26/08/2026
صلوا على أشرف وسيد الخلق سيدنا محمد عليه أفضل الصلاة وأتم السلام حبيبى يا رسول الله 💕💕💕
ياترى سيدنا النبي ﷺ شكله إيه !! 🤗
سيدنا الحسن بن عليّ بن أبى طالب لما كبر بدأت ملامح الرسول تروح من دماغه لأنه مات وهو عنده 7 سنين ،
فراح لواحد إسمه " هند بن أبي هالة " ( ابن زوج السيده خديجة الأول ) وقاله : " يا خال .. صفلي شيئا من حلية رسول الله أتمسك به"
فقال : " كان فخماً مفخماً وكان ليس بالطويل البائن ولا بالقصير ( يعنى ولا قصير أوى ولا طويل أوى ) لكن كان أقرب إلى الطول .. 👌😍
👈نبدأ من أول رأسه إلى قدمه ،
قال : كان وجهه أبيض مُشرب بحمرة فاض الجبين ، دقيق الحاجبين أزجّ سوابغ في غير قرن ( بيقولك حواجبه كانت رقيقة كلمه أزجّ يعني رفيعة ومقوسة ، سوابغ يعني الحاجب ممتلئ مش فاضي ، في غير قرن يعني مفيش شعر فوق ولا تحت حاجبه ) ،
واسع العينين شديد سوادهما في شدة بياضهما ( يعنى السواد أسود أوى والبياض أبيض أوى ) ، أكحل وما هو بأكحل ( يعنى كأنه حاطط كحل ) ، أهدب الأشفار
( الأشفار : الرموش ، وأهدب يعني طويلة ومن كتر ما هي طويلة متنية ) ..❤️😍
👈 كان أسيلُ الخدين ( يعني خدوده ناعمة لا فيها حبوب ولا حتة خشنة ولا فيه شعر لأن لحيته بادئة من تحت ) .. وكان أقنى العرنين ( يعنى الأنف وأقنى يعني مناخيره رفيعة صلى الله عليه وسلم زى ما بنسميها أحنا الأنف الأرنبية ) ، ممتلئ الشفاه ( بقه مش كبير لكن شفايفه ممتلئة ) .. مثلج الأسنان كأنها نظْم لؤلؤ ( سنانه بتلمع وكل سنة جنب التانية ) ، وإذا تكلم خرج النور من بين ثناياه وكانت في لحيته كثوفة وكانت تصل إلى صدره ، كانت ناعمة ومهذبة
👈ورقبته صلى الله عليه وسلم كأنها جِيدُ فضة ( يعنى كأنها مصبوبة زى الفضة كده ) ، أنور متجرد ( يعني جسمه اللي متغطي ده منور .. السيده عائشة كانت بتقول إنه مثلا لو عمل أي حركة وحته من جسمه ظهرت فيه نور يخرج من تحت العباية ) ❤️😍
بعيد ما بين المنكبين .. عاري الصدر والذراعين من دونهما ( يعني معندهوش شعر في صدره وذراعه وعنده شعر خفيف جداً من الكوع لحد الكتف و عنده خط خفيف من الشعر من السرة لتحت شوية ) ...❤️😍
👈أسيل القدمين ينئو عنهما الماء كأنهما إسطوانة فضة ( يعني ناعمة جداً لدرجة إن لما تصبي الميه تجري عليها ) .. وكان شعره أسود من الليل وكان ناعم جداً و أوقات يصل شعره تحت أذنه و أوقات إلى الكتف و أغلب الأحيان في منتصف الظهر وكان يضعه خلف أذنيه إذا فرق عقيقته فرق ( يعني لما بأيده كده يفرق شعره يثبت شعره ميرجعش تاني ) وكأن شعره طوعاً له 😍❤️ ..
وكانت رقبته طويلة كأنها جيد دُمية ، وكان سواء الصدر والبطن ( معندهوش كرش ) ، وكان بادر متماسك ( معندهوش ترهلات ) .. وكان إذا مشى كأنما ينحط من صبب ( كأن نصه اللي فوق مسابق نصه اللي تحت وهو ماشي ) ..
يقول الراوي : " ما رأيت أجمل منه ولا رأيت أحسن منه صلى الله عليه وسلم ❤ " .
ياحبيبي ياخير خلق الله ❤️
اللهم صلي على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم في العالمين انك حميد مجيد 🤲❤️
#مقتطفات من السيره النبويه ❤️
