عيادة د. فيبى نبيل لطب الاطفال و أمراض السكر

23/07/2026

٨ سنين كنت فيها معاكم على صفحة العيادة .. اتمنى تكون قدمت معلومات مفيدة تساعدكم
Celebrating my 8th year on Facebook. Thank you for your continuing support. I could never have made it without you. 🙏🤗🎉

23/07/2026

لا يوجد حد أقصى للعمر في معظم التطعيمات، إلا في نطاق محدود جداً
تطعيم الروتا: و دة مش بيتاخد بعد عمر 8 أشهر.
تطعيم السعال الديكي الخلوي كجزء من التطعيم الثلاثى صد الدفتيريا و التيتانوس و السعال الديكى .. بعد عمر 4 سنوات بيتبدل بتطعيم السعال الديكي اللاخلوي يعنى هيتاخد بس بشكل مختلف ..
التطعيمات المتاحة:
من عمر شهرين فيما فوق: المكورات الرئوية/ الحمى الشوكية الرباعى و نمط ب
من عمر ٦ شهور: الانفلونزا الموسمية (مع بداية الموسم فى فصل الخريف)
من عمر سنة فيما فوق: الالتهاب الكبدى أ/ الجديرى المائى
من عمر ٩ سنوات : فيروس الورم الحليمى للبنات و الاولاد كمان
و حتى تطعيمات الصحة ..
للاطفال و المراهقين و الكبار كمان اللى مخدش اى تطعيم او اخد عدد و مكملش الكورس كامل .. يسأل و يتابع و ميقولش فات المعاد غير بس للروتا
عدد الجرعات ممكن يختلف حسب السن و فى تطعيمات جرعتها بتختلف كمان
بنراجع مركز التطعيمات و هو بيحدد عدد جرعات التطعيم حسب السن و الجرعات السابقة اذا كانت اتاخد جزء و مكملش الكورس بتاعها..

#فاكسيرا

18/07/2026

بإذن الله تتوسع المبادرة و تشمل كل السكريين .. فى أمل

تمثل المبادرة محطة فارقة في مسيرة دعم ورعاية الأطفال في مصر، وتأتي ضمن حزمة المبادرات الرئاسية في مجال الصحة العامة تحت شعار "100 مليون صحة". كما تسهم في تخفيف معاناة الأطفال من خلال توفير أجهزة المراقبة الحديثة المستمرة للسكر، والتي تجنب الطفل أكثر من 3650 وخزة سنويًا، بمعدل 8 إلى 10 وخزات في اليوم الواحد، بما ينعكس إيجابًا على جودة حياة الأطفال وتمنحهم فرصة أكبر للاستمتاع بطفولتهم بصورة طبيعية.

جاء ذلك بحسب بيان صادر عن وزارة الصحة والسكان بتاريخ: 22 يونيو 2026.

المزيد من التفاصيل في هذا الإنفوجراف:

02/06/2026

بشرى للمسكرين من ٦ سنوات فيما فوق .. نوع أول و تانى .. تم اعتماد أفريزا (Afrezza) إنسولين فائق السرعة عن طريق الاستنشاق .. يعنى جرعات الاكل هتتبدل باستنشاق و مفيش حقن غير يدوبك شكة الانسولين القاعدى بس ..
و لانه فائق السرعة و سريع الامتصاص فهو بيتاخد مع بداية الوجبة (مش قبلها) و بيبدأ مفعوله خلال ١٢ دقيقة،و قمته خلال ٤٥ دقيقة و مفعوله بينتهى خلال ٣ ساعات و بالتالى بيسمح بتكرار الجرعات و انه يتاخد مع السناك بين الوجبات.
لانه استنشاق فهو مش مناسب لمرضى حساسية الصدر او اللى عندهم امراض رئة مزمنة و لازم نعمل اختبار وظائف الرئة قبل ما نبتديه …
متوفر بتركيزات مختلفة (٤ و ٨ و ١٢ وحدة) و سهل تحويل الجرعة من الحقن السريعة زى الابيدرا و الهيمالوج و نوفورابيد لافريزا ..
نتمنى انه يوصل مصر قريب و يكون سعره مناسب ..
كل سنة و انتم طيبين و دى كانت احلى عيدية جت المرة دى من FDA
د. فيبى نبيل
استشارى طب الأطفال و أمراض السكر

25/05/2026

✨✨✨✨✨✨ إعلان هام ✨✨✨✨✨✨
جدول التطعيمات الروتينية للأطفال خلال أجازة عيد الأضحى المبارك
كل عام وأنتم بخير 🐑🐑🐑

10/05/2026

تحذير هام إلى المتعايشين مع السكر مستخدمي مضخات الإنسولين من ميدترونيك:

يرجى العلم والتنويه بأنه يُحظر تمامًا شراء أي مضخة إنسولين تابعة لشركة ميدترونيك، من خلال قنوات غير رسمية أو بطرق غير قانونية، بما في ذلك عمليات البيع بين الأفراد أو عبر وسطاء غير معتمدين.

وتؤكد الجهات المختصة أن القنوات الشرعية الوحيدة للحصول على هذه الأجهزة هي من خلال شركة ميدكونسلت باعتبارها الوكيل و الموزع الحصرى لشركة ميدترونيك داخل مصر، وذلك لضمان سلامة الجهاز وكفاءته، فضلًا عن التمتع بكافة حقوق الضمان وخدمات ما بعد البيع.

وفي حال قيام أي مريض بشراء مضخة إنسولين عبر طرق غير قانونية أو من مصادر غير معتمدة، فإنه يتحمل المسؤولية الكاملة عن هذا التصرف، كما يُعد الجهاز في هذه الحالة خارج نطاق الضمان، وتسقط عنه كافة خدمات الدعم الفني وخدمات ما بعد البيع، بما في ذلك الاستبدال للجهاز و مستلزماته في حالة حدوث أي عطل أو تلف.

لذا، نرجو من جميع المرضى الالتزام بالقنوات الرسمية المعتمدة حفاظًا على سلامتهم وضمانًا لحقوقهم .

31/03/2026

التطعيمات متوفرة فى مراكز المصل و اللقاح فاكسيرا .. دى اعادة نشر لان تقريبا الظروف واحدة و الكلام هو نفسه بيتعاد

20/03/2026

عيد فطر مبارك، نسأل الله أن يكون العيد بداية لأيام شفاء وعافية وراحة بال، كل عام وأنتم بألف خير.

28/02/2026

التحاليل بمبلغ و قدره و كورس العلاج كله ميكملش ربع تمن التحاليل هو مينفعش اخد العلاج على طول دول شوية فيتامينات و حديد ؟! ولا انتم الدكاترة متفقين مع معمل؟! .. سؤال عظيم و اجابته سهلة.. لا و الف لا..
نجاوب بأمثله عشان نبقى واقعيين..
الحديد: طفل عمل تحليل هيموجلوبين طلع ١٠ و اخد كورس حديد محترم و مع انه اخده كامل الا انه لما عاد التحليل طلع برضه ١٠ .. لو كان كمل التحاليل (من صورة دم كاملة و تحاليل الحديد و تحليل براز كأبسط مجموعة مبدئية للتشخيص فى اغلب الحالات) كان ممكن نكتشف ان فى سبب تانى للانيميا غير نقص الحديد (نقص فيتامين ب ١٢ او حمض الفوليك او انيميا وراثية أو تكسير دم أو أو .. اصل اسباب الانيميا كتير يتعمل منها كتاب)
أو انها نقص حديد بس فى سبب بيزودها متعالجش (زى وجود ديدان معوية او جرثومة معدة او نزيف مخفى زى قرح المعدة و التهاب القولون المناعى او حتى دورة شهرية بنزيف شديد أو ضعف امتصاص الحديد الوراثى او بسبب ادوية اخرى او اكل معين مع الدواء الخ الخ الخ اصل فى اسباب غيرهم كتير )
أو انها نقص حديد و اتعالج جزئيا (و دة مش هيبان غير لو اتعمل تحاليل الحديد فى بداية التشخيص و اتعادت تانى بعد نهاية كورس العلاج ) فنكمل فى العلاج مع تعديل الجرعات و ممكن النوع و نراجع التغذية و طريقة اخد الدواء و معاده و بقية الادوية اللى ممكن الطفل يبقى بياخدها و ليها تأثير على امتصاص الحديد..

فيتامين د: جرعاته بتختلف حسب السن و درجة النقص مش معقول نختار جرعة عشوائية و نجرب حظنا و خلاص .. مش بس كدة
الجرعات الزيادة ليها مضاعفات على الكلى و سهولة تكوين الحصوات مع زيادة الكالسيوم و المغص و الترجيع و الامساك .. و مش بس كدة
احيانًا ممكن يحصل العكس بالظبط .. فى حالات النقص الشديد لفيتامين د و اثناء بداية العلاج و مع تحويل الكالسيوم من الدم للعظام بينقص مستوى الكالسيوم فى الدم و النقص دة هيبقى ملحوظ و زايد اذا كان الطفل عنده نقص كالسيوم من الاول او مع الجرعات العالية من فيتامين د و بالذات مع الحقن .. نقص الكالسيوم هيعمل وجع عضم و تشنجات بالعضلات ممكن توصل لتشنجات كاملة شبه حالات الصرع و كمان عدم انتظام فى ضربات القلب..
يبقى قبل ما ناخد فيتامين د لازم نعمل التحاليل الخاصه بيه و بالكالسيوم و الغدة الجار درقية كمان اذا لزم الامر.. دة انا مرضيتش اجيب سيرة بقية الامراض اللى ممكن تسبب اعراض شبه نقص فيتامين د و نسيب الحالة تسوء و احنا فاكرينها نقص يتعوض بحقنة ..

التحاليل مش رفاهية.. دى اداة بنستخدمها في التشخيص السليم و تحديد نوع العلاج المناسب و جرعته و مراقبه فاعلية العلاج و الاثار الجانبية ليه .. صحيح التحاليل غالية و دة مش بأيدى أغيره لكن اللى اعرفه انه مينفعش يبقى فى ايدى شمعة أمشى بيها على نور و اوصل لبر الامان و اقرر اطفيها و اضبش فى الضلمة و زى ما تيجى تيجى..
د. فيبى نبيل فوزى
استشارى طب الأطفال و أمراض السكر
#التحاليل