rehab seif-رحاب سيف

هو اتاخر علي ميعادي معناه انه مش مهتم بيا 😔
استهدي بالله بس وتعالي اسألك سؤال ؟

هل ممكن الشخص اللي اتاخر عليك يجيلك في ميعاده وبرده يكون مش مهتم بيك فكر كده ؟

هل ممكن يجي متأخر بس يكون مهتم بيك ؟

طيب ايه رأيك في فكرة انه جالك متأخر مش احسن من انه مايجيش خالص ؟

هل في معني تاني للتأخير غير انه مش مهتم بيك ؟

الشخص اللي ربط التأخير بالاهتمام كان عنده قناعه بتقول
الالتزام بالمواعيد = الاهتمام

ولمااتسأل الاسئله دي فرقت في حكمه علي الشخص
ورد فعله اختلف بعد كده،لانه كان تفكيره محصور في زاوية واحدة بس ،واختزل معني الاهتمام في الالتزام بالمواعيد
الاسئلة خلته شاف الاوجه التانيه لقناعته اللي خلت عنده مرونة اكتر

وبمناسبه المواعيد والوقت عاوزه افهمكم حاجة

في ناس بتبقي in time الناس دي بتبقي منغمسة في الاحداث والحاجة اللي بتعلمها لدرجة انها مابتحسش بالوقت
يبقي عنده ميعاد الساعه ٦ مثلا في مكان بعيد ينزل من بيته ٦ الا خمسة علي اساس انه هايطير مثلا😂
ولا اخفيكم سرا انا كنت من الناس دي
وبنسبه كبيرة ادركت مشكلتي واتعاملت معاها واتحسن الموضوع عندي بنسبة مرضية بالنسبة لي

وفي ناس بتكون through time يعني متحكمة في الوقت مش منغمسة في الاحداث و مدركة للوقت ولو عندها موعد زي بتاع الساعه ٦ ده بتنزل قبله بوقت مناسب علشان توصل قبل ميعادها او في ميعادها مظبوط .
طيب مين فيهم احسن ومين اوحش ؟

هي مش مسألة مين احسن من مين، الفكرة اننا عاوزين يكون فينا الاتنين in time وthrow time احيانا بنعوز نكون مركزين اوي في الحاجة اللي بنعملها زي مثلا لو قاعد مع شخص بيكلمك والشخص ده مهم بالنسبة لك عاوز تكون في كامل تركيزك معاه ساعتها بتكون in time وقت الكلام معاه ،ولكن في خلال يومك بشكل عام محتاج تكون متحكم في الوقت ومدرك المواعيد وتكون وقتها through time
يارب تكون وضحت الفكرة

بس بقولك ايه الناس ال through time دول لما يكون في حياتك شخص طبيعته انه in time
وعندكم موعد سوا وليكن الساعه ٧ قوله الميعاد الساعه ٥ وخليك ذكي ووفر علي نفسك وجع القلب 😅




#الوقت

سؤال واسأله لنفسك ؟؟
هل اللي انت فيه ووضعك الحالي هو اللي انت فعلا عاوز تكون عليه ؟؟
هو انت عارف انت عاوز ايه ومحدد اللي انت عاوز توصله ؟واللي انت فيه ده هايوصلك لهدفك ولا انت عايش وخلاص؟
شغال الشغلانه اللي اتفرضت عليك ولا شغال في حاجه بتحبها وبتشبع بيها قيمك وغايتك طيب نيتك ايه وانت بتشتغلها ؟
انت اصلا حاطط نية للي انت بتعمله ولا بتعمله وخلاص
الاسئله دي اجابتها واضحه بالنسبه لك ؟
انت صادق فيها مع نفسك ؟

في metaphor سمعته في كورس كنت بدرسه عجبني اوي وفرق معايا وهاشاركم بيه ممكن كمان يفرق معاكم ويقرب المعني

في قصه اليس في بلاد العجائب لما تاهت في المتاهة
كان معاها ارنب فسألته نطلع ازاي من هنا ؟
قالها انت عاوزه تروحي فين؟ قالت له مش عارفه انا عاوزه اطلع وبس
قالها خلاص يبقي امشي في اي طريق مش فارقه.
هي ماكانتش محدده هي عاوزه تروح لفين
فجايز تطلع وجايز تقعد تلف وترجع لنفس النقطة

هو ده حالنا لو مش محددين احنا عاوزين ايه
وعاوزينه ليه وكل مانجاوب علي سؤال ب ليه نسال ليه تاني
اكرر ليه علي نفسي لان غالبا اول اجابه لسؤال ليه ما بتكونش هي الاجابة العميقة اللي هاتوصلني لنيتي الحقيقية
النية الحقيقة هي الدافع القوي لاستمراري للوصول لغايتي وهدفي
استعن بالله وحدد هدفك ونيتك وطريقك
خليك واعي
ومتنساش الغاية الكبري النية الخالصة لله

هاتعرف تبطل سجاير 🫵
هاتعرف تبطل ادمان لسوشيال ميديا
هاتعرف تبطل سلوكيات كتير انت مش حاببها
لما تعرف تتعامل مع الاعذار اللي بتحطها علشان تعمل السلوكيات دي 💪🏻
دي حاجه من الحاجات المهمة اللي بتساعدنا نغير نفسنا ونغير سلوكيتنا اللي مش حابين نفسنا واحنا بنعملها ومش عارفين نبطلها في نفس الوقت

لو سألت واحد بيشرب سجاير انت بتشربها ليه

هايقولك السجاير بتهديني لما اكون متعصب او السجاير دي رجولة وبينه وبين نفسه كل مايولع سجارة عارف انها مش صح لصحته وعارف ضررها بس بيقول لنفسه هي اللي بتهديني او شايف انها من الرجولة
ده عذر هو حاطه

لو باصينا لكلامه في جانب ايجايبي او قيمة هو عاوز يحافظ عليها اللي هي الهدوء مثلا
اما الجانب السئ في الموضوع اللي هو الغلط الكبير هو ضرر السجاير وانها هي اللي بتتحكم فيه وانه مش قادر يسيبها

هي دي تركيبة العذر (جزئين)

الحتة الايجابية بتبقي جزء خفي صغير اوي
والجزء الغلط كبير وواضح لك

اللي انا بعمله اني بطلع الايجابي في العذر اللي انا حاطه ده واشوف القيمة اللي عاوز احافظ عليها واشوف ايه السلوك البديل اللي ممكن يحققلي القيمه دي غير اني اعمل السلوك المضر في حاله السجاير لو القيمة هي الهدوء او الرجولة
في حاجات تانية ممكن تحققلي القيم دي غير اني اشرب السجارة ده اول جزء
الجزء التاني اشوف اللي باقي من العذر وارفضه وارفض تأثيره عليه
اوجه الرفض للباقي من العذر واقول لا مش انت اللي هاتتحكم فيا في مثالنا مش هاسمح للسيجارة تضرني وتتحكم فيا

ده مثال ازاي بتعامل مع عذر

لو حاولت تتخلص من العذر علي بعضه كده من غير ماتتفصصه وتاخد الحلو اللي فيه
بعد شويه هاتحن للحلو وتعوز ترجعله تاني
لكن لو جزئته واخدت الحلو وحققته بشكل مفيد
ونسفت الغلط بنسبه كبيره جدا مش هاترجع تاني

لو عندكم اعذار بتقولوها لنفسكم شاركوني وانا هاساعدكم نتخلص منها او بمعني اصح ننسفها نسف

✍️ملحوظه مهمه
في حاجات تانية بنعملها بتساعدنا نغير تماماااا عادتنا السلبية
بس هنا في البوست ده التركيز كان علي الاعذار وازاي نتعامل معاها
انسف اعذارك وابدء التغيير 💪🏻💪🏻💪🏻

بقالي فتره ماعملتش بوست ولا شاركت معاكم بحاجة اصل انا كنت هناك في الحتة اللي بنحبها كلنا دي عارفين هي ايه
ايوه منطقة الراحة comfort zone
اكيد قعدت فيها انت كمان او ناوي تقعد فيها دي طبيعة النفس البشرية
ومش معني انها منطقة الراحة يبقي نقصد بيها الراحة الجسدية
لا المقصود بيها الحتة اللي هي علي هوانا دي اللي بنعمل فيها الحاجات من غير تعب ولا تفكير ، الحاجات المتعودين عليها ومفيهاش لاتعب ذهني ولا بدني
منطقه الكسلانين دي عارفينها
المنطقه دي مش غلط اننا نقعد فيها احيانا بنحتاج نروح لها
نفصل هناك
بس الغلط اننا نفضل فيها ونطول هناك

في حته تانية لما نيجي نطلع من منطقة الراحه ونحس اننا انتخنا كتير بنروح لها اللي هي منطقة المجهود بقا والشقي والتعب وعاوز اعوض وافضل اعمل حاجات كتير من غير ما افصل peak zone
المنطقه دي مطلوب نروح لها برده بس القاعده فيها كتير برده مش صح واللي بيطول فيها بيجي وقت عليه وحقيقي مابيقدرش يكمل احنا مش آلالات

الصح اننا نعمل توزان في منطقه صحية موجودة في النص
Growth zone(منطقه الانتاجية)
اللي فيها بنكون حاطين اولويات وبنشتغل بتوزان
لا مكسلين عن مسؤليتنا ولا مفرطين فيها بشكل يهلكنا
خليك متوزان وكأننا واسعنا دايرة راحتنا وبقا في انجاز مع الحفاظ علي الراحة

والبوست الجاي هاقولك ايه اللي بيخلينا نطول في comfort zone وازاي بنطل نتلكك ونحط اعذار وازاي نتغلب علي الحاله دي ونوسع دايرة راحتنا ونروح لمنطقةال growth او الانتاجية

وسع دايره راحتك 😉😉😉😉😉

أنا محسودة👁️

▪️في دولاب افكارنا في شماعات تلاقينا كده بنعلق اخطاءنا عليها ولما حد يواجهنا بمشاكلنا بنلبس اللي على الشماعة دي ونستخبي وراه

▫️زي شماعة الحسد رغم انه الحسد حق ومذكور في القرآن
لكن بنستخدم الكلمة علشان نتحجج ونحط اعذار لعيوب فينا احنا يمكن في طريقة تفكيرنا أو تناولنا للأمور
تلاقي زوج وزوجة حياتهم بايظة ويعلقوا مشاكلهم على شماعة الحسد
حد مش ناجح في شغله ولما تسأله يقولك اصلي محسود
طالب مش بيذاكر وجاب مجموع ضعيف اصله محسود

لحد امتي هاتفضل كده مكتف إيدك وبتسقط مشاكلك واخطاءك على الحجج والاعذار وكأنك مفعول به وملكش دور ،مستقبل بس مش متحكم ولا لك سلطة علي نفسك ❓

🔙خد خطوه لورا وراجع نفسك في تصرفاتك ماتعلقش اخطاءك على شماعات ملهاش لازمه
أنت كده اللي بتضر نفسك.

▫️محتاج تعيد حساباتك وتشوف ايه اللي ممكن تغيره علشان تبقي افضل

▫️واجه اخطاءك مش عيب على فكره بالعكس لما تعترف انك عندك نقط ضعف وتشتغل عليها ده في حد ذاته منتهي القوة

بس بقولك خد بالك وماتنساش تحصن نفسك
الا تتحسد بجد 🙆🏻‍♀️

بتستغرب من تصرفات وافعال حواليك و احيانا بتستغرب نفسك انت شخصيا انت ليه اتصرفت كده ومابتبقاش عارف ليه اوازاي ده بيحصل⚠️❓
تعالي احكيلك قصه صغيره

كان في بنوته صغيره بتحب باباها اوي وفي يوم باباها ضربها فالبنت دي جالها مشاعر قويه اوي ازاي بابا اللي بحبه يضربني فابوها لما جه يصالحها قالها
انا ضربتك علشان ماتتصرفيش غلط وده لاني بحبك وخايف عليكي
فالبنت علشان كان في مشاعر عندها قويه اوي
صدقت واقتنعت ان اللي لما حد يحبني ممكن يضربني علشان خايف عليا
وكبرت البنت ومعاها القناعه دي واتجوزت ومع اول خناقه مع جوزها استغربت هو ازاي مش بيضربني بيبقي مش بيحبني
وبقت تستفزه لحد ماوصلته انه ضربها وكونه ضربها بيبقي بيحبها ويخاف عليها
كان اللي حواليها بيستغرب ازاي تقبل الضرب وازاي تعيش معاه بالاسلوب ده
هي نفسها ماكانتش فاهمه ليه بتقبل ده
وايه اللي بيخليها تعمل كده

احد اقوي الاسباب اللي خلتها اتصرفت كده كانت (((قناعه))

🌱القناعات من اقوي الحاجات اللي بتتحكم في ردود افعالنا ورؤيتنا للاحداث

🌱القناعات ممكن تخدمنا في وقت معين بس القناعه لها مده صلاحيه كانت صالحه في الوقت ده لكن بعد كده مابقتش تصلح واقتناعنا بيها وتصديقها بيضرنا

🔸ركز في ردود فعلك واسال نفسك ياتري انا مصدق ايه مخليني اتصرف كده ؟؟

🔸هل القناعه دي مفيده بالنسبه لي ولا بتعطلني وتضرني

في طرق كتير ممكن نغير بيها القناعات المعيقه
او نتبني بيها قناعات تفيدنا

عاوز تطور نفسك وتحسن من ادائك ومهاراتك
خلي الفيدباك منهجيه عندك

يعني خد خطوه لورا سواء عملت حاجه حلوه أو وحشه
وشوف

الحاجه الحلوه دي ايه مميزاتي اللي خلتني عملتها؟
ايه نيتي وقتها ؟ايه المعني اللي انا حطيته للحاجه دي ؟
وايه القيمه اللي حاجه دي بتغذيها
واعرف نفسك وقيمك ونقاط قوتك وعززها

الحاجه الغلط اللي عملتها ؟
عملتها كده ازاي وايه اللي حصل؟
ايه حالتك وقتها ايه المفروض كنت تكون عليه ؟
كنت محتاج ايه وقتها ؟
وتشوف ايه اللي لو الموقف ده اتكرر هاتعمله مختلف
واعرف نقاط ضعفك واشتغل عليها وحسن منها
الفيدباك حقيقي هايفرق معاك
جرب تعمل كده وقولي بعدها انت بقيت ازاي


_متعه

كم مره قولت ايوه لحاجات في توقيت كان لازم تقول فيه لأ

لازم نعرف ان كل اه بنقولها في حياتنا بيكون قصادها لأ لحاجه تانيه في نفس الوقت

يعني احنا في رمضان اهو والكنافه والحلويات والذي منه
لما نقول لأ مش هاناكل 😭فانت قصادها قولت اه لصحتك ووزنك

لما تكون حاطط لنفسك وقت راحه وشخص يطلب منك طلب وتقوله اه ,فانت كده قولت لراحتك لأ

خد بالك امتي تقول( اه) وركز وقتها انت قولت (لأ )لايه قصادها

#تعلم _متعه_وعي

خد تعالي بس واقرا الكلام واستوعب اللي فيه لانه صدقني هايفرق معاك
كلنااااااااا مرينا بمشاعر احباط وخذلان ووجع من ناس كتير في حياتنا خاصه لما يكونوا الناس دول قريبين مننا او حتي ناس اتعاملنا معاهم بشكل او باخر
واللي بيحصل اننا بنرسم حوارات واحداث في دماغنا عن افعال هايعملها لنا الشخص الاخر (التوقعااات)
في سياقات كتير في العلاقه
اصدقاء /زوج وزوجه/ اتنين مخطوبين /اقارب /اخوات
كل واحد يتوقع من التاني انه يعمله اللي رسمه في خياله
زوجه متوقعه ان زوجها هايجي من برا جايب لها ورد يصالحها بيه لما يكونوا متخانقين في حاجه ( اللي هي الاحلام الورديه دي )
وطبعا لما يجي مش جايب الورد حتي لو حاول يصالحها مش بتكون قابله لانها رسمت الحوار وعاشت فيه والواقع ماجاش شبهه
وهو متوقع انه هايجي يلاقيها عملت له الاكل اللي بيحبه وهاتصالحه بيه ويجي مايلاقيش اللي تخيله فيتضايق اكتر
فيسيبوا المشكله الحقيقه اللي كانوا بيتخانقوا عليها
وكل واحد يفكر
ده ماجابليش ورد يصالحني بيه دا هونت عليه
ودي ماعملتش الاكل اللي بحبه وما اهتمش بيا
وخد بقا عندك من كده امثله كتتتير
الشاهد من الكلام
ان التوقعات اللي بنحطها للناس حوالينا هي افكارنا احنا مش الناس ولو انت توقعت من الناس هما كمان متوقعين منك ومش هانخلص
كل واحد له طريقته وقيمه وافكاره ومفيش حد شبه التاني
وخدوها قاعده مهمه جدا
المسافه بين التوقعات والواقع هي المساحه اللي بتتولد فيها مشاعر الوجع لو مجازا هانسميها كده
كل ما زادت المسافه دي كل مازاد وجعك
قلل سقف توقعاتك
او بلاش تتوقع من حد حاجه
ماتفكرش ايه اللي التاني هايعملهولك صدقني هاتعيش مرتاح

هل حصل معاك انك تبقي حاطط هدف او حاجه عاوز تعملها وبتبدء فيها بالفعل وبعدين توقف وماتكملش
وماتبقاش عارف ايه السبب ؟؟
عاوزه اخس اعمل دايت وانزل الجيم وشويه وارجع تاني !
عاوزه احفظ قران واشترك في حلقات وما اكملش !
عاوزه اعمل حاجه لنفسي بقا واطور نفسي واخد كورسات وبعدين ما اكملش !
وقيسي علي كده حاجات كتتتير بقا ……….
كلنااااااااا وانا اقصد التعميم حصل معانا كده
عارفين ليه ؟؟
السبب وخليني اقول انه مش هو مش السبب الوحيد لكن من اهم الاسباب
اللي بتعطلنا عن اننا نكمل حاجه عاوزينها
اننا مش بنسال نفسنا (((((ليه)))))
سؤال لماذا من اهم الاسئله اللي لازم نسألها لنفسنا لما نيجي نعمل حاجه
ليه انا عاوزه اعمل الحاجه دي
وكل ما اجاوب اسال نفسي ليه تاني كل اجابه تطلع اسال عليها ليه
اسال من ٣ الي ٥ مرات ليه
لان كل ما تظهر اجابه واسال نفسي ليه بلاقيني بتأكد هل فعلا انا عاوزه كده وده هدفي
وكل ما السبب اللي انا عاوزاه بقي واضح وصريح كل ما كان الدااافع قوي وكل ما كان الدافع قوي كل ما كانت نسبه اني اكمل في الحاجه اللي عاوزه اعملها كبيره
سؤال ليه ؟بيكشف لي النيه ورا الحاجه والنيه دي من الحاجات المهمه واللي حتي في الدين بتاعنا الرسول صل الله عليه وسلم علمها لنا ومن كتر ماهي مهمه بقا عليها اجر لما تكون نيه طيبه لو نويت بس من غير فعل تاخدي أجر العمل كأنك فعلت
قال صل الله عليه وسلم :
(انما الاعمال بالنيات وانما لكل امرئ مانوي)
وهنا لاحظوا قال الاعمال مش الافعال
العمل اللي بفكر اعمله واللي لسه مافعلتوش
وفي حاجه مهمه جداااا لازم ناخدها في الاعتبار
اسال نفسي ليه عاوزه اعمل كذا؟ مش ليه مش بعمل كذا؟
فرق كبيييير بينهم
لما اسأل ليه بتاعه الهدف بتحرك واتحفز لانها زي ما اتفقنا هي اللي بتولد الدافع
لكن لما اسأل ليه بتاعه وضعي الحالي هاتطلع لي التبريرات والحجج والاعذار ودور الضحيه وطبعا فرصه للوسواس بقا ودي حاجه احنا مش عاوزينها
👈👈يبقي ركزوا وماتنسوش تجددوا النوايا في كل عمل
واسالوا دايما ليييييه ؟؟؟؟ بتاعه الهدف😉😉😉
‎