21/07/2022
بسم الله أول منشور يخص بكالوريا 2023 📚❤️🖊
نحكيلكم على تجربتي انا فهادي الفترة كانت فترة شوية صعيبة خاصة بعدما خرجو نتائج الباك اللي قبلنا و اول مرة يكون معدل موزون و بزاف مخدموش و كان عندي بزاف تساؤلات من عندمن نقرا وكيفاه نقرا ونسمع تجارب الناس يقولك كنت نقرا 8 سوايع وكتر 😱 وانا والله كنت 20 دقيقة قراية منجي نكملها بسيييف😫💔 كنت نسمع يقلك انا سجلت فدروس خصوصية فليكول فلاني قالك اماكن محدودة وكدا … يزيدولك لابريسيون ..
دك صاديبو بلاك كاين اللي راه صاريلهم هكا كيفي وكاين اللي نو مي انا هكا كنت عايشة هدي الفترة العام الماضي 💚🤎
المفيد اكثر عفسة كانت مدوخة اغلب تلاميذ الباك و بلاك مام نتوما تاع ادا نبدا نقرا من الصيف ولا نو ؟؟
الجواب : بكل بساطة هدي تولي للتلميذ ومدى تحضيرو في السنوات الفارطة دك نتا عزيزي الطالب ادا راك مليح في المواد الاساسية تاوعك على حساب شعبتك وكنت قاري اولى ثانوي وثانية ثانوي تاعك مليح مكلاه تبدا من دك و ادا حبيت وكانت عندك حرقة ❤️🔥 انك تبدا تقرا من دك باه تجيب مليح لانو انا كنت كيفك ملغري كنت قارية مليح مي هكك وحبيت نبدا لكني مكنتش نعرف و مكنتش نستمر و لوكان دك يولي بيا الزمان راح نقرا لغات مليح لانو صدقوني في العام راح تركز بزاف على الموادالعلمية ادا كنت علمي و ادا كنت لغات فايدة كتر 🥰 لهذا جميع واحد حاب يبدا يقرا من الصيف يركز على الفرنسي و الانجلي ينقصهم عليه في العام تاعو 💪🏻
الفئة الثانية اللي كانت راميتها بركلا و مكانتش حاطة قاع فالقراية هنا عزيزي الطالب غير سيي تريكيبيري خاصة ادا كنت علمي سيي لماكس تنقذ شوي رياضيات كيما اشتقاقية نهايات دوال …. كيما فيزيك اكسدة وارجاع احماض واسس …. علوم 🔬كيما تركيبة adn ،الوراثة ،الطفرات ،الاتصال العصبي…. مهم تأكد انك فاهم اهم دروسك📖☹️التقنيين منعرفش هندساتكم 😂
انا عن نفسي في العلوم لقيت بزاف مشاكل نشفا في ديسمبر وليت للمصنف تاع دوزيام آني بسكو مكنتش حاكمة الوراثة مليح مكنتش فاهمة مامبا واش هو الاليل المورثة الصبغي وتم بديت نندب و قلت كل غير شديتهم في الصيف 😢💔
لهذا متغلطوش غلطتي و شوفو دروسكم تاع ثانية ثانوي وحتى الاولى اللي تحتاجوهم في الباك وتأكدوا مليح انكم فاهمينهم وشادينهم كي تتأكدو منهم جوزو للغات حسنوا رواحكم فيهم بسكو اللي ضعيف فيهم كي حالتي صح يعاني معاهم عام الباك 💔🥺
هدي كانت كبداية في المنشورات القادمة راح نحكي على كل مادة بالتفصيل 📗❤️اي اسئلة تفضلوا 🥰📚💪🏻
