٢٠٢٤ قد بلغ حوالي ٢٨٦ ألف طن.

في #٢٠٢٥:
عدد الأطنان رسميا غير معلن حتى الان لكن للتقريب باستخدام أسعار ٢٠٢٤ مع الأرقام المعلنة الرسمية لحجم التجارة نستنتج التالي:
🔻مصر استوردت قرابة ٤٩٢ ألف طن

وفي المقابل:
🔺️مصر صدرت قرابة ٢٥٦ ألف طن

ما سبق يوضح نقطة مهمة جدا، مصر #ليست معتمدة بالكامل على استيراد مادة PP، لكن في نفس الوقت ليست #مكتفية ذاتيا. فمصر تمتلك قاعدة إنتاج محلية كبيرة وتصدر كميات كبيرة من إجمالي إنتاجها، لكنها في المقابل ما زالت تستورد كميات كبيرة نسبيا مما يدل علي تنامي حجم السوق الصناعي و الحاجة لمشاريع استثمارية في قطاع البتروكيماويات لتتماشي مع النمو في القطاع الصناعي.

ينقصنا فهم نقطة هامة لاكتمال تحليل موقف سوق PP في مصر و سبب تأثره السريع بأحداث الخليج الجارية.

عرفتها؟‼️

#الإجابة: أهم مصادر لواردتنا الأساسية من خامات PP.

في #٢٠٢٣ استوردنا:
🔻 ٣٢٧.٥ ألف طن من #السعودية (رقم 1 في الترتيب)
🔻 ٧٧.٥ ألف طن من #الإمارات (رقم 2 في الترتيب)
🔻 ٩.٨ ألاف طن من (رقم 4 في الترتيب)

في #٢٠٢٤ استوردنا:
🔻 ٣٣٠ ألف طن من #السعودية (رقم ١ في الترتيب)
🔻 ١٢٧ ألف طن من #الإمارات (رقم ٢ في الترتيب)
🔻 ٣٣ ألف طن من (رقم ٣ في الترتيب)

أظن واضح جدا في السوق بصفة عامة للمصنعين والتجار أن المنتج الخليجي وتحديدا السعودي والإماراتي المنشأ مؤثرين في السوق لخامات البولي بروبلين.

من حيث ترتيب مصادر واردتنا السعودية والإمارات وسلطنة عمان من أهم 5 مصادر لواردتنا حتى تاريخه في حين أن نصيب الأسد للسعودية ونصيب الإمارات في تزايد. أرقام 2025 ستوضح أكتر الصورة لنا عند إعلانها.

نقطة أخيرة مهم فهمها و هي #مصادر مدخلات التصنيع لشركاتنا المحلية EPP و OPC المستخدمة لتصنيع بوليمر البولي بروبيلين PP.

بوليمر البولي بروبيلين PP يعتمد بصفة أساسية علي غاز Propane وهو أحد مشتقات الغازات البترولية. يستخدم كمدخل أساسي في هذه الصناعة ويمكن للمهتم البحث أكثر عن هذا الموضوع التقني.

المصادر #المباشرة:
أكبر مُصدر لغاز البروبان لمصر هي الولايات المتحدة.
يليها مصادر من السعودية و الإمارات.

المصدر :
إمدادات الغاز المسال من دولة الخرا التي يتم منها محليا إستخراج غاز البروبان لإمداد شركاتنا.

تأثير الأحداث الحالية على هذه المصادر:
▪️الولايات المتحدة (تأثير غير مباشر): المسار البحري منها إلى مصر عبر البحر المتوسط مفتوح ولا يمر بمناطق الصراع. لكن بسبب إغلاق مضيق هرمز، يتهافت العالم على الغاز الأمريكي، مما أدى إلى ارتفاع جنوني في أسعار البروبان الأمريكي، وبالتالي تدفع مصر تكلفة أعلى بكثير (War Premium).
▪️دولة الخرا (تأثير مباشر): أوقفت الخرا ضخ الغاز الطبيعي لمصر تماماً في ٢٨ فبراير ٢٠٢٦ بسبب الأحداث الجارية. هذا يؤثر بالسلب علي استخراج البروبان المحلي من شبكة الغاز الوطنية.
▪️السعودية والإمارات (تأثير مباشر): الإمدادات متوقفة فعليا بسبب إغلاق مضيق هرمز أمام الشحن التجاري وإعلان أرامكو Aramco حالة القوة القهرية.

مهم نفهم أن حوالي ٢٧% من صادرات غاز البترول المسال (LPG) العالمية تمر عبر مضيق هرمز. مع تصاعد الأحداث في أواخر فبراير ومارس ٢٠٢٦، أصبح المضيق مغلق فعليا أمام الشحن التجاري. وأعلنت شركة أرامكو السعودية حالة "القوة القهرية" وأوقفت صادراتها من البروبان. هذا أدى إلى ارتفاع تاريخي في أسعار البروبان العالمية بنسبة ٢٢% في يوم واحد (٢ مارس ٢٠٢٦). مما أثر بشدة على إنتاجنا المحلي المعتمد جزئيا على استيراد البروبان.

كانت النتيجة أن الشركات المصنعة للبولي بروبيلين تواجه ضغوط هائلة بسبب:
▪️نقص المادة الخام (البروبان) سواء المستوردة أو المحلية.
▪️ارتفاع تكاليف الشحن بشكل جنوني بسبب تحويل مسار السفن حول رأس الرجاء الصالح.
مما سيؤدي بالتأكيد إلى ارتفاع أسعار البولي بروبيلين في السوق المصري مرحليا لحين اتضاح الرؤية لنتيجة الأحداث وعودة سلاسل الإمداد للعمل بشكل منتظم و واضح مع ثبات الأسعار في التعاقدات.

رغم مرورنا مرور الكرام بإيجاز شديد علي البيانات والأرقام لفهم وتحليل الموقف إلا أن البوست طال. لكن خامة PP من الخامات الحيوية جدا في صناعات متنوعة من أهمها التعبئة والتغليف وغيرهم و محتاجين نفهم.

غرضي إيه من البوست الطويل العريض ده اللي اخد مني شغل قرابة يومين كاملين بخلاف البوست السابق؟‼️
🔹 ️أولا بحاول أفهم كمُصنع الجنان اللي حاصل في السوق سببه إيه؟ الخامة سعرها في السوق طول النهار بيرقص ذي فرقع لوز. لا عارفين نسعر ولا نشتري ولا نبيع. حتى النقدي بقي غير مضمون لأن نطات السعر خطواتها واسعة وكبيرة.
🔹 ️ثانيا محاولة لتوضيح الصورة لحضراتكم ومعارفكم يمكن وضوح الصورة بهدوء و بمعلومات مؤكدة بمصادر ذات مصداقية و معلنة يساهم في هدوءنا سواء مصنعين، أو تجار، أو مستثمرين، أو متخذي قرار وتحديد خطوتنا القادمة في صناعتنا وسوقنا.
🔹️ ثالثا إحنا فين من الاكتفاء الذاتي؟ و فين من مصادر مدخلات صناعاتنا الإستراتيجية وتنوعها؟
🔹️ رابعا مشاريع إعادة التدوير محتاجة استثمارات مختلفة عن كسارة وخرازة وخط غسيل. محتاجين جودة خامات معاد تدويرها عالية وبوفرة في السوق. و للأمانة، الجودة متوفرة لكن الوفرة بعافية لسه.
🔹️ أخيرا، سوقنا قوي وصناعتنا قوية لكن محتاجين منستغلش الظروف و بغشومية كل واحد يقول يالا نفسي ونطحن في بعض.

للحديث بقية لو قدر لنا.
إبقوا معنا...

دمتم مصنعين 🫡.

سلام 👋.