06/09/2026
"أنا تعبت، بينسى كل حاجة بتتقال له!" 🧠
لو جملة "دخلت أجيب القلم ونسيت راح فين" أو "كتبت الواجبات ونسيته في الشنطة" بتتقال كتير في البيت، يبقى محتاجة تعرفي عن "الذاكرة العاملة - Working Memory".
دي واحدة من أهم وظائف المخ التنفيذية، وتعتبر "السبورة الذكية" أو "الرامة" بتاعت مخ الطفل.
يعني ايه الذاكرة العاملة؟
ببساطة: قدرة الطفل إنه يستقبل المعلومة، يحتفظ بيها مؤقتاً، ويوظفها عشان ينفذ مهمة في نفس الوقت.
زي مثلاً لما تقوليله: "ادخل الحمام، اغسل إيدك، وتعال اقعد على السفرة"، هنا هو محتاج يخزن الـ 3 خطوات في دماغه بالترتيب وينفذهم.
من غيرها، بتحسي إن الكلام "بيدخل من ودن ويطلع من التانية".
طيب أعرف منين إن في ضعف في الذاكرة العاملة عند ابني؟
ركزي لو لقيتي العلامات دي متكررة:
نسيان الخطوات المتعددة: لو طلبتي منه طلبتين ورا بعض، بينسى التانية غالباً.
التوهان وسط الكلام: ممكن يبدأ يحكي لك قصة وينسى هو كان عايز يقول إيه في النص.
صعوبة النقل من السبورة: بياخد وقت طويل جداً وهو بينقل، لأنه بيضطر يبص للسبورة ويرجع يبص للكراسة وينسى هو كان بيكتب أنهي كلمة.
الخبط في الحساب: لو بيحل مسألة جمع أو طرح فيها "ترحيل"، بينسى الرقم اللي كان راكنه في دماغه.
مهم جداً يا ماما:
النسيان هنا مش إهمال ولا كسل. دي طاقة تخزين مؤقتة محتاجة تتمرن وتتنشط، لأن الذاكرة العاملة بتكبر وتتطور مع التدريب.
3 حاجات تعمليها من النهاردة لتقوية الذاكرة العاملة:
لعبة "قائمة السوبر ماركت": اقعدوا مع بعض وكل واحد يقول حاجة هنشتريها (أنا أقول تفاح، هو يقول تفاح وموز، وأنا أقول تفاح وموز وبرتقال... وهكذا لحد ما تلاقوا مين هيفتكر الكل).
قسمي الأوامر الطويلة: بلاش جمل مركبة. بدل ما تقولي "اجمع لعبك وادخل غير هدومك وتعال"، خليهم خطوة خطوة: "دلوقتي هنجمع اللعب وبس".
استخدمي الإشارات البصرية: اربطي الكلام بصور أو رموز مرسومة ( مهام يومية على الثلاجة مثلا) عشان تساعدي مخه يسترجعه بسهولة.
امتى أقلق وأروح لأخصائي؟
لو الذاكرة العاملة الضعيفة مأثرة بشكل واضح جداً على تحصيله الدراسي، ومش بيستجيب للأساليب البصرية أو التقسيم، وساعتها بيكون محتاج تقييم دقيق وبرنامج تدريبي متخصص.
انتي مش لوحدك، وكل خطوة صغيرة بتفرق في نمو مخ ابنك ❤️
قوليلي في الكومنتات: أكتر حاجة ابنك بينساها وبتعصبك إيه؟ عشان نتغلب عليها سوا 👇
✌️
❤
#الإسكندرية طريق العجمي الرئيسي بين الهانوفيل والحديد والصلب بالقرب من نقطة فوزي معاذ
01507144010
01507144011
