Mr\Abdullah Awed

25/08/2026

اي كمية الغل والحقد دي ...
قناتنا على التليجرام الأولى طلعت ل ١٠٠٠ وشوية وشوية ناس بغل عملوا ريبورتات قفلوها ومعرفش السبب نزلت قناة السنه دي وبفيد بيها طلبة وعمري ما نزلت عليها دعايه ولا نيله كلها لوجه الله شرح وحل وامتحانات واي حاجه الطالب عايزها ومذاكرتي حتى لما الحرامية بيسرقوا شغلي بقولها صريحه مش مسامح اي حد هياخد شغلي وينسبه لنفسه

بس الغل يوصل بيكم انكم تسرقوا حسابي على التليجرام وتغيروا كل حاجه علشان معرفش ارجعه استفدتوا اي

طيب انتوا عايزين توصلوا لي اي علشان انا قربت اجيب اخري

مش مسامح اي حد قال عليا كلمه وحشه
مش مسامح اي حد اذاني أو حاول ياذيني
مش مسامح اي حد خاض في عرضي وشغلي وحياتي
منكم لله فوق بقى أعلى واعلم بكل شئ

25/08/2026

📢 تنويه هام لطلاب الصف الأول والثاني الثانوي

أولًا: الصف الأول الثانوي
بعد نزول منهج العلوم للصف الأول الثانوي وتقسيمه إلى وحدات تشمل أكثر من تخصص، ومع كامل تقديرنا واحترامنا لإخواتنا المدرسين الذين يقدمون المادة كاملة قررنا أن يكون تركيزنا على الجزء الخاص بتخصصنا (الفيزياء فقط)
📚 المنهج الخاص بنا يتكون من 8 دروس خلال الترم، وسيتم تقسيمها على مدار الترم بحيث تكون
• حصة واحدة أسبوعيا
• مدة الحصة من ساعة ونصف إلى ساعتين
• المصروفات 100 جنيه فقط شهريا
والأفضل للطالب أن يدرس كل جزء مع مدرس متخصص فيه لأن منهج العلوم وخاصة جزء الفيزياء يُعد تأسيسا مهما جدا ويحتوي على أجزاء كثيرة من منهج فيزياء أولى ثانوي بالنظام القديم

وبالتالي، لو اخترت مسارا مرتبطا بالفيزياء في السنة القادمة تكون قد حصلت على أساس قوي في المادة من البداية.💙

---
ثانيًا: الصف الثاني الثانوي – البكالوريا

بعد نزول منهج الفيزياء الخاص بالبكالوريا، تبدأ الدراسة بإذن الله يوم الثلاثاء 1 سبتمبر.
📌 بالنسبة للطلاب الذين حجزوا بالفعل:
الالتزام بموعد المجموعة التي تم الحجز فيها، مع التأكيد أن الطالب الذي حجز في مجموعة واحدة يلتزم بها.
📌 المجموعة المتاحة للحجز الجديد حاليا
الأحد والأربعاء – الساعة 3 مساءً
وقد يتم نقل بعض الطلاب بين المجموعات في حالة وجود ظروف أو مشكلات تتعلق بالمواعيد
📚 وبالنسبة للكتاب الخارجي، سنعمل على كتاب لم نعلن عنه حتى الآن، وننتظر صدور الكتب الخارجية لنختار أفضل كتاب مناسب للعمل مع المنهج بإذن الله.
⚡ نظام الدراسة:
• 3 حصص أسبوعيا
• بإجمالي 12 حصة شهريا
• مجموعة واحدة فقط متاحة حاليا للطلاب الجدد

للحجز والتواصل على رقم السنتر 010 32410792

نسأل الله أن يوفق أبناءنا وبناتنا ونبدأ معا سنة جديدة بتأسيس قوي وشغل منظم من أول يوم. ❤️

مستر عبدالله عوض _ مدرس الفيزياء 🦅⚡

20/08/2026

السلام عليكم....
إن شاء الله انهاردة الخميس 20 / 8
هينزل لك فيديو شرح الدرس الأول الساعه 7 م على اليوتيوب
وده اللينك بتاعه طبعا مش هيظهر لك الفيديو غير الساعه 7 م
https://youtu.be/lVTskzMCPjM
والساعه 9 م هينزل لك فيديو حل واجب الدرس الأول
وده اللينك بتاعه برضه
https://youtu.be/BA8mCsNUID0
ويوم الجمعه Form الحل الجماعي هيكون 20 سؤال 15 اختياري و 5 مقالي
طبعا كل مجاميع السنتر هتحله طيب لو انت مش معانا في السنتر هتدخل تمتحن باسمك وهنكتب كود عــــــام لاي طالب مش معاه كود بس علشان يتصحح وينزل لنا درجاتك على السيستم عندنا

ربنا يوفقكم ودايما انا في ضهركم من اول يوم لحد باب الامتحان باذن الله
التليجرام ده علشان غيرك يستفاد
صفحتنا على الفيس بوك:-👇👇
https://www.facebook.com/share/1CqJFRoXix/
قناتنا على اليوتيوب:-👇👇
https://youtube.com/?feature=shared
قناتنا على التليجرام:-👇👇
https://t.me/+_xfcybgZD-A2MWRk
نتشرف بمتابعتكم ليصلكم كل جديد❤️❤️

🔥 الدرس الأول في الفصل الأول | التيار الكهربي وقانون أوم⚡لو لسه بت...

20/08/2026

هام 👇👇
🚨 المنهج نزل امبارح… فإزاي بدأت تشرحه النهارده؟! 🤦🏻‍♂️

مستعجب جدًا من الناس اللي منهج البكالوريا نزل امبارح، وهما شغالين فيه من النهارده! 😂
والأغرب من كده اللي أصلا كانوا شغالين أي منهج وطالعين يقولولك: «إحنا كنا صح»… صح في إيه بالظبط؟! 😂

حقيقي والله كمية العبث اللي حصلت في الشهر ده لا تعد ولا تحصى

أما قراري الشخصي 👇🏻
أنا قدامي لسه 10 أيام لغاية بداية شهر 9، وهبدأ المنهج من شهر 9 بإذن الله.
والـ10 أيام دول مش هقعد فيهم أحضر درس وأطلع أشرحه وخلاص…
هبدأ أبص على المنهج كامل للترم الأول، أشوف:
- إيه الموضوعات اللي بينها ترابط؟
- إيه السهل وإيه الصعب؟
- إيه اللي محتاج وقت أكتر؟
- وإزاي أرتب المنهج بحيث الطالب يفهم الصورة كاملة؟

هدفي إن المنهج كله يكون في دماغي قبل ما أبدأ أشرحه
لأن إن المنهج ينزل بكرة، وأشتغل فيه النهارده، وأقولك: «أنا بحضر الدرس بدرسه»…
ده مش شغل منظم، ده عبث تعليمي. ❤️

وأنا مش هدفي أكون أول واحد بدأ المنهج…
هدفي أكون من الناس اللي عارفة هي بتعمل إيه، وبتوصل الطالب لفين. 🦅❤️

وبإذن الله أول مجموعة اتقفلت لاكتمال العدد، وهنحدد معاد ونفتح الحجز فيها مرة تانية للي حابب ينضم لينا.
للحجز ابعت على رقم السنتر 010 32410792
بالتوفيق يا أبطال ❤️🦅
والسنة دي بإذن الله مختلفة.

#فيزياء #تعليم

19/08/2026

جزء من حصة الواجب اللي هتنزل مع حصة الشرح بكره ع جروب التليجرام...
وعندنا نظامنا مبنى على 3 نقاط...
١. شرح الدرس بكل نقطة فيه ومش بنسيب حاجه انت هتستخدمها في الحل.
٢. بنحل واجب فيه اسئله سهله ومتوسطة ده انت اللي بتحلهم بايدك علشان تتأكد انك ذاكرت واي نقاط ضعفك محتاج تدوس على اي او كده
٣. بنحل أفكار ومسائل مستويات عليا واسترشادي وسنوات سابقة من المذكرة التانية وبنخلص الجزيئات ع هيئة افكار بعنوان افتكر معايا هتلاقيها برضه في المذكره...
متنساش لو مش منضم معانا على التليجرام انضم..
https://t.me/+_xfcybgZD-A2MWRk
بالتوفيق يا حبايب❤️❤️

18/08/2026

من غير رووت 😂🔥
انهاردة حابب أوريكم جزء من حياتي، وهستغلها فرصة وأقولكم إزاي عديت أول مرحلة صعبة في مجال التدريس… ومن غير رووت 😂 أو بطريقة مش حلال يعني 😂

ركز بقى يعم معايا…
أولا أنا أخوكم مستر عبدالله عوض – مدرس فيزياء.
مبقاليش كتير في مجال التدريس… 3 سنين فقط
تاني حاجة أنا مش عارف أبدأها منين بس أول حاجة لازم أقولها
الحمد لله على كل نعمة في حياتي وعلى كل حاجة ربنا بيعملها معايا لمجد اسمه❤️
أخي المستر اللي لسه جديد زيي…
أنا جاي أقولك أنا عملت إيه في أول فترة في حياتي وهبدأ معاك من أول سنة ليا في المجال
في أول سنة ربنا سمح إن بعض مدرسين الفيزياء الأقدم مني يساعدوني (((وأغلبهم كانوا مش من بنها))) علشان نحط النقط على الحروف 😂، ومدوني مذكرات شرح وبنوك أسئلة ومراجع دولية وبدات اذاكر منها وافهم اكتر في الماده بجانب الكلية واللي بدرسه وده شيء أنا بشكرهم عليه جدا
المهم…
بدأت من أول سنة أعمل مذكراتي بنفسي وكنت شغال من الكتب الخارجية والمصادر المختلفة وبدأت فعليا أستخدم مذكرة ليا في مراجعة آخر السنة لتانية ثانوي ونفس الكلام كان لتالتة ثانوي
وللعلم…
(((والحمد لله مجاليش ولا واحد من قرايبي علشان أقول إنهم هما اللي دعموني أو سندوني أو جابولي طلبة)))
ولا الحمد لله كلمت مدرس وقلتله:
"زقني زقة يا مستر" 😂
ولا الكلام التعبان ده.
طب عايز أوصلك ليه؟
اشتغل على نفسك.
اعمل حاجة تخليك مختلف عن اللي حواليك.
أنا من أول سنة، وكل سنة لحد النهاردة، بسأل نفسي نفس السؤال
"الطالب ناقصه إيه علشان يحب الفيزياء؟"
أو
"أنا كعبدالله، لما كنت مكانه… كان ناقصني إيه علشان أفهم الفيزياء؟"
وبشتغل على النقطة دي
مش كل شغلي إني أشرح المنهج وخلاص…
أنا عايز الطالب يدخل عندي وهو مش فاهم ويخرج وهو حاسس إن الفيزياء بقت حاجة يقدر يفهمها ويحلها
والحمد لله من أول سنة وربنا كرمني
والحمد لله السنة دي مع إن معنديش مئات الطلبة لكن كان حوالي 80% من الطلاب اللي عندي جايبين فوق الـ50 من 60.
ودي مش فهلوة مني، ولا شطارة خارقة…
دي أولا نعمة وتوفيق من ربنا وبعد كده تعب مني ومن طلابي
لأنهم صدقوا كلامي…
وعملوا اللي كنت بقولهم عليه…
وتعبوا معايا زي ما أنا تعبت معاهم
وهنا بقى وصلت لأهم حاجة اتعلمتها في الـ3 سنين دول
مفيش مدرس جامد من غير طالب مؤمن بيه… ومفيش طالب هيصدقك إلا لما يشوف إنك فعلا بتتعب عشانه
أنا مش بقولك إني وصلت…
أنا لسه في أول الطريق
ولسه عندي حاجات كتير نفسي أعملها وأفكار كتير نفسي أنفذها ومستوى نفسي أوصله
بس الفرق إني كل سنة ببص على عبدالله بتاع السنة اللي فاتت وأقول
"لا… إحنا لازم نبقى أحسن من كده."

لو أنت مستر لسه جديد، متبصش لحد عنده 10 أو 15 سنة خبرة وتقول
"أنا مستحيل أوصل."
يا اخي في الله…
هو بدأ من الصفر برضه.
متستناش حد يديك مكانك
ومتستناش الطلبة تيجي لوحدها
ومتستناش اسمك يكبر قبل ما تكبر أنت
كبر نفسك الأول… والاسم هيكبر وراك
اعمل مذكرة أحسن
اعمل شرح أحسن
اتعب على طلابك
اسمع مشاكلهم
افهم هم محتاجين إيه
طور نفسك كل يوم
وخلي عندك حاجة لما الطالب يروح لمدرس تاني يقول
"لا… أنا عايز عبدالله."
ساعتها بس تعرف إنك بنيت حاجة حقيقية
وأنا لسه ببني…
ولسه مكمل…
ولسه عندي طموح أكبر بكتير من اللي وصلتله
واللي جاي بإذن ربنا… أقوى بكتير. 🦅🔥
(((الصوره اللي في البوست التقطها انهارده بعد تصوير 6 ساعات متواصلة تخللهم راحة لمدة ٢٠ دقيقة فقط)))
لو أنت مش مشترك معانا على جروب التليجرام فايتك كتير وهيفوتك اكتر
https://t.me/+_xfcybgZD-A2MWRk
ادخل نورنا من غير رسوم😂😂😂

18/08/2026

🦅 جروب النسر | على التليجرام
الجروب ده فتحناه السنة اللي فاتت وكنا بنزل عليه فيديوهات خاصة بالسنتر ولكن السنة دي قررنا نخليه لكل الناس وتكون حاجه حلوه احنا بنعملها او صدقة او مساعدة ولو بسيطه مع كل الطلاب "الصف الثالث الثانوي" فيزياء...
بإذن الله هينزل عليه ابتداءً من يوم الخميس القادم 20 أغسطس
اول حصه للدرس الاول شرح + حل اسئله نفس اللي بيحصل في السنتر بالظبط
هتخلص الحصه يوم الجمعه بإذن الله هتلاقي في الجروب برضه بعض الاسئله كا كويز تدربك نفسك
ان شاء الله هنزل المحاضرات باستمرار يوم الاتنين والخميس بعد الساعه 8 م
سواء انت معانا في السنتر او لا تقدر تدخل وتسأل وتذاكر معانا بدون مقابل ...
ما عليك غير الانضمام وتشير الجروب لينتفع به اخرين❤️
📲 انضم لجروب النسر الآن
وامسح الـQR Code الموجود في البوستر للدخول مباشرة
او من خلال اللينك 👇
https://t.me/+_xfcybgZD-A2MWRk

12/08/2026

توضيح بسيط بخصوص العلوم المتكاملة بقالنا سنتين في الموضوع بتاعها ولسه محدش فاهم لها
فا انا لسه على مبدأي مش هشتغل اولى ثانوي غير لما تكون وحدات منفصله وبعض المؤشرات واغلب المدرسين الكبار المتخصصين ملناش دعوه باللي بيهروا قالوا ان الماده هتبقى 3 وحدات لل 3 فروع كيمياء ..فيزياء..احياء
وعلى هذا الأساس قلبنا حجوزات بالبيانات فقط بناء على طلب طلاب اخواتهم كانوا عندنا السنة اللي فاتت....
ولكن اعتذر بشدة لو المنهج مازال مثل السنة اللي فاتت او اللي قبلها...
فا بكل أمانة ومصداقية افضل مني مدرس الأحياء وعلم الأرض يشرحها فا مش هخدعك واقولك انا التنين واللي بطير لا هو أفضل مني مليون مره في مجاله وانا مدرس مش بياع سبح ولا تاجر بطيخ علشان اقبل بحاجه انا شايفها مش صح وهري على الفاضي ....فا لو اتقسمت لافرع فا انا هشتغل فرع الفيزياء فقط
متقسمتش اقابلكم على خير يا حبايبي في تانيه ثانوي بكالوريا او عام❤️❤️

11/08/2026

الدنيا قامت ومقعدتش علشان واحد انتحل شخصية قاضي وواحده انتحلت شخصية دكتوره وواحد انتحل شخصية ظابط
بس مدوروش ورا اللي انتحل شخصية مدرس وشرح لكل دول
❤️😏

11/08/2026

🔥 الحجز بدأ رسميًا… 🦅⚡
لو داخل أولى أو تانية ثانوي وعايز تبدأ الفيزياء صح من أول يوم، فدي فرصتك تحجز مكانك وتبدأ السنة بخطة واضحة، شرح قوي، وتأسيس يخليك فاهم مش حافظ. 💪📚
🎯 الحجز متاح من 15 أغسطس
📲 للحجز واستلام المواعيد:
تواصل عبر WhatsApp
010 32410792
⚠️ متستناش لحد بداية الدراسة… احجز بدري واختار مكانك من البداية.
⚠️ اما بالنسبة لتالته ثانوي فا احنا شغالين من بداية شهر 8 وفي بعض الأماكن في مجموعه اتنين وخميس الساعه 1
🚀 احجز بدري… وابدأ السنة من أول خطوة صح.
مستر عبدالله عوض 🦅 النسر في الفيزياء ⚡
#فيزياء