18/05/2021
حواديت خلف الابواب المغلقة ...
الاب صباح الخير
الام صباح النور يا حبيبي . اية المنبة ضرب
الاب اه من حوالي ربع ساعة ...
الام حالا علي ما تتوضي وتصلي اكون جهزتلك الفطار والشاي ..
الاب شكرا يا حبيبتي بس بسرعة بالله عليكي عشان متاخرش عالشغل .
الام حالا يا حبيبي ..... وبسرعة تروح الام للمطبخ لكي تحضر الفطار لجوزها اللي رايح الشغل .
الاب ... اية يا ماما الفطار خلص ولا لسة
الام اهو يا حبببي فاضل البيض قولت اعملة لما تقعد عالسفرة عشان ميبردش ...
الاحداث يخرج الاب للذهاب للعمل وهو مستبشر خيرا بدعاء الام له حتي باب البيت ... وتبداء الام بالتجول في جميع انحاء الشقة كل الشبابيك تتفتح والستائر عشان الشمس تدخل وهواء ربنا يدخل يجدد البيت . وتبدا بالمطبخ تطلع الاكل اللي هيتعمل علي الغداء وتكمل عمل الفطار للاولاد وقبل ده كلة بتدخل تتوضي وتصلي الصبح وتشغل الراديو علي اذاعة القرأن الكريم وبعد كدة اذاعة الشرق الاوسط وبرامج الفترة الصباحية اللي بتعتبر محفورة في أذهاننا جميعا بداية من اغنية يا حلو صبح يا حلو طل الي اغنية ابلة فضيلة .
وتدخل الام علي الاولاد في غرف النوم بكل الحب والحنان تفتح الشبابيك علية وتشيل الغطا من عليهم وكانهم في سجون جوانتانمو ههههههه وتسحب الملاية بتاعت السرير وهما نايمين وتعمل فيهم وضع سيخ الكفتة وهو بيلف علي النار ومع كل هذا الحنان تربي جيل كامل علي هذة الطريقة في الاستيقاظ صباحا . وطبعا بما اننا في صيف فبيكون الاستيقاظ مبكرا نوع من العقاب الغير مبرر بالنسبة لعقلية الاطفال والمراهقين في ذلك الوقت والبنت طبعا يلا تعالي سعديني فالمطبخ والاولاد كل واحد يرتب سريرة ويفرش الملاية ويطبق الكوفرتة ويعدل مكتبة . وتقوم الام باعداد احلي فطار بعد طبعا ما احد الابناء ينزل يحضر الفول والطعمية الساخنة . وبعد الافطار تجلس الام قليلا لتشرب الشاي فالبلكونة او امام التلفاز ....ويمر اليوم بروتين يومي محفوظ من اعداد وجبة الغداء ويتخللها بعض النقاشات بين الام وابنتها وبعض مكالمات التليفون . والجميع في انتظار الاب للعودة من العمل الساعة الرابعة ... يدخل الاب الي غرفتة لتغيير ملابسة ويذهب لاخذ حمام ويخرج ليصلي العصر واثناء ذلك تقوم الام والبنت باعداد السفرة لتناول وجبة الغداء .
وبعدها يدخل الاب لغرفة الجلوس في انتظار كوب الشاي وياخذ معة الجرائد لكي يعرف الاخبار والاحداث المحيطة بة
وبعدها ينطلق الي غرفتة لياخذ قسط من الراحة بعد يوم عمل طويل ...
بعدما يستيقظ الاب من النوم تدخل علية الام بفنجان القهوة ويحكي لها كل ماحدث له فاليوم وهي تسمع وتبلغة بكل ما حدث من اولادة واخبار العيلة والجيران والتليفزيون والمسلسل اللي الزوج خان زوجتة اللي مراعياه ومراعية عيالة بقالها 20 سنة وبعد ده كل يخنها ويتجوز عليها وهو يسمع ويحاول يستوعب هي تقصد اية ويعدي اليوم بعد تناول وجبة عشاء خفيفة ومشاهده فيلم السهرة ويدخل الجميع الي غرفهم لينامو ..
كان اليوم فية بركة ونظام ومشاكل واحداث تقريبا في كل البيوت شبه بعض وكان الاكل والكلام والاستيقاظ والنوم بمواعيد كانت ساعتنا البيلوجية مظبوطة كان معظم البيوت شبة بعض فالعيشة ويوم الخميس له طقوس للسهر والزيارات والفسح لان الجمعة اجازة ... اما الان فحدث ولا حرج. فين الاسر دية فين المجتمع دة هي التكنولوجيا عملت فينا اية
22/03/2018