كوع و رولة

لو مهتم بحاجة معينة أو محتاج تفهم أزاي الحاجة دي بتتعمل, شاركنا رأيك على اللينك هنا http://goo.gl/forms/3rSwJqu218


#افهم

لو عايز تعرف ازاي تستلم السيراميك:

- لازم تاخد بالك ان اللحامات (المسافه بين السيراميك) تكون متساوية و مش كبيرة يعني متبقاش واسعة قووي لأن بكده هيحتاج الصنايعي يملا الفراغات دي بالاسمنت الابيض و هتعمل شكل وحش مع الوقت.

- كمان لازم تاخد بالك من أن اللحامات دي تكون ماشية مع بعض في خط مستقيم واحد، يعني متكنش معوجة، ممكن يكون سبب وسع الفراغات دي ان يكون الصنايعي و هو بيقطع السيراميك للغلايق مش بيقطع خط مستقيم او انه مش محافظ على المنسوب و الميل لكل صف. في الاول يظبط اتجهاته بميزان الخيط رأسي و أفقي و بيمشي بالميزان ده صف صف و عمود عمود.

- قبل ما يلزق السيراميك لازم ينقعه ف المياه وفي انواع سيراميك بيبقي مكتوب عليها انها لازم تتنقع فتره معينه مش شطف بس ده بيخلي البلاطة تمسك ف المونة و متقعش او تتحرك أول ما يلزقها.

#تشطيبات
#السيراميك

"أنا مش فاضي أعمل دا بنفسي!"

بس لازم تبقى فاضي و أنت بتشوف التشطيبات و كمان و هي بتخلص قدامك علشان تبقى مستلم الشغل صح زي ما انت عايز و تبقى مطمن ... و مش بس فاضي، لازم تكون في الاساس فاهم عشان ميضحكش عليك.

#افهم

دهانات الخشب "لاكيه"

يبدأ الصنايعي بصنفرة الباب و التلقيط بالمعجون و يترك حتي ينشف بعد كده يستعمل الصنفرة لحد ما يكون الملمس بتاعه ناعم و مفيهوش اجزاء خشنة او بروز او شطفات.

يدهن أول وش و يسيبه ينشف، ده بيطلع بعض العيوب اللي مش بتكون ظاهرة في اول وش معجون.

فبيلقط الباب تاني و يصنفر الاجزاء دي و بيبدأ بالدهان لحد ما يوصل للشكل النهائي المطلوب و فيه لازم تتأكد ان مفيش تسييل (سيولة) يعني لما تبص على الباب/الشباك من قريب متلاقيش في دهان مسيل او عامل شكل دمعه ده بيبقي بسبب ان الصنايعي مكنش بيوزع الدهان بشكل متساوي. لازم تتاكد كمان ان مفيش اجزاء كاشفة بمعني انك لما تقرب من الباب متلاقيش اجزاء فاتحة واجزاء غامقة.


#دهانات
#افهم

يعني ايه "كوع و رولة"؟

كوع هو الجزء اللي بيستخدم لربط المواسير ببعض عشان تعمل زاوية قايمة لأن في قطع تانية لوصل المواسير ببعض بس باستخدامات تانية.

رولة بتستخدم في الدهانات بديل الفرشاة و بتدي ملمس مختلف عنها في الدهانات.

وانت بتستلم الحنفيات و الخلطات من السباك... ممكن تتجنب مشاكل كتيير لو ركزت و انت بتستلم..

لازم تتأكد أن مفيش تسريب ولو بسيط من الخلاطات علي الحيطة. ممكن تتاكد عن طريق انك تجيب حته قماش نظيفة و ناشفة و الافضل تكون قطن او من خامة بتشرب المياه و تمسح بيها عند نقط الاتصال او التركيب ممكن يكون في تسريب بسيط و محتاج تربيط اكتر او انه يكون محتاج تيفلون او شعر بين العقلة و الخلاط.


#أفهم

* هستفيد بأيه يعني؟
* ما أنا ممكن أجيب أي حد ييجي يعملها و أنا مستريح ...
* مش فارقة معايا ...

كل دا كلام أي واحد فينا فكر فيه مع أختلاف الاسئلة بس الأجابة سهلة:

"علشان محدش يضحك عليك أو يعملك حاجة أنت مش عايزها و تتدبس فيها"

بمعنى تاني، "لو أنت مش فاضي" تعمل الحاجة دي بنفسك، مفيش مشكلة هات حد يعملها مكانك بس تبقى فاهم هو بيعمل ايه و هل هتحتاج كل الوقت دا ولا هيخلصها بسرعة؟؟ طب هل دا اللي انا كنت عايزه ولا هو عمل حاجة تانية خالص و انا مجبر على كدا؟

طب "لو أنت فاضي" و عارف بتتعمل أزاي، يبقى ليه أستنى أن حد لسه هييجي بكرة يعملها طالما أنا أعرف أعملها حالا؟

في كل الحالات أنت المستفيد، علشان هتبقى فاهم

أولاً ...

هنا مجموعة من التجارب/الخبرات/المعلومات عن حاجات كتير بيبقى دايماً نفسنا لو كنا اتعلمناها و فهمناها بشكل مبسط لأنها بتدخل في حياتنا اليومية و بالتالي هتسهل علينا تعب و مجهود لو عرفنا نحلها.

هنتعلم أزاي بمعلومات بسيطة نقدر أننا نفهم/نقييم الشغل اللي أتعمل في البيت (سباكة، نجارة، دهانات، كهربا ....) دا كدا تمام و لا كان المفروض يتعمل بشكل تاني؟ و هل "أنا" ممكن أعمله و لا لأ؟ و أزاي و ايه الأدوات اللي محتاجها في التنفيذ؟؟

الهدف من هنا :

- المعلومة المنقولة من تجارب سابقة و من ناس حرفيين
- الطريقة للتطبيق السهل و الممكن
- شرح المعلومة بشكل بسيط

انتظرونا، بعد قليل