17/08/2026
كيف تؤثر الجذور العائلية على تكرار نفس الأنماط داخل العائلة؟
باش نفهموا الإنسان، ما يكفيش نشوفوا غير علاقته الحالية مع الأب والأم
لازم نرجعوا للجذور
نشوفوا العائلة الصغيرة والعائلة الكبيرة، ونفهموا واش صرا فيها، واش عاش كل فرد، وواش شاف هذا الإنسان وهو يكبر
كيفاش كانت علاقته مع الأب والأم؟
كيفاش كان الجد يتعامل مع الأب؟
كيفاش كانت الجدة تتعامل مع الأم؟
وما هي المكانة اللي كان يحتلها كل واحد داخل العائلة؟
الجد والجدة يدخلوا أيضًا في الحكاية، لأن تأثير العائلة ما يبدأش فقط من الأب والأم.
لهذا، نبحثوا في الجذور من الجهتين:
من جهة عائلة الأم، ومن جهة عائلة الأب.
علاش؟
لأن في الجذور كاينة «الوراثة النفسية».
والوراثة النفسية ما تكونش دائمًا ظاهرة أو معروفة. ممكن تنتقل إلينا تجارب، مخاوف، طرق في التعامل وردود أفعال، من غير ما نعرفوا أصلها الحقيقي.
نعيشوها وكأنها جزء من شخصيتنا…
لكنها، في بعض الأحيان، تكون حكاية عائلية بدأت قبلنا.
لهذا، كي نرجعوا للجذور، ما نبحثوش على شخص نلوموه.
نبحثوا على الشيء اللي يتكرر…
باش نفهموه، وما نبقاوش نعيشوه من جيل إلى جيل.
