La classe de la maîtresse amina CHB

La classe de la maîtresse amina CHB Enseignante de francais cycle primaire à l'école primaire zaimi achour

الى عـشاق فـصل #الـشتاء ... هـدوء تـفرضه شـرائح الـثلوج
21/08/2026

الى عـشاق فـصل #الـشتاء ... هـدوء تـفرضه شـرائح الـثلوج

يا سيدي يا بن سيدي، صلّوا على النبي الهادي، واسمعوا حكاية من حكايات زمان… حكاية فيها الضحك، وفيها العبرة، وفيها واحد من ...
21/08/2026

يا سيدي يا بن سيدي، صلّوا على النبي الهادي، واسمعوا حكاية من حكايات زمان… حكاية فيها الضحك، وفيها العبرة، وفيها واحد من أصدق أنواع الحب: حبّ الأم لولدها.

كان يا ما كان، في قديم الزمان، كان واحد السلطان مولوع بالزين والجمال، ما يعجبو غير كل ما هو جميل ومليح.

نهار من النهارات، جاتو فكرة وقال:

— علاش ما نديرش مسابقة كبيرة؟ نجمع فيها أجمل مخلوقات المملكة، ونشوف شكون فيهم يستاهل لقب أجمل مخلوق!

بعث البراحين في القرى والدواوير، وكل واحد منهم كان ينادي:

— يا ناس! يا مخلوقات ربي! اللي عندو وليد ولا بنية فيهم الزين والجمال، يجيبهم للقصر! والرابح نمدولو صرّة ذهب!

ما كملوش البراحين كلامهم حتى قامت المملكة كامل على رجل وساق!

الطاووس جاب ولدو، وهو يتبختر بريشو الملون.

والغزالة جابت خشفها، يمشي بخفة ورشاقة.

والحمامة جابت فرخها، بريشو الأبيض الناصع.

حتى القصر تعمّر بالمخلوقات اللي تخطف العين.

لكن… كان في واحد الحيط قريب للقصر، عايشة فيه خنفوسة صغيرة مع ولدها الخنفوس.

سمعت بالمسابقة، وشافت ولدها مليح مليح…

كان كحل كي الفحم، ورجليه رقاق، وعينيه كبار شوية ومخرجين، بصراحة، ما كانش يشبه لا للطاووس لا للغزال!

لكن الأم شافت حاجة ما شافها حتى واحد آخر.

قربت منو، مسحتلو على راسو وقالت:

— يا عمري على الزين! يا كبدي عليك! شوفوا غير ولدي… هذا أصل الزين و لازم يشوفوا السلطان!

وفي الغد، غسلته مليح، نظفتلو رجليه، ومشطتلو شواربو، وقالتلو:

— اليوم يا وليدي، راك داخل للقصر باش تربح الذهب!

دخلت الخنفوسة وسط الناس وهي رافعة راسها، لكن المخلوقات ما رحموهاش .. غير شافوها ضحكوا و تغامزوا و حتى كاين لي عايرها و عاير ابنها بأقبح الصفات
هي بقات رافعة راسها حتى وصلت قدام السلطان.

السلطان شاف الطواويس والغزلان والحمام… وبعدها شاف الخنفوس.

سكت شوية، ومن بعد قال باستغراب:

— واش هذا؟! الناس جابو الغزلان والطواويس… وأنتِ جايبة خنفوس؟!

الخنفوسة حطت يديها على خصرها وقالت بكل ثقة:

— سيدي السلطان، مع كامل احترامي… راك تشوفو خنفوس، بصح أنا نشوف حاجة أخرى!

السلطان قال:

— وواش تشوفي فيه؟

قالت:

— نشوف فيه الزين كامل! شوف السمار تاعو، شوف عينيه، شوف هاد الرجلين! يا لطيف على الزين!

وزادت قربتو منها وقالت:

— هذا يا سيدي لو يلبس شاش ويتبختر في الزنقة، النمل كامل يوقف يتفرج فيه! و ممكن يطيحوا من الزين تاعو

السلطان ما قدرش يحبس الضحك.

ضحك وضحك، حتى دمعت عينيه..الخنفوسة بقات تشوف في وليدها و في قلبها غصة
شاف السلطان الخنفوسة وهي تنظر لولدها بنظرة كلها حب، وفهم حاجة مهمة…

الأم ما تشوفش ولدها بعين الناس… الأم تشوفو بعين قلبها.

يمكن الناس يشوفوه عادي، أو حتى ما يعجبهمش، لكن عند أمو هو أجمل واحد في الدنيا.
السلطان جبد صرة الذهب و حطها للخنفوس

ومن داك النهار، بقى الناس يعاودو هاد المثل:

«كل خنفوس عند أمو غزال.»

يعني كل أم تشوف ولدها أجمل وأحسن واحد، مهما كان رأي الناس فيه.

وهادي هي حكايتنا… مشات مع الواد وجات مع لولاد، وبقات العبرة:

الحب الحقيقي ما يشوفش العيوب… الحب يشوف الإنسان بعين القلب. ❤️

🌹 ياسادة يا كرام...يحكوا زمان فات على رجل طيب جدًا... 😍عيبو الوحيد أنو نية بزاف وغبي شويا! نهار من نهارات ربي، قرر يروح ...
20/08/2026

🌹 ياسادة يا كرام...

يحكوا زمان فات على رجل طيب جدًا... 😍
عيبو الوحيد أنو نية بزاف وغبي شويا!

نهار من نهارات ربي، قرر يروح للسوق يشري كبش 🐏.
وقف عند كبش أبيض، وفيه علامة كحلة بين عينيه ميزاتو على كامل الكباش... عجبو بزاف. 🤍🖤

🗣️ قال لمولاه:
"هذا كل ما عندي من مال... إمّا تبيعلي الكبش، ولا نروح... ما تشاحني ما نشاحنك." 🙂

وافق البائع على الثمن، وربط صاحبنا الكبش بحبل في رقبتو، ومشى يجرّ فيه من وراه... 🚶‍♂️🐏

📍وفي الطريق، شافوه زوج سرّارقة 🥷، واتفقو يسرقولُو الكبش.

تسلّل واحد منهم بخفة، وحلّ الحبل من رقبة الكبش بلا ما يشعر صاحبنا، وربط الحبل في رقبتو هو! 😅

أما السراق الثاني، شدّ الكبش وهرب بيه. 🏃‍♂️💨🐏

وكان اللي فايت من الناس يشوف المنظر، يتعجب ويضحك... 😂😂

أما صاحبنا، بقى يتعجب في نفسو ويقول:

🗣️ "لعلّاه حيّرهم وضحكتهم راجعة للخانة الكحلة بين عينيه... ولا عجبهم كبشي!" 🤔😂

المهم...

🏠 كي وصل للدار، دار باش يشوف الكبش...

😳 وإذا بيه يشوف راجل مربوط بالحبل بدل الكبش!

تعجب... وقريب يتغاشى من هول الصدمة!

قالو:
🗣️ "شكون أنت؟!"

اللص بدا يبكي... ويمسح في خنونتو. 😭

وقال:
🗣️ "يا سيدي... أنا راجل جاهل، مغضوب الوالدين."

قال صاحبنا:
🗣️ "واش تقصد ؟"

قال السراق:

🗣️ "أنا عصيت أمي، ودعات عليا... وطلبت من ربي سبحانه في صلاتها يمسخني ويحوّلني لكبش... واستجاب لها ربي. 🐏

وكي شافني خويا في هاذ الحالة، حب يتخلص مني، وحطني في السوق للبيع... وجيت أنت شريتني.

وببركتك... وبطيبة قلبك... رجعت إنسان كيما كنت." 🥹

وبدا السراق يبوسلو في يدو وراسو. 🤲

ومن غباء صاحبنا... صدقو! 😅

وزاد غدّاه، وطلّقو، ووصّاه وقالو:

🗣️ "روح... وطيع أمك، وما تكونش عاق والديك، واطلب منها تسامحك وتدعيلك بالخير." ❤️

📆 وبعد مدة، لمّ شوي دراهم، وقرر يرجع للسوق يشري كبش، لأنو كان محتاجو في قطيعو.

وبينما هو يدور... شاف نفس الكبش! 🐏

وعرفو مباشرة من العلامة الكحلة بين عينيه. 🖤

اقترب منو... وهمسلو في وذنو وقال:

🗣️ "الظاهر أنك ما سمعتش وصيتي... وعصيت أمك مرة ثانية! 😒

ربي يهديك...

أني نزيد نشريك هاذ المرة...

بصح والله إذا تعاودها... لا زدت شريتك!" 😂🖐

📢✨ خبر مميز لعائلة مدرسة الإبداع العلمي! ✨📢يسعدنا أن نعلن عن التحاق الأستاذ خالد بوڨندورة بفريقنا التربوي، أستاذًا لمادة...
19/08/2026

📢✨ خبر مميز لعائلة مدرسة الإبداع العلمي! ✨📢

يسعدنا أن نعلن عن التحاق الأستاذ خالد بوڨندورة بفريقنا التربوي، أستاذًا لمادة اللغة الإنجليزية 🇬🇧📚

👨‍🏫 الأستاذ خالد بوڨندورة: 🔹 أستاذ سابق في الطور المتوسط
🔹 وأستاذ اللغة الإنجليزية حاليًا بـ المدرسة الابتدائية زعيمي عاشور
🔹 خبرة تربوية وكفاءة في التعامل مع مختلف المستويات.

🎯 وانطلاقًا من حرصنا على تقديم تعليم نوعي ومتكامل، نعلن عن انطلاق التسجيلات في مادة اللغة الإنجليزية للطورين الابتدائي والمتوسط.

🌟 مع الأستاذ خالد…
نتعلم، نتطور، ونكتسب الثقة في اللغة الإنجليزية خطوة بخطوة! 🇬🇧💙

📚 التسجيلات مفتوحة الآن
📍 مدرسة الإبداع العلمي – Créative Science School




#ابتدائي
#متوسط

Un grand merci à mes nouveaux followers ! Saoudi Med, فوج لامل, عمر السنوسي, Emaa Bel, بيطام عبدنور عبدنور, Slsabil To, ...
19/08/2026

Un grand merci à mes nouveaux followers ! Saoudi Med, فوج لامل, عمر السنوسي, Emaa Bel, بيطام عبدنور عبدنور, Slsabil To, Nora Gch, أم ياسر, محمد علي الأسفداوي ودالبورت, ريحانة الجنان

يا سادة يا كرام…هاذ المرّة نڨصّ عليكم حكاية غريبة، مفهومة وماشي صعيبة، والجلسة معاكم ديما طيّبة 😌✨كان في وقت من لوقات، ت...
18/08/2026

يا سادة يا كرام…
هاذ المرّة نڨصّ عليكم حكاية غريبة، مفهومة وماشي صعيبة، والجلسة معاكم ديما طيّبة 😌✨
كان في وقت من لوقات، تعيش عايلة فيها غير البنات، ثلاث خْواتات، والرابعة ربيبة.
باباهم كان يعاملهم معاملة وحدة، ما يفرّقش بين الكبيرة والصغيرة، كل وحدة عندو أميرة 👑…
بصح أمّهم 😒 كانت دايرة فرق كبير بين بناتها لي من صلبها، والربيبة لي ما دخلتلهاش لقلبها.
كي كبرت ووعات، ولات هي لي قايمة وتنضف الدار 🧹، ومين تكمل شغلات الدار تقعد على الغرزة تطرّز ولا تخيّط 🪡، وكي تعيّطلها، تلقاها قدّامها تترعّد من الخوف 😟، سرّها ديما مقدوف وبّاباها غير يشوف… عيات بالسكات ، وهي فالدمير والتمارة كامل ليامات 💔.
وزادت كلّفتها كل يوم تعجن خبزة لكل واحد فيهم 🍞، وخبزة أمّهم تكون وافية شوية عليهم 😌.
تعجن وتعاين حتى تخمّر، تجمع لعواد، تحمّي الفرن، تطرح وتفرّق 🔥.
وتحط القدرة على الكانون، تحرّك وتْمَرّق 🍲، وتحلب وتمخض اللبن 🥛…
جهدها كامل غير يتدفن في هاذيك الدار، وعرقها يسقي حيطانها 💦.
وهي ساكتة… غير ربّي لي شايف حالها 🤲✨
وفي نهار من النهارات، مع الزربة والخلعة تلفتلها 😰، نسات وكْلات من خبزة مرت باباها وياويلها…
قالتلها: يا يمّا — على خاطر هي لي ربّاتها —
“راني نسيت، وبلا ما نحس صرات هاذ الحكاية، وإذا حبيتي نروح نطيب خبزة كيما موالفة خبزتك،.”
رجعتلها بغلّ و حقد: وقالت
“والو من خبزتي الي كليتي نحبها قدامي ذرك تتخلّق! 😡”
وحتى حل معاها ما لقات.
وبدات تعاير وتسبّ، وتضرب باللي لقات في يديها 🤲💥، والبنت المسكينة ما لقات غير رجليها هربوها… سبقو الريح 🏃‍♀️💨.
ومرت باباها وراها تبعتها وهي تعيط:
“بغيت خبزتي! عطيني خبزتي!”
ووراها وراها ، حتى خيال البنت غاب و غبر 👤🌫️.
وتاهت المغبونة ما بين السواقي والشجر 🌳💧، وبلا ما تفكّر قرّرت ما ترجعش.
وقعدت وحدها ، متخبّية وتتطلّ 👀،
وفي الليل كان يغطّيها شعرها الطويل لكحل 🌙🖤.
حتى نهار قرّرت تبدّل البلاصة، لوحدا أخرى تلقى فيها شوية اطمئنان 😔✨.
مشات ومشات حتى عيّات،
وصادفت جنان واسع وعريض، وبنيانو غريب 🏚️.
طلّت ودخلت… ما لقات حتى واحد فيه، وتعجّبت كيفاش ما كان حتى حد 🤨.
شربت من عيونو لكثار 💦وحسّت بالنعاس دوّخلها الراس 😴،
اتكّات وتمدّت، وغمّضت عينيها…
بصح ودنيها خلاّتهم محلولين 👂✨.
عارفة بلي راهي في خلا، مهيش في دارها ولا في رحلة 🌾، ويالله بْغات تتحرك، سمعت صوت غريب 👂…
“حلّو البيبان! فرّشو بالزرابي! السلطان وصل عيّان!” 👑
بالزربة نصّبو الخيام،
والطفلة غير شافت ما شافت 😳، تلعثمت وبدات تخمّم، لخاطر حصْلت.
الحيطان عالية، والحراس عينيهم تلقط الفار الا تحرك 👀⚔️.
خمّمت مليح، ودخلت بين لغنم 🐑،
لي كانو بزاف ، بجنب البير 💧،… والله نجاها وحماها وعما عيون الحراس عليها 🤲✨.
يا سادة يا كرام…
السلطان كي ارتاح، طلب مرايت الهند (لاجيمال)،
وبانلو منظر من بعيد… وسط الغنم طرف كحل 🖤🐑.
بلا ما يتعجّل قال لوزيرو:
“شوف…”
قالو: “إيّه يا مولاي، هادي حاجة ماشي خيال.”
💭 وقال:
“يا مولاي، ذرك توجد قصعة كبيرة،
بدجاج عرب يشهي 🍗، يكون مالح ماشي مسوّس، .
الإنسي ألي بيه الجوع ياكل،
والجني ما يقربش لطعامنا…وفي لحظة كلش يبان قدّامنا.”
وهذاك ما كان يا إخوان…كلات وبردت وكسرت صيام دام أيام 😌،ومن البير شربت 💦،وعرفوها إنس ماشي جان.
قالهم السلطان 👑:
“جيبوها قدّامي… ذرك فالحين وكيما كان.”
لحقو عندها غير بالظرافة واللطافة، كسّاوها بلحافة وخملو عليها ، وجابوها قدّام السلطان وهي تترعّد… ماشي من البرد، من الخوف 😰.سنانها يضربو في بعضاهم، ويديها متكمشين 🤲.
قالهم: “أطلقوها…”ومنّين شاف فيها وتمّعن مليح، شاف قدّامو جمال يفتن 😍✨.عاود فتح عينيه مليح حتى تيقّن، وقال لوزيرو:“أمرهم يتلمو …ويالا بينا نرحلو.”
وروحو للقصر .ومنّين لبست زادت تريڨلت 👗💫، وولات لالّات البنات،وفي وسط القبّة ضوات 🌟.وهي ما كانتش مأمنة بلي يجي نهار وتعيش هاذ العزّ العظيم…وسبحان المنّان الكريم 🤲، أكرمها بعد الخوف،والملك ولا فيها غير يشوف وما يشوفش غيرها ❤️.حتى علنو على عرس السلطان بالزين الفتّان 🎉👑،
رقصت الناس، والموسيقى صيحت 🎶، وحتى الطيور غنّات 🕊️،
وقالت: “هنيّ وهنيّ… من الخبزة تهنّات!” 🍞✨
سعدي يا الريم، يا زينة البنات 💖،وبالزربة والفت على الجو الجديد،أصلا الدلال ساهل توالفو أما الميزيرية واعرة ياولاد بلادي 😅المهم كان كل يوم عندها عيد 🎊🌸.
فاتت ليام ونهار من النهارات سمعت صوت حزين من بعيد 😔، يسعى ويقول: “ باب الله يامحسنين…” 🤲أمرت خدامتها تدخلها وتغسل لها،ومن الخيرات تعطيها 🍞🍲، على خاطر تربات على الضربات ، وشحال من نهار ماذاقت ماكلات…
وقالت لهم: “قرّبوها لي، وخلّوني معاها… حابة نحكي معاها.”
تعجّبو واستغربو 😳،
وهي كي شافتها عقلت عليها وقالت:“هاذي مرت بابا…”
بصح المرا ما عقلتهاش،على خاطر الطفلة تبدّلت 👑✨.
قالتلها: “ عرفتيني؟”قالتلها: “فكّريني يابنتي… اللي نعرفهم بزاف.”
قالتلها: “وين بابا وخاوتي؟”ردّت عليها: “آه … أنتي الهاربة اللي هربتي!عطيني خبزتي! عطيني خبزتي!” 🍞😠
وهنت تأمر الحرس الخاص يخرّجوها لبرّا لبلاد 🚪⚔️.
ويسكنوها في دار كي الحبس،ما يخصّها حتى خير،
وردّوها كيما طير في قفص 🕊️.غير الماكلة والرقاد…
يا سادة يا كرام… السلطان الهمّام قال للملكة:
“نروحو نبدّلو الجو فالجنّان لخضر 🌳، نمتّعو البصر.”
قالتلو: “أمرك مولاي يتنفّذ فالحال، والرحلة تبدّل الأحوال.” ✨
أمر عامل الموكب: “اتحرك!” 🚩
ومن الباب الكبير تاع الجنّان دخلو.
فوق ما يتخيّل الواحد ويتحيّر فالأشكال والأنواع 🌸🌺،
مناظر تفرّح حتى اللي جاع 😍،واد بقناطر، وشلّال ميّاهو تتقاطر 💦،
عشّاقة للنظر…
وحتى الدالية من الدخلة واقفة بحال الحرس من كل الجوانب 🍇،
وقت العنب طاب…سبحان الله! عنقود كحل، و عنقود أبيض 🤍🖤،منظر يفتن ما عندو نظير في جنّان الخير.وقعدو مع بعض بالهنّي 🍃،ومن بعيد كاينة العسّة 👀،وهما يحكيو زوج شتلات صغار 🌱🌱،ما تنبّهلهم حتى واحد من النظّار.،وسمعت شتلة تقول: “عطيني خبزتي!” 🍞والآخرة تردّ : “ما عنديش!”
وهي غير تتصكك وتضحك 😂✨.
والملك ما فهم والو 😕، لأنو ما سمع والو، وجّه سؤالو ليها:
“ ضحكينا معاك؟ .”قالتلوا يامولاي:“لا… ما كاين والو ، غير ضحكت.” 😅
قاللها: ما كانش ضحكة بلا سبّة، وبغى يدير من الحبّة قبّة 🏰🔥.ومنين شافاتو قلق …
حكاتلو عالشتلات واش قالو 🗣️ وقصتها مع الخبزة 🥙 ومرت باباها، وكيفاه حتى تلاقاها .❤
وقالتلو بلي مرت باباها في سجن برا لبلاد ،
وأمر يجيبو خواتاتها👱‍♀️👱‍♀️👱‍♀️ وباباها حذاها وعاشو كامل فالقصر
ومع ليام سمحت لمرت باباها ...

18/08/2026

لحظة إدراك… 🖤

أنا نمشي بالنية، وغيري يمشي بالحيلة.
نعطي من قلبي، نوقف مع الناس في وقت الشدة، ونفرح لفرحتهم وكأنها فرحتي…

لكن مع الوقت فهمت حاجة:
مش كل يد تمدّها، تمدّلك يدها كي تحتاجها.
ومش كل شخص وقفت معاه، يوقف معاك كي يجي دورك.

ما ندمتش على الخير اللي درتو، وما نندمش على مواقفي الصادقة…
لأنني كنت أنا، وماشي لأنهم كانوا يستاهلوا.

اليوم فقط تعلمت نكون طيبة… بحدود.
نعاون… بلا ما ننسى نفسي.
ونعطي… بلا ما ننتظر المقابل.

واللي اختار الحيلة بدل النية، ربي يسهل عليه…
أما أنا، نكمل بطريقتي.
بقلب نظيف، وضمير مرتاح، وبلا ما نردّ الأذى بالأذى. 🤍

#الخذلان

ياسادة يامادة دلني الله وإياكم على الخير والشهادةيحكيو زمان ، في بلاد بعيدة لي يروحلها يشقى ولي ماراحلها يتهنى ، كان عاي...
17/08/2026

ياسادة يامادة دلني الله وإياكم على الخير والشهادة
يحكيو زمان ، في بلاد بعيدة لي يروحلها يشقى ولي ماراحلها يتهنى ، كان عايش فيها وحش يخطف العرايس ، العرس لي يكون يحظر فيه ويتنكر في هيئة انسان عادي وكي يطيح الليل يخطف العروسة ويرفدها بين ساقيه ويطير بيها لبعيد .
وكيما دارو معاه مقدروش يحكموه حتى يأسو منو وتعبو وقررو باه واحد مابقى يتزوج ، وحتى بنات هذيك البلاد ولاو يرفضو الزواج من خوفهم منو .
ولد السلطان كانت عاجباتو بنت عمو وحتى هي كانت تحبو وكي خطبها فرحت ومارفضت .. وكيما دارو معاهم أهلو وأهلها ماقدروش يمنعوهم من الزواج .
مالا خمم الأمير وقرر أنو يتزوج ويدير عرس كبير و يتحدي الوحش خطاف العرايس .
ودارو عرس كبير استدعاو ليه الكبير والصغير ، الغني و الفقير والخيرات من كل خير وحتى الذهب توزع على المعازيم ..
وكيما كان الحال الوحش الشرير متنكر حاضر وسط المدعوين ياكل و يشرب من خيرات عرس الأمير . وكي طاح الليل غدر الجميع ورفد الأميرة بين ساقيه وطار بيها لبعيييد بعيد وخلاهم حايرين مبهوتين.
تقلق ولد السلطان ورفد سيفو الكبير والمال والذهب وأغلى مايملك وركب على حصانو وراح يجري مخلي أمو وراه دمعتها على خدها وهام في بلاد ربي الواسعة بلاد يعمرها وبلاد يخليها حتى وصل لبلاد اسمها بلاد اللبة ، كي شافوه ناسها عرفوه بلي غريب عليهم سقساوه وش تدير هنا ، حكالهم حكايتو مع خطاف العرايس وكيفاه خطفلو مرتو وقالهم بلي خرج وراه باه يرجع عروستو ..
قالولو اذا تدخل للقرية هذي صعيب باه تخرج منها على خاطر باه تخرج لازم تفوت على صخرة هي فالأصل لبّة وكون تقيسها تبلعك ، ونصحوه وقالولو باه تسلك منها على خير لازم كي تقربلها وتشوفك وتعرف بلي راح تبلعك ارضع من صدرها .
وكيما كان الحال راح الأمير لبلاصة الصخرة وكي شافاتو قرب لها بدات تتزعزع حبت تهجم عليه وتبلعو ..
ولكن هو كان أسرع وأخف منها ، رمى روحو عليها ورضع من حليبها .
هدات الصخرة وقاتلو ( ياولد السلطان لوكان مجاش حليبي بين اسنانك تسمع التطقطيق مابين عظامك) .
هيا احكيلي وش جابك عندي .
قالها يا أمي اللّبة أنا لي بيا خطاف العرايس وحكالها حكايتو كاملة معاه.
قاتلو انا نخليك تفوت بصح عندي شرط .
راك كي تخرج من بلادي تدخل على جبل يحرسو غول نحبك تجيبلي من عندو زهرة اسمها زهرة النرجس ..
وخلاتو راح في أمان .
خرج الأمير من هذيك البلاد بسلام وكمل طريقو وكلما يعيا يقعد يرتاح شوي ياكل و يشرب ويزيد يكمل المشي
مشى مشى حتى وصل لجبل خرجلو غول كبير قالو وش تدير هنا في بلادي ؟
قالو انا نحوس على زهرة النرجس لأمي اللّبة ، قالو الغول كي عادت اللّبة هي لي خلاتك تفوت نمدلك الزهرة . وداه و ورالو بلاصتها .
دا الأمير الزهرة ، وقبل مايخرج قالو الغول احكيلي حكايتك ، وحكالو الأمير حكايتو مع خطاف العرايس .
قالو الغول مالا كي تخرج من عندي راك تدخل لبلاد الحجر . هذيك هي بلاد خطاف العرايس جميع من يدخل لها ينفخ عليه الوحش يرجعو حجر . والوحيد لي قعد عايش فيها هو الراعي خلاه باه يرعالو الغنم .
دخل الأمير لبلاد الحجر ولقى الراعي لي حكالو عليه الغول ، الأمير يقرب وهذاك الراعي يشاورلو من بعيد ويقولو روح ،
الأمير يزيد يقرب والراعي يزيد يشاورلو ويقولو روح وارجع منين جيت ..
راح الراعي يجري عند الأمير وقالو وش تدير هنا ؟؟ شوف هاذو الحجر كامل كانو رجال كيما انت نفخ عليهم الوحش رجعهم حجر كيما راك تشوف فيهم ، روح قبل ما يشوفك ويرجعك حجرة كيما هوما .
قالو الأمير انا جيت نحوس على عروستي لي خطفهالي الوحش وحالف ميات يمين مانولي غير وهي معايا..
وكيما دار معاه الراعي باه يخرج ويرجع منين جا مقدرش يقنعو .
مالا عرض عليه الأمير وقالو وش رايك نمدلك المال لي عندي كامل والذهب ونزيدلك الحصان ونتبادلو بالحوايج ، أنا نولي راعي عند الوحش ونحوس وين مخبي لعرايس ندي الأميرة ونحررهم وانت تدي حريتك وتولي غني وتعيش حياتك .
خمم هذاك الراعي بينو بين روحو وقال وش خير لي أنا من حياة الهم لي عايشها حياتي كامل وانا مربوط عند الوحش وعايش وسط الغنم وحتى في كرشي مانيش شبعان ناكل غير من الليل لليل كي نرجع الغنم ..
عجباتو الفكرة وقال للأمير بلي موافق ولكن عندو شرط .
قالو راهي كاينة كلمة سر بيني و بين الوحش واحد مايعرفها من غيري انا واياه لازم نحفظهالك باه كي يسقسيك تعرف تجاوب .
قالو الراعي هاك هاذي العصى مع المغرب اضرب بيها النهر تبان فيه طريق . خلي الغنم و الحيوانات كااامل يفوتو اصبر عليهم و وسع بالك حتى يفوتو ويرجع النهر كيما كان . يجي عندك الوحش يقولك وين كنت ؟قولو كنت في ڨابس
يقولك كاش حشيش ؟ قولو الأخضر واليابس
يقولك جاك الذيب ؟ قولو تعرفو يغيب؟
يقولك علاه معيطتليش ؟ قولو صوتي ماشي بوق
يقولك علاه مشاورتليش ؟ قولو جناحي ماشي علام .
يحط يدو على راسك و يقولك فوت فوت اني غير نلعب عليك . قولو حتى أنا نلعب عليك .
ومبعد يرفدك على جناحو ويديك لوين عايش هو والنساء لي خاطفهم تلقى كوخ صغير هذاك الكوخ هو لي نعيش فيه أنا ونرقد فيه ، تجي عندك وحدة من النساء لي خاطفهم تغسلك رجليك وتجيبلك العشاء.
حفظ الأمير الكلام لي قالهولو الراعي مليح وتبادلو الحوايج ومدلو الذهب وكل ما يملك . وحكم غير زهرة النرجس لي وعد بيها اللّبة .
وهذاك الراعي دا كل واش مدلو الأمير وهرب فوق الحصان .
الأمير قعد يستنى حتى غرب المغرب ضرب النهر بالعصى لي مدهالو الراعي . تشق النهر وفاتت الحيوانات كامل زاد ضرب البحر ورجع كيما كان.
جا عندو الوحش قالو وين كنت ؟ قالو الأمير كنت في ڨابس
قالو كاش حشيش ؟ قالو الاخضر واليابس
قالو جاك الذيب ؟ قالو تعرفو يغيب ؟
قالو علاه معيطتليش ؟ قالو صوتي ماشي بوق
قالو علاه مشاورتليش ؟ قالو جناحي ماشي علام .
جا الوحش وقرب للأمير وحط يدو على راسو كيما قالو الراعي وقالو فوت فوت نلعب عليك. قالو الأمير حتى أنا نلعب عليك وفات السهرة الأولى، والأمير مازال ساكت يترقب، يراقب كل حركة تخرج من الوحش خطاف العرايس. الليل طويل، لكن قلب الأمير عامر بالعزم،
في الغدوة، كي طلع النهار، الوحش خرج باش يصيد، وخلّى الأمير على شكل راعي في كوخ كبير وسط الغابة. الأمير دار روحو مشغول بالغنم، لكن عينيه يدورو، يحسب الخطوات ويفتش وين مخبي الوحش سيفو وأغراضو.

حتى لقى مغارة كبيرة وراء الكوخ، مدخلها مخفي بالأغصان. الأمير دخل يشوف، وها هو يلقى كل النساء المخطوفات، بينهم الأميرة زوجتو! عطاها إشارة تسكت باش ما تفيقش الوحش.

الأمير خرج بسرعة، وراح يحوس على سلاح. وكي رجع الوحش في المساء، الأمير كان حاكم سيف كبير كان مخبيه في الكوخ. الوحش بدا يسقصي الأسئلة المعتادة:

وين كنت؟

ڨابس.

كاش حشيش؟

الأخضر واليابس.

جاك الذيب؟

تعرفو يغيب؟

علاه معيطتليش؟

صوتي ماشي بوق.

علاه مشاورتليش؟

جناحي ماشي علام.

ضحك الوحش وقرب باش يحط يدو على راس الأمير، لكن قبل ما يكمل، الأمير طلع السيف وضرب ضربة قوية وسط صدر الوحش، صيح صيحة رجّت الغابة، وطيح يتخبط حتى مات.

الأمير جرى للمغارة، كسر الأقفال وحرر كل النساء، وكل وحدة فرحت ورجعت لبلادها
الأمير سلّم زهرة النرجس لأمّه اللّبة باش يفي بوعدو، وهي دعتلو بالخير وطريق السلامة.

ومن يومها، عاش هو والأميرة في هناء وسلام، والناس فرحو برجوعهم، وولّى عرسهم رمز للحب والشجاعة، وما عاد حتى واحد يخاف من خطاف العرايس، لأن الأمير خلص البلاد من شرّو للأبد.

وكان يا ما كان، الخير ديما يغلب الشر، والنية الصافية توصل الإنسان للي يبغيه.

17/08/2026

📚✨ طفلكم يستحق أن يتعلّم… ويحبّ ما يتعلّمه!
هل تبحثين عن أستاذة لا تكتفي بتقديم الدرس، بل تجعل طفلك يشارك، يتفاعل، يكتسب الثقة ويحب اللغة الفرنسية؟ ❤️
مع la maîtresse Amina Chaieb، نتعلم الفرنسية بطريقة مختلفة…
🎯 بأسلوب مبسّط
🎲 بالتفاعل والأنشطة
🗣️ بالممارسة والتعبير
🌟 وبالكثير من التشجيع والتحفيز
لأننا نؤمن أن كل طفل قادر على النجاح، عندما يجد الطريقة المناسبة والأستاذة التي تؤمن بقدراته. 🥰
🇫🇷 Avec la maîtresse Amina Chaieb, apprendre le français devient une belle aventure !
📢 التسجيلات مفتوحة لجميع الراغبين في تطوير مستواهم في اللغة الفرنسية.
💛 اختيار الأستاذة ليس مجرد اختيار حصة… بل اختيار طريقة تجعل طفلك يحب التعلّم.
✨ MAITRESSE AMINA CHAIEB
Apprendre autrement… Réussir autrement.







🇩🇿

🌹 ياسادة ياكرام...جبتلكم اليوم خرافة متوارثة، وحبّيت نفكّركم بيها... 😉والي جامي سمعها، يسمعها اليوم. المهم... يقولو كان ...
16/08/2026

🌹 ياسادة ياكرام...

جبتلكم اليوم خرافة متوارثة، وحبّيت نفكّركم بيها... 😉
والي جامي سمعها، يسمعها اليوم.

المهم... يقولو كان راجل صلّى العشاء في دارو، وخرج قاصد ربي باش يروح لدار أنسابو، الي بعاد عليه، باه يلحق مع ضو الفجر. 🌙

وكان عندو حمار 🫏 ــ أكرمكم الله ــ يركب عليه، وعندو كلب 🐕 ديما يتبع فيه كي ضلّو... وين يمشي، يمشي معاه.

وفي الطريق... هزّ الكلب وحطّو فوق ظهر الحمار.

وبعد شوية... قعد يسمع في بهيمو ينهق ويهدر وحدو ويقول:
🫏💬 "والله إلا غُلْبة... والطريق مازالت بعيدة، وزيد ركب فوق ظهري كلب!"

الراجل تخلّع... 😱😳 وقال:
"يا فكيك... تبانلي راني راكب على جن!" 🤣🤣

هبط الراجل بالشوية من فوق ظهر الحمار ــ حاشاكم ــ وهزّ كلبو... وعطاها بجرية 🏃💨، وما شافش وراه.

شقّ الحرث والوديان... 🌾🏞️ حتى طاح من التعب، وما قدرش يتنفّس. 😮‍💨

شاف وراه... ما لقاش الحمار. 😅
حمد ربي... وتنفس الصعداء. 🤲

وهو هكذاك... سمع الكلب 🐕 يهدر هو ثاني وقال:
🐶💬 "واش من خلعة خلعنا بيها الحمار... الله لا تربحو!" 😂🤣

آيا... صاحبنا لعبت عليه دوخة، وتغاشى في بلاصتو. 😂😱

أيا تصبحو على خير
القصة تاع ليوم قصيرة 🩷🩷🩷

Adresse

Aïn Beïda

Site Web

Notifications

Soyez le premier à savoir et laissez-nous vous envoyer un courriel lorsque La classe de la maîtresse amina CHB publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Raccourcis

Partager

Type