أكاديمية الهَمَّام

13/09/2026

12/09/2026

كمل للآخر…
بعد ما صححنا نوايانا، وصححنا بعض معتقداتنا حول عيلنا، وفهّمنا أبناءنا قيمة العلم وطلبه، واهتمّينا بجانبهم النفسي والصحي.
جاء اليوم باش ننتبهوا لحاجة يمكن نشوفوها بسيطة، بصح هي جزء من التربية:
اختيار ملابس وأدوات أبنائنا المدرسية
قبل ما نشريو، نسقسو رواحنا: واش راهي تعكس هذي الأدوات؟
ماشي لازم كل حاجة فيها شخصية مشهورة، أو رسمة، أو كلمات، تكون مناسبة لأبنائنا؛ نقدروا نختاروا أدوات جميلة وأنيقة، وفي نفس الوقت تعكس هويتنا العربية والإسلامية وقيمنا.
وننتبهوا كذلك للرسومات، العبارات، الصور والأشكال اللي ممكن تحمل معاني ما تتناسبش مع قيمنا أو تسيء للفطرة السليمة.
حتى الملابس…
نختاروها أنيقة، مريحة، جميلة، وفيها احتشام يناسب أعمار أبنائنا، ونعلّموا بناتنا من الصغر أن الأناقة ما تعنيش التعرّي، وأن الجمال يقدر يجتمع مع الحياء.
لأن التربية ماشي غير في الكلام اللي نقولوه لأبنائنا، التربية كذلك في الاختيارات اللي نديروها نيابةً عنهم
كل حاجة نختاروها لهم، حتى لو بانَت صغيرة وبسيطة، تقدر تكون رسالة تتكرر أمامهم كل يوم.
وأنت كولي أمر؛ مسؤول عن اختيارات أبنائك، وعن القيم اللي تساعدهم يبنوا بها شخصيتهم، فخلّينا نربّيوهم بوعي، نعلّموهم، نرافقوهم، ونحافظوا على هويتهم، بالحزم مع الحنان، وبالحب مع الوعي.
وإذا وصلت إلى هنا، دعواتكم لنا بالتوفيق والسداد، وأن يجعل الله ما نقدمه خالصًا لوجهه، وينفع به أبناءنا وبناتنا.

09/09/2026

كمل للآخر...
بعد ما نوّينا، وحاولنا نصححو أفكارنا ومعتقداتنا حول عيلنا، وفهمّنا عيلنا بلي طلب العلم ماشي مجرد دراسة ونجاح؛ بل هو بناء لإنسان كامل.
اليوم جا الدور علينا حنا كأولياء؛ قبل ما نوجدوا المحفظة، المئزر، والأدوات؛ لازم نوجدوا الطفل نفسه.
🧠 نفسياً:
قربي من ولدك، احكي معاه، لاحظي تصرفاته.
هل يعاني من صعوبة في التركيز؟
هل كاين تغيّر في سلوكه؟
هل يخاف من المدرسة؟
هل عنده صعوبة في التواصل أو التعلم؟
وإذا لاحظنا حاجة غير عادية، ما نلصقوش عليه وصف فوضي كسول متحشم ووووو ، بل نحاولو نفهمو السبب، ونستعينو بالمختص المناسب إذا احتجنا.
🩺 وجسدياً:
من الجميل قبل الدخول المدرسي نديرو فحصاً صحياً عاماً، وننتبهوا خصوصاً للنظر والسمع.
لأن مرات الطفل ما يقولكش: ماما، ما نشوفش السبورة مليح.
وإحنا نقولو: ما يركزش، ما يحبش يقرا، راه مهمل.
وهنا لازم نوقفو شوية؛ ونفهمو قبل ما نحكمو.
🎒 الاستعداد للدخول المدرسي ماشي غير محفظة جديدة وملابس جديدة
الاستعداد الحقيقي هو:
🤍 طفل مسموع ومفهوم.
🧠 طفل مستعد نفسياً.
🩺 طفل مطمئن على صحته.
📚 وولي واعٍ باحتياجات طفله.
لأن هدفنا ماشي غير يدخل ولدنا للمدرسة، هدفنا يدخل وهو مستعد يتعلم، قادر يتطور، وواثق في روحو. ومن هنا نبدأو رحلة جديدة؛ رحلة ما نربّوش فيها أولادنا على النجاح فقط، بل نساعدوهم باش يكونوا أفضل نسخة من أنفسهم.
💬 قولو لي في التعليقات:
واش أول حاجة راح تديرها لولدك استعداداً للدخول المدرسي؟
وخلي المنشور عندك… يمكن تحتاجه قبل بداية العام.

09/09/2026

متحمسين
يليق بمقامكم غير الهَمَّام

08/09/2026

بكل حماس...
انتظرونا
يليق بكم غير الهَمَّام.

08/09/2026

"مآمآ .. اَهْ...!"
قصة لطيفة لا تعرفها سِوى معلمات الأطفَال 🪽🤍!
رزقت بهم 🥺🥺💛

06/09/2026

كمّل للآخر
بعد ما عقدنا النية، وبدأنا نحاولو نصححو أفكارنا ومعتقداتنا تجاه عيلنا ونخممو بإيجابية.
اليوم نطرقو لأهم حاجة، ونحطو يدنا على الجرح.
علاش رانا نقراو أصلًا؟
وعلاش نطلبو العلم؟
ديرو جلسة عائلية على طبلة تاي ☕️، ولا حتى خرجة للعرق 🌿، واقعدو مع أولادكم بهدوء بلا هواتف، بلا استعجال، وبلا محاضرات، وصححو النية معاهم، وافهموهم علاش رانا نقراو ونتعلمو
قولولهم:
🤍 حنا نقراو ونتعلمو باه نعرفو ربي، ونعبدوه ونحبوه.
🇩🇿 حنا نقراو باه نكونو جزء من صلاح أمتنا ووطننا.
🌱 وحنا نقراو باه نكونو من الناس اللي يتعلمو، ويعملو باللي تعلموه، وينفعو غيرهم.
بيّنولهم قيمة طلب العلم، وخلوهم يفهمو بلي القراية ماشي غير نقطة في ورقة، ولا معدل في آخر الفصل.
لأن الطفل كي يربط قيمتو بالعلامة…
يولي يخاف من الغلط أكثر مما يحب يتعلم. 💔
والأهم من هذا كامل؛ بيّنولهم بلي حبكم ليهم ماشي مربوط بعلاماتهم. ❤️
حبوهم كي يجيبو علامات ممتازة،
وحبوهم كي يحاولو ويجيبو نقاط متوسطة، وشجعوهم كي يغلطو ويتعلمو من أخطائهم.
خلي ولدك يعرف بلي: أنا نحبك لأنك ابني… ماشي لأنك جبت 18.
وفي نفس الوقت، الحب ما يعنيش أننا ما نطلبوش منهم الاجتهاد، علّموهم بلي التميز مسؤولية، والاجتهاد قيمة، وطلب العلم عبادة إذا صلحت النية.
خلّوهم يفهمو بلي ما نطلبوش منهم يكونو الأفضل على حساب غيرهم
نطلبو منهم يكونو أفضل نسخة من أنفسهم.
لأننا لازم نعرفو قيمة كل حاجة رانا نديروها، وعلاش رانا نديروها.
كي يفهم الطفل علاش يقرا، تتبدل نظرتو للقراية، ما تبقاش مجرد واجب، ولا خوف من النقطة، ولا محاولة باش يرضي الناس، تولي طريق يتعلم بيها، يبني بيها نفسو، وينفع بيها غيرو.
ومن هنا… يبدأ التغيير الحقيقي.
مدام وصلت للآخر، خلي لنا دعوة من قلبك.
ربي يصلح عيالنا، ويجعلهم قرة عين لينا، ويرزقهم علمًا نافعًا، وقلبًا صالحًا، ونية طيبة، وينفع بيهم دينهم ووطنهم ومجتمعهم. 🤍

06/09/2026

🎬 هل مشاهدة فيلم ممكن تكون درسًا في الحياة؟ 🤔❤️
أكيد💯
في نشاط الخميس، اجتمع أطفالنا لمشاهدة فيلم، لكن هدفنا ما كانش الترفيه فقط
شاهدنا، تفاعلنا، ناقشنا، وفي النهاية اكتشفنا قيمة مهمة جدًا:
🤝 الاتحاد والتعاون.
تعلم أطفالنا أن التعاون، مساعدة الآخرين والعمل كفريق، يخلينا نواجهوا الصعوبات ونحققوا نتائج أجمل. 🌱
لأننا في أكاديمية الهَمَّام نؤمن أن الطفل لا يتعلم فقط من الكتاب…
بل يتعلم أيضًا من اللعب، الحوار، التجربة والمواقف التي يعيشها. ❤️
🎥 شوفوا أجواء نشاط الخميس مع أطفالنا 🥰
أكاديمية الهَمَّام من التأسيس... إلى التمكين.

05/09/2026

كمّل للآخر لأن هذا العام نحبّوه يكون مختلف.
ما بقالناش بزاف ويدخل العام الدراسي.
واش رأيكم نخلو هذا الدخول بداية تغيير حقيقي؟
مش غير في القراية والنتائج؛ بل في طريقة تفكيرنا، تعاملنا مع عيالنا، ونظرتنا لقدراتهم.
وباش يكون هذا العام مختلف، نبدأو من اليوم بزوج حوايج:
🤍 أول حاجة: النية.
نعقدو نية صادقة للتغيير، تغيير لحاجة يحبها ربي، ونكونو سبب في الخير لعيالنا وللأطفال اللي نرافقوهم.
🧠 ثاني حاجة: نغيّرو قناعاتنا.
من اليوم نقولو: بإذن الله، هذا العام نخمّم بطريقة إيجابية مهما كانت الظروف.
عيالنا نعمة كبيرة من ربي ❤️
نحبوهم، نآمنو بقدراتهم، نشجعوهم، ونكونو سند ليهم.
وما تنساوش:
❌ ما كاش مقارنة بين عيالنا وعيال الناس.
❌ ما كاش مقارنة بين طفل وطفل.
❌ وما كاش مقارنة بين عائلة وعائلة.
كل طفل عنده قدراته، شخصيته، وظروفه، والسرعة الخاصة بيه في التعلم والنمو.
من اليوم، نبدلو حاجة صغيرة وبوعي،
وبإذن الله، مع الوقت راح نشوفو فرق كبير.
نحب هذا العام يكون عام خير، نمو، ثقة، نجاح وفرحة لعيالنا كامل.
وإذا وصلت للآخر خلي دعوة زينة لفريق أكاديمية الهَمَّام، يمكن تكون سبب في خير كبير لينا كامل. 🥹🤍