مركز الفهد للتدخل المبكر

مصطفى دخل المدرسة

مصطفى… طفل صغير عنده 12 سنة، كفيف، كان بيواجه الدنيا بتحديات أكبر من سنه، أكبر من أي طفل عادي ممكن يمر بيها. مصطفى ماكنش بس بيعاني من إنه كفيف، لا، ده كمان كان عنده اضطرابات خلت حياته وحياة أهله مليانة قلق وتعب ومجهود. الطفل اللي لما جيت أتعرف عليه لأول مرة، ماكنش حتى بيعرف يقول اسمه صح. كان بيقول: "أنا اسمي مصطخى". ومن هنا بدأت الحكاية.

السنتين اللي فاتوا دول كانوا أصعب سنتين، وأجمل سنتين في نفس الوقت. كل جلسة كنت بشوف مصطفى بيكافح فيها، كنت بحس إن الدنيا ممكن تتغير فعلاً. كنت بشوف طفل صغير، لكنه بطل كبير. مصطفى اللي لما كان يضحك بعد ما يتعلم حاجة جديدة، كانت ضحكته هي اللي بتعلّمني أنا أتحمل أكتر وأصبر أكتر.

مصطفى عنده قدرة على الحفظ تخلي أي حد عادي يعجز قدامها. ما شاء الله، طفل عنده طاقة مخبّية جوه، كان مستني حد يشوفها وينقذها من العتمة. وده اللي كنت بعمله كل يوم، طول السنتين دول. كنت بشوفه بيتغير قدامي. اللي كان بيقول "مصطخى" بقى بيقول: "أنا مصطفى". اللي ماكنش يقدر يركز لخمس دقايق، بقى يحفظ صفحات بحالها. اللي كان منعزل، بقى بيضحك ويتكلم ويشارك.

وبعدين… جت اللحظة اللي كنت بستناها. "مصطفى دخل المدرسة". جملة صغيرة، بس ما فيش حاجة أصعب ولا أعمق من إحساسها. تخيل تقول لوالدته: "مصطفى خلاص بقى زي أي طفل عادي، ليه مكان في المدرسة، ليه مكان في الحياة". الفرحة دي زي حلم بيتحقق، بس الغضب؟ الغضب موجود.

غضبان من قوانين جامدة بتكسر القلوب بدل ما تبنيها. قوانين بتخلي طفل زي مصطفى، عنده قدرات ومعجزات، يستنى سنتين علشان ياخد حقه الطبيعي في التعليم. المدرسة اللي المفروض تكون بيت آمن لأي طفل، بقت مكان مفيهوش حتى فكرة عن إزاي يتعاملوا مع طفل عنده شوية اضطرابات. مين اللي عنده المشكلة هنا؟ مصطفى ولا إحنا؟

فرحتي بمصطفى لا توصف، بس غضبي على الواقع أكبر. طفل زي مصطفى ماكانش المفروض يحارب لوحده. كان المفروض يلاقي مجتمع بيشجعه، مدرسة بتدعمه، قوانين بتحميه. مش يبقى حلمه إنه يبقى "زي أي طفل عادي"، ده المفروض يكون حقه، والدستور قال كده.

مصطفى دخل المدرسة. خبر ممكن يغير حياة أي حد، وأنا واحد منهم. اللحظة دي بتثبت إن كل تعب، كل كلمة تشجيع، كل جلسة، كانت بتقربنا من الحلم. مصطفى النهارده مش مجرد طفل دخل المدرسة. مصطفى النهارده رسالة لكل طفل عنده تحدي. رسالة لكل معلم وكل مدرسة وكل قانون: شوفوا مصطفى، وتعلموا منه.

مصطفى مش لوحده. وعمري ما هسيبه لوحده. النهارده، بدأنا صفحة جديدة، حلم جديد. وأنا شايف مصطفى بضحكته الجميلة، شايف المستقبل بنوره.