Reem Ghanem for English learning

🤯 ناس كتير بتتلخبط بين:
صعوبات التعلم – متلازمة داون – التوحد – فرط الحركه وتشتت الإنتباه (ADHD)
يلا نبدأ النهارده بشرح مبسط عن الفرق بين صعوبات التعلم وفرط الحركه وتشتت الإنتباه ⬇️

✏️ أولاً: صعوبات التعلم
صعوبات التعلم مش معناها إن الطفل عنده مشكلة في الذكاء، بالعكس… الطفل ممكن يكون طبيعي جداً:
عنده مهارات، اجتماعي، وذكي، لكن مش بيعرف يتعلم بالطريقه التقليديه زي باقي زمايله.

🤓 ممكن تلاحظ إنه:

بينسى الحروف أو الكلمات بسرعه

بيتلغبط في التهجي والكتابه

بيتأخر في القراءة رغم إنه بيحاول

مش بيفهم التعليمات بسرعه

💡 والمهم نعرف إن صعوبات التعلم ممكن:

تيجي لوحدها

أو تيجي مصاحبه لحالات تانيه زي: التوحد، متلازمة داون، أو ADHD

وده السبب إن أخصائي صعوبات التعلم لازم يكون فاهم ويتعامل مع كل الحالات دي، علشان يفرق ويعرف يبدأ منين ويشتغل إزاي.

⚡ ثانياً: ADHD (فرط الحركه وتشتت الإنتباه)
ده طفل مختلف شويه:

دايمًا بيتحرك، مش بيعرف يقعد مكانه

بيقاطع الناس ف الكلام، ويرد قبل ما يسمع السؤال كامل

مش بيركز ف اللعب، وسهل يتشتت

بيتصرف من غير ما يفكر (اندفاعي)

بيحب يجرب أي حاجه حتى لو خطر

بينسى حاجته، بيضيع أدواته، فوضوي

صعب يمشي على روتين أو نظام

لكن خليك فاكر أهم حاجه:

✨ طفل الـADHD ذكي جدًا، بل ممكن يكون فائق الذكاء لو اتعلّم بطريقه تناسب دماغه 💡
بس المشكله إنه محتاج طريقة مختلفة، أكتر بصريه، أكتر حركه، أقل كلام نظري.

🎯 وأحيانًا بيكون الطفل عنده ADHD + صعوبات تعلم، وده محتاج خطة تدخل مناسبة ومتابعة مستمرة.
أ/ريم غانم - أخصائي صحة نفسية - ماجيستير تربية خاصة
📞 012 11308378

التوحد ليس اعاقة ، بل إنه قدرة مختلفه

يعني ايه لما آجي أكلم ولي الأمر علىٰ الواجبات اللي مبتتعملش ولا مذاكرة بتتذاكر ومفيش متابعة في البيت يجي يقلب الترابيزة ويقولي شدي عليه يا مس !؟

والله بجد أعمل ايه؟
آجي أعيش معاكم وأتابع أنا في البيت؟!

Some of our customers' reviews 🧡

📌 الاستقرار الاسري وعلاقته بتحصيل الطفل

بصو يا جماعه، من اهم الاسباب الي بتأثر علي الطفل وبتخليه يعاني من صعوبات التعلم هي الاسره، ودي انا شخصيا بشوفها اهم نقطه في الموضوع كله.

الاب والام طول ما احنا جبنا طفل ف احنا مسؤلين عنه مسئوليه كامله، مش بس مصاريف واكل وشرب، لكن كمان الحب والاهتمام والاحتواء… لان دا بيأثر علي نفسية الطفل بشكل مباشر.

لازم نوفر للطفل جو فيه استقرار وهدوء، البيت يبقي فيه ترابط وأمان. الطفل لما يحس انه في بيت مستقر بيتعلم ويركز اكتر.

❌ مينفعش الطفل كل شويه يشوف خناقات بين بابا وماما، ولا يشوف ماما بتسيب البيت وتاخده وتروح، ولا يشوف بابا بيضرب ماما او بيعنفها.
❌ مينفعش كمان نضرب الطفل ضرب مبرح، دا بيكسر شخصيته ويخليه خايف طول الوقت.

✅ لازم نحتويه ونحضنه ونطبطب عليه، ونتكلم معاه لما يحصل مشكله، ونفهمه الدنيا.
✅ لو حصل انفصال بين الاب والام، مينفعش نستخدم الطفل كسلاح او كوسيلة ضغط على بعض، ولا نحكي عن الطرف التاني بأسلوب وحش قدامه. بالعكس، نفهمه ان احنا اختلفنا وانفصلنا ودا طبيعي بيحصل مع ناس كتير، لكن انت مالكش ذنب، واحنا لسه بنحبك وبنهتم بيك.

👩‍🦰 البنات غالبا بتحتاج الام اكتر، 👨 الاولاد بيحتاجو وجود راجل في حياتهم اكتر، ودا دور الاب.
💡 مفيش اي حد في العالم يقدر يعوض دور الام او دور الاب.

وفي الاخر، الاولاد امانه، وربنا هيسألنا عليهم، فحافظو علي الامانه وربوهم في بيئة مليانه حب واحترام، لان دا هيفرق معاهم طول حياتهم.

أ/ريم غانم - أخصائي صحة نفسية - ماجيستير تربية خاصة
📞 01211308378

بصي يا مامي ❤️، الاخصائي مش ساحر 🪄 ولا عنده عصاية سحرية 🧙‍♂️ هيخلّي الطفل يتغير فجأة. شغله مهم جدًا 💪، بس مش هيقدر ينجح لو اشتغل لوحده من غير تعاونك 🙌.
الطفل بيقعد مع الاخصائي في الجلسة ساعة أو ساعة إلا ربع ، غالبًا مرتين في الأسبوع ، لكن إنتي معاه ٢٤ ساعة طول اليوم ⏳. يعني إنتي الأساس في تطبيق كل اللي بيتعمل في الجلسة 📝.

دورك إنك تمشي على الخطة اللي الاخصائي بيحطها 📋، وتنفذي التعليمات في البيت 🏡، سواء كانت واجبات ✏️، أنشطة ، أو حتى تنظيم مواعيد النوم والأكل 🍽️.
لو إنتي قصرتي أو كسلتِ ، دا هيأثر على تقدم ابنك حتى لو الاخصائي شاطر جدًا 🌟.

أوقات كتير نلاقي التقدم ضعيف 📉، ولما نراجع نكتشف إن المشكلة مش في الاخصائي، لكن في عدم التزام الأم بالخطة . وساعتها لازم نقف وقفة ⛔ ونشوف إيه اللي بيحصل، لأن الاخصائي مهما كان شاطر ، مش هيقدر يشتغل لوحده.

إحنا دايمًا بنقول: الاخصائي يرسم الطريق ، لكن إنتي اللي بتمشي ابنك فيه . ولو الطريق اتساب، الطفل هيفضل واقف مكانه 🛑 أو هيرجع لورا .

افتكري دايمًا 💡: التغيير محتاج وقت ، التزام 📌، وصبر … مش هيحصل في يوم وليلة .

أ/ريم غانم - أخصائي صحة نفسية - ماجيستير تربية خاصة
📞 01211308378

إزاي كأم تعرفي تقيّمي الأخصائي اللي بيشتغل مع ابنك ماشي صح ولا لأ؟ 🤔
الموضوع مهم جدًا عشان منضيعش وقت الطفل في جلسات مش مفيدة.

بصي يا ستي، إحنا النهارده هنتكلم عن دور الأخصائي الأكاديمي 👩‍🏫.
الطفل ممكن يبدأ يمسك القلم من سن 3 سنين ونص لحد 4 سنين ونص، بس ده بيعتمد على قوة عضلات إيده. الأخصائي الشاطر هو اللي يقدر يحدد إذا كان الطفل جاهز يمسك القلم ولا نستنى شوية.

طالما الأخصائي بيشتغل "أكاديمي" يبقى شغله مع الطفل أكاديمي بحت، مش جلسات مهارات.
جلسات المهارات حاجة منفصلة، ومش المفروض يخلطوا بينهم.

والأهم قبل ما نمسك الطفل القلم، لازم يكون إدراكه كويس وعارف المصطلحات الأساسية بالعربي الأول.
ليه؟ لأن الإنجليزي مش لغتنا الأم، ولازم الأول يكون متقن لغته الأم عشان ميحصلش لخبطة في دماغه. حتى لو عنده لدغات في الكلام، هنا بييجي دور أخصائي التخاطب.

بعدها بنبدأ نخليه يمسك القلم بطريقة صحيحة، ونحببه فيه، ونخليه يكتب بنفسه.
💡 ملاحظة مهمة: النقط اللي الطفل يمشي عليها مش تعليم حقيقي، ده بس بيعلمه يقلّد، لكن الكتابة الصح إنه يعرف الحرف ويتعلم يكتبه من نفسه باتجاهاته الصح.

الأكاديمي يعني شغل "شفوي + تحريري":

شفوي: الطفل يشوف الحرف ويعرف ينطقه.

تحريري: الطفل يمسك القلم ويكتب الحرف صح.

هنا كمان لازم نختبر الذاكرة البصرية (يشوف الحرف ويقوله) والسمعية (يسمع اسم الحرف ويكتبه).
لو لقينا مشكلة في أي ذاكرة، بنعمل تمارين لتقويتها وتثبيت الحروف.

📌 كمان مهم نمشي على نظام غذائي غني بالأوميجا 3، لأنها بتقوي التركيز والذاكرة.
🚫 والأدوية؟ الأخصائي ملوش دعوة بيها، دي مسؤولية طبيب الأطفال بس.

وفي الآخر، الأم الذكية هي اللي تتابع وتتأكد إن شغل الأخصائي بيجيب نتيجة، مش بس تضيع وقت وفلوس.
أ/ريم غانم - أخصائي صحة نفسية - ماجيستير تربية خاصة
📞 01211308378

النهارده عايزين نتكلم عن الأبطال الحقيقيين💪
أمهات الأطفال اللي عندهم صعوبات تعلم.
الست دي مش محتاجة مننا غير الدعم... على قد ما نقدر. 🙏
بلاش نوجّه ليها انتقادات، لأنها أكتر حد حاسس باللي ابنها بيمر بيه.

أغلب الأطفال اللي عندهم صعوبات تعلم، بيكون عندهم كمان مشاكل سلوكية زي:
الاندفاع، العصبية، عدم التركيز، ممكن يوقع حاجه وهو ماشي، أو مايعرفش يتعامل مع أطفال من نفس سنه. ✊
وكل حالة غير التانية، يعني اللي ينفع مع طفل، ممكن ماينفعش مع غيره.

ساعات نكون في موقف محرج، بس الحل مش إننا نتدخل أو نلوم الأم. ❌
لو شوفنا سلوك مش طبيعي من الطفل، يا نوجهه بهدوء... يا إما نسيب الموقف للأم تتصرف فيه. ✅
بلاش نبصلها بنظرات فيها استغراب أو حكم.
هي عارفة إن عندها تحدي كبير... ومش ناقصة لوم أو كلام يوجع.

بلاش نقول إنها مقصّرة أو "مبَالغة"، بالعكس…
هي بطلة، ماشية في مشوار صعب جدًا، بين مراكز تعديل سلوك، وتنمية مهارات، وجلسات مع أخصائيين.
وكمان في البيت عندها تمارين وأنشطة لازم تتابعها.

دورنا كمجتمع، كناس حواليها، إننا نكون سند ليها...⚠️⚠️
يا بكلمة طيبة، يا على الأقل نسكت، وما نرميش عليها اللوم.

كل دعم بسيط منها ليها، بيفرق جدًا.
الكلمة الحلوة ساعات بتديها طاقة تكمل يومها كله.
هي مش لوحدها… ولازم تحس إن اللي حواليها فاهمين ومتقدّرين تعبها ومجهودها. 🧡
أ/ريم غانم - أخصائي صحة نفسية - ماجيستير تربية خاصة
📞 01211308378

طريقة جديدة لتدمير تركيز طفلك!! ⚠️⚠️
بصو يا جماعة، الموبايلات والتابلتات دلوقتي بقت في كل بيت، وكل طفل ماسك واحد! 📲
آه والله، وساعات بنستخدمها كوسيلة نلهي بيها العيال ونخلص دماغنا، وانا معاكم... بس والله ليها أضرار أكتر بكتير من نفعها. ❌❌

يعني بدل ما الطفل يقعد بالساعات ع التابلت، ممكن نجيب له بازل بسيط يلعب بيه، أو ميكانو يركّب فيه ويشغّل مخه.
ولو الميزانية مش مساعده، ممكن نجيب نوعين تلاتة مكرونة (مثلاً قلم وصدف وصغيرة) ونخلطهم ف طبق ونقول له: "يلا يا بطل افصل كل نوع لوحده!" 🧮
هو هيحس إنها لعبة... بس دي لعبة بتزود التركيز وبتنمي مهاراته الحركية والمعرفية.

كمان ممكن نستخدم حاجات من المطبخ!
زي دوبارة مثلًا، ونخليه يلضمها في فتحات مصفاة أو علبة قديمة مثقوبة، أو حتى نديه خلة أسنان ومعاها قطع سفن أب أو كور فوم صغيرة يدخلها فيها...
كل الحاجات دي بتشغل مخه وإيده في نفس الوقت. 💡

فيه ألعاب كتير جدًا تنمية مهارات متوفرة في المكتبات أو أونلاين بأسعار بسيطة، بدل ما نسيبه غرقان ف الموبايل طول الوقت. 🧩

بصراحة، الموبايل والتابلت بيسحبوا تركيز الطفل، بيقللوا انتباهه، وبيخلوه مشتت ومتوتر.
أيوه، احنا ممكن نظن إننا بنسليه، بس الحقيقة إحنا كدا بندمر تركيزه وحافظته، وبنزود مشاكله السلوكية كمان. 📌

يعني لو انتي عايزة ابنك يبقى عصبي، ميتذكرش، قليل الانتباه، وهايبر وعنيف...
يبقى خليه قدام الموبايل أكتر من ربع ساعة كل يوم من غير فاصل!

الموبايل مش للعيال، دا للكبار... ✅
والأطفال لو هيستخدموه، يبقى في الويك اند بس، وساعة واحدة مقسمة على ٤ مرات، يعني كل مرة ربع ساعة بالكثير، مش أكتر. ✅✅

أ/ريم غانم - أخصائي صحة نفسية - ماجيستير تربية خاصة
📞 01211308378

تغذيه ونظام حياه طفل صعوبات التعلم
⚠️⚠️
احنا لازم نخلي بالنا من أكل ولادنا، خصوصا اللي عندهم صعوبات تعلم، الاكل الصحى بيأثر جامد على التركيز والمود بتاعهم.

يعني النظام بتاعهم لازم يكون فيه بروتين، مش شرط لحمه وفراخ بس، لا، حتى لو بروتين نباتى زي المشروم، وخضار كتير والبان وبيض وجبنه قريش، دى احسن حاجه بجد.
🍎
بس خلى بالك، لازم نبعد عن حاجات كتير بتبوظ الدنيا:

المصنعات زى السوسيس والهوت دوج والبرجر والحجات دى.
❌❌
الوجبات السريعه اللى مليانه زيوت تقيله.

الاجبان المعلبه والالبان اللى بتتباع فى علب، كلها مواد حافظه وحجات مش صحى.

الشوكولاتات والسكريات الكتير، دى بتطلعهم بره التركيز وممكن تزود عندهم الحركه زياده عن اللزوم.
❌❌
احنا ممكن نستبدل السكر العادى فى التحليه بمعلقه واحده عسل نحل، بس مش نغرقها برضه.
✅
كمان المقليات زى البطاطس والبانيه والحجات دى، بدل ما نرميهم فى الزيت، نعملهم فى الفرن بدهنه زيت خفيفه، تطلع طعمه حلو وبرضه صحى.

والبيبسى والمشروبات الغازيه والشيبسى، بلاش خالص، مفيهمش اى فايده غير انهم بيلخبطوا الجسم كله.

السمك بقى مهم مهم مهم، مرتين فى الأسبوع على الاقل، علشان الاوميجا 3 اللى بتساعد على التركيز والذاكره.
✅
غير كده النوم بقى... مهم جدا النوم المنتظم، من 8 لـ 10 ساعات، يعنى الساعه 12 بليل دى ميبقاش لسه صاحي، لازم ينام بدرى، دا بيأثر على النمو العقلى وكمان التركيز والمزاج.

لو مشينا على الكلام ده، والله هنشوف فرق كبير ف ولادنا فى وقت مش بعيد، التركيز يزيد والمود يتحسن حتى طريقتهم ف التعامل تبقى اهدي.
أ/ريم غانم - أخصائي صحة نفسية - ماجيستير تربية خاصة
📞 01211308378

ازاي تتعاملي كـ مُدرسة مع طفل عنده صعوبات تعلم؟⚠️⚠️

بُصي... أي مُدرسة حتى لو مش أخصائية تربية خاصة، بتقدر تلاحظ مين في الفصل عنده صعوبات تعلم. وده بيبان أكتر لما تلاقي الطفل عنده شوية تصرفات مش مظبوطة أو مشاكل سلوكية. ساعات تلاقيه مش مركز، مش بيكتب، بيتأخر عن صحابه في الفهم والنقل.

أهم حاجة: التشجيع، ثم التشجيع، وبلاش نهمش الطفل ده أو نعتبره مش موجود! ✊🏻
يعني بلاش نقول لنفسنا: "هو كده كده مش بيفهم!" ❌
لا بالعكس... هو بيفهم كويس ومركز كمان، وبياخد باله إنك مش مهتمة بيه زي باقي الكلاس.

ولو حس إنه مش قدهم، الموضوع بيكبر جواه ويبقى عنده إحباط وممكن يزيد عنده التصرفات الغلط. 💔

فـ أول ما نلاحظ إن في طفل كده، لازم نشتغل على نفسيته ونشجعه:
ـ ندي له أسئلة سهلة في الأول، عارفين إنه هيعرفها، ونخليه يقوم يحلها قدام زمايله.
ـ أول ما يجاوب صح: نصفق ونقوله "برافو 👏🏻 عليك!" أو "شاطر يا بطل!"
ده بيفرق معاه جدًا.

ولو عنده مشكلة في نقل الكلام من على البورد (السبورة)، نشجعه بطريقة بسيطة:
مثلاً نقوله:
"يا فلان، لو نقلت بخط حلو، هديلك نجمة، والكلاس كله هيصفق لك!"
ساعتها هيتحمس ويحاول يكتب أسرع وأوضح. ✅

ولو بنشرح مثلًا، نسأله: "فاهم يا فلان؟ طب تعالى حل دي قدامنا!"
ساعتها مش بس هنساعده يفهم أكتر، لا كمان هنزود ثقته في نفسه ويبدأ يحس إنه مش أقل من صحابه.

في الآخر... معظم مشاكل أطفال صعوبات التعلم بتيجي من حاجتين:
١- التعامل الغلط من اللي حواليهم.
٢- قلة الثقة بالنفس.

فـ دورنا كمدرسين مش بس نشرح وخلاص... لأ، لازم نكون سند ليهم ونخليهم يحسوا إنهم مهمين زينا زي أي حد تاني. 💪🏻
أ/ريم غانم - أخصائي صحة نفسية - ماجيستير تربية خاصة
📞 01211308378