قال رسول الله صلي الله عليه وسلم :
ألا تحتسبون آثاركم؟
إذا مات ابن ءادم انقطع عمله إلا من ثلاث منهم " علم ينتفع به " :)
24/01/2023
السلام عليكم ورحمة الله وبركاته
رجعنا بفضل الله
صفحة الفيس بوك اتسرقت للاسف من شهر ٥ ومن بعدها مكونتش عارفة ارجع انشر حاجة خالص
قررت اعمل واحدة جديدة ونبدأ من جديد
الله المستعان
رابط الصفحة الجديدة ف البايو وف الستوري
مستنياكم 💜
22/03/2022
السلام عليكم ورحمة الله وبركاته
من ساعة ما بدأت انتظم في التعليم المنزلي وكل اسبوع ببحث عن مصادر واوراق عمل لخطة الاسبوع بفضل وقت طويل جدا جدا عقبال ما اوصل للحاجة اللي ف دماغي
وطبعا مع كثرة المصادر والروابط بزهق وبتعب جدا جدا
بعد فترة بدأت احدد ايه المصادر اللي تقابل اهتماماتنا حاليا او اللي بلاقي فيها بسهولة والاكثر تنظيما
فعملت قناة تلجرام سمتها مصدر المصادر 😅
بحط فيها روابط وقنوات ومدونات زاي حاجة فيها مصادر وليها هاشتاجات بحيث كل ماجة او موضوع تدخلي ع الهاشتاج تدوري فيه ع طول بدون ما تتشتتي بالمواضيع التانية
ده رابط القناة لو مهتمين
https://t.me/masder_elmsader
👣
22/02/2022
السلام عليكم ورحمة الله وبركاته
نكمل معاكم بوستات مرحلة ادخال الطعام الصلب
المرةدي مش معلومات اد ما هي كلام عن تجربة
مرحلة الاكل من 6 ل 12 شهر لازم تكون تجربة إيجابية للطفل ومنحسسهوش ان هو روبوت لازم ياكل بشكل معين ولازم نخليه يتحسس ويلمس الاكل
عادة اللي بيمنع ان الطفل يعيش المرحلة دي وتكون إيجابية بالنسبة له خصوصا الأطفال الحسيين هو الاهل وخوفهم على الملابس والمنزل انه يتبهدل والحقيقة ان مش بس الملابس والمنزل ده الطفل والام شخصيا بيتبهدلوا واكيد فاهمني :3
تجربتي مع طفلي الأول اني كنت دايما متوترة وقت الاكل وانا اللي امسك الاكل وااكله بنفسي واقعده بشكل معين وممنوع تمسك بايدك ولو جه نقطة ع الهدوم اتوتر زيادة وده كان بياثر طبعا ع تعامله مع الاكل ورفضه ليه وكمان اتاخرنا كتير على ما اتعود على فكرة الاكل واستقلاليته في الاكل .
الحمد لله مع طفلي الثاني بحاول اتجنب اللي كنت بعمله واجرب طرق تخليني مكونش متوترة واكون عاملة حساب التفاصيل اللي جربتها واللي بتخليني متوترة واخليله تجربة الاكل تجربة ايجابية ان شاء الله من خلال كام حاجة
لازم نفهم ان تجربة الاكل جزء منها انها تكون بالايدين مع الكثير من البهدلة والاستكشاف و و و عياط 😆
ولتجنب هذه المعركة ممكن ناخد كام احتياط كده عن تجربة اسمعي كلامي
اول حاجة اعملي هدوم معينة للاكل ومحدش يشوفها غيركم 🤭
اعملي حسابك ان بعد كل اكل ممكن نستحمى عادي لا مش ممكن هو اكيد معلش واي حد هيقعد جنبنا هيستحمى 🥴
حطي مفرش تحت الطفل عشان البهدلة متوصلش للسجاد او المفروشات
او خصصي مكان محدد للاكل في المطبخ مثلا ويكون بلاط
والله الموفق والمستعان 😃
👣
14/02/2022
السلام عليكم ورحمة الله وبركاته
أأكل طفلي كمية أد ايه عشان اعرف انه شبع؟
السؤال المنطقي بعد ما عرفنا اقدمله الاكل امتى وازاي؟
في مرحلة التذويق ينصح ب 2 – 3 ملاعق فقط كوجبة واحدة ومن نوع طعام واحد .
بعد مرحلة التذويق بندخل الاكل الصلب على شكل وجبات صغيرة ما بين 3 ل 6 ملاعق طعام مرة واحدة او مرتين خلال اليوم بشكل تدريجي بنزود الكمية لو اكتشفنا ان الطفل تقبله ومفيش حساسية .
بنعرف ازاي ان مفيش حساسية ؟
بنجرب الاكل 3 أيام متتالية اذا لم يظهر شيء اذا الحمد لله مفيش تحسس وبعدها نجرب نوع تاني 3 أيام متتالية مفيش تحسس نخلط النوعين 3 أيام وهكذا .
يعني مثلا بدانا بالكوسة 3 أيام متتالية ثم بطاطس 3 أيام متتالية بعدين نخلط كوسة مع بطاطس 3 أيام متتالية بعدين ندخل نوع جديد وهكذا
تابعونا المرة الجاية أبدأ بايه ؟ وايه المسموح في الأكل ؟
👣
10/02/2022
السلام عليكم ورحمة الله وبركاته
المرة اللي فاتت عرفنا هندخل الاكل للطفل من امتى
المرة دي هنعرف ازاي نقدمهوله ؟
تابعوا للاخر
ايه هي افضل طريقة لتقديم الطعام للطفل في بداية ادخال الطعام ؟
سلق – تبخير – شوي ؟
التبخير طبعا هو الطريقة الأفضل لتقديم الطعام للطفل لانه بيحافظ على المواد الغذائية في الاكل.
بنحط الخضار كامل وغير مقطع لحفظ المواد الغذائية ونحطها ف مصفاه على حلة فيها مياه ونسيبها تغلي فالبخار يسوي الخضار .
السلق
هو مش غلط ولكن الخضار بيفقد من قيمته الغذائية في مياه السلق فبتكون طريقة فعالة لو هنعمل من الخضار ده شوربة فهنخلط الخضار مع مياه السلق ونستفيد من المواد الغذائية اللي نزلت في المياه .
الشوي في الفرن
في الطريقة دي المياه اللي ف الخضار بتتبخر فمش بنفقد من المادة الغذائية ولكن ممكن مع درجة الحرارة العالية نفقد بعضها وهنا برده بنحط الخضار كامل وغير مقطع.
المرة الجاية هنعرف ناكل الطفل اد اييييييييييه؟
تابعونا
ولو عجبك البوست واستفدتي منه اعمليله شير.
👣
08/02/2022
أن أن أاااااان
مفاجأة مش كده 😃
لما قرأت الجملة دي وقفت لحظة كده عشان ادركها وقلت صحيح هم لسه أطفال احنا ليه بنعاملهم انهم كبروا لما يجيلهم أخ أو أخت أصغر مثلا؟
خلتني أراجع حاجات كتير كنت بعملها مع ابني الأكبر
07/02/2022
السلام عليكم ورحمة الله وبركاته
بما اني بعيد مرحلة ادخال الطعام الصلب لابني التاني فحبيت انقل التجربة الاولى مع بعض المعلومات العلمية اللي قراتها واتعلمتها خلال الرحلة
ف بسم الله نبدأ
امتى ادخل الاكل لطفلي؟
سؤال كل ام مع طفلها بعد ما تفوق من الولادة وتبدا تتأقلم مع الرضاعة ييجي السؤال ها ايه المرحلة اللي بعد كده ؟ :D
مفيش إجابة صحيحة الموضوع راجع لمدارس طبية فيها تفضيلات طبعا ولكن فيه ملاحظات وعلامات تقول ان طفلك جاهز او لا
المدرسة الأولى وهي 4 شهور ودي لااازم تلاحظي العلامات اللي هنقول عليها عشان تبداي في السن ده.
المدرسة الثانية وهي الأفضل عند 6 شهور لان المصدر الرئيسي والاساسي لتغذية الطفل من 0 ل 6 شهور هي الرضاعة والرضاعة فقط اذا كانت طبيعية او صناعية
وزارة الصحة لم تمنع الطعام تماما ما بين 4 ل 6 شهور ولكن يمكن التذوق فقط .
ايه هي العلامات اللي لو شفتها اقدر ابدا اطعام الطفل او تذويقه من 4 شهور ؟
نركز هنا 🧐
- لازم يكون الطفل اكبر من 4 شهور ووزنه الضعف عن اول الولادة على الأقل
- ردة الفعل بإخراج اللسان خارج الفم تكون اختفت وف الاغلب بتختفي من 3 ل 4 شهور
- يقدر يرفع راسه بشكل ثابت
- يقدر يقعد مع وضع مسند ورا ظهره مثلا
النقطة الأهم بقا هي قابلية الطفل للاكل ودي هتاخدي بالك منها لما تكونوا قاعدين تاكلوا وتلاقوا الطفل متلهف جدا للاكل وبيبص عليه وممكن كمان يخرج لسانه ويمد ايده
عشان كده مهم جدا ان وقت الاكل الطفل يكون جنبنا عشان يعرف ان ده روتين من حياتنا (واحنا بننيمه عشان ناكل كويس :D)
المهم خلاص العلامات كلها موجودة أيا كان بقا عمر الطفل المهم مش اقل من 4 شهور
لان حليب الام او الحليب الصناعي بيكون مصدر تغذية كافي بالعناصر الغذائية اللي توفره نمو سليم قبل الأربع شهور
لو الطفل بقا عنده 6 شهور ومعندهوش اهتمام بالاكل عادي ممكن يكون عشان متعرضش لتجربة الاكل ومشافش الاكل قبل كده فمعندهوش اهتمام فالافضل الانتظار للوقت اللي يظهر اهتمامه ومننساش الجملة اللي هنعلقها ان كل طفل مختلف عن الاخر وله وتيرة مختلفة في النمو والتطورات
لو وصل الطفل 8 شهور ولسه مأظهرش اهتمام ومبياكلش وبيرفض التذويق اذاااا نستشير الطبيب
هنعرف ازاي نقدم الاكل للطفل وده المرة الجاية ان شاء الله
تابعونا
👣
16/01/2022
مع بداية الشهر الخامس يدرك الطفل وجود يديه وان باستطاعته التحكم بها ✋🏻
دورنا في هذه المرحلة تعزيز هذا الإدراك وتطويره عن طريق تحفيزه لمد يديه وامساك الاشياء 👶
1⃣ عن طريق تعليق الاشياء أمامه لتحفيزه على مد يده
2⃣ اعطائه حلقة ليمسكها ويضعها في فمه فتستخدم كعضاضة ايضا يفضل خشبيه او سيليكون وليست بلاستيكية
3⃣ اصبح يستلقي على بطنه فترة اطول فنضع امامه هدف ليمد يده ويمسكه
4⃣ نضع له جرس او شخشيخة معلقة في يده او قدمه فيحركهم ويسمع الصوت
5⃣ الكتب القماشية وهو يجلس في حضن احد افراد الاسرة وبعضها يكون لها صوت مثل صوت الاكياس البلاستيكية
6⃣ المرآة هي خيارا ممتازا للتسلية يتابع تحركات يده وتعابير وجهه
#منتسوري
28/12/2021
نصيحة من أمي أم زوجي رحمها الله 😍
قولي لطفلك ما تريدين أن يفعل أو الفعل الصحيح
مثال آخر
طفلك يلعب مع أخيه بعنف
قولي له العب معه هكذا أمسك يده أو تحسس شعره
ولا تقولي لا تلمس وجهه، لا تلعب هكذا، لا تؤذيه
حيث ان الطريقة الاولى ستدفع الطفل لتجربة ما تقوليه وسيفهمه مخه وينفذه بشكل لا ارادي
بينما الطريق الثانية ستدفعه ايضا لعمل ما تقولينه ولكن بدون أداة النفي التي تسبق الكلام 😅
جربي واخبريني بالنتيجة 😎
# #نصائح #منتسوري
#تذكير
# 👣
26/12/2021
النصيحة الأولى والأهم في مشوارك مع طفلك في التعليم او الاكل او الحوار او اللغة او السلوكيات او التحفيظ
اي شئ اي شئ هو التكرار التكرار التكرار
ف "ما تكرر تقرر"
#نصيحة #نصائح #منتسوري
👣
05/12/2021
امسكي نفسك وانبهارك وحماسك 😅😆
#نصائح #منتسوري
17/11/2021
السلام عليكم ورحمة الله وبركاته
جزاكم الله خيرا ع الاهتمام
سعيدة جدا بكل تجتهد عشان تتعلم وتعلم اولادها ربنا يبارك فيكن جميعا 💜
كنت مخططة أبدأ ع طول واكتفي باللي موجودين ف الجروب بس قلت ليه واخد ثواب اكتر 😅 طمع وكده 😁
المهم ان ده اخرني لان ما شاء الله العدد كبير وايدي بتتعب مع مسكة الموبايل وقت طويل
بقالي نص ساعة حاليا ولسه فيه ادهم مرتين ما شاء الله
ولاني مش وقتي كله مناسب اضيف
بقول كده عشان اطمن اللي مدخلش الرسايل كتير جدا هنا وع اكونتي الشخصي ومش هقدر ارد ع كل الناس الاولى ادخلكم الجروب عشان نبدا ان شاء الله
.............
هجاوب ع كام حاجة بتسالوا عنها
الدورة مناسبة لمين؟
لاي ام حابة تعلم اولادها البرمجة
من سن ٣ سنوات
طيب لو اولادك اصغر عادي اتعلمي وعلميهم بعدين ان شاء الله
مش محتاجة حاجة للدورة الا ورقة وقلم والموبايل اللي هتسمعيني منه ان شاء الله
وكوباية حاجة دافية عشان دخلة الشتا السقعة دي 😁
الدورة هتكون مسجلة
٨ محاضرات ومعاهم تقريبا ٣ لايف
واحد ف البداية وواحد ف النص وواحد ف الاخر ان قدر لنا المولى عز وجل
اللينك بتاع المحاضرة هينزل ع الجروب ومعاه رابط التطبيقات وكمان بوست للاسئلة
والمحاضرة بتتقفل بعدها باسبوع في معاد المحاضرة اللي بعدها عشان نضمن التطبيق والمتابعة
اللي مدخلش الجروب يدخل ومينساش يجاوب ع الاسئلة لانها شرط للدخول واللي مجاوبش يدخل هيلاقي كلمة answer questions يضغط عليها ويجاوب وربنا يقدرني ع قبولهم ان شاء الله ونبدا ع طول 🌸
👣