17/07/2022
لتذكير :👌👌👌
أكثر تخصص جامعي مافيهاشي. فالجزائر هو تخصص #محروقات ... و الغريب أنه يستقطب المتفوقين في البكالوريا (معدل القبول هو 14 تقني رياضي و 15 علوم تجريبية)
المهم ، لكل واحد راح يجيب الباك بمعدل 14 فما فوق و ناوي يقرا محروقات لأنه في بالو أن هذا التخصص يسمح له بالعمل في سونطراك أو يسمح له بالعمل في الخليج أو داير في راسو أن هذا التخصص راح يرده غني ، جيت نقولك ماتغلطش غلطتي و تدير هذا التخصص لأن هادي الأحلام #مافيهاش تتحقق....
علاش راني نقولك ماديرش هذا التخصص ؟؟
خلي الأحلام الوردية تاع الدراهم و الخليج على جنب و ركز معايا :
1- كاين قانون لانام دارو سلال عام 2013 ، هذا القانون يقولك بلي باش تخدم في ولاية معينة لازم تكون عندك شهادة إقامة تاع هاديك الولاية....مثلا نتا ناوي تخدم في ورڨلة في مجال التنقيب عن البترول ، ماراحش تقدر تخدم إلا إذا كنت نتا من أبناء ورڨلة ، و إذا ناوي تخدم مهندس في مجال التكرير في ارزيو أو سكيكدة مثلا ماراحش تخدم إلا إذا كنت من أبناء هذه المناطق.....و لو تحصلت على مئات الشهادات المعتمدة ماراحش تقدر تخدم...و مين تقدم cv تاعك راح يرفضوه ، ليس على طريقة " مكاش خدمة" و لكن على طريقة :"كاين خدمة بصح ماتخدمش بسك ماكش ابن الولاية"
2- إذا راك حاسب أن المتخرجين من كلية المحروقات في بومرداس عندهم الأولوية في التوظيف ، نقولك بلي مكاين حتى فرق بينك و بين طالب st جاب الباك تاعه ب 10 ، و بالعكس هو خير منك إذا كانت عنده شهادة إقامة في ولاية بترولية ، بينما نتا بالباك تاعك لي ديتو بتقدير جيد أو جيد جدا ماعندكش الحق حتى تشارك في مسابقات التوظيف بسبب قانون لانام لي هدرنا عليه...
3- إذا الناس تقرا العام الدراسي تاعها نورمال ، كلية المحروقات جامي قراو عامهم نورمال و جامي كملوا البرامج تاعهم ، فمثلا هذا العام (لي من المفروض بدا في نوفمبر) ، معظم الجامعات قرات السداسي الاول و راها فالسداسي الثاني ، إلا كلية المحروقات مازال مابداو السداسي الأول ، و زيد راح يقراو سداسي كامل في أسبوعين !! ، يعني المستوى الدراسي في الكلية ماشي و يتكركر
4- مستوى إدارة الكلية كيف كيف رايح و يتكركر ، فبعدما كانت تضمن لطلبتها على الأقل تربص (سطاج) في مرحلة الليسانس و تربص اخر في مرحلة الماستر ، ولات ماهيش قادرة توفر هاد التربصات للطلبة تاعها و ولاو جامعات أخرى يدوا هاد الحصص تاع التربصات في الشركات البترولية رغم أنها حق من حقوق أبناء الكلية بحكم أنه تخصصهم (طالب محروقات لازم عليه يدير سطاج في شركة بترولية ، بينما طلبة الجامعات الأخرى قادرين يديروا لي سطاج في شركات أخرى)....يعني قادر تكمل قرايتك و تدي شهادتك و نتا جامي شفت ميدان العمل كيفاش داير ، قادر تدي شهادتك و تتخرج و نتا تعرف الجانب النظري برك و ماتعرف حتى حاجة على الجانب التطبيقي يعني حتى و تلقى خدمة (و لو أنه شبه مستحيل) فماراحش يقبلوك بسك ماتعرفش الجانب التطبيقي (الشركات ماعندهم ما يديروا بتمكنك من الجانب النظري و المعادلات الرياضية)
5- و لازم تعرف كذلك أن الإقامات الجامعية لي راح يبعثوك ليها ماتتوفرش فيها أدنى شروط العيش (و كمثال الماء ماراهش كاين رغم أن موسم الحر انطلق) ، و المطعم الجامعي كيف كيف تحشم تقول على ماكلتهم أنها نعمة ربي (المطاعم الجامعية الأخرى رغم رداءتها و شكوى طلبتها ، بالنسبة للمطعم تاع بومرداس تعتبر مطاعم فاخرة),
خلاصة هذا الكلام : إذا ماكانتش عندك إقامة في ولاية بترولية ، و إذا ماعندكش الدراهم باش تصرف على روحك ، و إذا ماعندكش معريفة فالشركات البترولية يشوفولك سطاج ، غير ماتخممش تدير تخصص محروقات بسك راح تكون غلطة حياتك
