Nahed Salah

المعانى والمصطلحات احياناً بتختلف من مجتمع لآخر وهى فى الغالب بتمثل منظور الشعوب وافكارها وثقافتها والامر لايختلف كثيراّ فيما يخص الافراد

وكثير من علماء النفس والاجتماع طرحوا النقطه دى لأهميتها فى تشكيل الوعى الجمعى
ولو رجعنا للأدب الشعبى او الحكم الشعبيه نلاقيها بتشرح الفكره بشكل مبسط جداً وفى حكمه بسيطه كتير مننا يعرفها بتقول(خاطبو الناس بقدر عقولهم )

التعرف على افكار المحيطيين بينا ركيزه اساسيه فى التعامل
ولو سألنا نفسنا ايه أهمية الموضوع هنلاقي ان أحياناً اختلاف المعانى والمصطلحات
ممكن يغير الفكره ويقلب معناها بصوره كامله

فهم افكار المحيطين بينا من خلال المصطلحات اللى بيستخدموها بيسهل فى تحسين العلاقات

واكيد كلنا سمعنا عن خلافات كثيره سواء بين شعوب او أفراد لو بحثنا عن السبب فى الغالب اكتر عنصر مؤثر هو المصطلح او المعنى

اللغه والمصطلحات من اهم ادوات التواصل و هى اللى بتحدد اسلوب تفكيرنا وهويتنا
وفهم ايدولوجية الطرف الآخر وطريقة استخدامه للمعانى ممكن جداً يوفر علينا سوء فهم او خلاف

بنسمع كتير البعض بيقول انا بنحت فى الصخر او حد يقول انا شايل حمل فوق طاقتى او انا عندى هموم ومشاكل محدش يستحملها او عندى مصائب مش عند حد

احياناً ادمغتنا بتكون السبب فى صياغة جمل بهذا النوع .ربنا سبحانه وتعالى خلق كل واحد فينا عنده القدره على تحمل كل مايواجهه من اعباء او مشاكل او صدمات

والدليل عندنا موجود فى الطبيعه اللتى خلقها الله سبحانه وتعالى

فى بعض انواع من الشجر بتنمو وسط الصخور مفيش مياه كفايه وتربه من وجهة نظرنا لاتصلح للزراعة
لكنها بتعيش وممكن يمتد عمرها لسنوات اكيد جذورها وهى بتنمو بتلاقى صخور ممكن تعيق نموها لكن بشكل ما بتقدر تشق طريقها
ولو تأملنا فى اى شئ فى الكون خلقه الله تعالى هنلاقيه ماشى بنفس الطريقه ومن ملايين السنين

مخنا هو اكبر سبب فى تكوين الفكره اننا متحملين اكبر من طاقتنا ولو اتعاملنا مع السبب وحاولنا نزيح الفكره بالتدريج اكيد الرؤيه بتكون اوضح وبالتالي نظرتنا لمشاكلنا بتختلف وتعاملنا مع الصعوبات والأعباء بيبقى اسهل

الفكره اننا لازم نسعى والسعى معناه مجهود لكن ده لايعنى ان المجهود ده فوق قدرتنا او اكبر من طاقتنا بالعكس هو ماخُلقنا له وتهيأت كل انفسنا لحمله

فى احد الرويات للكاتب الانجليزى ستيوارت تورتون بيوصف عن لسان محارب شعوره باول وجبه بعد كل معركه وبيقول ان الوجبه كانت عباره عن بواقى عظام الدجاج ومضاف ليها بواقى الخضار مع الشعير لانه هو ده المتاح فى ساحة المعركه ولنا ان نتخيل مدى سوء طعمها لكنه قال ان هذه الوجبه هى ماتشعره بالحياه

معارك الحياه لاتقل عناء ومشقه ومخاطر عن الحروب الحقيقة وكلٌ فى ميدانه ومع الوقت بنكتسب قدره على مناورة الصعاب وتصبح اللحظات القليله البسيطه اللى ممكن نستمتع بيها هى ماتشعرنا بالحياه

قدرتنا فى المراحل العمريه المختلفه على استيعاب الامور والفهم المنطقى لها هى اللى بتخلينا نقدر قيمه الاشياء مهما كان حجمها

كوب شاى بعد عناء يوم طويل بالنسبه للام مثلاً هو اعظم حاجه ممكن تسعدها
حمام دافئ بعد يوم سفر طويل وشغل مستمر هو شيئ بيشعر اى شخص بالسعاده والراحه

تقدير الاشياء الصغيره حتى او امتلكنا الكثير هى ماتشعرنا بالحياة

مابين الاهتمام بنفسنا ومراقبة حالتنا المزاجيه وبين الافراط فى ذلك خيط رفيع احياناً مش بنشوفه وفى الاغلب بننشغل بالمفهوم ده لغاية مانبدأ نفقد السيطره على رغبتنا واحتياجاتنا

والنتيجه نفس مدللة وغير قادره على مواجهة المشاكل

الحياه دون مواجهات حصيلتها بشر بلا خبره او تجارب

بمعنى ان احياناً لما بنسمع انك لازم تهتم بنفسك وتبعد عما يؤذيك وتهتم ازاى توصل لاكبر درجات السلام النفسى (وهو بالمناسبه عامل رئيسى فى تقبل السلبيات باسلوب عقلانى ولكن دون مبالغه )

ومع الوقت بنكتسب شخصيه هشة غير قادره على التصدى للتحديات والصعاب

نظرتنا لاحتياجتنا وطموحتنا لما بيبقى مقنن وله ضوابط رؤيتنا للامور بتبقى اكثر واقعية ومنطقيه واسلوبنا فى حل المشاكل يصبح اكثر سلاسه

اهتم بنفسك ولاتبالغ فى تدليلها

فى الاغلب ان علاقتنا بنفسنا بتشكل جزء كبير من علاقتنا بالآخرين وعشان نعرف نتعامل مع العالم الخارجى بطريقة افضل محتاجين نفهم نفسنا الاول ونعرف ازاى ان الافكار السلبيه والاحكام المسبقه على الامور المحيطه بينا بالاضافه لمخاوفنا بتأثر على نظرتنا لنفسنا

والسؤال هنا ازاى نغير منظورنا عن شخصيتنا ونوصل لطريقه سلسة ومناسبه لعلاقه قويه بأنفسنا ؟

اذا بدأنا بادراك حقيقة افكارنا واسبابها واتعاملنا مع نفسنا بلطف وقدرنا نكون علاقة صداقه قويه مع نفسنا وقدرنا ذاتنا وتسامحنا معاها نقدر فى الوقت ده نكون مفهوم واضح عن شخصيتنا ونوصل لطريقه مناسبه للتعامل مع مجريات الامور المحيطه بينا وكمان بنفتح باب للشفاء من اخفاقات الماضى وده بيساعدنا فى تعميق الروابط مع الاخرين ومع العالم

الموضوع مش صعب لكن محتاج مننا شوية مجهود احنا ممكن نكون احياناً بنخاف نواجهه نفسنا لان بعضنا بيقسو على نفسه وبيتضخم عنده الاحساس بالذنب لكن الفكره ابسط من كده التفكير فى سلبيات الماضى هى اللى بتوصلنا للاحساس ده ولو وقفنا عندها عمرنا ماهنتقدم خطوة

لو ادركنا قد ايه اننا من غير مانفهم نفسنا هيبقى صعب علينا فهم الأطراف الاخرى هنبذل وقتها مجهود اننا نعرف نفسنا اولاً

صعوبة وسهولة التغيير مرهونة بمدى تشبث الانسان بافكاره ومعتقداته. الانسان احياناً يعتقد انه اذا كان اكتسب افكار باليه او مغلوطه ان ده مش ذنبه لانه اتربى كده

احنا فى مرحلة النضوج نقدر نكون مسؤليين عن افكارنا والا هنبقى زى اللى كانو بيعبدو الاصنام ورمو اللوم على أبائهم رغم ان جات لهم رسل بالهدايه ومع ذلك اصرو على معتقداتهم

اكيد طبعاً مش كل حد فينا يقدر يغير من الافكار الى كبر واتربى عليها بسهوله لكن على الاقل يقدر يحاول تعديلها اوتصحيح المغلوط منها وده بيتطلب نضج وفهم لشخصيتنا اولاً

معرفتنا القويه لذاتنا بتمهد لتغيير افكارنا وبالتالى تعديل ردود افعالنا وسلوكنا

عشوائية الافكار وتزاحمها قد يكون اهم اسباب الارهاق والتعب

ترتيب الافكار يعنى
-ذهن صافى
-عقل قادر على ادارة الوقت بشكل مناسب
-طرق اسهل لحلول المشاكل

ومن الاساليب الفعاله للتخلص من تشتت العقل تنظيم التنفس وممارسة اى هوايه لانها بتساعد على تنشيط الدماغ خاصةً لحظة الشعور بتلاحم الافكار وتداخلها

اكيد الموضوع فى بدايته مش سهل وبممارسته بشكل تدريجى وفى المشاكل البسيطه ممكن نقدر نطبقه بصوره دائمه على نطاق اوسع
ومننساش ان الافكار السلبيه ونظرتنا ليها بتفرق كتير وبتخلى العقل عاجز انه يفكر بصورة سلسة

جراح السهام والرماح تبرأ سريعاً
اما جراح نصل اللسان فتبقى تنز الماً فى القلب
لماذا لم تتزوج او تتزوجى الى الآن ؟ سؤال ام لكمه
لماذا لم تنجبى الى الآن ؟ سؤال ام طعنه
لماذا لم تغيروا اثاث البيت ؟ حرص عليهم ام هدم صبرهم
لماذا لم تشترو ثياباً جديده ؟ حرص عليهم ام تحريض
الطعنات لها اشكال عديده الاسئله العشوائيه الغير مبرره احد اشكالها

من كتاب رسائل من النبى
ادهم شرقاوى

اذا دققنا قليلاً فى التاريخ نجد ان الخوف هو معول رئيسى وغير ظاهر فى هدم معظم الحضارات والممالك هو المحرض على الغزوات خوفاً من ضياع الهيمنة والسلطه والدافع على الصراعات لفرض النفوذ فإذا كان هذا حال ممالك وحضارات فما بالنا بتأثير الخوف على الفرد وهو الوحيد صاحب كل مايخصه من أفكار وقرارات او اختيارات

الحذر والحرص والاخذ بالاسباب هو احد عوامل الاستمرار فى النجاح وتحقيق الاهداف
والخوف قد يكون هاجس يفسد ماحققناه

نطالع يوميا على مواقع التواصل الاجتماعى كلمات لاتحمل اى صفه من صفاته كالعزله عن الناس والوحده اللتى هى افضل من الاختلاط وغيرها من معانى التباعد والوحده
اكيد فى بعض الاحيان عدم الاختلاط حل افضل لكن ان يكون وضعاً دائماً فلن يكون الانسب

فإلى كل تلك الاصوات اللتى تنادى بالعزله مهلاً يوما ً ما سنفقد التواصل ولن نكتسب المناعه الكافيه لحماية انفسنا من اذى الناس الا بقدر مناسب من الاختلاط وبعض الحرص فى المعامله