04/08/2024
الأعزاء
💥رسالة مهمة لوجه الله 💥
(( كلكم راعٍ و كلكم مسئول عن رعيته.. كفى بالمرء إثماً أن يضيع من يعول))
1- انزل احجز بنفسك و شوف المدرس و اتعرف عليه بنفسك و اعرف كل التفاصيل علشان تكون مطمن ابنك (او بنتك بالذات) بياخدوا مع مين؟
2- قيمّ المدرس حسب الترتيب ده ( دين- أخلاق - علم ) لأن فاقد الشيء لا يُعطيه لأن المدرس تأثيره على الأولاد أكثر من تأثير أبائهم و أمهاتهم
فأختار صح ( تعليم بلا أخلاق ملوش لازمة وهتعانى منه ) خلى ابنك جاهل و محترم أحسن من متعلم و قليل الأدب لأن علمه بلا أخلاق هيزود جحوده
3- اعمل جدول حصص ابنك او بنتك بنفسك و علقه على الحائط فى البيت علشان تعرف مواعيد خروجهم و دخولهم( خاصة البنات) هترتاح جداً
4- شوف مدرس يبعت لك تقرير يومي بغياب الطالب ودرجاته وفلوس الشهر ( هتريّح دماغك و أنت فى شغلك و هتابع ابنك خطوة بخطوة من غير مشقة).
5- لو فجأة ابنك أو بنتك قالولك أنا طلعت من الدرس وروحت لمدرس تاني. اتصل بالمدرس الأول و اعرف منه السبب .
يمكن الغلط من عند ابنك بسبب سوء مستواه أو سلوكه أو مش على مزاجه .. و اتصل برده بالمدرس التانى واعرف منه المواعيد والفلوس وياريت لو تروح له وتعرف مكانه.
6- فاجئ ولادك بزيارة للمدرسين كلهم واسأل على حضورهم وغيابهم و درجات امتحاناتهم و علاقاتهم بزمايلهم و سلوكياتهم و برده اتأكد فلوس الشهر بيدفعوها ولا لأ .
( معرفتك للمدرس مهمة جدا )
7- لما تروح للمدرسين سيب رقم تليفونك بنفسك.( علشان بيكتبوا أرقام بتاع الكشري 😂 )و لو لاحظت عدم المتابعة فترة طويلة يبقي أكيد فى حاجة غلط ( اتعمل بلوك للمدرس من على تليفوناتك 😉)
8- لو ظروف حضرتك المادية ما تسمحش بدفع فلوس الشهر كاملة ومحتاج تعمل تخفيض . اطلب ده بنفسك و بعزة وكرامة .. فضلكم وخيركم كتير ع المدرسين .. و لو المدرس رفض أو كلمك وحش رد عليه الرد المناسب وخد ابنك وامشي.
9- اعطى السلطة الكاملة للمدرس إنه يربّي ابنك و يعلّمه و يعاقبه لو استاهل العقاب
يمكن بعض منكم مش هيكون فاهم هدف النصايح دي إيه، بس أكيد أولادكم فاهمين كويس..
احنا كمدرسين عارفين الحاجات اللى بتحصل بحجة الحصة و بفلوس الحصة وفى وقتها..
وكتير أولياء أمور اكتشفوا مصايب بتحصل لا داعي لذكرها.
أولادكم أمانة ويستاهلوا رقابة و متابعة و اهتمام منكم أكتر من كده يا جماعة ..
و ربنا يجعل تعبكم بفايدة ويفرحكم بأولادكم.🍃🤍
