MR Hossam Abo Daif

"‏﴿فَلَا تَظْلِمُوا فِيهِنَّ أَنْفُسَكُمْ﴾.. 🌙
الظلم مش بس ذنوب، الظلم إنك تحرم نفسك من حلم تعبت عشانه. خليك هادي، رتب ورؤق، واستعین بالله في كل خطوة.. اللي جاي محتاج نفس طويل وقلب واثق."
#ثانويةعامة #كيمياء

"بفضل الله ومنّته، انتهينا اليوم من شرح آخر محاضرات المنهج .. اللهم إن كنت قد وفقتُ في إيصال العلم وتيسيره، فاجعل عملي هذا صالحاً لوجهك الكريم، وشفيعاً لي يوم ألقاك. وما كان من توفيق فمن الله وحده، وما كان من خطأ أو تقصير أو نسيان فمني ومن الشيطان، والله ورسوله منه براء. استودعتُ الله عقول طلابي وما بذلته معهم♥️♥️."

في أيام هتحس إنك مش قادر… وإنك تايه… وإن مفيش فايدة.
بس الحقيقة إن اللحظات دي هي اللي بتفرق بين اللي بيكمل واللي بيقف.
إوعى تربط قيمتك بدرجاتك…
بس برضه إوعى تسيب نفسك من غير ما تحاول.
ذاكر حتى لو:
مش عندك مزاج
تعبان
مش فاهم
لأن الانضباط أهم من الحماس… الحماس بييجي ويروح، لكن اللي بيكمل هو اللي بينجح.
`افتكر دايمًا: “مش لازم أكون أسرع واحد… بس لازم أكون واحد مبيوقفش.”`
وكل ما تكسل قول: “أنا لو مكملتش النهارده… بكرة هبقى ندمان.”

📢 تنويه بخصوص حصة بكرة.. بنتعامل مع الواقع بمرونة 🌧️💻
شباب، عشان نكون على نور ونستغل وقتنا صح من غير تشتيت، ده النظام اللي هنمشي عليه بكرة بخصوص الحصة:
السيناريو الأول (استقرار الجو): لو الأمور تمام، ميعادنا في السنتر زي ما هو في نفس المواعيد المحددة.. مفيش أي تغيير.
السيناريو الثاني (لو الجو مطر أو غير مستقر): سلامتنا وتركيزنا أهم، وفي الحالة دي الحصة هتتحول Online (بث مباشر) في نهاية اليوم، عشان الكل يكون في بيته ومركز بعيداً عن زحمة الشوارع.

تنويه هام يا شباب.. "تأجيل تكتيكي" لزوم العظمة! 🚀

يا دكاترة ويا باشمهندسين المستقبل، ركزوا معايا في الكلمتين دول عشان مصلحتكم هي اللي بتمشينا في الآخر:
إحنا قررنا تأجيل الامتحان الشامل لما بعد عيد الفطر المبارك.. ليه بقى؟ 🤔
1️⃣ عشان "نظبط الأداء": المجموعات كانت ماشية بسرعات مختلفة، وإحنا عاوزين الكل يدخل الامتحان وهو واقف على أرض صلبة ومخلص كل فتفوتة في المنهج.
2️⃣ مراجعة من "كوكب تاني": الوقت ده هنستغله في إننا ننزلكم مراجعة قوية وشاملة لمحتوى امتحان الشهر، مراجعة هتخليك داخل امتحانك وأنت حاطط رجل على رجل من غير ما تفكر تغش من حد يا غشاش انت 😂😂 😎
3️⃣ بروفة : الامتحان الشامل بتاعنا هيكون هو "البروفة النهائية" الحقيقية قبل امتحان الشهر في المدرسة، يعني هتغلط عندي هنا وتتعلم، عشان تروح هناك تقفل الدرجة النهائية وأنت مغمض.
الخلاصة: استمتعوا بالعيد، واشحنوا طاقتكم، واستعدوا للي جاي عشان اللي جاي تقيل ومحتاج تركيز! 💪
كل سنة وأنتم طيبين، وعيد سعيد عليكم وعلى بيوتكم جميعاً. ❤️
والصورة دي لفت انتباه مش اكتر 😂 😂 ✌️

#القائد


#تحفيز

عارف أيه أكبر جريمة ممكن يرتكبها مدرس في حق طالب ؟ .. يقدمله كل حاجة.

إزاي ؟ مش المفروض ان ده أجمد مدرس ؟

بص ياخال .. تقدر تقولي أيه هو الدافع في التعلُم ؟
الدافع هو التحدي اللي بيؤدي للفضول .. الطالب عشان يندفع للتعلُم لازم يواجه مشكلة تحطه في تحدي .. يحاول يحل المشكلة والفضول ياخده ناحية كل الجوانب .. يحاول يدور ويتعلم أكتر (يفرُك بالمعنى الدارج).

طول ما هو بيفرك كده عمال بيتعلم حاجات جديدة .. ممكن تكون مش كلها هتساعده في حل المشكلة الحالية ولكن بتزود مخزون المهارات عنده وبتمرن دماغه على استقبال المعلومات وتخزينها لوقت الحاجة .. حتى لو بعد البحث ده كله موصلش .. هيكون كله فضول وعطش يمسك الحل.

هنا بقى ييجي دور المدرس .. يشاورله على الطريقة الصح .. لما المعلومة تجيله بعد فضول وعطش .. حتوماً هيلتهمها ويهضمها بكل ما أوتي من عقل.

أما لما المدرس بيقدم كل حاجة ع الجاهز .. بيقتل روح التحدي والفضول عند الطالب .. بمعنى الأصح الطالب دخل اللعبة لقى حلول كل الألغاز والتحديات .. فين المتعة ؟ .. هيلعب ليه ؟