22/08/2026
🎬 اجتهدي في دراستك.. وأتقني مهنتك.. واصنعي مستقبلكِ بنفسكِ 🌷
إلى بناتنا الطالبات... ❤️
أنا عايزكِ تجتهدي... مش علشان تاخدي الدبلوم وخلاص، لكن علشان تتعلمي بجد، وتتقني مهنتك، وتكوني متميزة في تخصصك.
اختاري المجال اللي بتحبيه، لأن لما الإنسان يشتغل في حاجة بيحبها، بيكون عنده دافع إنه يتعلم أكتر، ويتعب أكتر، ويطور نفسه، وفي النهاية يكون متميز في شغله ومهنته.
اجتهدي من البداية، واهتمي بدراستك وتدريبك العملي، وحاولي تحققي مجموع يخليكِ تدخلي الكلية اللي نفسك فيها وتكملي طريقك في التعليم.
لكن لو الظروف ما ساعدتكيش، وما حالفكيش الحظ في دخول الكلية اللي كنتِ بتتمنيها، ده مش معناه إن الطريق انتهى.
لو أتقنتِ مهنتك، وتعلمتِ صح، واكتسبتِ الخبرة، ممكن تفتحي لنفسكِ طريق تاني، وتعملي مشروعك الخاص، وتكوني صاحبة مهنة ومشروع واسم ناجح.
والأجمل إنك مش هتكوني لوحدك. ❤️
إحنا مع كل طالبة مجتهدة، حريصة على مستقبلها، وبتحاول تتعلم وتتطور.
هنساعدها بالمعلومة، ونوجهها، ونقف جنبها، ونساعدها على قد ما نقدر علشان توصل لهدفها.
لكن يا بنتي، لازم تكون عندكِ الرغبة الحقيقية في التعلم.
لأن اللي تدخل المدرسة وهي بتقول:
«أنا عايزة أعدي السنين وخلاص وأخد الدبلوم»
ممكن تعدي السنين فعلًا، لكن هتكتشفي في النهاية إنك ما استفدتيش منها بالشكل اللي كان ممكن يغير حياتك.
وممكن تلاقي نفسكِ خرجتِ من المدرسة من غير إتقان حقيقي للتخصص، ومن غير مهارة تقدري تعتمدي عليها، ومن غير خبرة تساعدكِ في سوق العمل.
وعشان كده رسالتي ليكِ بسيطة:
اتعلمي... اجتهدي... أتقني... حبي مهنتك... وطوري نفسكِ.
خلي عندكِ هدف أكبر من مجرد النجاح والانتقال من سنة لسنة.
خلي هدفك إنك تخرجي من المدرسة وإنتِ فعلًا بتعرفي تعملي حاجة بإيدكِ، وعندكِ مهنة تقدري تعيشي منها، وتكملي تعليمك، أو تبدئي مشروعك الخاص.
🌷 نجاحكِ مش بيتحدد بس بالشهادة... نجاحكِ الحقيقي إنك تخرجي من المدرسة ومعاكِ علم ومهارة ومهنة وثقة في نفسكِ.
ولكل طالبة مجتهدة بتسعى إنها تكون أفضل:
إحنا معاكِ... وهندعمكِ... وهتلاقينا جنبكِ طول الطريق. ❤️
🎥 شوفي الفيديو للنهاية، ويمكن تكون الرسالة دي سبب إنها تخلي طالبة واحدة على الأقل تعيد التفكير في مستقبلها وتبدأ من النهارده.
ِ
محمد محسن شعيب @أبرز المعجبين قناة فيديوهات بنحبك يا مصر 🇪🇬🇪🇬🇪🇬
مدرسة الشهيد محمد محسن شعيب الثانوية الصناعية بنات بأسوان
الزخرفة والديكور بأسوان 🖌️🎨
Mahmoud M Zaki
