Mama & Little

الشاشات موت لعقلهم بالبطئ بتحرمهم من التواصل الاجتماعي..
تركيزهم وقدرتهم على التعبير والتفاعل والإحساس بالناس بتقل جدا

✅ماتسبيش الاطفال طول اليوم على الكارتون او الجيمز عشان مشغولة ومش عايزة دوشة

✅ماتحطيش تلفزيون ولا كمبيوتر في اوضتهم

✅حاولي تحطي حد للشاشات وساعديهم يلاقوا بدائل مفيدة تنفعهم وتكون ممتعة

✅اتفقي معاهم على وقت للشاشات محدد ومعقول
والتزموا كلكوا بيه

✅بالنسبة للبدايل عشان مايحسوش بملل اقعدوا وكل واحد يقول افكاره واقترحي انتي كمان واختاروا اللي ينفع يتنفذ

في واحدة كانت كل مشكلتها مع بنتها
انها مش بتعرف ابدا هي حاسة بإيه
وانها بتكتم مشاعرها بشكل كبير فرح ...حزن ... غضب
كله في صمت ..عكس اخوها تماماً
لدرجة بتقول مرة باب حديد قفل على ايديها جامد قعدت تعيط من غير صوت والام مش فاهمة مالها ولا ايه اللي حصل
ا---------------------------

◾الأطفال مختلفة حتى في تعبيرها عن مشاعرها
في منهم تعبيره عن انفعاله قوي
يفرح ⬅️ يضحك يتنطط
يزعل ⬅️ يصوت ويعيط بصوت عالي
يغضب ⬅️ يضرب ويكسر

◾ومنهم النوع الهادي اللي رد فعله داخلي
مش بيعبر عن مشاعره
ماتقدريش تعرفي هو حاسس بإيه
مجرد ابتسامة بسيطة او عياط في هدوء
لو اتوجع او اضايق وشه يحمر ويسكت
بيكتم اعتراضه ...
بينفذ الاوامر...
دة طبع فيه هو مولود كدة

بس مشكلته ان بيجي وقت بيتملى على آخره
بيرفض يتعامل بيرفض يتكلم او يشارك في اي نشاط
من كتر ما كتم مش عارف بقى ايه اللي مضايقه اصلا
مشاكله بتكبر عشان مش بيقولها اول باول

طب احنا ممكن نعمل ايه يساعده ؟!

✅ اول حاجة طبعا مهم جداً تقبليه زي ما هو
من غير كلام كل شوية يحسسه ان دة عيب فيه

✅ محتاجة تعملي معاه quality time
تقعدي معاه شوية لوحدكوا كل يوم
تكوني مركزة معاه
تعملوا حاجة بيحبها لعبة.. رسم .. قصص..تتمشوا شوية
وانتوا قاعدين تسأليه أسئلة بسيطة
مرة على مرة حيبدأ يتكلم ويعبر ..
تسمعي باهتمام حتفهميه ..
تاخدي المعلومات دي وتشوفي عايزة تعلميه ايه
لما يتكلم و يلاقيكي بتسمعيه دة مفيد
حيشجعه يطور نفسه في التعبير

✅ لما يبان على وشه انه اتضايق ماتتجاهليش
قوليله انت اتضايقت عايز تقول ايه طيب ؟
يطمن فيتكلم

✅ لو فيه مشكلة كبيرة ممكن تقوليله
تعالى في حضني عشان يبدأ يطمن
ويخرج كل اللي جواه

✅ عبري انتي عن مشاعرك قدامه عشان يتعلم منك

▪️ انا فرحانة عشان كذا..
▪️انا مضايقة عشان كذا ..
▪️انا حاسة بغضب بسبب ..
▪️انا بحبك
حاولي معاه يتعلم التعبير عن المشاعر عشان ده مهم جداً لصحته النفسية .

خذ وقت للتدريب دي من الادوات اللي مهم نطبقها
على اي مهارة بيتعلموها ازاي يلبسوا ..ينضفوا الغرفة..يحضروا فطارهم ..
وحتى مهارات زي حل المشكلات وتعلم الأخلاقيات والسلوكيات
احنا بنقولهم يعملوا الحاجة وبنفتكر أنهم فاهمين
وبنتوقع انهم حيعملوها زي ما احنا بنعملها ..
هي سهلة علينا بس بالنسبةلهم حاجة جديدة
محتاجة وقت وتدريب..
✓ اول حاجة اشرح المهمة المطلوبة منهم
وانفذها قدامهم خطوة خطوة
✓ نعمل المهمة مع بعض
✓ اسيبه يعملها واشرف عليه
✓ بس خلاص هو كدة جاهز يعملها لوحده
علميه بصبر من غير كلام زي مش حتعرف .. حتكسرها .. حتبوظها .. حتوقعها

في كتاب حلو اسمه
how to talk so kids will listen & listen so kids will talk
جزء فيه كان بيتكلم عن ٥ بدائل
ممكن نستخدمها مع الولاد
بدل الاوامر والمحاضرات واللوم
تخليهم يهتموا اكتر ويتعاونوا معانا

جربنا كتير الأوامر و الزعيق و اللوم
بنلاحظ انهم بيعندوا ومش بيسمعوا الكلام
وكمان بتأثر على علاقتنا بيهم
وبيعمل حاجز بيننا و بينهم
غير ان الحاجات دي بتقلل ثقة الطفل بنفسه

= البدائل دي هي ايه ؟؟

١- الوصف : صف المشكلة اللي انت شايفها بدل من اللوم
الفوطة بلت السرير - نور الحمام لسه والع
مجرد انك توصفي اللي شايفاه هو حيفهم

٢- اعط معلومات : اللبن بيبوظ لو اتساب برة التلاجة - قشر التفاح بيتحط في الباسكيت - حتساعديني فعلاً لو حضرتي الترابيزة للعشا

٣- الأختصار : كلمة واحدة او جملة بسيطة
اللانش بوكس بتاعك - البيچامات ياولاد

٤- اوصف مشاعرك : أنا بتضايق لما حد يدخل بالجزمة وانا لسة منضفة - بتعصب لما حد يقاطعني في الكلام قبل ما اخلص - بقلق لما اتصل بيك وماتردش

٥- اكتب ملاحظة : بدل الكلام علق ورقة مجرد ما يقراها يفتكر ..
اطفوا نور الحمام
او على التلفزيون.. المذاكرة الاول وبعدين التلفزيون

الحاجات دي ممكن ماتنفعش مع كل الأطفال
و ممكن ما تنجحش طول الوقت
لكن على الأقل بتعمل جو من الاحترام و الحب في البيت بتقلل التوتر والخناق و بالتالى بتحسن علاقتنا بولادنا
وبتزود تعاونهم معانا لما يلاقونا بنحترمهم.

" هو انا لازم اتحايل عليك عشان تنزل معايا لما احتاجك في حاجة لكن لو حد من صحابك كلمك بتنزل جري "

لو عندك ابن في سن المراهقه حتلاقي نفسك قلت الجملة دي قبل كدة

في المرحلة دي
بتكون علاقته بأصدقائه أقوى
يتكلم معاهم كتير ..
يقضي معاهم وقت كبير ..
يفضلهم عن اهله لما يجي يخرج

السبب ببساطة انهم بيبقوا شبهه
عندهم نفس الاهتمامات ونفس التفكير
فبيبقى مستريح اكتر وهو معاهم
بيتكلموا نفس لغته
مش بينتقدوا بعض

بالإضافة بردو انهم في السن دة بيعتبروا الأهل مصدر حرج يتكسف لو حد من صحابه شافه مع ماما او بابا
بيحس انه لسه صغير

طبيعي ممكن تضايقي من كدة
بس الأفضل ماتخديش الموضوع بشكل شخصي
دة مالوش علاقة بحبه ليكي
تقبلي دة واتعاملي عادي وبلاش انتقاد
خلي الوقت اللي بيقضيه معاكم وقت حلو
تقربوا فيه اكتر بعيد عن الانتقاد والسخرية والخناق
عشان مايبعدش اكتر
وافتكري دايما انها مرحلة وحتعدي
وحترجع علاقتكوا اقوى من الاول.

#المراهقة ( ٥ )


المراهقة ١ ( مرحلة وهتعدي )
https://www.facebook.com/344860212215559/posts/4842730242428511/
المراهقة ٢ ( انا مين ؟)
https://www.facebook.com/344860212215559/posts/4852770484757820/
المراهقة ٣ ( التمرد )
https://www.facebook.com/344860212215559/posts/4862918407076361/
المراهقة ٤ ( التغيرات )
https://www.facebook.com/344860212215559/posts/4882340311800837/

هو ليه اتغير اووي كدة ؟!!

في المرحلة دي بتحصل تغيرات في كل حاجة
▪️تغيرات عاطفية :
يبدأ يمر ب mood swings
شوية تلاقيه هادي ورايق وبيضحك
وفجأة يقلب تلاقيه قاعد ساكت وحزين

▪️تغيرات جسمانية:
كل جسمه بيتغير وينمو عضمه ومفاصله بتوجعه
تلاقيه مكسر ومش قادر يتحرك .. مكسل ونايم في السرير بيقوم بالعافية.. عايز ينام كتير .. دة بيبقى غصب عنه

▪️بيحصل نمو معرفي:
يبدأ يفكر في مواضيع كتير ويسأل عن حاجات مهمة
ويقول رأيه في قضايا عميقة

▪️بيحصل تغيير ونمو عقلي:
خصوصاً المنطقة الأمامية من المخ
بتكون لسه ماكتملتش
ودي مسئولة عن الأخلاق ..والتحكم في الغضب والمشاعر ..حل المشكلات
فنلاقي ردود فعل عنيفة .. مش بيقدر يسيطر على غضبه .. افعاله فيها تهور .. حساس بزيادة

نبقى مش عارفين هو كبر وبقى ليه رأي
ولا لسه صغير و طايش
وهو نفسه مش بيبقى عارف ومحتار

مطلوب مننا
✓ نطمنه ونعرَّفه ان دة طبيعي ولازم يحصل..مهم يبقى على علم بالتغيرات دي عشان يفهم نفسه
✓ نوصلَّه ان احنا متقبلينه دايما ومعاه
✓ نحاول نعلمه اكتر عن التحكم في الغضب
وطريقة التعبير الصح عن المشاعر
[ وفي خطوات عملية تساعده على دة ]

#المراهقة (٤)


المراهقة ١ ( مرحلة وهتعدي )
https://www.facebook.com/344860212215559/posts/4842730242428511/
المراهقة ٢ ( انا مين ؟)
https://www.facebook.com/344860212215559/posts/4852770484757820/
المراهقة ٣ ( التمرد )
https://www.facebook.com/344860212215559/posts/4862918407076361/

واحد بيقول لما كنت في سن المراهقه بدأت تيجي في دماغي أسئلة كتير عن الدين
فجبت كتاب اسمه حوار مع صديقي الملحد
لدكتور / مصطفى محمود
هو كتاب مفهوش حاجة وحشة
وبيجاوب عن الاسئلة بطريقة علمية
وبدات اقرأ فيه بابا دخل عليا مرة شافني ماسكه
اتخض وقعد يزعق ايه اللي بتقراه دة ..
استغفر الله العظيم تعالي شوفي ابنك..
وكلام كتير كأني ضعت خلاص
بيقول انا كملت الكتاب بردو بس من غير مايعرف بقيت اشيله في الدرج تحت الكتب واقرا فيه وهو مش هنا

اكتر صفة بتميز المرحلة دي هي التمرد
تمرد على كل حاجة قيم.. عادات ..قواعد الأسرة
يبدأ يختبر تمسكنا بيها..حتى الدين
يبدأ يفكر ويعترض ويرفض

ليه بيحصل كده ؟
لأنه في مرحلة بين الطفوله اللي بيكون فيها تابع لأسرته في كل حاجة.. والشباب اللي حينفصل عن اهله ويستقل بشخصيته وأفكاره

التمرد دة طبيعي لانه بينمي عنده التفكير وبيساعده
يبقى عنده شخصية مستقلة في المرحلة اللي بعد كدة مرحلة الإنفصال
[ لو ماحصلش تمرد في المرحلة دي بيكون في مشاكل في مرحلة الانفصال ]

محتاج مننا ايه عشان نعدي المرحلة دي بسلام ؟
تفهُم .. محتاج حوار بهدوء
خليه يحس ان اي موضوع قابل للنقاش
مفيش موضوع ممنوع ولا عيب ولا حرام ..
بلاش احساس كأنه عمل جريمة انه بيفكر أو معترض
لو عملتي كدة مش حيتكلم تاني واعرفي انه حيروح يسأل بره ويتكلم في اللي عايزه
بس ساعتها مش حنضمن ايه الافكار اللي حتوصله

طبيعي صعب علينا نشوفه بيتمرد وبيرفض كل القواعد والثوابت ..
مش حيساعدنا غير حوار منطقي بهدوء
عشان مايبعدش زيادة ويعند اكتر
مع التأكيد انك بتحبيه ويهمك بس مصلحته
تسمعيه وتقولي رأيك
عشان اي عنف بتستخدميه او انك تحاولي تجبريه
انتي بتشوفي بنفسك بيحصل ايه ..
ومش بيجيب نتيجه زي ما كان صغير ..بيعند وبيعلي صوته وبيغلط

الكلام دة ممكن يمشي على اي حاجة بيحاول يعند ويتمرد ويرفضها وانتي عارفه ان فيها مصلحته
▪️حوار بهدوء
▪️كلام بالمنطق عشان يقتنع بأسبابك
▪️التأكيد على حبك مهما عمل
▪️اتفاقات ترضيكوا انتوا الاتنين وتتابعي تنفيذها بحزم

[ ان شاء الله يكون في بوست عن الاتفاقات مع المراهقين بعد ما نخلص سمات المرحلة ]

#المراهقة ( ٣ )

المراهقة ١
https://www.facebook.com/344860212215559/posts/4842730242428511/
المراهقة ٢
https://www.facebook.com/344860212215559/posts/4852770484757820/

لما الأطفال يعملوا تصرف غير مسئول او فيه عدم احترام أديهم فرصة يعوضوا عن اللي عملوه بإنهم يعملوا حاجة تخلي الشخص اللي أساءوا ليه يشعر بتحسن

عمل الإصلاح دة شئ مشجع بيعلم الطفل تحمل المسؤولية.. الأطفال بيحسوا احساس حلو تجاه نفسهم لما يساعدوا غيرهم

بعض الامهات بتعتقد ان مساعدة الأطفال انهم يشعروا احسن بعد ما عملوا تصرف غلط دة كدة كأنهم بيكافؤهم
على غلطهم
لأ.. لاحظي ان الأطفال مش بيفلتوا بالغلط اللي عملوه لأ دة انتي بتحاولي تشجعيهم يصلحوا الخطأ دة
ودة بيعلمهم يتحملوا المسئولية باحترام وكرامة

اسمها مرحلة الهوية
المراهق فيها عايز يكتشف نفسه
انا مين .. ؟ انا مش تابع انا مختلف عن اهلي
فيبدأ يجرب حاجات جديدة
ويبدأ يبقى عنده اسرار كتير مش بيشاركها مع اسرته
يشاركها مع اصحابه بس عشان هما هيفهموه وبيكون مرتاح معاهم

- تلاقي مكالمات التليفون اللي بصوت واطي
- التشات طول اليوم
- موبايله اللي بباسورد طبعاً محدش يعرفها
- مش عايز حد يدخل أوضته
- مش بيقول هو رايح فين
- يضايق لو فتحتي شنطته او دُرجه

طبعا كل التصرفات دي تبدأ تقلقنا
نبدأ نفتش ونتجسس ونراقب وننتقد اي تصرف
فيفقدوا الثقة فينا و يداروا اكتر

وأوقات كتير بيكونوا مش بيعملوا حاجة غلط
هو بس عايز يحس بأنه كائن منفصل مستقل له خصوصية واسرار

طب هو عايز ايه ؟
- مساحة عشان يكتشف نفسه
اديله المساحة دي

▪️يتكلم مع صحابه من غير ما نتريق على كلامهم ومواضيعهم

▪️ نسمحله يخرج معاهم ( بالاتفاق على مواعيد مناسبة طبعا )..
من غير ما نحسسه كل ماينزل مع صحابه بالذنب عشان بيفضلهم علينا
[ وحنتكلم ان شاء الله بالتفصيل عن الاتفاقات بتكون ازاي عشان تتنفذ]

▪️يعبر عن رأيه من غير ما نقلل منه اونقول عليه تافه

▪️يقرا اللي عايزه من غير ما نقعد ننتقد اختياراته وياريت نتناقش معاه في اللي بيقراه بهدوء

▪️نحاول نحببه انه يقعد معانا ودة بيكون بالكلام الكويس والهزار بعيد عن اللوم والنقد ..ونسأله عايز تتكلم في ايه

وكوني متأكدة ان الكذب بيبدأ مع كتر النقد واللوم والعتاب على كل حاجة

طبعا وارد جداً في رحلة اكتشافه لنفسه دي يجرب حاجة مش صح زي السجاير مثلا..
اتأكدي أن الغضب والشدة في التعامل مع الموقف حيخليه يكمل في اللي هو فيه
أتعاملي بهدوء وليكي حرية الاختيار
يا إما كأنك ماتعرفيش واتكلمي في الموضوع بصورة غير مباشرة...
يا إما تواجهيه وتسمعي منه بهدوء ليه بيشربها وقولي رأيك في الموضوع وانك خايفة عليه مع التأكيد انك متقبلاه وبتحبيه مهما حصل ودة شئ مش حيتغير...

كلامك حيعلق معاه وحيفكر فيه حتى لو الموضوع اخد وقت شويه المهم تحافظي على العلاقة بينكوا.

#المراهقة ( ٢ )

الجزء الأول من هنا
https://www.facebook.com/344860212215559/posts/4842730242428511/

مش دة ابني اللي ربيته ..دة كأنه واحد تاني معرفوش"

اول ما يبدأ الابن / الابنة يدخل في مرحلة المراهقة تظهر تصرفات غريبة ما كانتش موجودة قبل كدة
تمرد على كل حاجة اتربى عليها ..
عصبية ويعلي صوته..
يقعد كتير لوحده ..
يقضي اكتر الوقت مع صحابه..
ستايل غريب ..
كسل وتضيع وقت وغيرها كتير
كأنه شخصية تانية
تصرفاتهم الجديدة دي بتخلينا نستغرب
ونحس انهم بيضيعوا مننا
ونبدأ نتصرف معاهم بعنف وتوتر والخناقات تكتر والمسافة بينا تزيد
اهم حاجة خليكي فاكرة ان دي مرحلة وهتعدي
مرحلة زي اي مرحلة مر بيها قبل كدة زي ما كان بيتعلم المشي مثلاً ..
وهي دي مواصفات المراهق الطبيعي ومفيش حاجة اسمها المراهق المثالي

محتاج منك ايه في المرحلة دي ..؟
- عايز دعم و حب غير مشروط
( يفضل واصله انك بتحبيه و هو عندك اهم من اي حاجة)
- قواعد واضحة واتفاقات بينكم وحزم في تنفيذها

اللي عليه ابنك دلوقتي مش هي شخصيته اللي في المستقبل .. لا افكاره ولا تصرفاته ولا شكله
كله هيعدي مرحلة المراهقة بتغيراتها كلها .. المهم حيتعلم ايه في النهاية
طبعا بيختلف من شخص للتاني
مش كل مراهق بتظهر عليه السلوكيات كلها
حنتكلم ان شاء الله المرات الجاية عن الصفات دي بالتفصيل
قوللنا اكتر صفة لاحظتيها ظهرت وبتتصرفي ازاي معاه ؟!

#المراهقة (١)

الطفل اللي عنده سلوكيات كتير وحشه مش عجباكي دة اكتر حد محتاج التشجيع 💪
حاولي تلاحظي أي حاجة كويسه بيعملها ف اليوم أو أي تقدم حتى لو بسيط وشجعيه عليه
لأن اللي بتركزي عليه هو اللي بيزيد فبدل ما طول الوقت نقعد ننتقد فيه
ونلفت نظره للحاجات الوحشة اللي بيعملها (انت مهمل/ انت كسول /انت مؤذي/انت شقي) 😠
وبتلاحظي انه بيزيد مش بيقل ركزي ع الحلو عنده عشان يزيد
(دوري حتلاقي اكيد) 😍

" يووه هو كل يوم صلاة.. انا زهقت بقى !! "
دة كان رد طفل على مامته وهي بتسأله صليت ولا لسه

كتير من الامهات موضوع الصلاه بالنسبةلهم فعلا مشكلة يومية
خناقات وزعيق بسبب تطنيش الأولاد للصلاة وانها تقيلة عليهم
ولو قاموا بيقوموا بالعافيه عشان يصلوا😏

المشكلة اللي كتير مننا بيقع فيها أن أول ما بنبدأ
بنبدأ نعلمه الوضوء والصلاة ويبقى كل هدفنا
ازاي نخليه يصلي ال5 صلوات في اليوم بأي طريقة
وفي الغالب بتكون النتيجة ان الطفل ممكن يتحمس في الأول
عشان حاجة جديدة وبعدين يبدأ يزهق وتبقي بتشدي فيه وتتحايلي عشان يقوم يصلي

✔ محتاجين يكون هدفنا الأهم انه يحب ربنا الأول وعشان يحبه لازم يعرفه
🌟يعرف أسمائه وصفاته (مش يحفظها بس) يعرف معانيها ويحس بيها في حياته اليوميه

🌟احكيله عن ربنا ورحمته وحبه لينا وأنه دايما معانا وسامعنا وشايفنا ❤

🌟عوديه يرجع له في كل أموره..يكلمه.. يدعيه يثق انه معاه ومش حيسيبه ابدا..

🌟عرفيه ان كل النعم اللي عندنا دي ربنا اللي رزقنا بيها.. دايماً فكريه بكدة

🌟علميه دينه احكيله عن سيرة النبي..قصص الأنبياء.. قصص الصحابه.. أركان الإيمان

🌟كلميه على الجنه و جمالها

🌟علميه عن الصلاة وأهميتها وانها عماد الدين وهي الصلة بين العبد وربه

🌟ازرعي محبة الله في قلبه.. خلي ربنا أولوية في حياته بعد كدة علميه الفرائض
لأن اول مابتحصل المحبه بيكون تنفيذ الأوامر واجتناب النواهي أسهل عليه وتلاقيه مقبل علي العبادات اكتر لأن حيبقى كل همه دلوقتي رضا اللي بيحبه..رضا الله سبحانه وتعالى ❤

✔ مهم جداا يشوف اهتمامك بالصلاة وحرصك عليها وأنك ب تسيبي اللي في ايدك عشان الصلاة حتى لو كنتي في مكان برة البيت بتحاولي تشوفي مكان تصلي فيه عشان ماتفوتش..ماتنسيش انهم بيتعلموا بالقدوة

✔ ابدأي بقى شجعيه على الصلاة يبقى له سجادة صلاة بتاعته.. واسدال لو بنت
في ناس بتعمل حفلة للطفل اول ما يكمل سبع سنين وتجيب تورتة وهدية وحاجات الصلاة
عشان تفرح الطفل وتبين أهمية الموضوع

✔ علميه واحدة واحدة وماتستعجليش عليه وشجعيه دايما لما يصلي بالكلام الحلو
ادعيله.. قوليله صوتك حلو في القرآن..صلاتك مظبوطة.. أحضنيه

✔ طبعا حلو اوي في الأول على أد ما تقدري تصلوا مع بعض
وأنك تكليفه بمهمة ويبقى له دور دة بيخليه متحمس اكتر
زي انك تقوليله أما تسمع الآذان تعالى قولي.، هو اللي يفكرك.. ممكن تخليه يقيم الصلاة مثلا..

(كانت أم قبل كدة بتحكي انهم متفقين على قاعدة في البيت
كل واحد منهم له يوم مسئول عن شوية حاجات أول ما يسمع الأذان يقوم يعملها
زي انه يقفل الراوتر.. والتلفزيون لو مفتوح..ويلف على كل اللي في البيت يفكرهم يسيبوا اللي بيعملوه ويستعدوا للصلاة ) 👍

✔ طبعا لازم تتابعي معاه ممكن في الأول تلاقي صعوبة انه يواظب على ال 5 صلوات
هو لسه في مرحلة التعود... أبدأي مثلا فترة اتأكدي انه صلي الصبح قبل ماينزل
والعشاء قبل ماينام..واحدة واحدة اتأكدي انه صلي العصر مثلا قبل المذاكرة..
خلي الموضوع بالتدريج

❌في شوية ممنوعات كدة الأفضل ما نعملش حاجة منها

◀بلاش زعيق وضرب على الصلاة هما في مرحلة تدريب وتعود
حتلاقيه شوية مواظب وشوية مكسل دورك كل فترة تفكريه بأهمية الصلاة وفضلها

◀ياريت بلاش تخويف بعذاب النار وعذاب القبر في الفترة دي
وبلاش كلام زي ربنا مش حيحبك وحيزعل منك وحيدخلك النار لأن دة مش حقيقي ..
مفيش الكلام دة دول اطفال عايزين نحببهم في ربنا وفي الصلاة
قال رسول الله صلى الله عليه وسلم : "إن الله رفيق يحب الرفق في الأمر كله"

◀الأفضل بلاش الحافز المادي والرشاوي اللي زي مثلا:
لو صليت الاسبوع كله ليك هديه.. وكل صلاة حتصليها ليك نقطة ونحسب عدد النقط والكلام دة
لأن لو ظاهرياً حسيتي انه مفيد وبدأ يواظب على الصلاة فهو مواظب عشان الهدية والمكافأت وحتلاقيه طول الوقت يسأل على الهدية.. وحتجبيلي ايه.. وانا عايز المرة الجاية كذا..
لأ دي مش عاجبني هاتي كذا..
ولو وقفتي الهدايا والحوافز تلاقيه يبطل ويهمل في الصلاة
لأن اللي كان بيحفزه خلاص مش موجود
واحنا هدفنا انه يحب الصلاة ويكون اللي بيحركه حافز داخلي
وهو حب ربنا مش خوف من عقابك ولا مستني منك مكافأة..
هدفنا يحافظ على الصلاة في وجودك وغيابك.. عشان ربنا مش أي حاجة تانيه 🙏

الموضوع محتاج صبر وحياخد وقت ومتابعة وتذكرة كتير
اعملي اللي عليكي واتعبي معاهم وسيبي النتائج على ربنا وافتكري دايماً
أهم حاجة الدعاء "رب اجعلني مقيم الصلاة ومن ذريتي ربنا وتقبل دعاء"
وربنا يجعلهم ذرية صالحة وينبتهم نباتا حسناً ❤

*ياريت لو حد جرب حاجة ساعدت أن ولاده يلتزموا بالصلاة يشاركنا بيها في الكومنتات كلنا نستفيد 🌸