Visual Merchandising Eye

16/06/2026

📌 إيه هو الـ Seersucker؟

▪️الـ Seersucker مش خامة هو طريقة نسج وتصنيع للقماش بتديله شكل مموج أو مكرمش بشكل طبيعي

▪️فرقنا قبل كده بين:

1__الFiber = الخامة الخام

زي القطن (Cotton) والكتان (Linen) والبوليستر (Polyester)

2__الFabric Construction / Weave = طريقة بناء أو نسج القماش

▪️عشان كده ممكن تلاقي الـ Seersucker مصنوع من:

قطن 100%
كتان
بوليستر
أو خامات مخلوطة

▪️يبقى السير ساكر ده هو اسم قماش اتنسج بشكل معين خلاه مموج بشكل طبيعي ممكن يتصنع من آي خامة من اللي ذكرناها فوق

📌 ليه القماش بيكون مموج بالشكل ده؟

الطريقة التقليدية والأشهر هي عن طريق النسج:
أثناء عملية النسج بيتم شد بعض الخيوط أكتر من خيوط تانية.

بيكون الشكل النهائي للقماش بعد التصنيع:

▪️الخيوط المشدودة بتفضل مستقيمة
▪️الخيوط اللي متشدتش بتكش شوية

وده بيخلق مناطق مرفوعة ومناطق هابطة في القماش فتظهر التمويجات المميزة للـ Seersucker زي الصور

فيه كمان طريقة كيميائية حديثة بتستخدم مواد معينة زي الصودا الكاوية علشان تخلي أجزاء من القماش تكش شوية لكن الطريقة التقليدية بالنسيج هي اللي بتدي الشكل الأصلي والمشهور.

📌 إيه مميزات الـ Seersucker؟

1__خفيف جداً على الجسم
2__بيسمح بمرور الهواء بشكل أفضل
3__بيقلل التصاق القماش بالجلد في الحر
4__بيساعد على تبخر العرق والرطوبة بسرعة
5__مش محتاج كوي بشكل مستمر لأن التمويجات جزء من تصميمه الأساسي

من أشهر الأقمشة المستخدمة في الملابس الصيفية

📌 ليه اتسمى Seersucker؟

الاسم أصله جاي من كلمة فارسية قديمة:

ه[ Shir o Shakar ]

ومعناها : لبن وسكر

ودخلت الكلمة بعد كده للإنجليزي عن طريق الهند أيام الاستعمار البريطاني

وده لأن القماش بيجمع بين:

▪️مناطق ناعمة ومتساوية
▪️ومناطق مموجة

فكانوا بيشبهوه بمزيج اللبن والسكر

📌 أشهر استخداماته؟

▪️القمصان الصيفية
▪️البليزرات الصيفية
▪️البدل الصيفية
▪️الشورتات
▪️البناطيل الخفيفة
▪️ملابس الأجازات الصيفية والبحر والسفر

📌 أشهر الـ Styling المرتبط بالـ Seersucker

▪️الPreppy Style
ستايل الجامعات الأمريكية الكلاسيكي

▪️الIvy League Style
الستايل المرتبط بجامعات النخبة الأمريكية

▪️الResort Wear
ستايل الأجازات والمنتجعات

▪️الSmart Casual Summer
الكاجوال الأنيق المناسب لفصل الصيف

📌 أشهر البراندات اللي استخدمت الـ Seersucker بشكل أساسي:

▪️Brooks Brothers
▪️Ralph Lauren
▪️Tommy Hilfiger

06/06/2026

📌 ايه الفرق بين ال

1__الDispaly Area منطقة العرض المُلهِم
2__الSelling Area منطقة البيع
3__الHybrid Area منطقة المزيج

▪️أولاً قبل ما أشرح الفرق بينهم فيه نموذج مهم جداً في التواصل الإعلاني اسمه نموذج AIDA model

يعني ايه نموذج تواصل؟ AIDA

نموذج التواصل AIDA هو :

▪️إطار نظري بيوصف المراحل المتسلسلة التي يفترض إن بيمر بيها العميل من أول ما يتعرض للرسالة التسويقية لحد ما ياخد قرار الشراء

▪️المراحل دي في منها مراحل نفسية وفيه مرحلة سلوكية

▪️يعني في الريتايل بيوصف رحلة العميل من أول ما يعدي من قدام المتجر لحد ما يشترى

▪️ الواقع الحقيقي لسلوك العميل فوضوي ومعقد ومليء بالمشاعر والاستثناءات

▪️النموذج بيجي علشان يبسط الواقع ويحطه في قالب منطقي (خطوات متسلسلة) علشان نعرف ندرسه ونطبقه ونحفظه

طيب....

▪️حروف كلمة AIDA كل حرف فيهم بيعبر عن كلمة وهي :

A = Attention الإنتباه
I = Intrest الإعجاب
D = Desire الرغبة في الإمتلاك
A = Action أخذ القرار

📌 أولاً ال Attention الإنتباه

ببساطة هي المرحلة اللي بيحصل فيها انتباه العميل للمتجر

📌 ثانياً ال Intrest مرحلة الإهتمام

هي المرحلة اللي بيحصل الإهتمام وملاقاة استحسان العميل للشي اللي شايفه

📌 ثالثاً مرحلة Desire إثارة الرغبة

وهي المرحلة اللي بيحصل فيها إثارة الرغبة الداخلية للإمتلاك عند العميل

لحد هنا دي مراحل نفسية بتحصل في عقل العميل

📌 رابعاً مرحلة ال Action أخذ القرار

هي المرحلة اللي بياخد فيها العميل أكشن وهو الشراء

ودي المرحلة السلوكية الوحيدة في النموذج

▪️هي دي المراحل الأربعة اللي بيعدي عليها كل العملاء أول ثلاثة من النموذج مراحل نفسية والمرحلة الأخيرة هي مرحلة سلوكية

▪️اللي صاغ النموذج ده لأول مرة هو رائد الإعلان الأمريكي إلياس سانت إلمو والنموذج ده بيتم العمل بيه لحد انهارده

طيب نيجي بقى للفرق بين:

▪️Display Areas
▪️Selling Areas
▪️Hybrid Areas

▪️كلمة Display Areas معناها مناطق العرض الجذاب ودي توصفيها الدقيق ينطبق على المناطق المخصصة في المتجر للجذب وملاقاة الاستحسان والرغبة في الإمتلاك يعني أول ثلاث مراحل من موديل التواصل

ودي تشمل

1__In Store Manniquens المانيكانات الداخلية
2__Window Display عرض الويندو
3__Focal Points مناطق الجذب المخصصة

▪️أما كلمة Selling Area هي المنطقة اللي بتخدمني في عملية البيع الأماكن اللي معروض فيها البضائع في داخل المتجر والهدف الأساسي منها هو أخذ أكشن الشراء

وبتشمل الأتي:

1__Walls الحوائط بجميع أنواعها
2__Tables الطاولات بجميع أنواعها
3__Racks الراكات بجميع أنواعها

وكل الفيكتشيرز المعروض عليها البضايع بهدف إكمال عملية البيع وبالتالي بتكتمل رحلة العميل النفسية بالشراء حسب نموذج AIDA

📌 Display Areas create Attention, Interst , Desire & Selling Areas convert desire into Sales

يبقى الخلاصة إن مناطق العرض الإلهامي الجذاب تختلف عن منطقة البيع في الوظيفة اللي بتقوم بيها

الأولي هدفها جذب الانتباه وملاقاة الاستحسان وإثارة الرغبة عند العميل

والثانية هدفها تحويل الرغبة اللي اتكونت دي لمبيعات بسهولة

⭕️ علشان كده أفضل عرض هو ال Hybrid Area

▪️كلمة هايبرد معناها مزيج

وهو ان كل منطقة داخلية داخل المتجر تكون بتعمل الوظيفيتين

1__الجذب
2__البيع

وده اللي بتعمله ال Lifestyle Area لأنها بتكون فيها حائط ومانيكانات وطاولة أو طاولات وراكات

لكن السؤال ليك هنا هل في نموذج ال AIDA رحلة العميل كل مرة بيعدي بنفس المراحل دي بالترتيب؟

30/05/2026

📌 أسئلة Visual Merchandising Eye

📌 إيه الفرق بين

1__Selling Area
2__Display Area

20/05/2026

📌 حائط أوتفيتOutfit Wall
📌 من جايد لاين Visual Merchandising Eye

📌 الSegment الشريحة المستهدفة:

▪️بيخاطب Gen Z سنة من 18 _ 27 السن الأكثر شراء في جيل Z
▪️باحثين عن الاختلاف
▪️محبي الألوان
▪️شخصيات مرحة

📌 الwall structure بنية الوال:

⭕️ حائط خمسة براكيت [كابولي] تم تصميم العرض فيه لإستيعاب 24 SKU في شكل هيكل ثلاثي المستويات Third levels

📌 Styling: Street Wear / Funny prints


▪️لوك ترندي متكامل يركز في الأساس على عائلة متكاملة family تستهدف بيها محبي الاختلاف والألوان

▪️لاحظ الكوليكشن جروبينج إن كل قطعة جزء من الفاميلي مفيش قطعة لا تعبر عن الاستايلينج بالبرنتات المرحة

الاستايل مكون من:

▪️denim jackets
▪️hoodies
▪️long sleeves
▪️short-sleeve tee
▪️jeans
▪️sneakers
▪️mobile pack
▪️cap

📌 Details:

▪️عمل توازن في ال layring تلبيس القطع مع بعض والاضافات للقطع بحيث ان تم عمل لاير لقطعة وترك التانية علشان منعاً للعشوائية وال over doing وتزاحم النقاط اللي هينظر ليها العميل لو عملنا كده وده بيزود الحمل المعرفي ويزود جهد أكبر في التركيز ومن ثم إرهاق بصري أسرع

▪️ميزة الإضافة انها بتزود قيمة المنتج اللي متعلق لوحده بتجمله بصرياً في عين العميل وبتزود احتمالية الشراء مع بعض بشكل كبير جداً

▪️الإضافة دي ممكن تكون كاب زي اللي متعلق مع الجينز يكمل الأوتفيت

▪️التيشيرت اللي تحت الجاكيت الدينم عامل دور في تجميل وإظهار الجاكيت وفي نفس الوقت دور لجمال الوال نفسها بتوزيعته كلون في الوال ودور في الكونتراست اللي هيعمله مع الشوز لو حد حب يشتري الجاكيت والجينز ويعمل ماتشينج اللون التيشرت مع الشوز والكاب

📌 الPlanogram:

▪️القطع المهمة كلها في الفيس أوت في ال A placement القطع المعبرة عن الاستايلينج ذات هامش الربح العالي

▪️السايد بار رقم 1 B placement

السايد ده على اليمين عليه أوتفيت يكمل بالجينز اللي جنبه مع الشوز والكاب عليه ثلاث موديلات فقط للحفاظ على المتنفس البصري لسهولة الإدراك البصري والتصنيف ومراعاة عرض كامل المقاسات من كل موديل والمتنفس الحركي على السايد بار علشان العملاء تعرف تتفرج على القطع على السايد متكنش مكربسة ومزنقة على بعض

▪️السايد بار رقم 2 B placement

عليه أوتفيت كامل تيشيرت وسويت شيرت وجينز ويكمل بالشوز والكاب

▪️لاحظ هنا توزيع الجينز في الجزء الشمال من الوال بحيث يكون مع القطع اللي في نصف الوال أما النصف التاني اليمين معاه جينز متعلق فيس أوت

▪️القطع اللي على السايد هي الألوان من نفس الموديلات اللي متعلقة فيس أوت وده مهم في تتبع الموديل كامل لما يكون في مكان محدد مع بعض داخل الوال بحيث لو الموديل اللي في الفيس أوت عجب العميل يبقي ألوانه معاه في نفس الوال ده بيسهل تتبع مبيعات الموديل كامل لأنه بيكون خامة واحدة لكنه برنت ولون مختلف

▪️ال C placement تم عرض فيه ستوك للجينز اللي على السايد بار وستوك للجينز اللي متعلق فيس أوت وشوز تكمل الأوتفيت

▪️ آي قطعة هتشوفها في الوال تقدر تلبسها مع آي قطعة تانية ويمكن استخراج أكثر من 20 أوتفيت وطريقة ارتداء مختلفة لكل القطع مع بعض

▪️ارتفاع الفيس أوت تم وضع الفرونتال على ارتفاع يراعي متوسط أطوال الفئة المستهدفة اللي لا يتعدي طول الشخص مع رفع ذراعه عن 2,30 اتنين متر وثلاثين

▪️عرض الفيس أوت عليه موديل واحد فقط بمقاساته من غير ما يكون فيه موديلات مستخبية وراه

▪️تم عرض القطع من Xs _ 2xl مقاسات كاملة مترتبة من الصغير للكبير على السايد بار الكبير من اليمين للصغير للشمال
▪️ تم توجيه وجه الشوز لإتجاه دخول العملاء
▪️تم ترتيب الشماعات عكس عقارب الساعة
▪️تم عرض جميع مقاسات الشوز 45 _ 40
▪️تم وضع ترتيب مقاسات الجينز من الصغير للكبير بجميع المقاسات من 28 _ 40
▪️تطبيق ستوك قطع الجينز مفتوح السوستة مع فتح الأزرار لتسهيل التجربة وعمل مظهر جذاب وإظهار تفاصيل اللوجو الداخلية للجينز والفينش الداخلي

📌 الBrand Positioning التموضع للبراند:

▪️فValue for money القيمة مقابل السعر

▪️ طريقة العرض دي للبراند بتثب الصورة الذهنية المستهدفة وهي موضة عصرية شبابية تأخذ قيمة مقابل السعر المرتفع قليلاً

📌 الColors الألوان:

▪️ استخدام أربعة ألوان

▪️ألوان محايدة : الأبيض
▪️ألوان باردة : الزيتي _ الدنيم
▪️ألوان حارة : بينك ماجينتا

▪️تم توزيع الألوان بالتساوي لإحداث ملائة بصرية للألوان في الحائط

📌 الMarketing Materials خامات الترويج:

▪️استخدام بوستر فيه يد ممسكة بكاميرا يعكس نمط حياة الشباب السريع المحب للصور وأخذ الذكريات مع المرح

▪️البوسترات التانية استخدمت فقط كلون مكمل لألوان الوال وعمل نقطة جذب بيه

📌 الUnity الوحدة:

▪️وحدة نوعية الشماعات وخامتها
▪️وحدة إتجاه الشماعات
▪️وحدة الأعداد
▪️وحدة الرسالة
▪️وحدة الشريحة المستهدفة
▪️وحدة الصور المستخدمة واتساقها مع الكوليكشن
▪️وحدة الصورة الذهنية المراد تثبيتها

كل ده أدى إلى اكتمال مبدأ الوحدة الجمالي وفعالية وحدة العرض في تسهيل البيع

📌 الContrast التباين:

▪️ التباين واضح في كامل الحائط بوجود تباين في الألوان والخامات مع بعض في جميع مواضع العرض
▪️التباين في الفيس أوت ظاهر بتوزيع الألوان الصحيح
▪️تباين الخامات بين دينم وقطن على السايد بار

📌 الBalance التوازن:

▪️ فيه توازن غير متماثل في بنية الحائط Asymmetrical Balance

▪️براكيت واحد زي خمسة
▪️براكيت اتنين معكوس براكيت أربعة
▪️براكيت 3 فاصل

▪️توازن في عدد القطع المعروضة ب Volume متساوي كل موديل قد الثاني في العدد حسب فئته

▪️التوازن في توزيع الألوان على كل براكيت فوق وتحت بشكل زجزاح والتوازن في توزيع الفئات

📌 الSpace الفراغ:

▪️تم مراعاة المتنفس البصري داخل الوال ومنع العشوائية وتلزيق الموديلات فوق بعض والالتزام بالأعداد

▪️كذلك مراعاة مسافة بين الفيس أوت والقطع اللي تحته بدون لمس

▪️كذلك مراعاة المتنفس البصري بين القطع على الشيلفات

▪️عرض ثلاث موديلات فقط على السايد بار يخلي فيه
المتنفس البصري لسهولة الإدراك البصري والتصنيف

▪️ عرض ثلاث موديلات فقط على السايد يخلي في متنفس حركي علشان العملاء تعرف تتفرج على القطع على السايد متكنش مكربسة ومزنقة على بعض

📌 الFloor plan تخطيط أرضية المتجر:

▪️ مكان الحائط في تخطيط أرضية المتجر بيكون في ال hot zone في الانترانس علشان الألوان الجاذبة وعلشان المتجر بنقسمه

من الألوان الجاذبة والسن الصغير في الأول

إلى السن الأكبر والألوان المحايدة للداخل وهكذا

📌 الLighting الإضاءة:

▪️الإضاءة البيضاء الباردة هي المناسبة مع الكوليكشن واللاين وفكرته ب تسليط ضوء كشاف الإضاءة بدرجة 45 درجة وتبعد متر على الأقل عن القطع علشان الإضاءة متأثرش على ألوان القطع

▪️مع كل براكيت كشاف إضاءة

📌 ال KPI مؤشرات الأداء

▪️عرض الأوتفيت بالشكل الصحيح هيزود من:

1__الATV: متوسط قيمة الفاتورة
2__الUPT: متوسط عدد القطع المباعة في كل فاتورة
3__الASP: التركيز على القطع ذات هامش الربح العالي واللي سعرها عالي في نفس الوقت يزود متوسط سعر القطعة المباعة

15/05/2026

📌 Polka dot's trend pattern

08/05/2026

📌 بتعرض جاكيت بـ 10,000 جنيه على مانيكان إيده مكسورة وبعد كده تستغرب !!

▪️ليه انجذاب العملاء بيقل؟
▪️ليه العميل مش مقتنع بالسعر؟
▪️ليه فيه شك في الجودة؟

الموضوع مش في الجاكيت نفسه ولا قيمته، الموضوع في الإشارات والسياق الكامل اللي اتبنى في ذهن العميل قبل ما يفكر يشتري.

وده يخلينا نفهم انحياز إدراكي مهم في علم نفس المستهلك اسمه:

⭕️ Horn Effect تأثير الهورن
أو
⭕️ Negative Halo Effect تأثير الهالة العكسي

وهو انحياز إدراكي بيخلي العميل لما يشوف تفصيلة سلبية واحدة يعمّم الإحساس السلبي ده على التجربة بالكامل

لازم تعرف إن العقل البشري مش بيحلل كل عنصر بشكل منفصل لكنه بيستخدم اختصارات ذهنية (Heuristics)
علشان يكوّن حكم سريع على الحاجة اللي قدامه

علشان كده

تفصيلة سلبية واحدة ممكن تخلي العميل يسحب تقييم التجربة بالكامل لتحت في ذهنه

يعني:

مانيكان مكسور = إحساس بالإهمال

والإحساس ده ما بيقفش عند المانيكان فقط لكنه يمتد تلقائيًا إلى:

▪️تقييم المنتج
▪️إدراك الجودة
▪️تبرير السعر
▪️الثقة في البراند

وده لأن العميل ما بيقيّمش المنتج بمعزل عن بيئته
لكن من خلال الإشارات السياقية المحيطة به
(Contextual Cues)

يعني البيئة المحيطة بالمنتج هي جزء من القيمة المدركة للسعر ولما تكون فيه إشارات بتدي رسائل عكسية ده بيصعّب عملية البيع ويضرب في الـ Consistency أو الاتساق بين الصورة الذهنية للمنتج والبيئة المحيطة بيه

📌 والنتيجة في ذهن العميل:

1__قيمة مدركة أقل للمنتج
2__سعر يبدو غير مبرر
3__تراجع في صورة البراند
4__اهتزاز الثقة في الوعود التسويقية

والأخطر من كده

لو المشهد ده موجود في الـ Window Display
فالعميل ممكن ما يدخلش المتجر من الأساس
لأن الانطباع السلبي اتكوّن قبل بداية التجربة الشرائية

وده تحديدًا هو تأثير الـ Horn Effect.

01/05/2026

📌 ايه الفرق بين :

1__Up Selling
2__Cross Selling
3__Down Selling

📌 إيه دورك كVM؟
📌 ليه أساليب (تكنيكات) البيع دي مهمة وبتأثر على ايه؟

📌 أولاً ال Up Selling

▪️كلمة أب سيلينج معناها رفع قرار الشراء للعميل
▪️هو إنك ترفع اختيار العميل لنفس الفئة لكن بمستوى أعلى في السعر والقيمة

يعني ايه الكلام ده ؟

⭕️ مثال:

عميل اشترى جاكيت ب 2000 جنية انت أقنعته بجاكيت أفضل في الخامة والقصة وسعره 3000 جنية انت كده عملت Up Selling

انت هنا حسنت اختيار العميل من نفس الفئة لحاجة أعلى في السعر وأفضل للعميل كقيمة سواء كانت خامة أو قصة أو غيره

⭕️ دورك ك VM

إن حسب البلانوجرام الصحيح ف القطع اللي سعرها عالي بتعرضها في ال A placement

📌 ثانياً ال Cross Selling

▪️كلمة كروس سيلينج معناها البيع التكميلي
▪️هو انك تضيف قطعة او قطع مُكملة للقطعة اللي اشتراها العميل


⭕️ مثال:

عميل اشترى بنطلون جينز انت عرضت عليه تيشيرت وجاكيت وشوز عليه والعميل اشتراهم او اشترى قطعة منهم مع البنطلون

العميل اقتنع لانك اديتله قطع بتتماشى مع القطعة اللي اشتراها وظيفياً يعني كملتله الأوتفيت اللي رايح بيه المناسبة زي اول يوم الجامعة مثلا، مبيعتلهوش بشكل عشوائي

انت كده عملت Cross Selling

⭕️ دورك كVM

لتسهيل ال Cross Selling

ال Vm بيشتغل بال Cross Merchandising العرض التكميلي علشان تسهل الاختيار على العملاء وعلى السايلز في مساعدة العملاء

وده بيظهر في انك تشتغل على بناء الأتفيت في المتجر
وطريقة الكومبينيشن

📌 ثالثاً ال Down Selling

▪️كلمة داون سيلينج معناها الهبوط بالبيعة
▪️هي إنك تنزل باختيار العميل علشان تحافظ على البيعة لأن العميل ممكن يكون :

مش مقتنع بالاختيار اللي عندك
أو القطعة سعرها عالي بالنسبة لامكانياته
أو عندكم موديلات كتيرة وتاه وسطهم

هنا بتنزل بالبيعة علشان تقلل من مقاومة الشراء وتزود فرصة إغلاق البيعة لما العميل يرفض السعر أو القيمة اللي متقدماله مقابل السعر

⭕️ مثال:

عميل عجبه بدلة سعرها عشرة ألاف جنية والسعر أعلى من البادجت اللي حاططها لبدلة تقدر تنزل لبدلة قريبة منها أقل سعراً لضمان البيعة انها متطيرش

دي محتاجة حرفية شديدة علشان بيكون صعب تبيع الأقل جودة بعد الأفضل جودة

بيكون مهم الحفاظ على قيمة اللي بتبيعه في نظر العميل ميحسش فرق كبير بين الاختيارين

⭕️ دورك ك VM

العرض وفقاً لل price ladder

هي طريقة تعتمد على عرض الموديلات المتشابهة مع بعض بأسعار مختلفة وبتكون أفضل مع الموديلات اللي ربحها مرتفع زي البدل

بحيث ان العميل مثلا لو جاي الفرع محتاج بدلة كحلي

يجي يلاقي البدلة الكحلي الصوف الإيطالي ال Premium price

والصوف المحلي ال Medium price

والبدلة البوليستر ال Low price

▪️الPremium price سعر عالي
▪️الAverage price سعر متوسط
▪️الLow price سعر منخفض

والطريقة دي هفصل فيها بعدين أكتر

📌 ليه بُتستخدم أساليب البيع دي وبتأثر على ايه؟

كل تكنيك من دول بيأثر مباشرة على أرقام المتجر حيث أن :

▪️الUp Selling = بيزود قيمة القطعة المُباعة

وده بيأثر على ال (ASP) متوسط سعر البيع

▪️الCross Selling = بيزود عدد القطع المباعة

وده بيأثر على (UPT) متوسط القطع في الفاتورة

▪️الDown Selling = يحافظ على البيع لكل العملاء اللي دخلوا

وده بيأثر على (CR) معدل التحويل

⭕️ طيب السؤال اللي كان بعده أثاره يوسف في الكومنتات تفتكر لو العميل اشترى تيشيرت والسايلز باعله تيشترت تاني كده ده يسمى ايه؟

23/04/2026

📌 أسئلة visual merchandising eye

ايه الفرق بين:

1__Up Selling
2__Cross Selling
3__Down Selling

10/04/2026

📌 ADT

📌 إيه هو ال average dwell time؟
📌 إيه أهميته؟
📌 إزاي بيتحسب؟
📌 إيه تأثير العرض الداخلي والخارجي عليه؟

__ال average dwell time معناها متوسط مدة بقاء العميل في المتجر

__هو مؤشر مهم بيعكس نجاح أو فشل العرض الداخلي
للمتجر وبيعكس مدى راحة البيئة الداخلية للمتجر ككل

__المؤشر ده مهم لأنه بيعكس مدى تمرس الVM في عمل الfloor plan تخطيط أرضية المتجر

__كل ما العميل زاد بقاءه داخل المتجر كل ما ده زاد من احتمالات الشراء وكل ما كان ده مؤشر على خدمة العملاء الجيدة ومحاولات البيع الاحترافية لكل عميل

📌 إزاي بيتحسب؟

__دخلك 30 عميل كل واحد منهم قعد في المتجر مدة مختلفة تجمع كل الدقايق المختلفة دي وتقسمها على عدد العملاء زي المعادلة:

متوسط بقاء العميل = عدد دقائق كل العملاء / عدد العملاء

لو افترضنا إن عدد دقائق كل العملاء هو 600 دقيقة

يبقى متوسط بقاء العميل = 600 / 30 = 20 دقيقة لكل عميل

⭕️ ده كده متوسط ممتاز لأن ال benchmark اللي بيتقاس عليها عالمياً في ال fahsion retail هي المتوسط هو من 10 _ 15 دقيقة

⭕️ هنا بقى تقارن الرقم اللي طلعلك بالرقم اللي فات هل فيه تحسن في الرقم ده والناس بتقعد أكتر بعد العرض الجديد وبعد التدريب للسايلز أو لأ وتقيم وتحسن وهكذا

⭕️ لازم تعرف إن معدل بقاء عميل مرتفع لوحده مش مؤشر جيد لازم يكون المعدل ده معاه معدل تحويل conversion rate عالي علشان نقول إنه مفيد وإيجابي

📌 ؟إزاي تصميم الممرات بيأثر على مدة بقاء العملاء

__تصميم الممرات داخل المتجر أو خارجه سواء كانت واسعة أو ضيقة هو اللي بيحدد سرعة حركة العميل لا إرادياً

__الممر الضيق بيدفع العميل للتحرك بسرعة بيخلي العميل عايز يطلع من المكان اللي حاسس انه قفل عليه ال حريته علشان كده بيكون avergae dwell time في المتاجر اللي الممرات فيها ضيقة بيكون أقل بكتير من المتاجر اللي فيها الممرات واسعة والعميل واخد حريته

__وبالتالي ممر ضيق = وقت للعملاء أقل = تعرض للبضايع أقل = احتمالات شراء أقل = بيع أقل

لكن المساحات المفتوحة بتشجع العملاء على التوقف والتأمل وبالتالي المعادلة بتكون عكسية
ممر واسع = وقت للعملاء أعلى = تعرض أعلى للبضايع = احتمالات شراء أعلى = بيع أعلى

📌 لو المتجر نفسه موجود في ممر ضيق في المول ده هيأثر على توقف العملاء عنده من الأساس وبعض المولات بيكون فيها كيوسكات قريبة جداً من مداخل بعض المتاجر وده بيأثر على انتباه العملاء للمتجر وملاحظتهم ليه خصوصاً لو اللي موجود بيبع عطور وبيجذب انتباه العملاء بالتجريب وهكذا