إحصاء و مركز معلومات إدارة ابنوب التعليمية

السادة مسئولي الإحصاء
الاستقراري شقين زي ماحنا متعودين كل سنة
لقيتكم نايمين قلت اذكركم واذكر نفسي معاكم
👈🏻 الشق الأول خاص بالطلبة وفيه بيتم مراجعه بيانات الطلبة على مستوى كل الصفوف من حيث (الاسم - الرقم القومي - الديانة - اللغة الأجنبية الأولى والثانية - التخصص) وطبعاً جميع الطلبة تتسكن ع فصولها، وطبعا يتعمل جمييع التحويلات.
وإذا تعذر عليك اضافة طالب لانه كان مستبعد من مدرسة تاني هتعملي مكاتبة معتمدة من المدرسة موضح فيها الاسم والرقم القومي والمدرسة والصف والفصل وابعتهالنا .
👈🏻 الشق الثاني خاص بالعاملين بالمدرسة يعني اي تغيير طرأ على الموظفين ف مدرستك هتبلغنا بيه زي ايه؟🤔
زي النقل - الندب (كلي - جزئي) - أجازة - فصل -انقطاع هتبلغنا ازاي ؟ طبعا بالمستندات الداله ع كدة ( صورة من نشرة الندب او النقل مع صورة من الاخلاء او الاقامة - صورة م الأجازة - وهكذا.......)
🤔🤔 طيب عملنا كل ده وخصلنا كدة تمام ياترى؟؟
هقولك لا ناقص حاجة صغيرة وزع المعلمين ع الفصول واطبع تقاريرك وسلمها معتمدة لقسم الإحصاء
وفي حاله وجود اي تساؤل او حاجة طبعا تواصل معنا فريق إحصاء أبنوب ( نجلاء - هاجر - مصطفى)

«أصدق التهاني وأطيب الأمنيات أبعثها لكم بمناسبة عيد الأضحى المبارك، أعاده الله عليكم بالسعادة والهناء، وملأ أيامكم فرحًا وأمانًا. كل عام وأنتم إلى الله أقرب، وبالخير أنقى وأزهر»

السادة مسئولي الإحصاء
توضيح هام
بالنسبة للترشيحات سبق ونوهنا ان الترشيح بيتم لجهة العمل الأصلية
وعليه فيه مدارس مش بيكون فيها ناس مرشحة .
- لحظة كدة إزاي بتقولي مش فيه ناس مرشحة وانا ظاهر عندي في التقييمات ناس 🤔🤔؟
هقولك ياسيدي
ركز معايا ✍️✍️ الترشيح فقط بيكون من جهة العمل الأصلية اما باقي الإجراءات وده بالنسبة للناس المنتدبه باقي الإجراءات الخاصة بيهم بتتم في جهة الندب و عشان كدة ممكن تلاقي كشف الترشيح (صفر) لا يوجد به معلمين وكشف التقييمات والحصر به عدد من المعلمين دول بقى اللي (منتدبين)
تمام ولا ؟؟؟؟

اما التقرير الثاني المطلوب وهو تقرير الحصر وموقف الإنتهاء من متطلبات الترقي يتم طباعته كالتالي
- يتم الدخول الى الرابط التالي
https://academy.emis.gov.eg/evaluation/default.aspx
- نضغط على حصر بيانات السادة المعلمين
- الخطوة الأخيرة نضغط على رمز الطباعة أعلى اليسار هينزل الملف pdf

مسئولي الإحصاء اللي مسكوا معانا الإحصاء جديد ادي الخطوات بالصور لطباعة تقرير المرشحين للترقي
- في البداية ندخل على الرابط التالي
https://academy.emis.gov.eg/academy/homer1.aspx
- نضغط على تسجيل التقدم للترقي
- اخر خطوة طباعة المتقدمين هينزل الملف pdf

السادة مسئولي الإحصاء
الرجاء الدخول إلى موقع الأكاديمية وطباعة التقارير الأتية وتسليمها معتمدة لقسم الإحصاء
1- تقرير المرشحين للترقي عبر الرابط التالي
https://academy.emis.gov.eg/academy/homer1.aspx
2- تقرير حصر موقف الإنتهاء من متطلبات الترقي (التقرير الذي به علامات الصح امام كل متطلب)
https://academy.emis.gov.eg/evaluation/

ع كل معلم مستهدف للترقي من دفعة 2019 وتخلفات ما قبلها الدخول ع الموقع الخاص به ع الأكاديمية ومتابعة اجراءات الترقي ولابد وأن تكون النسبة 84% اللهم بلغت اللهم فاشهد اخر موعد غدااا ومش هنبه تاني الترقي مسئولية المعلم نفسه

السادة مسئولي الإحصاء / المعلمين المستهدفين للترقي من دفعة (2019) وتخلفات ما قبلها
الرجاء الإنتهاء من متطلبات الترقي تجنباً لعدم ضياع حقك في الترقية
الوقت بيعدي بسرعة بلاش التأجيل
اللهم بلغت اللهم فاشهد

عزيزي المعلم / المعلمة المستهدفين للترقي
لما اجي اعمل ملف الإنجاز بعمله ببياناتي انا الشخصية كمعلم مستهدف للترقي
اه والله زي ما بقولك كدة مش ببيانات مسئول إحصاء المدرسة.
وكمان تقييم الموجه والمدير مش بيتعملوا غير من جهة العمل الحالية لحضرتك وعن طريق مسئول الإحصاء بتاعها فقط لا غير يعني حتى الإدارة مش ليها صلاحية تعملهالك

السادة مسئولي الإحصاء بالمدارس الرجاء سرعة تسجيل غياب طلاب تكافل "الدورية الثالثة " والأخيرة لهذا العام

لو أنا نسيت كلمة السر الخاصة بالإيميل الموحد بتاعي أو حابب اغيرها اعمل ايه 🤔؟
- شوف ياسيدي هتفتح نفس الرابط اللي بتفعل الإيميل
https://office365.emis.gov.eg/
الفرق اننا هنلاقي الصفحة شكلها اتغير عن التفعيل بقى يطلب كلمة السر الحالية والكلمة الجديدة زي الصورة اللي تحت دي 👇👇
فلو انا كتبت كلمة المرور الحالية وكلمة جديدة وكملت الخطوات ابقى كدة غيرت كلمة المرور
أما بقى لو انا مش فاكرة كلمة المرور اصلا يبقى هختار نسيت كلمة المرور و في الحالة دي بيبعتلي كلمة المرور بتاعتي على الايميل البديل فاكرينه تماااااااااااام هو ده اللي حطيناه وقت التفعيل وقولنا مهم يكون ايميل شغال لاني هحتاجه فكل اللي هعمله افتح الايميل البديل واطلع كلمة السر وخلاص
اما بقى لو مش فاكرة كلمة مرور الايميل البديل كدة لازم اكلم الدعم الفني يغيرلي الايميل البديل لايميل شغال ومعايا كلمة المرور بتاعته ورقمهم أهم ( 19368)
ونصيحة بلاش كلمات المرور الصعبه اللي انتم نفسكم بتنسوها وبيتقفل منكم الايميل
بالتوفيق

إعادة نشر خطوات تفعيل الإيميل الموحد مرة اخرى