همي وحزني

قالو ناس بكري....😎☝

قلة الشي صح تعيشك في غبينة
بصح كثرة المال دير الوسواس
لا تسكن فالريف لا تهجر للمدينة
لا تامن فالذيب لا ديره عساس
لا دير لامان في الهدرة الحنينة
لا تفرح للرجلة لي فيها المقياس
لا تغيضك المرا تشوفها مسكينة
ولي يحڨر ولية مايتسمى تراس
الريحة في النعناع تلقاه زينة
والبنة ديما تلقاها فالبسباس
المحبة والخير خيوط متينة
ما يعرف قيمتها غير القلب الحساس
لي يزرع الڨمح ما يحصد الفارينة
وعود الشوك عمره ما يملاس
وشجرة التفاح ما تثمر تشينة
وعرجون الدڨلة ما يولي فرماس
للا تضيع رزقك ولا تحكم رهينة
ولا تركب الداب حلا س على حلاس
ما تجبد من الناس ما دير صحبة شينة
لا تخسر نفسك وما تكسب الماس