07/09/2024
كيف تتحصل على 20 في الرياضيات بدون تعب و ب 0 دج 😱
اول ما تقرى العنوان هذا رح يجي في بالك سؤال من بين زوج اسئلة
رح تقول اما انو هذا الأستاذ يبيعلنا فالوهم و ربما تحصل مرة في حياتو على علامة 20 ف رياضيات و جا يخلعنا بيها في منشور ف الفيسبوك 😒
للأسف يا صديقي توقعك في غير محله 🙃
من الرابعة متوسط وأنا أتحصل على علامات جد ممتازة في الرياضيات ، حتى ف الجامعة لدرجة انو علامة 20 في مادة أساسية كما رياضيات لي يخافوها اغلب التلاميذ رجعت تبانلي حاجة عادية (جد عادية) ، وبما انو تبانلي حاجة عادية تلقائيا مكانش سبب يخليني نخلعك بيها
حسنا ، كاين فئة من الناس رح تقلك بما أنو هذا أستاذ رياضيات فمن الطبيعي انو يدي علامات ممتازة لأنو أي أستاذ معروف انو كان خباش ف المادة لي يقريها 🙂
اممم تخمام مليح هذا ، ولكن لا ينطبق علي 😌
لماذا ؟
كاغلبية التلاميذ ، كنت نكره رياضيات و مانديش فيها مليح ، نشفى ف سنة 3 متوسط كنت ندي فيها 0.5 و 1
و الكارثة الكبيرة لي اغلب ناس مايصدقوهاش أني دوبليت مرتين ف سيام ، و بلاما نحكو على التقارير و الإنذارات في السلوك لي مزالها موثقة في كشوف النقاط لحد الآن (نخليهالكم ف تعليقات)😱😂
صحا ، ضرك لحقنا للمسقي 😎
"كيفاش تبدلت من تلميذ يكره رياضيات و مشاغب كان على شفى حفرة من الطرد من الدراسة إلى تلميذ متفوق في رياضيات ، و الأكثر من ذلك أستاذ في هذي المادة حاليا 🙂"
الأسباب كثيرة رح نهدرلكم على أهمها و لي نظن أي واحد لوكان يطبقها رح يتحصل على علامة 20 مش ف رياضيات فقط ، بل في أي مادة ✅
راكم مستعدين 👀 اربطو أحزمتكم 🛩️
اولاً: بدل تفكيرك ، جامي تقول "نكره الرياضيات" "الرياضيات مادة صعيبة " " معنديش لاباز ف رياضيات "
الكلام هذا كامل جامي تقولو حتى ولوكان بينك وبين نفسك ، لأنو عقلك اللاواعي رح يتبرمج على أساس انك غير مؤهل ل دراسة هذي المادة ، و كي تلحق للمرحلة هذيك مكان حتى حاجة تنفعك بش تقرا الرياضيات ، حتى ولوكان يقريك أينشتاين vip في منزلك
(اول سؤال نطرحو على أي تلميذ جديد يجي يقرأ عندي نسقسيه إذا يحب يقرأ الرياضيات ولا لا ، و من هنا نعرف هذاك تلميذ اسك جاي يقرأ صح ولا يفسد على زملاءو)
ثانيا : اقرى وحدك فدار ، بغض النظر على الدراسة في المؤسسة ولا ف دروس الخصوصية ،
القراية ف دار وحدك تقدر تشكل فرق كبير في تحسن مستواك ف رياضيات لأنو نسبة تركيزك كي تكون ف دار وحدك تكون اعلى بكثير 🔝
ثالثا : كي تقرا وحدك اقرأ ب ذكاء و ليس ب جهد ، اعرف وش تقرا واعرف كيفاش تقرا ،
قادر تقرا نص ساعة و نتا عارف وين باغي توصل ، احسن من انك تقرا زوج سوايع ونتا مراكش عارف أصلا وش راك دير ، يعني مايكونش همك انك تريح ضميرك وخلاص
مثال : أنا كي كنت نقرا ف 3 متوسط ، كنت طايح على التربية مدنية نحفظ فيها قلب و رب ، و كنت مهمش ال math
جبت 20 ف المدنية ، و 1 ف رياضيات
وفي الأخير المعدل خرج تحت 10 لأنو الفرق بين معاملي المادتين كبير 😤
لثم كي خممت مع راسي لقيت روحي نتعب ف باطل و لثم عرفت بلي لازم نقرا ال math سواءا حبيتها ولا ماحبيتهاش🤯
لا علينا ، من بين اهم الطرق لي تخليك تقرا ب ذكاء و بدون تعب هي التعلم بالتجزئة chunking و لي هي عبارة عن تقسيم الدرس إلى عدة اجزاء يسهل استيعابها بدل من محاولة فهم درس كامل دفعة واحدة ( حتى أنا نعتمد عليها ف التدريس)
نعطيكم مثال من درس لي حاليا نقريه ل تلاميذي تع BAC
درس المتتاليات
أنا قسمتو الى 3 اجزاء ، و كل جزء ولا عنصر جبتلو مثال من بكلوريات سابقة هكا باش التلميذ تكون عندو فكرة على نوعية الاسئلة لي تجي ف الباك
جزء 1 : عموميات في المتتاليات ، هنا تعرف وش معناها متتالية , و كيفاش تكتب ، مجال تعريفها ، وش هي مجموعة الأعداد N ، و *N و R و …
جزء 2 : المتتاليات الحسابية
جزء 3 : المتتاليات الهندسية
وهذو زوج اجزاء عبارة عن قانون و طبق بصحتك
يعني الفايدة كامل ف الجزء الأول ، فمن غير المعقول تلميذ مايعرفش الفرق بين مجموعة الأعداد N و *N و R و يروح يحاول يحل تمرين تع متتاليات حسابية مثلا
هذا من ناحية الدرس
اماً من ناحية التمارين
ف الدرس هذا خصصتلو 3 سلاسل من التمارين ، و التمارين مرتبة من الأسهل إلى الاصعب
سلسلة 1 : خاصة بالمتتاليات الحسابية
سلسلة 2 : خاصة بالمتتاليات الهندسية
سلسلة 3 : خاصة ب تمارين المتتاليات الواردة في البكلوريات السابقة (وهنا التلميذ يعرف صح المستوى تاعو وين وصل )
الطريقة هذي رح تخلي التلميذ يعرف وين راه رايح ، مش يقرأ ب عشوائية كما يديرو اغلب تلاميذ
المهم المرة هذي عطيتكم مثال بدرس تع bac
المرة الجاية ان شاء الله نعطيكم مثال من درس تع BEM 🔜 مع طرق أخرى اكثر فعالية في دراسة الرياضيات
نلتقي في منشورات أخرى بحول الله 😉 سلام 🥰
