22/07/2026
عارفة ليه طفلك بعد ما يقع أول حاجة بيعملها إنه يبص في وشك؟
لأنه قبل ما يقرر إذا كان الموقف مخيف ولا لا بيشوف رد فعلك إنتِ!
لو لقاكي اتوترتي واتخضيتي غالباً توتره هيزيد، ولو لقاكي هادية جسمه هيبدأ يهدى بالتدريج.
ودي مش مجرد ملاحظة، ده مفهوم نفسي معروف اسمه الـ "Co-regulation" أو "التنظيم المشترك". 😌
ببساطة، طفلك في أول سنين عمره لسه بيتعلم ينظم مشاعره، ولحد ما يكتسب المهارة دي محتاج "جهاز تنظيم خارجي" للمشاعر يساعده يرجع للتوازن وقت الانفعالات، الجهاز ده غالباً بيكون إنتِ.
وجودِك الهادي وقت انفعال طفلك بيساعده يفتح البوابة بين مخه العلوي والسفلي، ويوصّل الأجزاء المفصولة ببعضها تاني، بالتالي يبدأ يستعيد قدرته على التفكير والهدوء.
وده مش معناه إنك بتدلعيه، أو بتستسلمي لانفعاله، أو حتى موافقة على سلوكه لو كان خاطئ.
معناه إنك بتحاولي تساعدي جهازه العصبي يعمل حاجة هو لسه مش عارف يعملها لوحده: إنه يهدى عشان يقدر يسمعك ويفهمك بعدين.👌
ولو طفلك متعلمش ينظم مشاعره بطريقة صحية من خلال مساعدتك، للأسف هيفضل معتمد عليكِ في ده، ومهما كان عمره هيفضل يبصلك وياخد منك رد الفعل.
مفهوم الـ Co-regulation من أكتر المفاهيم اللي غيّرت نظرتي للتعامل مع نوبات الغضب، وخلتني أشوفها كفرصة للتعلُم مش مجرد موقف لازم يخلص بسرعة.
عشان كدة في مناقشة كتاب "طفل المخ الكامل" بنقف عندها بالتفصيل، وبنتعلم استراتيجيات أكتر تساعدنا نعدّيها بأقل الخساير.
لو مهتمة تعرفي أكتر عن مناقشة كتاب "طفل المخ الكامل" في نادي القراءة Read & RiseUp، هتلاقي كل التفاصيل في اللينك ده:
https://kidsup.nzmly.com/l/lgpjtSHYfK
