08/10/2022
Hello future doctors🩺🩺
نصائح لمراجعة المواد للسنة اولى طب
بعد ما حكينا على كيفاه تقرا كل موديل
(اللي مشافش راني درت بوست على كل موديل تلقوهم في الصفحة)
الان نقولكم كيفاه تراجعوا المواد وتنظموا وقتكم في الدراسة
🔵وزع تعبك بين المواد
متركزش على موديل واحد فقط و تهمل البقية
نشوف بزاف طلبة يعجبه موديل يقعد غي يقرا فيه
مثلا كاين ناس تقرا غي اناطومي و تركز عليها غير هي
و هذا خطا لان معندكش غي الاناطومي كاين مواد اخرى مهمة لازم جهدك و تعبك يكون موزع على كامل الموديل لي تقراهم
🔵ادرس حسب الاولوية
اعرف المواد لي تعطيهم اهمية على الاخرين
مثلا مديش تقعد تخمم في كور تع ssh 🙂
و ناسي الاناطومي و البيوشيمي كونك منطقي، منيش نقولك لا متقراش اس اس اش لا اقراها لكن كاين موديل اهم بكثير
و انا نرتبهم هكذا :
Anatomie
Biochimie
Cytologie
Physiologie
Histologie/Embryolgie
Et les autres modules
و البقية رتب حسب رغبتك
هذا ترتيب ليس ضروري دير عليه لكن نظن هاذوا أهم الموديلات راهم مع الاول
🔵نطول مع الكور
بزاف طلبة يقولك الكور نقعد فيه اسبوع و اسبوعين
و هذي خصك تعرف بلي حاجة عادية قادر توصل شهر باش تفهم الكور 100%
لان راك تقرا حاجة جديدة (الطب) و بلغة جديدة (الفرنسية) و منطقة جديدة لي هي الجامعة او الاقامة
هاذو عوامل راح ياثرو عليك في البداية لكن مع الوقت راح تتقلم
🔵أحصر نفسك بوقت محدد
كيفاه نقدر نولي نكمل الكور بسرعة
اولا نتفاهمو على شيء باش تولي تكمل الكور من المحاولة الاولى غي انساها😂 مستحيييييل
يلزم تقراه و تقراه باش تفهم الا اذا كنت نابغة في عقلك
و لكن تقدر تفهم الكور في 3 ساعات و نظن هذا وقت قصير مقارنة ب أسبوع
السر هو أنك تحصر نفسك بوقت كيفاه يعني:
📍اولا اختر اي درس و قعد تقراه و احسب الوقت لي إستغرقته باش تفهم الدرس
مثلا كور اناطومي قعدت معاه 3 ايام
📍ثانيا نقص الوقت بالتدريج
لازم المرة الثانية مين تقرا اناطومي تقعد مع الدرس
يومين و نصف او يومين فقط
يعني كل مرة تحصر على نفسك الوقت و هكذا تعود مخك يستوعب المعلومة في وقت اقل حتى توصل يوم ثم نصف يوم
🔵اقرا 2 موديل
يلزم تعود تقرا على الاقل مادتين في اليوم
لكن مش كل مواد تقراهم مع بعض مثلا
اناطومي و بيوشيمي متقدرش تقراهم مع بعض لأن فيهم بزااااف ديتاي و معلومات ، لكن لا تقلق عندي الحل
قائمة 1 : موديل ثقال
Anatomie
Biochimie
Biophysique
Embryo/Histo
قائمة 2 : موديل خفاف
Chimie
Biostatistque
Cytologie
Physiologie/SSH
اختر موديل من قائمة 1 و موديل من قائمة 2
و جرب اقراهم مع بعض و شوف لي يساعدك
📍موديلات القائمة واحد منصصحكش تقراهم مع بعض
📍 موديلات القائمة 2 تقدر تقراهم مع بعض
🔵اعادة الدرس
او كيما يسموها couches
مش شرط الكور من المرة الاولى تفهمه 100%
يعني تقدر تفهم فقط %70 او 60%
و مين تعادوه للمرة الثانية تزيد ديك النسبة
و كلما تعاود الدرس راح تترسخ المعلومات القديمة و تزيد معلومات جديدة مكونتش فاهمها من الاول
يعني تضرب عصفورين بحجر
ايضا حاجة مهمة اعادة الدرس مش كيما تقراه من الصفر
يعني الدرس اول مرة تقعد معاه ايام لكن مين تعاوده راح يدي منك فقط ساعات
📍وينتا نعاود الكور ؟
مين تكمل الموديل لي ناقصينك خصص 3 ساعات عاود موديل لي راك باغيه ومرة على مرة عادو الدروس و أضف العناصر لي مفهمتهمش من المرة الاولى
🔵لا تتسرع!!
هذي النصائح نتائجها مديش تكون لحظية لااااا
يعني اذا طبقتها الآن مديتش تلاحظ فرق مباشرة و لكن صدقني راح تلاحظ فرق كبير مع الوقت
لازم الصبر و تواصل الدراسة هذا مشوار طويل رانا كامل فيه كاطباء في المستقبل مراكش وحدك تقرا تذكر بلي كاين انا و انتٓ و انتِ و الاف الطلبة في الجزائر و الملايين حول العالم يدرسوا هذا المهنة النبيلة.
اذا عندك سؤال حطه في التعليقات🌝🌚
